പതിനാല് വർഷങ്ങൾക്ക് ശേഷം തെലങ്കാന സംസ്ഥാന സർക്കാർ 'ഗദ്ദർ ' അവാർഡ് എന്ന പേരിൽ നൽകുന്ന ചലച്ചിത്ര അവാഡിൽ മികച്ച നടനുള്ള സ്പെഷ്യൽ ജൂറി പുരസ്കാരത്തിന് അർഹനായിരിക്കുകയാണ് ദുൽഖർ സൽമാൻ.വെങ്കി അറ്റ്ലൂരിയുടെ സംവിധാനത്തിൽ കഴിഞ്ഞ വർഷം പുറത്തിറങ്ങിയ 'ലക്കി ഭാസ്കർ 'എന്ന ചിത്രത്തിലെ അഭിനയത്തിനാണ് ദുൽഖറിനെ തേടി ഈ നേട്ടമെത്തിയത്. മികച്ച നടനുള്ള അവാർഡിന് പുറമെ മികച്ച മൂന്നാമത്തെ ചിത്രം, മികച്ച എഡിറ്റർ, മികച്ച തിരക്കഥാകൃത്ത് എന്നീ മറ്റ് മൂന്ന് അവാർഡുകളും 'ലക്കി ഭാസ്കർ ' സ്വന്തമാക്കി. 1992 ൽ യഥാർത്ഥത്തിൽ നടന്ന ഒരു പണം തട്ടിപ്പിനെ അടിസ്ഥാനമാക്കിയാണ് 'ലക്കി ഭാസ്കർ ' എന്ന പീരിയഡ് ഡ്രാമ ത്രില്ലെർ നിർമ്മിക്കപ്പെട്ടത്.തിയേറ്ററുകളിൽ വൻ വിജയമായി മാറിയ ചിത്രത്തിന് ' ഒറ്റിറ്റി പ്ലാറ്റ്ഫോമുകളിലും മികച്ച സ്വീകരണവും, പ്രേക്ഷകശ്രദ്ധയും ലഭിച്ചിരുന്നു. തെലുങ്കിന് പുറമെ മലയാളം, കന്നഡ, തമിഴ്, ഹിന്ദി എന്നീ ഭാഷകളിലും പ്രദർശിപ്പിച്ച ചിത്രത്തിന്റെ ബോക്സ്‌ ഓഫീസ് വിജയം അത്ഭുതപ്പെടുത്തുന്നതായിരുന്നു. ടൈറ്റിൽ കഥാപാത്രമായ 'ഭാസ്കർ ' ആയി ദുൽഖർ നടത്തിയ പ്രകടനം വ്യത്യസ്തവും, അദ്ദേഹത്തിന്റെ കരിയറിലെ തന്നെ മികച്ചു നിൽക്കുന്നതുമായിരുന്നു എന്ന തരത്തിൽ നിരൂപക പ്രശംസ ലഭിച്ചിരുന്നു. ഈ അവാർഡിലൂടെ കൂടുതൽ പ്രേക്ഷകരിലും ഇതേ അഭിപ്രായമാണ് ഇപ്പോൾ ഉയരുന്നത്.

