18
MAR 2021
THURSDAY
1 GBP =106.75 INR
1 USD =84.94 INR
1 EUR .=88.58 INR
.png)
ചാന്‍സലര്‍ റേച്ചല്‍ റീവ്സിന്റെ തീരുമാനങ്ങള്‍ ബ്രിട്ടന്റെ സമ്പദ് വ്യവസ്ഥയ്ക്ക് തിരിച്ചടിയാകുന്നതായി റിപ്പോര്‍ട്ട്. നാഷണല്‍ ഇന്‍ഷുറന്‍സ് വര്‍ദ്ധന രാജ്യത്തിന്റെ സമ്പദ് വ്യവസ്ഥയെ ഗുരുതരമായി ബാധിക്കുകയാണ്. വളര്‍ച്ചാ നിരക്ക് മൂന്നു മാസം പൂജ്യമായി മാറി. രാജ്യം കടുത്ത സാമ്പത്തിക പ്രതിസന്ധിയിലെന്ന് പറയുമ്പോഴും ലേബര്‍ സര്‍ക്കാര്‍ ന്യായീകരിക്കുന്നത് മുന്‍ സര്‍ക്കാരിന്റെ പിടിപ്പുകേടാണ്. മുന്‍ സര്‍ക്കാരുണ്ടാക്കിയ ബാധ്യതയാണ് രാജ്യത്തിന്റെ പ്രതിസന്ധിക്ക് കാരണമെന്നാണ് വിശദീകരണം.
എന്നാല്‍ ബ്രിട്ടന്റെ വളര്‍ച്ചാ നിരക്ക് പുറത്തുവന്നതോടെ സര്‍ക്കാരും സമ്മര്‍ദ്ദത്തിലാണ്. പ്രവചനങ്ങള്‍ പ്രകാരം യുകെയുടെ വളര്‍ച്ചാ നിരക്ക് ഈ വര്‍ഷത്തെ അവസാന മൂന്നു മാസത്തിലേത് പൂജ്യമാണ്. നേരത്തെ ഇത് 0.3 ശതമാനമായിരുന്നു. ലേബര്‍ അധികാരത്തിലെത്തും മുമ്പ് ബ്രിട്ടന്റെ സമ്പദ് വ്യവസ്ഥ മെച്ചപ്പെടുന്നതായി റിപ്പോര്‍ട്ടുണ്ടായിരുന്നു. എന്നാല്‍ ചാന്‍സലര്‍ റേച്ചല്‍ റീവ്സ് ബജറ്റ് അവതരിപ്പിച്ചതോടെ കാര്യങ്ങള്‍ കൈവിട്ടിരിക്കുകയാണ്. ബാങ്ക് ഓഫ് ഇംഗ്ലണ്ടിന്റെ മുന്നറിയിപ്പ് പ്രകാരം രാജ്യത്തെ സ്ഥിതി മോശമാണ്.
രാജ്യത്തെ സമ്പദ് വ്യവസ്ഥ ഉടനെ മെച്ചപ്പെടാനുള്ള സാധ്യതയുമില്ല. ബജറ്റ് പ്രഖ്യാപനങ്ങള്‍ ബിസിനസ് മേഖലകളെ കാര്യമായി ബാധിച്ചുകഴിഞ്ഞതായിട്ടാണ് റിപ്പോര്‍ട്ട്. ദീര്‍ഘവീക്ഷണത്തോടെ പെരുമാറുകയാണ് സര്‍ക്കാര്‍ എന്നു വിശദീകരിക്കുന്നുണ്ടെങ്കിലും ടാക്സ് ബോംബുമായി ബജറ്റിലെത്തിയ ചാന്‍സലര്‍ ജനത്തിനെ കടുത്ത സമ്മര്‍ദ്ദമാണ് കൊടുക്കുന്നത്. മാത്രമല്ല നിലവിലുണ്ടാകുന്ന പാളിച്ചകളില്‍ നിന്ന് കരകയറാന്‍ രാജ്യത്തിന് മികച്ച പദ്ധതികളും ആവശ്യമാണ്.
ജീവിത ചെലവിനായി ബുദ്ധിമുട്ടുന്നവര്‍ക്ക് മേല്‍ അധിക നികുതി ഭാരം വരുന്നത് തിരിച്ചടി തന്നെയാണ്. ബിസിനസ് സംരഭകരോടുള്ള സര്‍ക്കാര്‍ മനോഭാവവും വിമര്‍ശനത്തിന് ഇടയാക്കിയിട്ടുണ്ട്. ജനങ്ങള്‍ ക്ഷമയോടെ കാത്തിരിക്കണമെന്നും വലിയ നേട്ടങ്ങള്‍ക്കായി കാര്യമായ മുന്നൊരുക്കവും ബുദ്ധിമുട്ടും അനിവാര്യമെന്നാണ് പ്രധാനമന്ത്രി കീര്‍ സ്റ്റാര്‍മര്‍ പറയുന്നത്.
കുട്ടികളെ ദുരുപയോഗം ചെയ്ത് നിരവധി സംഭവങ്ങളില്‍ കാര്യമായ നടപടികള്‍ സ്വീകരിച്ചില്ല എന്ന ആരോപണങ്ങളുടെ പശ്ചാത്തലത്തില്‍ രാജിവച്ച കാന്റര്‍ബറി ആര്‍ച്ച് ബിഷപ്പിന്റെ ക്രിസ്മസ് സംഭാവന കുട്ടികളുടെ ചാരിറ്റി നിരസിച്ചു. ജസ്റ്റിന്‍ വെല്‍ബിയില്‍ നിന്ന് ഒരു സംഭാവന സ്വീകരിക്കുന്നത് 'ഞങ്ങളുടെ പ്രവര്‍ത്തനത്തിന് അടിവരയിടുന്ന തത്വങ്ങള്‍ക്കും മൂല്യങ്ങള്‍ക്കും അനുസൃതമായിരിക്കില്ല' എന്ന് സ്‌നാബില്‍ ചില്‍ഡ്രന്‍സ് സൊസൈറ്റി പറഞ്ഞു.
ജനുവരി ആദ്യം ചര്‍ച്ച് ഓഫ് ഇംഗ്ലണ്ടിന്റെ യഥാര്‍ത്ഥ നേതാവ് എന്ന സ്ഥാനത്തുനിന്ന് ഔദ്യോഗികമായി സ്ഥാനമൊഴിയുന്ന വെല്‍ബി, അദ്ദേഹവും ഭാര്യ കരോലിനും ഒപ്പിട്ട ഒരു ഇലക്ട്രോണിക് ക്രിസ്മസ് കാര്‍ഡ് ഈ ആഴ്ച ആദ്യം അയച്ചു.
കാര്‍ഡിന്റെ പിന്‍ഭാഗത്ത് ചില്‍ഡ്രന്‍സ് സൊസൈറ്റിയുടെ പ്രവര്‍ത്തനത്തെക്കുറിച്ചുള്ള ഒരു ഖണ്ഡിക ഉള്‍പ്പെടുത്തിയിട്ടുണ്ട്, 'ക്രിമിനല്‍, ലൈംഗിക ചൂഷണത്തിന് വിധേയരായ കുട്ടികള്‍ക്കൊപ്പം ചാരിറ്റി പ്രവര്‍ത്തിക്കുന്നു'. എന്നാല്‍ വെള്ളിയാഴ്ച വെല്‍ബിയില്‍ നിന്നുള്ള സംഭാവന സ്വീകരിക്കേണ്ടതില്ലെന്ന് 'ബഹുമാനപൂര്‍വ്വം' തീരുമാനിച്ചതായി ചില്‍ഡ്രന്‍സ് സൊസൈറ്റി അറിയിച്ചു.
ചില്‍ഡ്രന്‍സ് ചാരിറ്റിയുടെ ചീഫ് എക്സിക്യൂട്ടീവായ മാര്‍ക്ക് റസ്സല്‍ പറഞ്ഞു: ''സൂക്ഷ്മമായ പരിഗണനയ്ക്ക് ശേഷം, സ്ഥാനമൊഴിയുന്ന കാന്റര്‍ബറി ആര്‍ച്ച് ബിഷപ്പ് വാഗ്ദാനം ചെയ്യുന്ന സംഭാവന സ്വീകരിക്കേണ്ടതില്ലെന്ന് ഞങ്ങള്‍ ആദരപൂര്‍വം തീരുമാനിച്ചു.
'ചില്‍ഡ്രന്‍സ് സൊസൈറ്റി ദുരുപയോഗത്തെ അതിജീവിക്കുന്നവരെ പിന്തുണയ്ക്കാന്‍ അഗാധമായ പ്രതിജ്ഞാബദ്ധരാണ്, ഞങ്ങളുടെ ടീമുകള്‍ കുട്ടികളെ ലൈംഗികമായി ദുരുപയോഗം ചെയ്യുന്നവരെ പിന്തുണയ്ക്കുന്നു, ഈ സംഭാവന സ്വീകരിക്കുന്നത് ഞങ്ങളുടെ പ്രവര്‍ത്തനത്തിന് അടിവരയിടുന്ന തത്വങ്ങള്‍ക്കും മൂല്യങ്ങള്‍ക്കും യോജിച്ചതല്ല എന്നാണ് ഇതിനര്‍ത്ഥം.'
ആര്‍ച്ച് ബിഷപ്പിന്റെ ലണ്ടന്‍ ആസ്ഥാനത്ത് നിന്നുള്ള ഒരു പ്രസ്താവന ഇങ്ങനെ പറഞ്ഞു: ''ചില്‍ഡ്രന്‍സ് സൊസൈറ്റി എടുത്ത തീരുമാനത്തെ ലാംബെത്ത് പാലസ് മാനിക്കുന്നു. കാന്റര്‍ബറി ആര്‍ച്ച് ബിഷപ്പ് ചില്‍ഡ്രന്‍സ് സൊസൈറ്റിയുടെ തത്ത്വങ്ങളും മൂല്യങ്ങളും പങ്കിടുന്നു, കൂടാതെ ദുരുപയോഗം അതിജീവിച്ചവര്‍ക്കും കുട്ടികള്‍ക്കെതിരായ ലൈംഗികാതിക്രമത്തിന് ഇരയായവര്‍ക്കും പിന്തുണ നല്‍കാന്‍ പ്രതിജ്ഞാബദ്ധനാണ്. ഈ മേഖലയിലെ അശ്രാന്ത പരിശ്രമത്തിന് അദ്ദേഹം ചില്‍ഡ്രന്‍സ് സൊസൈറ്റിയെ അഭിനന്ദിക്കുന്നു.
