ചോറ്റാനിക്കര: പോക്സോ കേസ് അതിജീവിതയായ പത്തൊമ്പതുകാരിയെ വീടിനുള്ളില്‍ അബോധാവസ്ഥയില്‍ കണ്ടെത്തി. കഴുത്തില്‍ ഷാള്‍ മുറുകി അര്‍ദ്ധനഗ്നയായ നിലയില്‍ ആണ് പെണ്‍കുട്ടിയെ കണ്ടെത്തിയത്. ക്രൂരമായ ബലാത്സംഗത്തിന് ഇരയായോ എന്നും സംശയമുണ്ട്. വീടിനുള്ളില്‍ കഴുത്തില്‍ ഷാള്‍ മുറുകി ബോധമറ്റ നിലയില്‍ അര്‍ധനഗ്‌നയായി കിടക്കുന്ന പെണ്‍കുട്ടിയെ ഒരു ബന്ധുവാണ് കണ്ടെത്തുന്നത്. കുട്ടിയുടെ കയ്യിലെ മുറിവില്‍ ഉറുമ്പരിച്ചിരുന്നു. അമ്മയും മകളും മാത്രമാണ് വീട്ടിലുള്ളത്. ഞായറാഴ്ച അമ്മ വിവാഹചടങ്ങില്‍ പങ്കെടുക്കാന്‍ പോയപ്പോഴാണ് സംഭവം. സാമ്പത്തികമായി നല്ല നിലയിലുള്ള കുടുംബാംഗമായ പെണ്‍കുട്ടിയുടെ അച്ചന്‍ ഒപ്പമില്ല. ഉച്ചയ്ക്ക് അടുത്ത ബന്ധു വീട്ടിലെത്തി വിളിച്ചിട്ടും മറുപടി കിട്ടാതെ ജനലിലൂടെ നോക്കിയപ്പോഴാണ് ബോധരഹിതയായ നിലയില്‍ കട്ടിലില്‍ കിടക്കുന്ന നിലയില്‍ കണ്ടെത്തിയത്. പിന്‍വാതില്‍ തുറന്ന നിലയിലായിരുിന്നു. യുവതിയെ ആദ്യം തൃപ്പൂണിത്തുറയിലെ സര്‍ക്കാര്‍ ആശുപത്രിയിലെത്തിച്ചു. പിന്നീട് അടുത്തുള്ള സ്വകാര്യ ആശുപത്രിയിലേക്ക് മാറ്റി. മൂന്നു ദിവസമായി അതീവ ഗുരുതരാവസ്ഥയില്‍ 20കാരി എറണാകുളത്തെ സ്വകാര്യ ആശുപത്രിയില്‍ ചികിത്സയിലാണ്. ഐ.സി.യുവില്‍ അബോധാവസ്ഥയില്‍ വെന്റിലേറ്ററിലാണിപ്പോള്‍. എന്താണ് സംഭവിച്ചതെന്ന് ആര്‍ക്കും പിടി കിട്ടിയിട്ടില്ല. യുവതിയ്ക്ക് സംസാരിക്കാന്‍ കഴിയാത്തതാണ് ഇതിന് കാരണം. തലച്ചോറിന് കാര്യമായ ക്ഷതമേറ്റിട്ടുണ്ട്. അമ്മയുടെ പരാതിയില്‍ ബലാത്സംഗത്തിനും കൊലപാതകശ്രമത്തിനും ചോറ്റാനിക്കര പൊലീസ് കേസെടുത്തു. രഹസ്യഭാഗങ്ങളില്‍ രക്തംവാര്‍ന്ന നിലയിലായിരുന്നു. കഴുത്തില്‍ കയര്‍ മുറുക്കിയ പാടും ഉണ്ടായിരുന്നു. പെണ്‍കുട്ടിയുടെ കോട്ടയം സ്വദേശിയായ ആണ്‍സുഹൃത്ത് പൊലീസ് നിരീക്ഷണത്തിലാണ്. ഇയാളെ പോലീസ് കസ്റ്റഡിയില്‍ എടുത്തിട്ടില്ല. സമീപ പ്രദേശത്തെ സിസിടിവി അടക്കം പോലീസ് നിരീക്ഷിക്കുന്നുണ്ട്. മൂന്നു വര്‍ഷം മുമ്പ് പെണ്‍കുട്ടി ഡിഗ്രി വിദ്യാര്‍ത്ഥി ആയിരിക്കവേയാണ് പതിവായി സഞ്ചരിച്ചിരുന്ന സ്വകാര്യ ബസിലെ രണ്ടു ജീവനക്കാര്‍ ലൈംഗിക പീഡനത്തിന് ഇരയാക്കിയത്. നാലു മാസം മുമ്പ് പരാതി നല്‍കിയതിനെ തുടര്‍ന്ന് ബസ് ജീവനക്കാര്‍ അറസ്റ്റിലായി. അടുത്തിടെയാണ് ഇവര്‍ ജാമ്യത്തിലിറങ്ങിയത്. ഇവരും സംശയത്തിലാണ്. ഈ പ്രതികളേയും പോലീസ് നിരീക്ഷിക്കുന്നുണ്ട്. അതുകൊണ്ടാണ് ആണ്‍ സുഹൃത്തിനെ പോലീസ് കസ്റ്റഡിയില്‍ എടുക്കാത്തത്. യുവതിയ്ക്ക് ആരോഗ്യ നില വീണ്ടെടുക്കാനായാല്‍ മാത്രമേ പോലീസിന് മൊഴി കിട്ടൂ.