കമൽ ഹാസന്റെ വിവാദപരാമശത്തിനെതിരെ കർണാടകയിലെങ്ങും വിമർശനങ്ങൾ ഉയരുമ്പോൾ അതിനോടൊപ്പം ശക്തമായ പ്രതികരണം രേഖപ്പെടുത്തിയിരിക്കുകയാണ് സംഗീത സംവിധായകനായ നാദബ്രഹ്മ ഹംസലേഖ.'കന്നഡ ഭാഷക്ക് ജന്മം നൽകിയത് തമിഴ് ആണ്' എന്ന കമലിന്റെ വാക്കുകൾക്കെതിരെ 'തമിഴ് ഭാഷയക്ക് ലിപിയുണ്ടായത് കന്നഡയിൽ നിന്നാണ്' എന്നു പറഞ്ഞാണ് അദ്ദേഹം പ്രതികരിച്ചത്.കമൽ ഹാസൻ തമിഴ് ഭാഷയുടെ ഉത്ഭവത്തെക്കുറിച്ച് കൂടുതൽ പഠിക്കേണ്ടിയിരിക്കുന്നുവെന്നും, കന്നഡക്കാർക്ക് സ്വന്തം ഭാഷയിൽ അഭിമാനവും അതിനെക്കുറിച്ച് വ്യക്തമായ അറിവുമുണ്ടെന്നും ഹംസലേഖ കൂട്ടിച്ചർത്തു. കമൽ ഹാസൻ - മണിരത്നം കൂട്ടുകെട്ടിൽ പിറന്ന ഏറ്റവും പുതിയ ചിത്രം 'തഗ് ലൈഫ്' ന്റെ ഓഡിയോ ലോഞ്ചിനിടെയായിരുന്നു കമൽ വിവാദത്തിനിടയായ വാക്കുകൾ സംസാരിച്ചത്. ഇതിനെതിരെ കർണാടകയിൽ വലിയ പ്രതിഷേധം ഉണ്ടാവുകയും, പല രാഷ്‌ട്രീയ പ്രവർത്തകരും വിമർശനങ്ങളുമായി രംഗത്ത് വരികയും ചെയ്തു. ഇതുമായി ബന്ധപ്പെട്ട് കമൽ ഹാസൻ മാപ്പ് പറയാതെ 'തഗ് ലൈഫ്' കർണാടകയിൽ പ്രദർശിപ്പിക്കില്ല എന്ന് കർണാടക ഫിലിം ചേമ്പർ ഓഫ് കൊമേഴ്സ് നേരത്തെ അറിയിച്ചിരുന്നു. ഇപ്പോൾ അനുവദിച്ച സമയത്തിനുള്ളിൽ മാപ്പ് പറയാൻ താരം വിസമ്മതം പ്രകടിപ്പിച്ചതോടെ ചിത്രം കർണാടകയിൽ പ്രദർശിപ്പിക്കണ്ട എന്നതാണ് സംഘടനയുടെ തീരുമാനം

മയാളികൾക്കേറെ പ്രിയപ്പെട്ട താരമാണ് ഗിന്നസ് പക്രു എന്ന അജയ് കുമാർ. ചിരിച്ചും, ചിന്തിപ്പിച്ചും കടന്നു പോയ ചിത്രങ്ങൾ മുതൽ ഗിന്നസ് റെക്കോർഡിന്റെ ഉയരം വരെ തൊട്ട ഈ കലാകാരന് മലയാളി പ്രേക്ഷകർക്കിടയിൽ അത്രമാത്രം സ്വീകാര്യതയുണ്ട്. ഇപ്പോൾ ഒരു ഇടവേളക്ക് ശേഷം ഗിന്നസ് പക്രു നായകനായെത്തിയ '916 കുഞ്ഞൂട്ടൻ' എന്ന ചിത്രത്തിന്റെ പത്രസമ്മേളനത്തിൽ വച്ച് അദ്ദേഹം പറഞ്ഞ കാര്യങ്ങൾ ചർച്ചയാവുകയാണ്. "സിനിമയും അഭിനയവും ആവണം ഒരു അഭിനേതാവിന്റെ ലഹരി. അതിനപ്പുറമുള്ള ലഹരി വസ്തുക്കളുടെ ഉപയോഗം നല്ലതല്ല.അതിനെ പ്രോത്സാഹിപ്പിക്കാനും കഴിയില്ല. സിനിമാ മേഖലയിലെ ലഹരിയുടെ കടന്നുവരവിനെ ചെറുക്കൻ സിനിമാ സംഘടനയും, അതിലെ അംഗങ്ങളും കൃത്യമായ തീരുമാനങ്ങൾ എടുത്തിട്ടുണ്ട്" എന്നിങ്ങനെയാണ് പക്രു പറഞ്ഞത്. ഇന്ന് എല്ലായിടത്തും വ്യാപകമായ ലഹരിയുടെ കടന്നു കയറ്റം കുട്ടികളിലേക്ക് വരെയെത്തുന്നത് ഏറെ ഭയപ്പെടുത്തുന്നുണ്ട്. ഇത് തടയാൻ സിനിമാ മേഖലയുലുള്ളവരടക്കം എല്ലാവരും ഒരുമിച്ച് നിൽക്കണമെന്നും അദ്ദേഹം കൂട്ടിച്ചർത്തു. ഇതിനിടയിൽ സിനിമയിലെ അഭിനേതാക്കളുടെ പ്രതിഫലത്തെച്ചൊല്ലി ഇപ്പോൾ നിലനിൽക്കുന്ന തർക്കങ്ങളെക്കുറിച്ച് സംസാരിക്കേ,അഭിനേതാക്കൾ അവരുടെ പ്രതിഫലം തീരുമാനിക്കുമ്പോൾ അത് സിനിമയെ തകർക്കുന്ന രീതിയിൽ ആവരുതെന്നും പ്രതികരിച്ചിരുന്നു.