ആണ്‍കുട്ടികളെയും യുവാക്കളെയും തുടര്‍ച്ചയായി ദുരുപയോഗം ചെയ്യുന്ന ജോണ്‍ സ്മിത്തിന്റെ പ്രവര്‍ത്തനങ്ങളെക്കുറിച്ചും ഫലപ്രദമായ നടപടിയെടുക്കുന്നതില്‍ ചര്‍ച്ച് ഓഫ് ഇംഗ്ലണ്ട് പരാജയപ്പെട്ടതിനെക്കുറിച്ചും ഒരു സ്വതന്ത്ര റിപ്പോര്‍ട്ടിന് ശേഷം 'എല്ലാ ഇരകള്‍ക്കും പീഡനത്തിന് ഇരയായവര്‍ക്കും ദുഃഖത്തില്‍' താന്‍ ആര്‍ച്ച് ബിഷപ്പ് സ്ഥാനം രാജിവെക്കുന്നതായി വെല്‍ബി കഴിഞ്ഞ മാസം പ്രഖ്യാപിച്ചു. .
ദുരുപയോഗം സംബന്ധിച്ച ആരോപണങ്ങള്‍ ആര്‍ച്ച് ബിഷപ്പിന്റെ മുമ്പാകെ 2013-ല്‍ വന്നപ്പോള്‍ വെല്‍ബി ഔപചാരികമായി പോലീസില്‍ റിപ്പോര്‍ട്ട് ചെയ്തിരുന്നെങ്കില്‍ സ്മിത്തിനെ നിയമത്തിനു മുന്നില്‍ കൊണ്ടുവരാമായിരുന്നുവെന്ന് മക്കിന്‍ അവലോകനം നിഗമനം ചെയ്തു.
കരിസ്മാറ്റിക് ബാരിസ്റ്ററായ സ്മിത്ത് തന്റെ ഗാര്‍ഡന്‍ ഷെഡില്‍ ആണ്‍കുട്ടികളെയും യുവാക്കളെയും ക്രൂരമായി മര്‍ദ്ദിച്ചതായി റിപ്പോര്‍ട്ടില്‍ പറയുന്നു. ആരോപണം ഉയര്‍ന്നപ്പോള്‍, സ്മിത്ത് സിംബാബ്വെയിലേക്ക് താമസം മാറി, അവിടെ ആണ്‍കുട്ടികളെയും യുവാക്കളെയും ദുരുപയോഗം ചെയ്യുന്നത് തുടര്‍ന്നു.
Latest News
അപ്രതീക്ഷിതമായി സമ്പന്നരായാല്‍ മതിമറന്ന് പോകുന്നവരാണ് അധികവും. എന്നാല്‍ ഒരു ഭാഗ്യം കടന്നുവന്നിട്ടും ജീവിതശൈലിയില്‍ മാറ്റം വരുത്താതെ ലളിതമായി ജീവിക്കുന്നതിന് നല്ല മനസ്സുറപ്പ് ആവശ്യമാണ്.
ഇംഗ്ലണ്ടിലെ വേക്ക് ഫീല്‍ഡ് സ്വദേശികളായ അമാന്‍ഡയും ഗ്രഹാമും അതിന് ഉദാഹരണമാണ്. കോടികള്‍ ലോട്ടറി അടിച്ചപ്പോള്‍ വാങ്ങിയ വീട്ടില്‍ സൗകര്യങ്ങള്‍ അധികമായത് കാരണം ചെറിയ വീട് അന്വേഷിക്കുകയാണ് അവര്‍.
കാര്‍പെറ്റ് ഫാക്റ്ററിയിലാണ് ഇരുവരും ജോലി ചെയ്തിരുന്നത്. 2013ലാണ് 6.6 മില്ല്യണ്‍ പൗണ്ടിന്റെ ലോട്ടറി അടിച്ചത്. ബാധ്യതകള്‍ തീര്‍ത്ത് പിന്നാലെ ജോലിയും രാജിവെച്ചു. 2014ല്‍ 5 കിടപ്പ് മുറികളുള്ള ഒരു ബംഗ്ലാവും നിര്‍മിച്ചു. ഇരുവരും ലളിതമായ ചടങ്ങില്‍ വിവാഹിതരുമായി. പിന്നീട് ഇരുവരും മാതാപിതാക്കളെ പരിചരിച്ച് ജീവിച്ചു. എന്നാല്‍ ഇത്ര പണം ലഭിച്ചിട്ടും ജീവിതശൈലിയില്‍ വന്‍ മാറ്റങ്ങള്‍ വരുത്താനായി ഇവര്‍ക്ക് തോന്നിയില്ല. ഓസ്‌ട്രേലിയന്‍ യാത്രയും നിസാന്‍ പാത്‌ഫൈന്‍ഡര്‍ സ്വന്തമാക്കിയതുമാണ് ഇവര്‍ ചെയ്ത ചെലവുകള്‍.
ഇവര്‍ക്ക് 18 ചെറുമക്കളുണ്ട്. കുട്ടികളും പണത്തിന്റെ വില മനസ്സിലാക്കി ജീവിക്കണമെന്നത് ഇവര്‍ക്ക് നിര്‍ബന്ധമുണ്ടായിരുന്നു. ഇപ്പോളിതാ ഇത്രയും വലിയ വീട് തങ്ങള്‍ക്ക് ആവശ്യമില്ലായെന്ന് അവര്‍ തിരിച്ചറിഞ്ഞ് ഒരു ചെറിയ വീട്ടിലേക്ക് മാറാനാണ് തീരുമാനിച്ചിരിക്കുന്നത്. ഇവരുടെ ജീവിതം സമൂഹ മാധ്യമങ്ങളില്‍ വൈറലാണ്.
ASSOCIATION
നിമ ഓണം 2024-ന്റെ മഹത്തായ വിജയത്തിന് ശേഷം, നോര്‍ത്തേണ്‍ അയര്‍ലന്‍ഡ് മലയാളി അസോസിയേഷന്‍ സംഘടിപ്പിക്കുന്ന ക്രിസ്മസ്, ന്യൂ ഇയര്‍ ആഘോഷം 2025 ജനുവരി രണ്ടിന് ഗിര്‍ഡ്വുഡ് കമ്മ്യൂണിറ്റി ഹബ്ബില്‍ വൈകുന്നേരം നാലു മണിക്ക് നടക്കും.
മിമിക്രിയിലെ രാജകുമാരനായ മഹേഷ് കുഞ്ഞുമോന്‍, സണ്‍ ടിവിയിലെയും വിജയ് ടിവിയിലെ സൂപ്പര്‍ സിംഗര്‍ പ്രോഗ്രാമിലെയും വിജയിയായ വിഷ്ണു വര്‍ദ്ധന്‍, ദിലീപ് കലാഭവന്‍ എന്നിവര്‍ അണിനിരക്കുന്ന അയര്‍ലണ്ടിലെയും യുകെയിലെയും എക്കാലത്തെയും മികച്ച ഷോകളിലൊന്നാണ് വേദിയിലെത്തുന്നത്.
കൈരളി യുകെ സതാംപ്ടണ്‍ പോര്‍ട്ട്സ്മൗത്ത് യൂണിറ്റിന്റെ നേതൃത്വത്തില്‍ വാട്ടര്‍ലൂ കമ്മ്യൂണിറ്റി സെന്ററില്‍ വെച്ചു നടന്ന പാട്ടുകൂട്ടം വ്യത്യസ്തമായ പരിപാടികള്‍ കൊണ്ടും പങ്കാളിത്തം കൊണ്ടും ശ്രദ്ധേയമായി മാറി. കൈരളിയുടെ യൂണിറ്റ് പ്രസിഡന്റ് ബിനു, സെക്രട്ടറി ജോസഫ്, പരിപാടിയുടെ കോര്‍ഡിനേറ്റര്‍ സുശാന്ത്, പ്രസാദ് തുടങ്ങിയവര്‍ പരിപാടികക്ക് നേതൃത്വം നല്‍കി. മലയാള ചലച്ചിത്ര രംഗത്ത് പാട്ടിന്റെ പാലാഴി തീര്‍ത്ത മഹാരഥന്മാരെ അനുസ്മരിക്കുന്ന രീതിയില്‍ തയ്യാറാക്കിയ സ്റ്റേജില്‍ കൊച്ചു കുട്ടികള്‍ മുതല്‍ മുതിര്‍ന്നവര്‍ വരെ പങ്കെടുത്ത വൈവിധ്യമാര്‍ന്ന പരിപാടികള്‍ കൊണ്ട് വേറിട്ടു നിന്നു.
ശബ്ദ മാധുര്യം കൊണ്ട് സദസ്സിനെ ഇളക്കിമറിച്ച സുശാന്തും, രഞ്ജിത്തും, ജെയ്‌സണും സദസ്സിനെ ആവേശത്തില്‍ ആഴ്ത്തി. വീടുകളില്‍ നിന്നും പാചകം ചെയ്തുകൊണ്ടുവന്ന വൈവിദ്ധ്യമാര്‍ന്ന രുചിക്കൂട്ടുകള്‍ പരിപാടിക്ക് മികവേകി. വീണ്ടും രണ്ട് മാസത്തില്‍ ഒരിക്കല്‍ പാട്ടുകൂട്ടം പരിപാടിക്ക് ഒത്തുചേരാം എന്ന പ്രതീക്ഷയുമായി കൈരളി യുകെ സതാംപ്ടണ്‍ പോര്‍ട്സ്മൗത്ത് യൂണിറ്റിന്റെ നേതൃത്വത്തില്‍ നടന്ന പാട്ടുകൂട്ടം പരിപാടി അവസാനിച്ചു.
ഡെവോണ്‍: ഈ വര്‍ഷത്തെ ക്രിസ്മസ് ആഘോഷങ്ങളുടെ ഭാഗമായി ടോര്‍ബെ ഹോസ്പിറ്റലില്‍ വെച്ച് 'The Jingle Dance' ഫ്ലാഷ് മൊബ് സംഘടിപ്പിക്കുന്നു. ഈ മാസം 23ന് തിങ്കളാഴ്ച ഉച്ചയ്ക്ക് 12 മണിയ്ക്ക് നടക്കുന്ന പ്രോഗ്രാമിലേക്ക് എല്ലാ അംഗങ്ങളെയും ക്ഷണിക്കുന്നു.
ഇത് ടോര്‍ബെ ഹോസ്പിറ്റല്‍ ചരിത്രത്തില്‍ ആദ്യമായിട്ട് നടത്തുവാന്‍ അനുമതി ലഭിച്ചിരിക്കുകയാണ്. ആയതിനാല്‍ സാധിക്കുന്ന എല്ലാവരും ക്രിസ്തുമസ് ജംമ്പര്‍ / റെഡ് കളര്‍ ഡ്രസ് ധരിച്ചു അന്നേദിവസം കുടുംബസമേതം വരണമെന്ന് സംഘാടകര്‍ അഭ്യര്‍ത്ഥിച്ചു.
സ്ഥലത്തിന്റെ വിലാസം
ടോര്‍ബെ ഹോസ്പിറ്റല്‍,
TQ2 7AA
കൂടുതല്‍ വിവരങ്ങള്‍ക്ക് ബന്ധപ്പെടുക
Arunkrishna : 07774968012
ഇപ്‌സ്വിച്ച്: നക്ഷത്രത്തിളക്കത്തോടെ, സമഭാവനയോടെ ഐഎംഎയുടെ ക്രിസ്മസ് പുതുവത്സരാഘോഷമായ 'നക്ഷത്രരാവ് 2024' ഈ മാസം 27 ന് നടക്കുമെന്ന് ഭാരവാഹികള്‍ അറിയിച്ചു. ഇപ്‌സ്വിച്ചിലെ സെന്റ് ആല്‍ബന്‍സ് ഹൈസ്‌കൂളില്‍ വെകുന്നേരം 3 മണി മുതല്‍ വിവിധ കലാപരിപാടികളുടെ മികവോടെയാണ് ഇത്തവണ ഐഎംഎ ഈ വര്‍ഷത്തെ ക്രിസ്മസ് പുതുവത്സരാഘോഷത്തിന് ഒരുങ്ങുന്നത്.