വയനാട്: വന്യജീവി ആക്രമണം നടന്ന വയനാട്ടില്‍ സന്ദര്‍ശനം നടത്തി പ്രിയങ്ക ഗാന്ധി എം.പി. ജനങ്ങളുടെ ഭീതിയകറ്റുന്നതിനും സുരക്ഷിതത്വം ഉറപ്പ് വരുത്തുന്നതിനുമുള്ള നടപടികള്‍ ഉണ്ടാകണമെന്ന് ആവശ്യപ്പെട്ട് പ്രിയങ്ക ഗാന്ധി. കടുവ ആക്രമണത്തില്‍ കൊല്ലപ്പെട്ട രാധയുടെ കുടുംബത്തെ സന്ദര്‍ശിച്ച ശേഷം കളക്ട്രേറ്റില്‍ ചേര്‍ന്ന യോഗത്തിലാണ് ഇതു സംബസിച്ച നിര്‍ദേശം നല്‍കിയത്. മലയോര മേഖലകളിലെ ജനങ്ങളുടെ പ്രശ്‌നങ്ങള്‍ പരിഹരിക്കുന്നതിന് സാധ്യമായതെല്ലാം ചെയ്യുമെന്നും പ്രിയങ്ക ഗാന്ധി അറിയിച്ചു. കടുവയുടെ ആക്രമണത്തില്‍ മരണപ്പെട്ട രാധയുടെ മകന് സ്ഥിരം ജോലി നല്‍കണം. ഇതിന് മുമ്പ് വന്യജീവി ആക്രമണത്തില്‍ മരണപ്പെട്ടവരുടെ കുടുംബാംഗങ്ങള്‍ക്ക് സ്ഥിരം ജോലി നല്‍കാത്തവര്‍ക്കും സ്ഥിരം ജോലി നല്‍കണം. വന്യ ജീവി ആക്രമണം തടയുന്നതിനുള്ള സ്ഥിരം സംവിധാനം ഒരുക്കണമെന്നും പ്രിയങ്കാ ഗാന്ധി ആവശ്യപ്പെട്ടു. സമഗ്രമായ റിപ്പോര്‍ട്ട് ജില്ലാ ഭരണകൂടം നല്‍കിയാല്‍ സി.എസ്.ആര്‍ ഫണ്ട് ഉള്‍പ്പെടെ ലഭ്യമാക്കി പ്രശ്‌ന പരിഹാരത്തിന് ശ്രമിക്കും. ഫണ്ടിന്റെ അപര്യാപ്ത വലിയ പ്രശ്‌നമായി നിലകൊള്ളുകയാണ്. കേന്ദ്ര - സംസ്ഥാന സര്‍ക്കാറുകളുടെ ശ്രദ്ധയില്‍ ഇത് പെടുത്തും. വിഷയം പാര്‍ലമെന്റില്‍ ഉന്നയിക്കും. കേന്ദ്ര സര്‍ക്കാര്‍ ഫണ്ട് ലഭ്യമാക്കാനുള്ള നടപടികളും സ്വീകരിക്കും. പ്രിയദര്‍ശിനി എസ്റ്റേറ്റ് ഉള്‍പ്പെടെയുള്ള സ്ഥലങ്ങളിലും വന പ്രശങ്ങളിലും തദ്ദേശീയരായ കൂടുതല്‍ ബീറ്റ് ഫോറസ്റ്റ് ഓഫീസര്‍മാരെ നിയോഗിക്കണം. ഇവരുടെ സേവന വേതന വ്യവസ്ഥകള്‍ പരിഷ്‌കരിക്കണം. കുറഞ്ഞ വേതനത്തിന് കൂടുതല്‍ സമയം വിശ്രമമില്ലാതെ ജോലി ചെയ്യണ്ടി വരുന്ന സാഹചര്യം ഒഴിവാക്കണമെന്നും പ്രിയങ്കാ ഗാന്ധി പറഞ്ഞു. കേന്ദ്ര-സംസ്ഥാന സര്‍ക്കാറുകളെ വിശ്വാസത്തിലെടുത്ത് കൂട്ടായ പ്രവര്‍ത്തനത്തിലൂടെ മുന്നോട്ട് പോവും. മനുഷ്യ ജീവന്‍ വിലപ്പെട്ടതാണ്. ഫണ്ടില്ലാത്തതുകൊണ്ട് ഇത് നഷ്ടപ്പെടുന്ന സാഹചര്യമുണ്ടാകരുത്. മുന്‍ഗണണന നിശ്ചയിച്ച് സമയബന്ധിതമായി പദ്ധതികള്‍ പൂര്‍ത്തിയാക്കണം.