ബലതാരമായി മലയാള സിനിമയിൽ അരങ്ങേറ്റം കുറിച്ചുകൊണ്ട് പ്രേക്ഷകർക്കിടയിൽ തന്റേതായ സ്ഥാനം വളർത്തിയെടുത്ത നിവേദ തോമസ് ഇപ്പോൾ തെലുങ്കിലും താരമാണ്.14 വർഷങ്ങൾക്ക് ശേഷം പ്രഖ്യാപിക്കുന്ന തെലങ്കാന സർക്കാരിന്റെ സംസ്ഥാന ചലച്ചിത്ര അവാർഡിൽ, മികച്ച നടിക്കുള്ള പുരസ്‌കാരമാണ് നിവേദ സ്വന്തമാക്കിയിരിക്കുന്നത്. നന്ദ കിഷോറിന്റെ സംവിധാനത്തിൽ കഴിഞ്ഞ വർഷം പുറത്തിറങ്ങിയ '35 ചിന്ന കഥ കാതു' എന്ന ചിത്രത്തിലെ പ്രകടനത്തിനാണ് ഈ അവാർഡ് തേടിയെത്തിയത്. ഒരു സാധാരണ കുടുംബത്തിലെ വീട്ടമ്മയും രണ്ടു കുട്ടികളുടെ അമ്മയുമായ സരസ്വതി എന്ന വേഷം വളരെ തൻമയത്വത്തോടു കൂടിയാണ് നിവേദ ചിത്രത്തിൽ അവതരിപ്പിച്ചത്. ആ കഥാപാത്രത്തിന്റെ എല്ലാ വികാരങ്ങളെയും, അതേ ആഴത്തിൽ മനസ്സിലാക്കാൻ സാധിക്കുന്ന അഭിനയമാണ് അതിൽ എടുത്തുപറയേണ്ടത്. നിവേദ തന്റെ സമൂഹമാധ്യമങ്ങളിലൂടെ അവാർഡ് വാർത്ത പങ്കുവച്ചതോടെ, ഏറ്റവും അർഹതപ്പെട്ട അവാർഡ് എന്നാണ് പേക്ഷകർ അതിനെ വിശേഷിപ്പിച്ചത്. ഇതേ ചിത്രത്തിന് വേണ്ടി, കഥാപാത്രത്തിന്റെ പൂർണ്ണതയെ കണക്കിലെടുത്തു കൊണ്ട് നടി തന്റെ ശരീരഭാരം വർദ്ധിപ്പിച്ചിരുന്നു.എന്നാൽ ഇതിന്റെ പേരിൽ പൊതുവേദികളിലും, സമൂഹമാധ്യമങ്ങളിലും ബോഡി ഷെയ്മിങ്ങിനും, സൈബർ ബുള്ളിയിങ്ങിനും ഇരയാകുന്ന അവസ്ഥ വരെ നേരിടേണ്ടി വന്നു. ഇപ്പോൾ ഈ സിനിമയും,നിവേദയുടെ കഥാപാത്രവും വലിയ ചർച്ചയാകുമ്പോൾ ഇത്രയും നാളും വിമർശിച്ചവർക്കുള്ള ഒരു തിരിച്ചടിയായിത്തന്നെ ഈ പുരസ്‌കാരനേട്ടത്തെ കാണാൻ കഴിയും.