ഈ വര്‍ഷത്തെ ക്രിസ്മസ് പുതുവത്സരാഘോഷങ്ങള്‍ക്ക് മാറ്റുകൂട്ടുവാന്‍ യുകെ ജിംഗള്‍ ബെല്‍സ് മെഗാ ഷോയുമായി മഹേഷ് കുഞ്ഞുമോന്‍, ഗായകരായ വിഷ്ണു വര്‍ദ്ധന്‍, ഷാനവാസ്, ആബിദ് അന്‍വര്‍, ഗ്രേഷ്യ അരുണ്‍, യു കെ, യൂറോപ്യന്‍ മലയാളികള്‍ക്ക് ഏറെ ഏറെ പ്രിയങ്കരനായ കലാകാരന്‍ മജോ ജോസഫ് , കലാഭവന്‍ ദിലീപ് , ഡിജെ ജെഫ്രി എന്നിവര്‍ പങ്കെടുക്കും.
എല്‍ഇഡി വാളിന്റെ മികവോടെയാണ് കലാപരിപാടികള്‍ അരങ്ങേറുന്നത്.
SPIRITUAL
ബിര്‍മിംഗ്ഹാം: ഈശോ മിശിഹായുടെ തിരുപ്പിറവി ആഘോഷങ്ങളുടെ തിരുക്കര്‍മ്മങ്ങള്‍ക്ക് വിപുലമായ ക്രമീകരണങ്ങള്‍ ഒരുക്കി ഗ്രേറ്റ് ബ്രിട്ടന്‍ സീറോ മലബാര്‍ രൂപത. രൂപതയുടെ വിവിധ ഇടവക, മിഷന്‍ അടിസ്ഥാനമായി 150ല്‍ അധികം കേന്ദ്രങ്ങളില്‍ ക്രിസ്മസ് രാത്രിയില്‍ പിറവിത്തിരുനാള്‍ തിരുക്കര്‍മ്മങ്ങളും, ക്രിസ്മസ് ദിനത്തില്‍ വിശുദ്ധ കുര്‍ബാനകളും ക്രമീകരിച്ചിട്ടുള്ളതായി രൂപതാ പി.ആര്‍.ഒ അറിയിച്ചു.
രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ പ്രെസ്റ്റന്‍ സെന്റ് അല്‍ഫോന്‍സാ കത്തീഡ്രലില്‍ നടക്കുന്ന തിരുക്കര്‍മ്മങ്ങള്‍ക്ക് കാര്‍മികത്വം വഹിക്കും. രൂപതയുടെ വിവിധ ഇടവകകളിലും മിഷനുകളിലും നടക്കുന്ന തിരുക്കര്‍മ്മങ്ങളുടെ സമയക്രമം, മിഷന്‍ ഡയറക്ടര്‍മാരുടെ കോണ്‍ടാക്ട് ഡീറ്റെയില്‍സ് തിരുക്കര്‍മ്മങ്ങള്‍ നടക്കുന്ന പള്ളിയുടെ മേല്‍വിലാസം എന്നിവ റീജിയന്‍ തിരിച്ചു തയ്യാറാക്കിയത് താഴെ നല്‍കുന്നു.
ലീഡ്‌സ്: സേവനം യുകെയ്ക്ക് ലീഡ്‌സില്‍ പുതിയ യൂണിറ്റ്. പ്രസിഡന്റായി പ്രജുണ്‍ പിഎസ്, സെക്രട്ടറിയായി അരുണ്‍ ശശി, ട്രഷററായി ശ്രീശക്തി ആര്‍. എന്‍, വനിതാ കോര്‍ഡിനേറ്ററായി ബിന്ദു മനു. യൂറോപ്പിലെ ഏറ്റവും വലിയ ഗുരുദേവ പ്രസ്ഥാനമായ സേവനം യുകെയുടെ പുതിയ ഒരു യൂണിറ്റിനു ലീഡ്‌സില്‍ തുടക്കം കുറിച്ചു.
ലീഡ്‌സിലും പരിസര പ്രദേശങ്ങളിലും താമസിക്കുന്ന സേവനം യുകെയുടെ അംഗങ്ങളുടെ ദീര്‍ഘകാലമായ അഭിലാഷമാണ് ലീഡ്‌സ് യൂണിറ്റ് രൂപീകരിച്ചതിലൂടെ സഫലമായത്.
സേവനം യുകെയുടെ ഉദ്ദേശ ലക്ഷ്യങ്ങളില്‍ അടിയുറച്ചു പ്രവര്‍ത്തിക്കുവാനും, ശിവഗിരി ആശ്രമം യുകെയുടെ പദ്ധതികള്‍ക്ക് പിന്തുണ നല്‍കുവാനും യൂണിറ്റ് തീരുമാനമെടുത്തു. സേവനം യുകെ വനിതാ കണ്‍വീനര്‍ കല ജയന്റെ അദ്ധ്യക്ഷതയില്‍ കൂടിയ യോഗത്തില്‍ സേവനം കണ്‍വീനര്‍ സജീഷ് ദാമോദരന്‍ നിലവിളക്കു കൊളുത്തി ഉദ്ഘാടനം നിര്‍വഹിച്ച യൂണിറ്റിന്റെ പ്രസിഡന്റായി പ്രജുണ്‍ പി എസ്, സെക്രട്ടറിയായി അരുണ്‍ ശശി, ട്രഷററായി ശ്രീശക്തി ആര്‍ എന്‍ വനിതാ കോര്‍ഡിനേറ്ററായി ബിന്ദു മനുവിനെയും തെരഞ്ഞെടുത്തു.
യോഗത്തില്‍ നോര്‍ത്ത് വെസ്റ്റ് യൂണിറ്റ് സെക്രട്ടറി വിപിന്‍ കുമാര്‍, കാര്‍ത്തിക, മനീജ, മുരുകന്‍ സലിം, ശ്രീജിത്ത്, ലിജി, തപസ്സ് അമൃത തുടങ്ങിയവര്‍ ആശംസകള്‍ നേര്‍ന്നു സംസാരിച്ചു. അമ്പിളി സ്വാഗതവും മനു നന്ദിയും രേഖപ്പെടുത്തി.
ബര്‍ലിന്‍: കഴിഞ്ഞ 36 വര്‍ഷമായി ക്രിസ്തീയ ഭക്തിഗാന മേഖലയില്‍ തനതായ വ്യക്തിമുദ്ര പതിപ്പിച്ച കുമ്പിള്‍ ക്രിയേഷന്‍സ് ഇത്തവണയും ക്രിസ്മസ് ആല്‍ബവുമായി രംഗത്ത്. രചനയ്ക്കും സംഗീതത്തിനും എറെ പ്രാധാന്യം നല്‍കിയ ഹൃദ്യമായ 'അതിപൂജിതമാം ക്രിസ്മസ്' എന്ന കാരള്‍ ഗാനം റിലീസ് ചെയ്ത ആദ്യദിനം തന്നെ 15,000 ലധികം പ്രേക്ഷകരാണ് യുട്യൂബില്‍ കണ്ടത്.
അമലോത്ഭവ മാതാവിന്റെ തിരുനാള്‍ ദിനമായ ഡിസംബര്‍ എട്ടിന് കൊളോണ്‍ റ്യോസ്‌റാത്തിലെ നിക്കോളാസ് ദേവാലയ ഹാളില്‍ നടന്ന ചടങ്ങില്‍ സെന്റ് നിക്കോളാസ് ചര്‍ച്ച് വികാരി ഫാ. ജോസ് വടക്കേക്കര സിഎംഐയാണ് കുമ്പിള്‍ ക്രിയേഷന്‍സ് യുട്യൂബ് ചാനലിലൂടെ ആല്‍ബം റിലീസ് ചെയ്തത്.
ജോസ് കുമ്പിളുവേലില്‍ ചടങ്ങില്‍ സ്വാഗതം ആശംസിച്ചു. ഫാ. ജോസ് വടക്കേക്കര സിഎംഐ അധ്യക്ഷത വഹിച്ചു. ജര്‍മനിയിലെ വിവിധ ഇടവകകളില്‍ ജോലി ചെയ്യുന്ന സിഎംഐ സഭാംഗങ്ങളായ റവ. ഡോ. റ്റിജോ താന്നിക്കല്‍, ഫാ. റോയി അഞ്ചാനി, ഫാ. ഷിന്റോ പുന്നയ്ക്കല്‍, വേള്‍ഡ് മലയാളി ഗ്ലോബല്‍ ഭാരവാഹികളായ തോമസ് അറമ്പന്‍കുടി, ഗ്രിഗറി മേടയില്‍, മേഴ്‌സി തടത്തില്‍, യൂറോപ്പ് റീജന്‍ ഭാരവാഹികളായ ജോളി തടത്തില്‍, ജോളി എം. പടയാട്ടില്‍, ജര്‍മന്‍ പ്രൊവിന്‍സ് ഭാരവാഹികളായ ചിന്നു പടയാട്ടില്‍, ബാബു എളമ്പാശേരില്‍, കൊളോണ്‍ കേരള സമാജം പ്രസിഡന്റ് ജോസ് പുതുശേരി, ജോണ്‍ മാത്യു എന്നിവര്‍ ആശംസകള്‍ നേര്‍ന്നു. ഷീന കുമ്പിളുവേലില്‍ നന്ദി പറഞ്ഞു.
യൂറോപ്പിലെ മാധ്യമ പ്രവര്‍ത്തകന്‍ ജോസ് കുമ്പിളുവേലിയുടെ വരികള്‍ക്ക് ഷാന്റി ആന്റണി അങ്കമാലിയുടെ സംഗീതത്തില്‍ ഹിറ്റ് ഗാനങ്ങളുടെ ഉടമകളായ ഫാ. വിപിന്‍ കുരിശുതറ സിഎംഐ, സിസ്റ്റര്‍ സിജിന ജോര്‍ജ് എംഎല്‍എഫ് എന്നിവരാണ് ഗാനം ആലപിച്ചിരിക്കുന്നത്. ബിനു മാതിരംപുഴയാണ് ഓര്‍ക്കസ്‌ട്രേഷന്‍ നിര്‍വഹിച്ചിരിക്കുന്നത്.