ഇതിനായി എല്ലാവരും ഒത്തൊരുമിച്ച് പ്രവര്‍ത്തിക്കണമെന്നും എംപി ആവശ്യപ്പെട്ടു.

വാഷിംഗ്ടണ്‍: ടിക് ടോകിനെ ഏറ്റെടുക്കാന്‍ മൈക്രോസോഫ്റ്റ് തയ്യാറെടുക്കുന്നതായി വാര്‍ത്ത. സുരക്ഷാകാരണങ്ങളാല്‍ അമേരിക്കയില്‍ നിരോധിച്ചടിക് ടോക്കിന്റെ അമേരിക്കയിലെ ബ്രാഞ്ച് വാങ്ങുന്നത് പരിഗണിക്കുന്ന കമ്പനികളില്‍ മൈക്രോസോഫ്റ്റും ഉണ്ടെന്ന് ആണ് അമേരിക്കന്‍ പ്രസിഡന്റ് ഡോണള്‍ഡ് ട്രംപ് അറിയിച്ചിരിക്കുന്നത്. ദേശീയ സുരക്ഷാ പ്രശ്നങ്ങളെക്കുറിച്ചുള്ള സുപ്രീം കോടതി വിധി പ്രകാരം, മാതൃ കമ്പനിയായ ബൈറ്റ്ഡാന്‍സിന് അമേരിക്കയില്‍ പ്രവര്‍ത്തിക്കുന്നതിനുള്ള സമയപരിധി ജനുവരി 19ന് അവസാനിച്ചിരുന്നു. ഇതോടെ, ടിക്ടോക്ക് അമേരിക്കയില്‍ പ്രവര്‍ത്തനം അവസാനിപ്പിക്കുകയും ചെയ്തു. ഇതോടെ, ട്രംപ് 90 ദിവസത്തെ വിപുലീകരണം പ്രഖ്യാപിക്കുകയും ടിക് ടോക്കിന്റെ ഭൂരിഭാഗം ഓഹരികളും അമേരിക്ക ഏറ്റെടുക്കുന്നതിനുള്ള പദ്ധതി നിര്‍ദ്ദേശിക്കുകയും ചെയ്തു. എന്നാല്‍ ഇതുമായി ബന്ധപ്പെട്ട് മൈക്രോസോഫ്റ്റും ടിക് ടോക്കും ഇതുവരെ പ്രതികരിച്ചിട്ടില്ല. നിലവില്‍ ടിക് ടോകിന് 75 ദിവസത്തെ സാവകാശം നല്‍കിയിരിക്കുകയാണ് അമേരിക്ക. അമേരിക്കന്‍ നീതി ന്യായ വ്യവസ്ഥയെയും ട്രംപിനെയും അനുസരിക്കാന്‍ തീരുമാനിച്ചതോടെ ടിക് ടോകിന്റെ നിരോധനം നീക്കിയിരുന്നു. ആപ്പിന്റെ പ്രവര്‍ത്തനം രാജ്യത്ത് പുനഃസ്ഥാപിക്കുകയും ചെയ്തിരുന്നു. അമ്പത് ശതമാനം ഓഹരികളും അമേരിക്കയ്ക്ക് കൈമാറാമെന്ന തീരുമാനം ടിക് ടോക് അംഗീകരിച്ചതിനാലാണ് പ്രവര്‍ത്തനം പുനഃസ്ഥാപിക്കാന്‍ സാധിച്ചത്. ടിക് ടോക്ക് വാങ്ങുന്നതിനെക്കുറിച്ച് താന്‍ നിരവധി കക്ഷികളുമായി ചര്‍ച്ചയിലാണെന്നും