18
MAR 2021
THURSDAY
1 GBP =107.33 INR
1 USD =84.45 INR
1 EUR =89.20 INR
ജോലിക്കിടയിലെ ഒഴിവുവേളകളില്‍ 'പങ്കാളിയുമായി ലൈംഗിക ബന്ധത്തില്‍ ഏര്‍പ്പെടണമെന്ന' ആഹ്വാനം, ജനനനിരക്ക് കൂട്ടാന്‍ 'മിനിസ്ട്രി ഓഫ് സെക്സ്' എന്ന പുതിയ മന്ത്രാലയം രൂപീകരിക്കാന്‍ റഷ്യ
Story Dated: 2024-11-13
മോസ്‌കോ: ജനനനിരക്ക് കുത്തനെ ഇടിയുന്നതു സാഹചര്യത്തില്‍ പുതിയ ആശയവുമായി എത്തുകയാണ് റഷ്യ. ജനനനിരക്ക് താഴുന്നത് നേരിടാന്‍ 'മിനിസ്ട്രി ഓഫ് സെക്സ്' എന്ന പുതിയ മന്ത്രാലയം രൂപീകരിക്കാനുള്ള ആലോചനയില്‍ ആണ് റഷ്യ.
പ്രസിഡന്റ് വ്‌ലാഡിമിര്‍ പുട്ടിന്റെ അനുയായിയും റഷ്യന്‍ പാര്‍ലമെന്റിന്റെ ഫാമിലി പ്രൊട്ടക്ഷന്‍ സമിതി അധ്യക്ഷയുമായ നിന ഒസ്റ്റാനിയ (68) ഇതു സംബന്ധിച്ച ഒരു നിവേദനം പരിഗണിക്കുകയാണ് എന്ന് റിപ്പോര്‍ട്ട്. ജോലിക്കിടയിലെ ഒഴിവുവേളകളില്‍ 'പങ്കാളിയുമായി ലൈംഗിക ബന്ധത്തില്‍ ഏര്‍പ്പെടണമെന്ന' ആഹ്വാനം പുട്ടിന്‍ നേരത്തേ നടത്തിയിരുന്നു. മൂന്നാം വര്‍ഷത്തിലേക്ക് അടുക്കുന്ന യുക്രെയ്ന്‍ യുദ്ധത്തില്‍ ധാരാളം പേര്‍ കൊല്ലപ്പെട്ടിട്ടുണ്ട്. പക്ഷേ, രാജ്യത്തെ ജനനനിരക്കില്‍ കാര്യമായ കുറവാണ് ഉണ്ടാകുന്നതും. അതുകൊണ്ടുതന്നെ ജനനനിരക്ക് ഉയര്‍ത്താനുതകുന്ന നടപടികള്‍ എടുക്കണമെന്ന് പുട്ടിന്‍ ആവശ്യപ്പെട്ടിരുന്നു.
പ്രാദേശിക തലത്തില്‍ ഓരോ പ്രവിശ്യയും സ്വന്തമായി പ്രത്യേക പാക്കേജോ സാമ്പത്തിക സഹായങ്ങളോ നല്‍കാനും പദ്ധതികളുണ്ട്. ഖബാറോവ്സ്‌കില്‍ 18നും 23നും ഇടയില്‍ പ്രായമുള്ള വിദ്യാര്‍ഥിനികള്‍ക്കു കുട്ടികള്‍ ഉണ്ടായാല്‍ 900 യൂറോ (97,282 ഇന്ത്യന്‍ രൂപ) ലഭിക്കും. ചെല്യാബിന്‍സ്‌കില്‍ ആദ്യ കുട്ടിയുണ്ടാകുമ്പോള്‍ ലഭിക്കുക 8,500 യൂറോയാണ് (9,18,782 ഇന്ത്യന്‍ രൂപ). ചായ, ഉച്ചഭക്ഷണ ഇടവേളകളില്‍ പങ്കാളികള്‍ തമ്മിലുള്ള അടുപ്പം വര്‍ധിപ്പിക്കുന്ന കാര്യങ്ങള്‍ ചെയ്യാമെന്ന് പ്രാദേശിക ആരോഗ്യമന്ത്രി യെവ്ഗനി ഷെസ്‌തോപാലോവ് പറഞ്ഞു.