കുമ്പിള്‍ ക്രിയേഷന്‍സിന്റെ ബാനറില്‍ ജെന്‍സ്, ജോയല്‍, ഷീന കുമ്പിളുവേലില്‍ എന്നിവരാണ് പ്രൊഡ്യൂസര്‍മാര്‍. ആവശ്യക്കാര്‍ക്ക് പിന്നണി സംഗീതത്തോടുകൂടി ആലപിക്കാന്‍ വരികളടങ്ങിയ കരോക്കെയും യുട്യൂബില്‍ ലഭ്യമാക്കിയിട്ടുണ്ട്.
SPECIAL REPORT
എന്നും വാട്സ്ആപ്പില് സ്ഥിരം ഒരേ മെസേജ് അയച്ച് മടുത്തു തുടങ്ങിയെങ്കില്‍ ഈ ക്രിസ്മസ് ന്യൂ ഇയറിന് ഇനി കളം ഒന്ന് മാറ്റി പിടിക്കാം. ക്രിസ്തുമസിനും ന്യൂഇയറിനും നിങ്ങളുടെ പ്രിയപ്പെട്ടവര്‍ക്കായി ഒരു ആനിമേറ്റഡ് വീഡിയോ അയക്കാന്‍ വാട്‌സ്ആപ്പ് നിങ്ങളെ സഹായിക്കും.
ഉപഭോക്താക്കള്‍ക്ക് സര്‍പ്രൈസ് സമ്മാനവുമായി എത്തിയിരിക്കുകയാണ് വാട്‌സാപ്പിന്റെ പുതിയ ഫീച്ചറുകള്‍. ടെക്സ്റ്റിംഗ്, കോളിംഗ് തുടങ്ങിയവ മെച്ചപ്പെടുത്തുന്നതിന് 2025ന്റെ തുടക്കത്തില്‍ പുതിയ ഫീച്ചറുകള്‍ എത്തിക്കാനാണ് വാട്സ്ആപ്പിന്റെ മാതൃ കമ്പനിയായ മെറ്റയുടെ പ്ലാന്‍.
പുതുവര്‍ഷത്തില്‍ ന്യൂഇയര്‍ തീമോടെ വാട്സ്ആപ്പില് വീഡിയോ കോളുകള്‍ വിളിക്കാനാകുമെന്നതാണ് ഒരു സവിശേഷത. ഫെസ്റ്റിവല്‍ വൈബുകള്‍ സമ്മാനിക്കുന്ന പുതിയ ആനിമേഷനുകളും സ്റ്റിക്കറുകളും വരുന്നതാണ് മറ്റൊരു സര്‍പ്രൈസ്. ആശംസകള്‍ നേരാനുള്ള സ്റ്റിക്കറുകളും ഇമോജികളും ഇതിനൊപ്പം കാണും. ഫെസ്റ്റിവല്‍ സീസണുകളില്‍ എല്ലാം ഇത്തരം ബാക്ക്ഗ്രൗണ്ടുകളും ഫില്‍ട്ടറുകളും ഇഫക്ടുകളും ഉപഭോക്താക്കള്‍ക്ക് ലഭിക്കും.
പുതിയ ആനിമേറ്റഡ് റിയാക്ഷനുകളും ഫെസ്റ്റിവലുകളുമായി ബന്ധപ്പെട്ട് വാട്സ്ആപ്പില് പ്രത്യക്ഷപ്പെടും. പാര്‍ട്ടി ഇമോജികള്‍ ആരെങ്കിലും ഉപയോഗിച്ചാല്‍ അയക്കുന്നയാളുടെയും ലഭിക്കുന്നയാളുടെയും വാട്സ്ആപ്പില് ആ വിശേഷ ദിനവുമായി ബന്ധപ്പെട്ട ആനിമേഷന്‍ പ്രത്യക്ഷപ്പെടുമെന്നതാണ് പ്രത്യേകത. അടുത്തിടെ വാട്സ്ആപ്പില് അണ്ടര്‍വാട്ടര്‍, കരോക്കേ മൈക്രോഫോണ്‍, പപ്പി ഇയേഴ്സ് തുടങ്ങിയ വീഡിയോ കോള്‍ ഇഫക്ടുകള്‍ അവതരിപ്പിച്ചിരുന്നു.
CINEMA
ആരാധകരുടെ ഇഷ്ട ജോഡികളാണ് ബോളിവുഡ് താരങ്ങളായ ഐശ്വര്യ റായിയും അഭിഷേക് ബച്ചനും. ഇരുവരുടെയും വിവാഹമോചന വാര്‍ത്തകള്‍ സമൂഹ മാധ്യമങ്ങളില്‍ വലിയരീതിയില്‍ ഇടം നേടിയെടുത്തിരുന്നു. എന്ത് ചടങ്ങിനും, അവാര്‍ഡ് ഷോയ്ക്കും ഐശ്വര്യയ്ക്കൊപ്പം മകള്‍ ആരാധ്യ മാത്രമാണ് ഉണ്ടാവാറുള്ളത്. ആരാധ്യയുടെ സ്‌കൂളിലെ പരിപാടികള്‍ക്കും അഭിഷേക് ഉണ്ടാവാറില്ല. ഇപ്പോഴിതാ ഇരുവരും മകള്‍ ആരാധ്യയുടെ സ്‌കൂള്‍ വാര്‍ഷിക പരിപാടിക്ക് ഒന്നിച്ചെത്തിയിരിക്കുകയാണ്.
ആരാധ്യയുടെ ധീരുബായി അംബാനി സ്‌കൂളില്‍ നടന്ന വര്‍ഷാന്ത്യ പരിപാടിയിലേക്കാണ് ഐശ്വര്യ റായിയ്ക്കൊപ്പം അഭിഷേക് ബച്ചനും മുത്തശ്ശന്‍ അമിതാഭ് ബച്ചനും എത്തിയിരുന്നത്. ഐശ്വര്യയെ ചേര്‍ത്ത് പിടിച്ച് അഭിഷേക് നടക്കുന്നതും, ഐശ്വര്യയ്ക്കൊപ്പമിരുന്ന്, ആരാധ്യയുടെ സ്റ്റേജ് പെര്‍ഫോമന്‍സ് ഫോണില്‍ പകര്‍ത്തുന്നതുമൊക്കെ പുറത്തുവന്ന വീഡിയോകളിലും ഫോട്ടോകളിലും കാണാം. താരകുടുംബം സ്‌കൂളിലെത്തിയതിന്റെ ഫോട്ടോയും വീഡിയോകളും ഇന്റര്‍നെറ്റില്‍ വൈറലാണ്.
പരിപാടിക്ക് ശേഷം ഐശ്വര്യയും ആരാധ്യയും അഭിഷേകും ഒരുമിച്ച് ഒരു വണ്ടിയില്‍ ഇരുന്നാണ് തിരികെ പോയത്. പൊതുവേദിയില്‍ താര കുടുംബം ഒന്നിച്ചെത്തിയതിന്റെ സന്തോഷത്തിലാണ് ആരാധകര്‍. ഷാരുഖ് ഖാന്‍,സെയ്ഫ് അലിഖാന്‍, കരീന കപൂര്‍ എന്നിവരും മക്കളുടെ പരിപാടിയില്‍ പങ്കെടുക്കാന്‍ എത്തിയിരുന്നു.
മലയാളികള്‍ക്ക് ഇഷ്ടം മുതല്‍ ഇന്നു വരെ ഏറ്റവും പ്രിയപ്പെട്ട നടിയാണ് നവ്യ നായര്‍. സിനിമയില്‍ തിളങ്ങി നിന്നതിന് ശേഷം വിവാഹ ജീവിതത്തിലേക്ക് കടന്ന താരം പക്ഷെ വലിയൊരു ഇടവേളയ്ക്ക് ശേഷം തിരികെ എത്തുകയായിരുന്നു.
സിനിമയിലേക്ക് തിരികെ എത്തിയിട്ടും അതേ രീതിയില്‍ തന്നെ മുന്നോട്ടു പോകുന്ന താരം കൂടിയാണ് നവ്യ. നൃത്തമാണ് തനിക്ക് എല്ലാമെന്ന് നവ്യ പറഞ്ഞിട്ടുണ്ട്. അതിനാല്‍ തന്നെ നവ്യ ഒരു നൃത്ത സ്‌കൂള്‍ തുടങ്ങിയിരുന്നു. ഇപ്പോഴിതാ സിനിമാ നൃത്തം ഒപ്പം പുതിയൊരു ചുവടു വയ്പ്പിലേക്ക് കൂടിയാണ് നവ്യ കടക്കുന്നത്.
കലയ്ക്ക് പുറത്ത് മറ്റൊരു ബിസിനസുമായി എത്തിയിരിക്കുകയാണ് ഇപ്പോള്‍ നവ്യ. ഏര്‍ത്ത് ബൈ നവ്യ എന്നു പറഞ്ഞ ഒരു ഇന്‍സ്റ്റഗ്രാം പേജിലൂടെയാണ് തന്റെ പുതിയ സംരംഭത്തെക്കുറിച്ച് നവ്യ അറിയിക്കുന്നത്
നവ്യ പുതുതായി തുടങ്ങുന്ന ബിസിനസിനെ കുറിച്ചാണ് അറിയിച്ചിരിക്കുന്നത് ഒരു ഓണ്‍ലൈന്‍ സ്റ്റോറാണ് നവ്യ തുടങ്ങുന്നത് വസ്ത്രങ്ങള്‍ക്ക് വേണ്ടിയുള്ള ഓണ്‍ലൈന്‍ സ്റ്റോര്‍ ആണ് ഇത്. ഇതിലൂടെ തങ്ങളുടെ ആദ്യത്തെ കളക്ഷന്‍ ആളുകളിലേക്ക് എത്തിക്കുകയും ചെയ്തിട്ടുണ്ട് നവ്യ സ്‌റ്റൈലിഷ് ലുക്കിലുള്ള ഒരു ഡ്രസ്സ് ആണ് ആദ്യത്തെ കളക്ഷന്‍ ആയി നവ്യ എത്തിച്ചിരിക്കുന്നത് ഇത് വളരെ വേഗം തന്നെ ആളുകള്‍ ഏറ്റെടുക്കുകയും ചെയ്തിട്ടുണ്ട് നിരവധി ആളുകളാണ് ഇപ്പോള്‍ ഈ പുതിയ സംരംഭത്തിന് താരത്തിന് ആശംസകള്‍ അറിയിച്ചുകൊണ്ട് എത്തുന്നത്.
മലയാളികള്‍ക്ക് വിനീത് ശ്രീനിവാസന്‍ അവതരിപ്പിച്ച നടനാണ് അജു വര്‍ഗീസ്. മലര്‍വാടിയിലൂടെ അജു സിനിമയിലേക്ക് എത്തിയ ശേഷം താരത്തിന് തിരിഞ്ഞു നോക്കേണ്ടി വന്നിട്ടില്ല. ഇപ്പോഴിതാ തന്നെ മലയാളത്തിലെ ഒരു പ്രശസ്ത താരത്തിന് ഇഷ്ടമായിരുന്നില്ല എന്നും അത് അദ്ദേഹം തുറന്ന് പറഞ്ഞിരുന്നു എന്നും പറയുകയാണ് അജു.