ബിന്റോ സ്റ്റീഫന്റെ സംവിധാനത്തിൽ ദിലീപ് നായകനായെത്തിയ ഏറ്റവും പുതിയ ചിത്രം 'പ്രിൻസ് ആൻഡ് ഫാമിലി' യെ പ്രശംസിച്ചതിന്റെ പേരിൽ സിപിഐഎം ജനറൽ സെക്രട്ടറി എം എ ബേബി ഒട്ടേറെ വിമർശനങ്ങൾ നേരിട്ടിരുന്നു.ഇപ്പോൾ ഇതുമായി ബന്ധപ്പെട്ട് സമൂഹമാധ്യമങ്ങളിലൂടെ അദ്ദേഹം നടത്തിയ പ്രതികരണം ശ്രദ്ധ നേടുകയാണ്. സിനിമയെക്കുറിച്ച് താൻ സംസാരിച്ചതിനെച്ചൊല്ലി പലരും പരാതി പറഞ്ഞെന്നും,നല്ല സന്ദേശം നൽകുന്ന ഒരു ചിത്രമെന്നതിനപ്പുറം ആരോപണ വിധേയനായ നടനെ അതിലൂടെ ന്യായീകരിക്കാൻ ശ്രമിക്കുന്നില്ലെന്നും,തന്നെ സ്നേഹിക്കുന്നവരെ ഇതിലൂടെ വിഷമിപ്പിച്ചതിൽ ഖേദിക്കുന്നു ' എന്നും അദ്ദേഹം ഫേസ്ബുക്കിൽ കുറിച്ചു. എം എ ബേബിയുടെ വാക്കുകൾ ഇങ്ങനെ,  "പ്രിൻസ് ആൻഡ് ഫാമിലി എന്ന സിനിമ കണ്ട് ഞാൻ ഒരു അഭിപ്രായം പറഞ്ഞതിനെക്കുറിച്ച് പല സുഹൃത്തുക്കളും എന്നോട് നേരിട്ടും അല്ലാതെയും പരാതി പറഞ്ഞു. അതിനെക്കുറിച്ച് എനിക്ക് പറയുവാനുള്ളത് ഇതാണ്. കേരളത്തിൽ നിന്നുള്ള ഒരു യുവ പുതുമുഖ ചലച്ചിത്ര സംവിധായകന്റെ നിരന്തരമായ അഭ്യർത്ഥന കൊണ്ടാണ് ഞാൻ ഈ സിനിമ കാണാൻ നിർബന്ധിതനായത്. സിനിമ കണ്ടപ്പോൾ, ഒരു നല്ല സന്ദേശമുള്ള സിനിമായാണിതെന്ന് എനിക്ക് തോന്നി. മറിച്ച് അഭിപ്രായം ഉള്ളവരും ഉണ്ടാകാം. കലാപരമായി അസാധാരണമായ ഔന്നത്യം ഇതിനില്ലെങ്കിലും അക്രമരംഗങ്ങളോ അനാവശ്യമായ അസഭ്യസംഭാഷണങ്ങളോ ഒന്നും ഇല്ലാത്ത ഭേദപ്പെട്ട ഒരു സിനിമ ആയി തോന്നി.അതുകൊണ്ടാണ് സംവിധായകനെ അല്ലാതെ മറ്റാരെയും പേരെടുത്ത് പരാമർശിക്കാതെ ഞാൻ അത് പങ്കുവച്ചത്. ഇക്കാര്യത്തിന് ഇതിൽ കൂടുതൽ അർത്ഥമുണ്ടെന്ന് ഞാൻ കരുതുന്നില്ല. ഇതിൽ അഭിനയിച്ച ആരോപണവിധേയനായ നടനെ ഞാൻ ന്യായീകരിക്കുന്നു എന്ന് വ്യാഖ്യാനിക്കേണ്ടതില്ല. തികച്ചും അപ്രതീക്ഷിതമായി ഒട്ടേറെ സഖാക്കൾ അനുഭാവികൾ തുടങ്ങിയവർ സദുദ്ദേശ്യത്തിലും മറ്റു ചിലർ അങ്ങനെയല്ലാതെയും ഈ കാര്യത്തിൽ എന്നോട് അവരുടെ വിയോജിപ്പ് പ്രകടിപ്പിക്കുകയുണ്ടായി.പാർട്ടിയെയും എന്നെയും സ്നേഹിക്കുന്നവരെ ഇത്തരത്തിൽ ഉദ്ദേശിക്കാതെ പ്രയാസപ്പെടുത്തിയതിൽ എനിക്കും വിഷമമുണ്ട് " കഴിഞ്ഞ ദിവസം,ഡൽഹി മലയാളികൾക്കൊപ്പം ചിത്രം കണ്ടതിനു ശേഷം മാധ്യമങ്ങളോട് സംസാരിക്കേ, മികച്ച അഭിപ്രായമാണ് എം എ ബേബി പങ്കുവച്ചത്. ചിത്രം പ്രസക്തമായ സന്ദേശവും, മികച്ച ആശയവും പങ്കുവയ്ക്കുന്നുണ്ടെന്നു പറഞ്ഞതിനോടൊപ്പം, സംവിധായകനും മറ്റെല്ലാ അണിയറപ്രവർത്തകർക്കും അനുമോദനങ്ങളും നേർന്നിരുന്നു.