ജനനനിരക്ക് വര്‍ധിപ്പിക്കുന്നതിനായി സ്ത്രീകളുടെ സ്വകാര്യ ജീവിതത്തെക്കുറിച്ച് ഇപ്പോള്‍ത്തന്നെ അന്വേഷണം തുടങ്ങിയതായാണു വിവരം. ആരോഗ്യത്തെക്കുറിച്ചുള്ള ചോദ്യങ്ങള്‍ ഉള്‍പ്പെടുന്ന ഒരു ചോദ്യാവലി പൊതുമേഖലയിലെ വനിതാജീവനക്കാര്‍ക്കു നല്‍കിയിരുന്നു. ഇതിനു മറുപടി നല്‍കാതിരുന്നവര്‍ക്ക് ഡോക്ടര്‍മാരുമായുള്ള കൂടിക്കാഴ്ചയില്‍ പങ്കെടുക്കേണ്ടിവന്നിരുന്നു.
More Latest News
ശിശുദിനം: കുട്ടികളുടെ ദിനമായ ശിശുദിനത്തോട് അനുബന്ധിച്ച് കുട്ടികളിലെ മാനസിക സമ്മര്‍ദ്ദം ലഘൂകരിക്കാനായി 'ചിരി' പദ്ധതിയുമായി കേരള പൊലീസ്
ശിശുദിനത്തോടനുബന്ധിച്ച് കുട്ടികളിലെ മാനസിക സമ്മര്‍ദ്ദം ലഘൂകരിക്കാനായി 'ചിരി' പദ്ധതിയുമായി കേരള പൊലീസ്. ചിരിയുടെ 9497900200 എന്ന ഹെല്‍പ് ലൈന്‍ നമ്പരിലേക്ക് കുട്ടികള്‍ക്ക് മാത്രമല്ല അധ്യാപകരും മാതാപിതാക്കളും കുട്ടികളുടെ പ്രശ്‌നങ്ങളുമായി വിളിക്കാമെന്നും കേരള പൊലീസ് സാമൂഹിക മാധ്യമത്തില്‍ പങ്കുവെച്ച കുറിപ്പില്‍ പറയുന്നു.
കഴിഞ്ഞ ദിവസം സൂപ്പര്‍ ലീഗ് കേരള മത്സരത്തിനു ശേഷം പൃഥ്വിരാജിന്റേയും ബേസിലിന്റെയും വൈറലായ ഒരു വീഡിയോയുടെ ഫോട്ടോ ഉപയോഗിച്ചാണ് കേരള പൊലീസ് കുറിപ്പ് പങ്കുവച്ചത് സ്റ്റേഡിയത്തില്‍ സൂപ്പര്‍ ലീഗ് കേരളയുടെ ഉദ്ഘാടന പതിപ്പിന്റെ ഫൈനല്‍ വേദിയില്‍ നടന്ന സംഭവമാണ് ബേസിലിനെ സോഷ്യല്‍മീഡിയയില്‍ ട്രോളുകള്‍ക്കിടയായ്ക്കിയിരുന്നു.
അതേസമയം, ഓണ്‍ലൈന്‍ നടക്കുന്ന തട്ടിപ്പുകള്‍ക്കെതിരെ നിരന്തരം കേരള പൊലീസ് ജാഗ്രത മുന്നറിയിപ്പ് നല്‍കാറുണ്ട്. അത്തരം തട്ടിപ്പുകളില്‍ പെട്ടാല്‍ വിളിക്കേണ്ട എമര്‍ജന്‍സി നമ്പറും ഇവര്‍ സോഷ്യല്‍മീഡിയ പോസ്റ്റില്‍ പങ്കുവെയ്ക്കാറുണ്ട്. ഓണ്‍ലൈന്‍ വഴി നടക്കുന്ന പലതരത്തിലുള്ള തട്ടിപ്പുകള്‍ക്കെതിരെ ജനങ്ങള്‍ കരുതിയിരിക്കാനാണ് ഈ മുന്നറിയിപ്പ്. പൊലീസിന്റെ ഇത്തരം പോസ്റ്റുകള്‍ക്ക് വന്‍ സ്വീകാര്യത ലഭിക്കാറുണ്ട്.
മലയാളി ദമ്പതികള്‍ സൗദിയില്‍ താമസ സ്ഥലത്ത് മരിച്ചു, ജോലിക്ക് എത്താഞ്ഞതിനെ തുടര്‍ന്ന് നടത്തിയ അന്വേഷണത്തില്‍ അറിഞ്ഞത് ദമ്പതികളുടെ മരണ വാര്‍ത്ത
മലയാളി ദമ്പതികളെ സൗദി അറേബ്യയിലെ താമസസ്ഥലത്ത് മരിച്ച നിലയില്‍ കണ്ടെത്തി. കൊല്ലം കടയ്ക്കല്‍ ചിതറ ചിതറ ഭജനമഠം പത്മവിലാസത്തില്‍ ശരത്ത് (40), ഭാര്യ കൊല്ലം സ്വദേശി പ്രീതി (32) എന്നിവരാണ് മരിച്ചത്. ബുധനാഴ്ചയാണ് അല്‍ ഖസീം പ്രവിശ്യയിലെ ബുറൈദക്ക് സമീപം ഉനൈസയിലെ താമസ സ്ഥലത്ത് ഇരുവരെയും മരിച്ച നിലയില്‍ കണ്ടെത്തിയത്.