എന്റെ മുഖം സ്‌ക്രീനില്‍ കാണുമ്പോള്‍ തന്നെ അദ്ദേഹത്തിന് ദേഷ്യമായിരുന്നെന്ന് പറഞ്ഞുവെന്നാണ് താരം വ്യക്തമാക്കുന്നത്. എനിക്ക് നിന്നെ കണ്ണെടുത്താല്‍ കണ്ടുകൂടായിരുന്നു എന്നും അദ്ദേഹം പറഞ്ഞുവെന്നും അജു വര്‍ഗീസ് പറഞ്ഞു.
ഒരു യൂട്യൂബ് ചാനലിന് നല്‍കിയ അഭിമുഖത്തില്‍ അജു പാറഞ്ഞത് ഇങ്ങനെ:
'ജാഫര്‍ ഇടുക്കിയുമായി ഞാന്‍ ആദ്യകാലത്തൊന്നും സിനിമകള്‍ ചെയ്തിട്ടുണ്ടായിരുന്നില്ല. ഒരു സിനിമയില്‍ ഞങ്ങള്‍ ഒരുമിച്ച് അഭിനയിച്ചപ്പോള്‍ പുള്ളി എന്റെയടുത്ത് വന്നിട്ട് 'മോനേ, എനിക്ക് നിന്നെ കണ്ണെടുത്താല്‍ കണ്ടുകൂടായിരുന്നു' എന്ന് മുഖത്തുനോക്കി പറഞ്ഞു.
എന്റെ മുഖം സ്‌ക്രീനില്‍ കാണുമ്പോള്‍ തന്നെ ദേഷ്യമായിരുന്നെന്നും പുള്ളി പറഞ്ഞു. പക്ഷേ വെള്ളിമൂങ്ങ കണ്ടതിന് ശേഷം ആ അഭിപ്രായം മാറിയെന്നും പുള്ളി പറഞ്ഞു. ഞാന്‍ അത് ഒരു കോംപ്ലിമെന്റായിട്ടാണ് എടുത്തത്.
ഒരു വ്യക്തിയുടെ പെരുമാറ്റമോ മാനറിസമോ ഇഷ്ടമല്ലാത്തവര്‍ ഉണ്ടായിരിക്കാം. അത് ചിലപ്പോള്‍ അവര്‍ക്ക് ഇറിട്ടേഷന്‍ ഉണ്ടാക്കുന്നത് കൊണ്ടാകാം. എനിക്കും ഇഷ്ടമല്ലാത്ത ഒരുപാട് ആളുകള്‍ ഇപ്പോഴുമുണ്ട്. എന്നുവെച്ച് അത് ഞാനോ ജാഫറിക്കയോ മനസില്‍ കൊണ്ടുനടക്കാറില്ല. വെള്ളിമൂങ്ങ കണ്ടില്ലായിരുന്നെങ്കില്‍ സാജന്‍ ബേക്കറിയിലേക്ക് ഞാന്‍ വിളിച്ചാല്‍ പുള്ളി വരില്ലായിരുന്നു,' അജു വര്‍ഗീസ് പറയുന്നു.
NAMMUDE NAADU
കോഴിക്കോട്: മലയാളത്തിന്റെ പ്രിയ സാഹിത്യകാരനും എഴുത്തുകാരനും തിരക്കഥാകൃത്തും സംവിധായകനും ആയ എംടി വാസുദേവന്‍ നായര്‍. കോഴിക്കോട് ബേബി മെമ്മോറിയല്‍ ആശുപത്രിയില്‍ അതീവ ഗുരുതരാവസ്ഥയില്‍ കഴിയുകയാണ് അദ്ദേഹം ഇപ്പോള്‍.
എം.ടി.വാസുദേവന്‍ നായര്‍ക്ക് വേണ്ടി പ്രാര്‍ത്ഥനയോടിരിക്കുകയാണ് കേരളം. ഈ മാസം 15നാണ് എം.ടിയെ ശ്വാസകോശ തടസമടക്കം ആരോഗ്യ പ്രശ്നങ്ങളോടെ ആശുപത്രിയില്‍ പ്രവേശിപ്പിച്ചത്. ഇന്നലെ രാവിലെയോടെ ആരോഗ്യ നില കൂടുതല്‍ വഷളായി. തുടര്‍ന്ന് ഹൃദയസ്തംഭനമുണ്ടായി. ഓക്സിജന്‍ മാസ്‌കിന്റെയും മറ്റും സഹായത്തോടെ ഐ.സി.യുവിലാണ് ഇപ്പോള്‍ അദ്ദേഹം ഉള്ളത്.
വിവരമറിഞ്ഞ് ആശുപത്രിയിലെത്തിയ മന്ത്രി മുഹമ്മദ് റിയാസ് ആശുപത്രി പുറത്തിറക്കിയ മെഡിക്കല്‍ ബുള്ളറ്റിനില്‍ സൂചിപ്പിച്ച കാര്യങ്ങള്‍ മാദ്ധ്യമങ്ങള്‍ക്ക് മുമ്പാകെ വിവരിച്ചു. സര്‍ക്കാരും സംവിധാനങ്ങളുമെല്ലാം എം.ടിയുടെ ജീവന്‍ രക്ഷിക്കാന്‍ ഒപ്പമുണ്ടെന്നും സാദ്ധ്യമായ സംവിധാനങ്ങളെല്ലാം ഉപയോഗിക്കുന്നുണ്ടെന്നും മന്ത്രി പറഞ്ഞു.
ആരോഗ്യനില മാറ്റമില്ലാതെ തുടരുകയാണെന്നാണ് ഏറ്റവും ഒടുവില്‍ ഇറക്കിയ മെഡിക്കല്‍ ബുള്ളറ്റിനില്‍ പറയുന്നത്. അതേസമയം,? ഹൃദയ മിടിപ്പും രക്തസമ്മര്‍ദ്ദവും നിയന്ത്രണ വിധേയമാണെന്നും ആശുപത്രി അധികൃതര്‍ അറിയിച്ചിട്ടുണ്ട്. വിദഗ്ദ്ധ ഡോക്ടര്‍മാരുടെ പ്രത്യേക സംഘം നിരീക്ഷിച്ചു കൊണ്ടിരിക്കുകയാണ്.
മന്ത്രി എ.കെ.ശശീന്ദ്രന്‍, സി.പി.എം പൊളിറ്റ് ബ്യൂറോ അംഗം എം.എ.ബേബി, ഗോവ ഗവര്‍ണര്‍ പി.എസ്. ശ്രീധരന്‍പിള്ള തുടങ്ങിയവര്‍ ആശുപത്രിയിലെത്തി ഡോക്ടര്‍മാരുമായും ബന്ധുക്കളുമായും സംസാരിച്ചു. കുടുംബാംഗങ്ങളെല്ലാം ആശുപത്രിയിലുണ്ട്.
രാജസ്ഥാന്‍: ജയ്പൂര്‍-അജ്മീര്‍ ഹൈവേയിലുണ്ടായ ടാങ്കര്‍ അപകടത്തില്‍ മരണം 14 ആയി. അപകടത്തില്‍ പരുക്കേറ്റ 32 പേര്‍ ഗുരുതര വിഭാഗത്തില്‍ ചികിത്സയില്‍ കഴിയുകയാണ്. മരിച്ചവരുടെ കുടുംബങ്ങള്‍ക്ക് സര്‍ക്കാര്‍ 5 ലക്ഷം രൂപ ധനസഹായം പ്രഖ്യാപിച്ചിട്ടുണ്ട്. പരുക്കേറ്റവര്‍ക്ക് 50,000 രൂപയും നല്‍കും.
വെള്ളിയാഴ്ച രാവിലെ, ജയ്പൂര്‍-അജ്മീര്‍ റൂട്ടില്‍ എല്‍പിജി കയറ്റിയ ടാങ്കറുമായി രാസവസ്തുക്കള്‍ നിറച്ച ട്രക്ക് കൂട്ടിയിടിച്ചതിനെ തുടര്‍ന്നാണ് തീപിടുത്തമുണ്ടായത്. ഒന്നിന് പിറകെ ഒന്നായി നിരവധി വാഹനങ്ങള്‍ കൂട്ടിയിടിച്ചതും അപകടത്തിന്റെ ആഴം കൂട്ടിയിട്ടുണ്ട്. 14 പേര്‍ മരിച്ചതായും നിരവധി പേര്‍ക്ക് പരുക്കേറ്റതായും 60 ശതമാനത്തിലധികം പേര്‍ക്ക് പൊള്ളലേറ്റതായും എസ്എംഎസ് ആശുപത്രി സൂപ്രണ്ട് ഡോ. സുശീല്‍ കുമാര്‍ ഭാട്ടി സ്ഥിരീകരിച്ചു.
സംഭവത്തെത്തുടര്‍ന്ന് രാജസ്ഥാന്‍ മുഖ്യമന്ത്രി ഭജന്‍ ലാല്‍ ശര്‍മ്മ ഭാന്‍ക്രോട്ട തീപിടുത്തമുണ്ടായ സ്ഥലം സന്ദര്‍ശിക്കുകയും പരുക്കേറ്റവര്‍ക്ക് ചികിത്സ നല്‍കുന്നതിന് ആവശ്യമായ ക്രമീകരണങ്ങള്‍ ഒരുക്കി ഒരു ഹെല്‍പ്പ് ലൈന്‍ സ്ഥാപിക്കുമെന്ന് പ്രഖ്യാപിക്കുകയും ചെയ്തു. ഏകദേശം രണ്ട് ഡസനോളം വാഹനങ്ങള്‍ക്ക് തീപിടിച്ചു, നിരവധി ട്രക്കുകളും ട്രോളികളും കത്തിനശിച്ചു. ഭാന്‍ക്രോട്ടയിലെ പെട്രോള്‍ പമ്പിന് സമീപമാണ് അപകടമുണ്ടായത്.
14 പേര്‍ മരിച്ചതായും നിരവധി പേര്‍ക്ക് പരുക്കേറ്റതായും 60 ശതമാനത്തിലധികം പേര്‍ക്ക് പൊള്ളലേറ്റതായും എസ്എംഎസ് ആശുപത്രി സൂപ്രണ്ട് ഡോ. സുശീല്‍ കുമാര്‍ ഭാട്ടി സ്ഥിരീകരിച്ചു.
Channels
സമൂഹ മാധ്യമങ്ങളിലൂടെ ഒരുപാട് വിമര്‍ശനങ്ങള്‍ കേള്‍ക്കേണ്ടി വന്ന ഗായികയാണ് അമൃത സുരേഷ്. സ്റ്റാര്‍ സിംഗര്‍ എന്ന ചാനല്‍ റിയാറ്റി ഷോയിലൂടെ എത്തിയ താരത്തിന്റെ വളര്‍ച്ച വളരെ പെട്ടന്നായിരുന്നു. ഒരുസമയത്ത് വിവാഹജീവിതത്തില്‍ നേരിടേണ്ടി വന്ന ദുരനുഭവങ്ങളെക്കുറിച്ചെല്ലാം പറയുകയും അമൃതയ്ക്കും കുടുംബത്തിനും നേര്‍ക്ക് കടുത്ത സൈബര്‍ അറ്റാക്ക് നേരിടുകയും ചെയ്തിരുന്നു. എന്നാല്‍ ഇപ്പോള്‍ തന്റേതായ ലോകത്ത് ഹാപ്പിയായി ജീവിക്കുകയാണ് താരം. വിശേഷങ്ങളെല്ലാം ആരാധകരുമായി പങ്കുവെയ്ക്കാറുള്ള താരത്തിന്റെ പുതിയ ഇന്‍സ്റ്റാഗ്രാം പോസ്റ്റാണ് ഏറെ ശ്രദ്ധ നേടുന്നത്.