അടുത്ത 30 ദിവസത്തിനുള്ളില്‍ ആപ്പിന്റെ ഭാവിയെക്കുറിച്ച് തീരുമാനമെടുക്കുമെന്ന് പ്രതീക്ഷിക്കുന്നുവെന്നും ട്രംപ് മുമ്പ് പറഞ്ഞിരുന്നു. ഏകദേശം 170 ദശലക്ഷം അമേരിക്കന്‍ ഉപയോക്താക്കളുള്ള ആപ്പ്, ദേശീയ സുരക്ഷാ കാരണങ്ങളാല്‍ ബൈറ്റ്ഡാന്‍സ് ഒന്നുകില്‍ വില്‍ക്കണമെന്നും അല്ലെങ്കില്‍ അമേരിക്കയില്‍ പ്രവര്‍ത്തിക്കരുതെന്നും സുപ്രീം കോടതി ബൈറ്റ്ഡാന്‍സിന് മുന്നറിയിപ്പ് നല്‍കിയിരുന്നു.

പാലക്കാട്: നെന്മാറ ഇരട്ടക്കൊല കേസ് പ്രതി ചെന്താമരയെ പൊലീസ് കസ്റ്റഡിയിലെടുത്തു. പോത്തുണ്ടി മാട്ടായിയില്‍ നിന്നാണ് ചെന്താമര പിടിയിലായത്. തെരച്ചില്‍ അവസാനിപ്പിച്ച് പോലീസ് തിരികെ പോകും വഴിയാണ് ചെന്താമര കുടുങ്ങിയത്. പോലീസ് പിന്‍വലിഞ്ഞെന്നുള്ള സൂചന ലഭിച്ചതോടെയാണ് ചെന്താമര പിടിയിലായതെന്ന് ആണ് വിവരം. കൊലപാതകം നടന്ന് 36-ാം മണിക്കൂറിലാണ് ചെന്താമര പിടിയിലായിരിക്കുന്നത്. വീടിന്റെ അടുത്ത് നിന്നാണ് ചെന്താമരയെ പിടികൂടിയത് എന്ന് പാലക്കാട് എസ്പി അജിത്കുമാര്‍ പറഞ്ഞു. ചെന്താമര ക്ഷീണിതനായിരുന്നുവെന്നും വീട്ടിലേക്ക് മടങ്ങാനുള്ള ശ്രമത്തിനിടെയാണ് അറസ്റ്റിലായതെന്നും എസ്പി പറഞ്ഞു. പോത്തുണ്ടി മലയില്‍ നിന്നും രണ്ട് വഴികളാണ് ഉണ്ടായിരുന്നത്. ഒന്ന് മംഗലം ഡാമിലേക്കും മറ്റൊന്ന് ഇയാളുടെ വീടിന്റെ പിന്‍വശത്തേക്കുമുള്ളതായിരുന്നു. വീട്ടിലേക്കുള്ള വഴിയിലൂടെയാണ് ഇയാള്‍ നടന്നുവന്നത്. ഒളിച്ചിരുന്ന പോലീസുകാര്‍ ഇയാളെ പിടികൂടുകയായിരുന്നു. പോലീസ് തിരച്ചില്‍ അവസാനിപ്പിച്ച് പിന്മാറിയെന്ന പ്രതീതിയുണ്ടാക്കി ഒളിയിടത്തില്‍ നിന്ന് ചെന്താമരയെ പുറത്ത് ചാടിക്കുകയെന്ന ലക്ഷ്യം കൃത്യമായി ഫലം കാണുകയായിരുന്നു. ഇയാള്‍ കൂടുതല്‍ കൊലപാതകങ്ങള്‍ ചെയ്യാന്‍ പദ്ധതി ഇട്ടിരുന്നതായാണ് പുറത്ത് വരുന്ന വിവരങ്ങള്‍. ആറു പേരെ കൊല്ലാന്‍ ആയിരുന്നു ഇയാള്‍ പദ്ധതിയിട്ടിരുന്നത് എന്നാണ് സൂചന. ചെന്താമരയെ പിടികൂടിയെന്ന വാര്‍ത്ത പുറത്തുവന്നതിന് പിന്നാലെ വന്‍ ജനക്കൂട്ടം നെന്മാറ പൊലീസ് സ്റ്റേഷന് മുന്നിലെത്തി. പ്രതിയെ കാണണമെന്ന് ആവശ്യപ്പെട്ട് നാട്ടുകാര്‍ പ്രതിഷേധിച്ചു. പ്രതിഷേധം കനത്തതോടെ പൊലീസ് നാട്ടുകാര്‍ക്ക് നേരെ ലാത്തി വീശി. പൊലീസ് സ്റ്റേഷന്റെ ഗെയ്റ്റ് തള്ളിത്തുറന്നാണ് നാട്ടുകാര്‍ സ്റ്റേഷന്‍ കോമ്പൗണ്ടിലേക്ക് കയറിയത്. രാഷ്ട്രീയപ്പാര്‍ട്ടി നേതാക്കള്‍ അടക്കം എത്തി നാട്ടുകാരെ തിരിച്ചയക്കാനുള്ള ശ്രമം നടക്കുന്നുണ്ട്.

തിരുവനന്തപുരം: പോക്‌സോ കേസില്‍ നടന്‍ കൂട്ടിക്കല്‍ ജയചന്ദ്രന്റ അറസ്റ്റ് നടപടികള്‍ തടഞ്ഞ് സുപ്രീം കോടതി. അന്വേഷണവുമായി സഹകരിക്കണമെന്ന നിര്‍ദേശത്തോട് കൂടിയാണ് സുപ്രീംകോടതി അറസ്റ്റ് നടപടികള്‍ തടഞ്ഞത്. കൂട്ടിക്കല്‍ ജയചന്ദ്രന്റെ മുന്‍കൂര്‍ ജാമ്യാപേക്ഷയില്‍ കോടതി സര്‍ക്കാരിന് നോട്ടീസ് അയച്ചിട്ടുണ്ട്. കഴിഞ്ഞ ജൂണ്‍ എട്ടിനായിരുന്നു കോഴിക്കോട് കസബ പൊലീസ് ജയചന്ദ്രനെ പ്രതിയാക്കി കേസെടുത്തത്. പോക്‌സോ നിയമത്തെ ദുരുപയോഗം ചെയ്ത കേസാണിതെന്നാണ് നടന്റെ അഭിഭാഷകന്റെ വാദം. കുടുംബ തര്‍ക്കത്തെ തുടര്‍ന്ന് നല്‍കിയ പരാതിയാണെന്നും വാദത്തില്‍ പറയുന്നു. ഒരു മാസത്തേക്കാണ് സുപ്രീം കോടതി അറസ്റ്റ് തടഞ്ഞത്. കഴിഞ്ഞ ജൂണ്‍ എട്ടിനായിരുന്നു കോഴിക്കോട് കസബ പൊലീസ് ജയചന്ദ്രനെ പ്രതിയാക്കി കേസെടുത്തത്. 4 വയസുകാരിയെ നഗരപരിധിയിലെ വീട്ടില്‍ വെച്ച് പീഡിപ്പിച്ചുവെന്നാണ് കൂട്ടിക്കല്‍ ജയചന്ദ്രനെതിരായ കേസ്. അഞ്ച് വര്‍ഷം ജീവപര്യന്തം വരെ ലഭിക്കാവുന്ന കുറ്റമാണ് ജയചന്ദ്രനെതിരെ പൊലീസ് ചുമത്തിയത്. കേസില്‍ മുന്‍കൂര്‍ ജാമ്യം തേടി നല്‍കിയ അപേക്ഷ കോഴിക്കോട് അഡീഷണല്‍ സെഷന്‍സ് കോടതിയും ഹൈക്കോടതിയും തള്ളിയിരുന്നു. തുടര്‍ന്നാണ് അപ്പീലുമായി കൂട്ടിക്കല്‍ ജയചന്ദ്രന്‍ സുപ്രിംകോടതിയെ സമീപിച്ചത്.