'ചിരിക്കുക, അതാണ് വേദനകള്‍ അകറ്റാന്‍ നിങ്ങള്‍ക്കും മറ്റുള്ളവര്‍ക്കുമുള്ള ഏറ്റവും എളുപ്പവും, അതേ സമയം പവര്‍ഫുളും ആയിട്ടുള്ള മരുന്ന്. ഏതൊരു കൊടുങ്കാറ്റിനി് മുന്നിലും ചിരിച്ചുകൊണ്ട് നില്‍ക്കു, കാരണം കൂടുതള്‍ തിളക്കമുള്ള ദിവസങ്ങള്‍ മുന്നിലുണ്ട്' എന്നാണ് പുതിയ പോസ്റ്റിലൂടെ അമൃത പറയുന്നത്. ചിരിച്ചുകൊണ്ടേയിരിക്കുക, എല്ലാം ശരിയാവും, പോസിറ്റീവിറ്റി എന്നിങ്ങനെയാണ് ഫോട്ടോയ്ക്ക് ഹാഷ് ടാഗായി നല്‍കിയിരിക്കുന്നത്. അമൃതയുടെ മനോഹരമായ ഒരു ചിത്രവും ഇതിനൊപ്പം ചേര്‍ത്തിട്ടുണ്ട്.
അസിസ്റ്റന്റ് ഡയരക്ടറും, അമൃതയുടെ ഉറ്റ സുഹൃത്തുമായ കുക്കുവാണ് ചിത്രങ്ങള്‍ പകര്‍ത്തിയിരിക്കുന്നത്. സ്നേഹം അറിയിച്ച് നിരവധി കമന്റുകളും ലൈക്കുകളുമാണ് പോസ്റ്റിന് താഴെ ആരാധകര്‍ അറിയിച്ചിരിക്കുന്നത്. മ്യൂസിക് ഷോകളും , സ്റ്റേജ് പരിപാടികളുമൊക്കെയായി അമൃത തിരക്കിലാണ് താരം.
ഉപ്പും മുളകും എന്ന ജനപ്രീയ പരമ്പരയിലൂടെയാണ് നിഷ സാരംഗ് താരമായി മാറുന്നത്. നിരവധി സിനിമകളിലും അഭിനയിച്ചിട്ടുണ്ടെങ്കിലും ഉപ്പും മുളകുമാണ് കരിയര്‍ മാറ്റി മറിക്കുന്നത്. നിഷ എന്ന സ്വന്തം പേരിനേക്കാള്‍ ഇന്ന് അറിയപ്പെടുന്നത് നീലുവമ്മ എന്ന പേരിലാകും. തന്റെ ജീവിതത്തില്‍ നേരിട്ട പ്രതിസന്ധിയെക്കുറിച്ച് മുമ്പ് നടി തന്നെ പറഞ്ഞിട്ടുണ്ട്. ആദ്യ വിവാഹവും ആ ജീവിതം പരാജയപ്പെട്ടതിനുള്ള കാരണവും വരെ അവര്‍ തുറന്ന് പറഞ്ഞിരുന്നു. എന്നാല്‍ അടുത്തിടെ തനിക്ക് വീണ്ടുമൊരു വിവാഹം കഴിക്കാന്‍ താത്പര്യമുണ്ടെന്ന് നിഷ പറഞ്ഞിരുന്നു.
ഇപ്പോഴിതാ നിഷ പ്രണയത്തെ കുറിച്ച് പറഞ്ഞ കാര്യങ്ങളാണ് വീണ്ടും വൈറലാകുന്നത്. പ്രണയം വളരെ രസകരമാണെന്നാണ് താരം വ്യക്തമാക്കുന്നത്. ചെറുപ്പക്കാരുടെയും മുതിര്‍ന്നവരുടെയും പ്രണയം തമ്മില്‍ വ്യത്യാസമുണ്ടെന്നും നിഷ പറയുന്നു.
'ചെറുപ്പക്കാരൊക്കെ മരത്തിന്റേം പോസ്റ്റിന്റേം വണ്ടീടേമൊക്കെ സൈഡില്‍ നിന്ന് പ്രണയിക്കുന്നത് കാണാം. എന്നാല്‍ പ്രായമായവരുടെ പ്രണയം അങ്ങനെയല്ല, അവര്‍ പ്രണയിക്കുകയാണെന്ന് മനസിലാകുകയേ ഇല്ല, എന്നാല്‍ ഒടുക്കത്തെ പ്രണയവും ആയിരിക്കും. മരിക്കുന്നിടം വരെ പ്രണയം വേണം. എന്നാലേ ജീവനുണ്ടാകൂ, ചലിക്കാത്ത വസ്തുവിന് ഒരിക്കലും പ്രണയമുണ്ടാകില്ല. നമ്മുക്ക് ജീവനുണ്ടെന്ന് തോന്നണമെങ്കില്‍ നമ്മുക്ക് പ്രണയമുണ്ടാകണം.
അപ്പോള്‍ നിങ്ങള്‍ ആലോചിക്കുന്നുണ്ടാകും എനിക്ക് പ്രണയമുണ്ടെന്ന്. ഉണ്ടാവുമായിരിക്കാം. കാരണം എനിക്ക് എല്ലാവരോടും പ്രണയമാണ്. പാറുക്കുട്ടിയോട് എനിക് പ്രണയമാണ്. അളക്കാന്‍ പറ്റാത്ത സ്നേഹം ആണ് പ്രണയം. പാറുക്കുട്ടിയൊക്കെ എന്റെ അടുത്തേക്ക് വരുമ്പോള്‍ എനിക്ക് ഊര്‍ജമാണ്. ഉള്ളില്‍ എല്ലാരോടും സ്നേഹം ഉണ്ടാകണം. പണമൊക്ക സാമ്പാദിക്കണമെന്നൊക്കെ തോന്നുന്നത് ആഗ്രഹവും സ്വപ്നവുമൊക്കെയാണ്. അതിനൊക്കെ ജീവനുണ്ടാകണം. രാവിലെ എഴുന്നേല്‍ക്കുമ്പോള്‍ ഞാന്‍ ചിരിക്കും.കാരണം രാത്രി ഉറങ്ങുന്നതിന് മുന്‍പ് എനിക്ക് കിട്ടിയ എല്ലാത്തിനും ഭഗവാനോട് നന്ദി പറഞ്ഞ് കിടന്ന് എണീക്കുമ്പോള്‍ എനിക്ക് ജീവനുണ്ടല്ലോ. ഇതിനപ്പുറം ഭാഗ്യവും സന്തോഷവുമൊന്നും നമ്മുടെ ജീവിതത്തില്‍ ഇല്ല. ഇതെല്ലാം തിരച്ചറിഞ്ഞാല്‍ പിന്നെ ഈ ലോകത്ത് പ്രണയവും സമ്പത്തും ഒന്നുമല്ല, ഏറ്റവും വലുത് നമ്മള്‍ ജീവിച്ചിരിക്കുകയെന്നതാണ്', താരം പറഞ്ഞു.'
സോഷ്യല്‍ മീഡിയയില്‍ കുറച്ച് ദിവസങ്ങളായി കേള്‍ക്കുന്ന മൂന്ന് പേരുകളാണ് വരദ, ജിഷിന്‍, അമേയ. വരദയുമായി പിരിഞ്ഞ ജിഷിന്‍ അമേയയുമായി പ്രണയത്തില്‍ ആയെന്ന തരത്തിലാണ് വാര്‍ത്തകള്‍ വന്നത്. എന്നാല്‍ ഞങ്ങളുടേത് പ്രണയമാണെന്ന് ഞാന്‍ ഒരിക്കലും പറയില്ലെന്നും വിവാഹം കഴിക്കാനും തീരുമാനിച്ചിട്ടില്ലെന്നും ഇതൊക്കെ സോഷ്യല്‍മീഡിയ ഉണ്ടാക്കിയതാണെന്നുമാണ് ജിഷിനും അമേയയും പറഞ്ഞത്.
പക്ഷെ സൗഹൃദത്തിനും മുകളില്‍ ഒരു അടുപ്പവും ഇഷ്ടവും ഞങ്ങള്‍ക്കിടയിലുണ്ട് എന്ന് രണ്ടു പേരും പറയുന്നു. പക്ഷെ വിവാഹം, ദാമ്പത്യം എന്നതിലേക്ക് എത്തിയിട്ടില്ല. ഞങ്ങള്‍ ടീനേജിലല്ല. എനിക്കും അദ്ദേഹത്തിനും ജീവിതത്തില്‍ ഡ്രോ ബാക്‌സ് ഉണ്ടായിട്ടുണ്ട് എന്നാണ് പറഞ്ഞത്.
ഇപ്പോഴിതാ ജിഷിന്‍ സോഷ്യല്‍മീഡിയയില്‍ പങ്കിട്ട ഏറ്റവും പുതിയ ഫോട്ടോകളാണ് വൈറലാകുന്നത്. അമേയയ്‌ക്കൊപ്പമുള്ള കുറച്ച് മിറര്‍ സെല്‍ഫികളാണ് ജിഷിന്‍ മോഹന്‍ പങ്കുവെച്ചത്. ചുംബിക്കും മുമ്പ് നീ എന്നെ നോക്കുന്ന രീതി ഞാന്‍ ഇഷ്ടപ്പെടുന്നു എന്നാണ് ഫോട്ടോകള്‍ക്ക് ജിഷിന്‍ നല്‍കിയ ക്യാപ്ഷന്‍. കൂടാതെ റൊമാന്റിക്ക് കപ്പിള്‍സ്, ലവ് സ്റ്റോറി, കിസ് മി, റൊമാന്റിക്, ലവ് യു, ടുഗെതര്‍ ഫോര്‍ എവര്‍ തുടങ്ങിയ ഹാഷ്ടാഗുകളും നല്‍കിയിട്ടുണ്ട്.
ബോളിവുഡിലെ ഹിറ്റ് ഗാനങ്ങളില്‍ ഒന്നായ മേ അഗര്‍ കഹൂം എന്ന പാട്ട് ബാഗ്രൗണ്ട് മ്യൂസിക്കായും നല്‍കിയിട്ടുണ്ട്. ജിഷിന്റെ മാറോട് ചേര്‍ന്നും തോളില്‍ തല ചായ്ച്ചും ചുംബനം നല്‍കികൊണ്ടും നില്‍ക്കുന്ന അമേയയെയാണ് ഫോട്ടോകളില്‍ കാണാന്‍ കഴിയുക. വൈറല്‍ കപ്പിള്‍ ആയതുകൊണ്ട് തന്നെ പുതിയ പോസ്റ്റും അതിവേഗത്തില്‍ ശ്രദ്ധിക്കപ്പെട്ടു.
ബിഗ്‌ബോസ് കഴിഞ്ഞ സീസണില്‍ കേട്ട പ്രധാന പേരുകളില്‍ രണ്ട് പേരായിരുന്നു ഗബ്രിയും ജാസ്മിനും. രണ്ടു പേരും നിരവധി വിമന്‍ശനങ്ങള്‍ നേരിട്ടെങ്കിലും ഷോയ്ക്ക് ശേഷം പുറത്ത് വന്നതോടെ ഇരുവരും നല്ല സുഹൃത്തുക്കളായി മാറി.
ഇപ്പോള്‍ ജാസ്മിന്‍ സോഷ്യല്‍ മീഡിയയില്‍ പങ്കുവെച്ച ഒരു വീഡിയോയും അതിന് നല്‍കിയ ക്യാപ്ഷനുമാണ് ആരാധകര്‍ക്കിടയിലെ ചര്‍ച്ച. ഗബ്രിക്ക് ഒപ്പമുള്ള മനോഹരമായ നിമിഷങ്ങള്‍ കോര്‍ത്തിണക്കിയ വീഡിയോ ആണ് ജാസ്മിന്‍ പങ്കുവെച്ചത്.
'ഈ വര്‍ഷത്തെ എല്ലാ സങ്കടങ്ങള്‍ക്കിടയിലും നീ എനിക്ക് തലചായ്ക്കാന്‍ ഒരിടം തന്നു, ഈ വര്‍ഷം എനിക്ക് സംഭവിച്ച ഏറ്റവും നല്ല കാര്യം നീയാണ്, യു ഇഡിയറ്റ് ' എന്നാണ് ജാസ്മിന്‍ വീഡിയോയ്‌ക്കൊപ്പം പങ്കുവെച്ച ക്യാപ്ഷന്‍. നിരവധിപേരാണ് ഈ വീഡിയോയ്ക്ക് കമന്റുമായി എത്തുന്നത്.
എന്നും ഇതുപോലെ ഒരുമിച്ച് ഉണ്ടാകാന്‍ ഈശ്വരന്‍ അനുഗ്രഹിക്കട്ടെ. രണ്ടു പേരും നന്നായി പ്രാര്‍ത്ഥിക്കൂ നിങ്ങള്‍ ആഗ്രഹിക്കുന്നത് എന്താണോ അതു സാധിക്കട്ടെ, എന്റെ മക്കളെ നിങ്ങള്‍ തമ്മില്‍ എന്ത് ചേര്‍ച്ചയാണ് നിങ്ങള്‍ക്ക് ഒന്നായി കൂടെ നിങ്ങള്‍ക്ക് പരസ്പരം ഇഷ്ടമുണ്ടെന്നറിയാം, പക്ഷേ എന്തോ കാരണങ്ങളാല്‍ നിങ്ങളുടെ ഇഷ്ടം നിങ്ങള്‍ മറച്ചുവയ്ക്കുന്നു. ആരെയാണ് നിങ്ങള്‍ പേടിക്കുന്നത് മതപരവും വീട്ടുകാരുടെ എതിര്‍പ്പും ആണോ അതാണെങ്കില്‍ അതൊക്കെ വെറും താല്‍ക്കാലികം മാത്രമാണ് തീരുമാനമെടുക്കേണ്ടത് നിങ്ങള്‍ മാത്രമാണ് അതെല്ലാം മറച്ച് വേറെ എന്തുകാരണം കൊണ്ടാണെങ്കില്‍ ഒക്കെ അത് നിങ്ങളുടെ ഇഷ്ടം എന്നിങ്ങനെ പോകുന്നു വീഡിയോയ്ക്ക് വരുന്ന കമന്റുകള്‍.
സ്റ്റാര്‍ മാജിക്കിലൂടെ പ്രേക്ഷകര്‍ക്ക് ഏറെ പ്രിയപ്പെട്ടതായി മാറിയ താരമാണ് ലക്ഷ്മി നക്ഷത്ര. ഏഴ് വര്‍ഷത്തോളം കടന്ന സ്റ്റാര്‍ മാജിക്ക് അവസാനിപ്പിക്കാന്‍ പോകുന്നു എന്ന വാര്‍ത്തകള്‍ കഴിഞ്ഞ ദിവസമാണ് പുറത്ത് വരുന്നത്.
ലക്ഷ്മി നക്ഷത്രയെ കുറിച്ച് നിരവധി വിമര്‍ശനങ്ങള്‍ ആണ് പുറത്ത് വന്നത്. കൊല്ലം സുധിയുടെ മരണത്തോടെ ആ കുടുംബത്തെ വിറ്റാണ് ലക്ഷ്മി ജീവിക്കുന്നത് എന്നാണ് വിമര്‍ശനങ്ങളില്‍ കൂടുതലും ആയി കേള്‍ക്കുന്നത്. ഇപ്പോഴിതാ ആ വിമര്‍ശനങ്ങള്‍ക്ക് മറുപടിയും സ്റ്റാര്‍ മാജിക്ക് നിറുത്തുന്നതിനെ കുറിച്ചും പറയുകയാണ് ലക്ഷ്മി നക്ഷത്ര.
''നമ്മള്‍ എന്ത് നല്ലത് ചെയ്താലും അതിനെ മോശമായി പറയുന്ന ഒരുപാട് ആളുകള്‍ ഉണ്ടാകും. ഞാന്‍ അത്തരക്കാരെ നോക്കുന്നില്ല. എനിക്ക് അദ്ദേഹത്തിന്റെ വീട്ടുകാരെയും അദ്ദേഹത്തെയും എന്റെ വീട്ടുകാരെയും എന്റെ മനഃസാക്ഷിയെയെയും മാത്രം ഓര്‍ത്താല്‍ മതി. ഈ പറയുന്ന ആളുകളോ, എതിര് നിന്നിട്ടുള്ള ആളുകളോ, അല്ലെങ്കില്‍ മോശം പറഞ്ഞവരോ അവര്‍ എന്ത് ചെയ്‌തെന്നു മാത്രം ആലോചിക്കുക.
എനിക്ക് അങ്ങനെ ചെയ്തതില്‍ ഒരുപാട് ആത്മസംതൃപ്തിയുണ്ട്. എത്രയോ ആളുകള്‍ എന്നെ കണ്ടിട്ട് സന്തോഷം പങ്കുവച്ചിട്ടുണ്ട്. ഈ പെര്‍ഫ്യൂമിന്റെ കാര്യം തന്നെ പറയാം. ഒരിക്കല്‍ ഒരു ചേച്ചി അവരുടെ അച്ഛനെ കുറിച്ചുള്ള ഓര്‍മകള്‍ എന്നോട് പറഞ്ഞു. ഒരു തോര്‍ത്ത് മാത്രം ആണ് അച്ഛന്റേതായി ആ ചേച്ചിയുടെ കയ്യില്‍ ഉള്ളത്. ആ തോര്‍ത്തുമായി അവര്‍ യൂസഫ് ഭായിയുടെ അടുത്തേക്ക് പോകുകയാണെന്നു പറഞ്ഞു.
രേണു ആണ് യൂസഫ് ഭായി എന്നൊരാളെക്കുറിച്ച് എന്നോടു പറയുന്നത്. രേണു പറഞ്ഞിട്ടാണ് ഞാന്‍ പോകുന്നതും. അവര്‍ ഹാപ്പിയാണ് ഞാനും ഹാപ്പി. എന്റെ വീട്ടുകാര്‍ക്കും എന്നെ അറിയാം, അവരുടെ കുടുംബത്തിനും അറിയാം, അത്ര മാത്രം മതി. പിന്നെ സഹപ്രവര്‍ത്തകരുടെ പ്രതികരണം, ഞാന്‍ അവരെപ്പോലെ അല്ല. പ്രതികരിക്കാന്‍ ഞാന്‍ ആഗ്രഹിക്കുന്നില്ല. അതെന്റെയൊരു ഗ്രാറ്റിറ്റിയൂഡ്.
ഏഴുവര്‍ഷമായി ആ പരിപാടി തുടങ്ങിയിട്ട്. നിങ്ങളൊക്കെ തന്നെ പറയുന്നുണ്ട്, ഞങ്ങള്‍ക്കു മാറ്റം വേണം എന്നൊക്കെ. ഒരു മാറ്റം പ്രേക്ഷകരും ആഗ്രഹിക്കുന്നുണ്ടാകും. ഒരു താത്ക്കാലിക ബ്രേക്ക് മാത്രമേ ഉള്ളൂ. അതു കഴിഞ്ഞാല്‍ ഉറപ്പായും നിങ്ങള്‍ക്ക് സന്തോഷിക്കാന്‍ വകുപ്പ് ഉണ്ടാകും. ഇവന്റ് പരിപാടികളൊക്കെയായി ഞങ്ങളെല്ലാം സജീവമായി രംഗത്തുണ്ട്.
വീട്ടിലെ ഒരംഗമായാണ് ആളുകള്‍ എന്നെ കാണുന്നത്. ആ സ്‌നേഹവും പരിഗണനയുമൊക്കെ ഉറപ്പായും ഈ പരിപാടിയിലൂടെ സംഭവിച്ചത്. അതിനുള്ള നന്ദിയും സ്‌നേഹവും ഉറപ്പായും ആരാധകരോട് ഉണ്ട്. പിന്നെ മിണ്ടി കഴിഞ്ഞാല്‍ എന്നെ എയറില്‍ ആക്കുന്ന ചില ആളുകള്‍ ഉണ്ട്. ഇപ്പോള്‍ അതും ട്രെന്‍ഡ് ആണ്. അതുകൊണ്ട് ഞാന്‍ അതും ആസ്വദിക്കുന്നു.''-ലക്ഷ്മി നക്ഷത്രയുടെ വാക്കുകള്‍.
BUSINESS
ഇന്ത്യന്‍ വിപണിയില്‍ നിന്ന് സ്റ്റാര്ബക്സ് വിട്ടു പോകുന്നതായി കഴിഞ്ഞ ദിവസമാണ് ചില മാധ്യമങ്ങള്‍ റിപ്പോര്‍ട്ട് ചെയ്തത്. ഇത് പിന്നീട് സമൂഹമാധ്യമങ്ങള്‍ ഏറ്റെടുക്കുകയും ചെയ്തിരുന്നു.
ഇപ്പോഴിതാ ഇതു സംബന്ധിച്ച് ടാറ്റ കണ്‍സ്യൂമര്‍ പ്രോഡക്ട്സ് പ്രസ്താവന ഇറക്കിയിരിക്കുകയാണ് ഇപ്പോള്‍. റിപ്പോര്‍ട്ടുകള്‍ 'അടിസ്ഥാനരഹിതം' എന്നാണ് ടാറ്റ വിശേഷിപ്പിച്ചിരിക്കുന്നത്.
'ഉയര്‍ന്ന പ്രവര്‍ത്തനച്ചെലവും' 'കുറഞ്ഞ ലാഭവും' കാരണം സ്റ്റാര്ബക്സ് കോഫി ചെയിന്‍ ഇന്ത്യയില്‍ പ്രവര്‍ത്തനം നിര്‍ത്തിയേക്കുമെന്ന് ഒരു മാധ്യമം റിപ്പോര്‍ട്ട് ചെയ്തിരുന്നു. ഇതിന് പിന്നാലെയാണ് ചര്‍ച്ച ചൂടുപിടിച്ചത്. നാഷണല്‍ സ്റ്റോക്ക് എക്സ്ചേഞ്ച് ഓഫ് ഇന്ത്യ, ബിഎസ്ഇ ലിമിറ്റഡ്, കല്‍ക്കട്ട സ്റ്റോക്ക് എക്സ്ചേഞ്ച് എന്നിവയ്ക്ക് അയച്ച കത്തില്‍ ടാറ്റ കണ്‍സ്യൂമര്‍ പ്രോഡക്ട്സ് ഈ അവകാശവാദങ്ങള്‍ നിരസിച്ചു.
സ്റ്റാര്ബക്സ് കോഫി കമ്പനിയും ടാറ്റ കണ്‍സ്യൂമര്‍ പ്രൊഡക്ട്സ് ലിമിറ്റഡും തമ്മിലുള്ള സംയുക്ത സംരംഭത്തിലൂടെയാണ് 2012 ഒക്ടോബറില്‍ സ്റ്റാര്ബക്സ് ഇന്ത്യന്‍ വിപണിയില്‍ പ്രവേശിച്ചത്. 'ഉയര്‍ന്ന ചെലവുകള്‍, മോശം രുചി, വര്‍ധിച്ചുവരുന്ന നഷ്ടങ്ങള്‍' എന്നിവ കാരണം സ്റ്റാര്ബക്സ് ഇന്ത്യ വിടുന്നു എന്ന തലക്കെട്ടിലായിരുന്നു വാര്‍ത്ത. ലോകത്തെ ഏറ്റവും ജനസംഖ്യയുള്ള രാജ്യമായ ഇന്ത്യയില്‍ ഉപഭോക്താക്കളുടെ എണ്ണം കുറയുന്നതിനാല്‍, ടാറ്റ കണ്‍സ്യൂമര്‍ പ്രൊഡക്ട്സ് ഹ്രസ്വകാലത്തേക്ക് സ്റ്റാര്ബക്സ് സ്റ്റോറുകള്‍ തുറക്കാനുള്ള പദ്ധതികള്‍ തത്കാലം നിര്‍ത്തിവെക്കുമെന്ന് ഡിസംബര്‍ 16-ന് റോയിട്ടേഴ്‌സ് റിപ്പോര്‍ട്ട് ചെയ്തിരുന്നു.
പുതിയ ചുവടുവെപ്പുമായി ഒല. ബെംഗളൂരുവില്‍ ഫുഡ് ഡെലിവറി ചെയ്യാനുള്ള പുതിയ തയ്യാറെടുപ്പിലാണ് ഒല. പത്ത് മിനിറ്റിനുള്ളില്‍ ഫുഡ് ഡെലിവറി ചെയ്യാനുള്ള നീക്കത്തിലാണ് ഒല.
'ഒല ഡാഷ്' വഴിയാണ് ഫുഡ് ഡെലിവറി ചെയ്യാന്‍ ഒല തയ്യാറെടുക്കുന്നത്. അതേസമയം സേവനം സംബന്ധിച്ച് ഒല ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല. ഈ വര്‍ഷം ജൂണ്‍ മുതല്‍ ഒല ഡാഷ് ഫുഡ് ഡെലിവറി ലഭ്യമാണ്.
നിലവില്‍ ഒല മെയിന്‍ ആപ്പിലെ ഫുഡ് ഡെലിവറി സെക്ഷന്‍ വഴി ബെംഗളൂരുവിലെ തെരഞ്ഞെടുത്ത ഇടങ്ങളില്‍ ഈ സേവനം ലഭ്യമാണ്. എന്നാല്‍ ഒരു കിലോമീറ്റര്‍ ചുറ്റളവിലുള്ള ചില റസ്റ്റോറന്റുകളില്‍ മാത്രമേ ഈ സേവനം ഉണ്ടായിരുന്നുള്ളു. ഇതോടേയാണ് പത്ത് മിനിറ്റിനുള്ളില്‍ ഫുഡ് ലഭ്യമാകുന്ന തരത്തിലുള്ള സേവനം തുടങ്ങാന്‍ ഒല തയാറെടുക്കുന്നത്.
കഴിഞ്ഞ വര്‍ഷം ഒക്ടോബറില്‍ ബെംഗളൂരുവില്‍ 'ഓല പാഴ്‌സല്‍' സേവനം കമ്പനി ആരംഭിച്ചിരുന്നു. ഇലക്ട്രിക് സ്‌കൂട്ടറുകള്‍ ഉപയോഗിച്ച് പാഴ്‌സലുകള്‍ എത്തിച്ച് നല്‍കും. അഞ്ച് കിലോമീറ്ററിന് 25 രൂപയും 10 കിലോമീറ്ററിന് 50 രൂപയും 15 കിലോമീറ്ററിന് 75 രൂപയും 20 കിലോമീറ്ററിന് 100 രൂപയുമാണ് ഡെലിവറി ഫീസായി ഒല ഈടാക്കിയിരുന്നത്.
സ്റ്റാര്‍ലിങ്ക് വിമാനങ്ങളില്‍ ഉള്‍പ്പെടെ വേഗത കൂടിയ ഇന്റര്‍നെറ്റ് സേവനങ്ങള്‍ ലഭ്യമാക്കുമെന്ന് സൂചന നല്‍കി ഇലോണ്‍ മസ്‌ക്. എക്സില്‍ പങ്കിട്ട രണ്ട് മിനിറ്റ് വിഡിയോയിലാണ് മസ്‌ക്, സ്റ്റാര്‍ലിങ്ക് മികച്ച സേവനം വാഗ്ദാനം ചെയ്യുമെന്ന് പറയുന്നത്. വിമാന യാത്രകളില്‍ അതിവേഗ ഇന്റര്‍നെറ്റ് സേവനം നല്‍കുന്നതുള്‍പ്പെടെ സ്റ്റാര്‍ലിങ്കിന്റെ ബ്രോഡ്ബാന്‍ഡ് കണക്റ്റിവിറ്റിയുടെ മേന്മകള്‍കളും വിഡിയോയില്‍ പറയുന്നു.
വിമാന യാത്രക്കിടെയും ഉയര്‍ന്ന വേഗതയില്‍ ഓണ്‍ലൈന്‍ ഗെയിമിങ് ആസ്വദിക്കാന്‍ കഴിയുമെന്ന് വിഡിയോയില്‍ പറയുന്നു. യാത്രകളില്‍ വിഡിയോ കോളുകള്‍, ഓണ്‍ലൈന്‍ മീറ്റിങ്ങുകള്‍ എന്നിവ ഇടതടവില്ലാതെ നടത്താന്‍ ഉപയോക്താക്കള്‍ക്ക് കഴിയും. വയേര്‍ഡ് ബ്രോഡ്ബാന്‍ഡ് സേവനങ്ങളുമായി താരതമ്യപ്പെടുത്താവുന്ന 250 എംബിപിഎക് മുതല്‍ 300 എംബിപിഎസ് വരെ ഇന്റര്‍നെറ്റ് വേഗത സ്റ്റാര്‍ലിങ്കിന് ലഭിക്കുമെന്നും കമ്പനി അവകാശപ്പെടുന്നു.
ഇന്ത്യയില്‍ സ്റ്റാര്‍ലിങ്ക് സേവനം അധികം വൈകാതെ തന്നെ എത്തുമെന്നാണ് റിപ്പോര്‍ട്ട്. പ്രവര്‍ത്തനം ആരംഭിക്കുന്നതിന്റെ ഭാഗമായി സ്റ്റാര്‍ലിങ്ക് നിലവില്‍ ടെലികോം റെഗുലേറ്ററുടെ അനുമതിക്കായി കാത്തിരിക്കുകയാണ്. അടുത്ത വര്‍ഷം ആദ്യം സ്റ്റാര്‍ലിങ്ക് രാജ്യത്ത് പ്രവര്‍ത്തനം ആരംഭിക്കുമെന്നാണ് റിപ്പോര്‍ട്ടുകള്‍. എയര്‍ടെല്‍ വണ്‍വെബ്, ജിയോ സാറ്റ്‌കോം, ആമസോണ്‍ കൈപ്പര്‍ എന്നിവയുള്‍പ്പെടെയുള്ള കമ്പനികളും സാറ്റലൈറ്റ് ബ്രോഡ്ബാന്‍ഡ് സേവനങ്ങള്‍ ഇന്ത്യയിലെത്തിക്കാനുള്ള ശ്രമങ്ങള്‍ നടത്തുന്നുണ്ട്.
BP SPECIAL NEWS
ഉയരം കൂടുന്തോറും ചായയുടെ സ്വാദ് കൂടും എന്നത് പരസ്യ വാചകം ആണെങ്കില്‍ ഒരു കഫേയില്‍ ഈ വാചകത്തിന് അല്‍പം മാറ്റമുണ്ടാകും. ഒരു ചായയുടെ വിലയാണ് ഇപ്പോള്‍ സോഷ്യല്‍ മീഡിയയില്‍ ഹിറ്റാകുന്നത്.
ചായപ്രേമികള്‍ ഏറെ ആഗ്രഹിക്കുന്ന ചായ ആണെങ്കിലും ഈ ചായ കുടിച്ചാല്‍ മനസ്സ് ഒന്ന് പൊള്ളും. കാരണം ഇതിന്റെ വില ഒരു ലക്ഷം രൂപയാണ്.
ചില ആഡംബര ചായകള്‍ സോഷ്യല്‍ മീഡിയയില്‍ മറ്റും വൈറലാകുമ്പോള്‍ ചായപ്രേമികള്‍ക്കിടയില്‍ ചര്‍ച്ചയാകുകയാണ് 'ഗോള്‍ഡ് കരക്' ചായ. ദുബായിലെ എമിറേറ്റ്സ് ഫിനാന്‍ഷ്യല്‍ ടവറില്‍ പ്രവര്‍ത്തിക്കുന്ന ബോഹോ കഫേയിലാണ് ഗോള്‍ഡ് കരക് ചായ ലഭിക്കുന്നത്.
എന്താണ് ഈ ചായയുടെ പ്രത്യേകത എന്നോ? ഇതൊരു സ്വര്‍ണ ചായ ലഭിക്കുന്നത്. ഇന്ത്യന്‍ വംശജയായ സുചേത ശര്‍മ്മയുടേതാണ് ഈ കഫേ. ഗോള്‍ഡ് കരക് ചായയ്ക്ക് 5000 ദിര്‍ഹം ആണ് വില. അതായത് ഏകദേശം 1.14 ലക്ഷം രൂപ.
PRAVASI VARTHAKAL