ജോലിക്ക് എത്താഞ്ഞതിനെ തുടര്‍ന്ന് സ്‌പോണ്‍സര്‍ ഫോണില്‍ ബന്ധപ്പെട്ടിട്ടും കിട്ടാതെ വന്നതോടെ അന്വേഷിച്ച് ഫ്‌ലാറ്റിലെത്തുകയായിരുന്നു. പൂട്ടിയ നിലയിലായിരുന്ന ഫ്‌ലാറ്റില്‍ തട്ടിവിളിച്ചിട്ടും മറുപടിയില്ലാത്തതിനെ തുടര്‍ന്ന് പൊലീസിന്റെ സഹായത്തോടെ വാതില്‍ തകര്‍ത്ത് അകത്ത് കയറി നോക്കുമ്പോഴാണ് ഇരുവരേയും മരിച്ച നിലയില്‍ കണ്ടെത്തിയത്. മുറിയില്‍ ശരത് തൂങ്ങിനില്‍ക്കുന്ന നിലയിലും പ്രീതി തറയില്‍ മരിച്ചുകിടക്കുന്ന നിലയിലുമാണ് കണ്ടെത്തിയത്.
മൃതദേഹങ്ങള്‍ ബുറൈദ സെന്‍ട്ര ആശുപത്രി മോര്‍ച്ചറിയിലേക്ക് മാറ്റി. മരണ കാരണങ്ങളൊന്നും വ്യക്തമല്ല. ദീര്‍ഘകാലമായി ഉനൈസയില്‍ ഇലക്ട്രിക്, പ്ലമ്പിങ് ജോലി ചെയ്തിരുന്ന ശരത് നാലു വര്‍ഷം മുമ്പാണ് പ്രീതയെ വിവാഹം കഴിച്ചത്. രണ്ട് മാസം മുമ്പാണ് സൗദിയിലേക്ക് കൊണ്ടുവന്നത്. ശരതിന്റെ പിതാവ്: മണിയനാചാരി. കൊല്ലം മാന്തോപ്പില്‍ അക്ഷരനഗര്‍ പ്രവീണ്‍ നിവാസില്‍ പരേതനായ വിശ്വനാഥന്‍, തങ്കം ദമ്പതികളുടെ മകളാണ് പ്രീതി. സഹോദരങ്ങള്‍: പ്രവീണ്‍, പ്രിയ. മരണാനന്തര നിയമനടപടികള്‍ക്കായി കനിവ് ജീവകാരുണ്യ കൂട്ടായ്മ രംഗത്തുണ്ട്.
സല്‍മാന്‍ ഖാന് നേരെയുള്ള വധഭീഷണി: നവംബര്‍ ഏഴിലെ ഭീഷണിക്ക് പിന്നില്‍ അടിപൊളി ട്വിസ്റ്റ്, ഭീഷണിപ്പെടുത്തിയ വ്യക്തിയും ഭീഷണിക്കു പിന്നിലെ കാരണവും വ്യക്തമായി
സല്‍മാന്‍ ഖാന് നേരെ വന്ന വധഭീഷണി സന്ദേശത്തില്‍ സിനിമാ കഥയെ വെല്ലുന്ന വന്‍ ട്വിസ്റ്റ്. സല്‍മാന്‍ ഖാന്റെ അടുത്ത ചിത്രമായ സിക്കന്ദറിന് വേണ്ടി പാട്ടെഴുതിയ സൊഹൈല്‍ പാഷയാണ് നവംബര്‍ ഏഴിലെ ഭീഷണി സന്ദേശത്തിന് പിന്നിലെന്ന് പൊലീസ് കണ്ടെത്തി. തന്റെ പാട്ട് ഹിറ്റ് ആകാന്‍ വേണ്ടി ഒപ്പിച്ച പണിയാണിതെന്നാണ് യൂട്യൂബര്‍ കൂടിയായ സൊഹൈല്‍ പറഞ്ഞതായാണ് പൊലീസ് പറയുന്നത്. കര്‍ണാടകയിലെ റായ്ചൂരില്‍ നിന്നാണ് സൊഹൈലിനെ പൊലീസ് അറസ്റ്റ് ചെയ്തത്.
നവംബര്‍ ഏഴിനാണ് മുംബൈ ട്രാഫിക് കണ്‍ട്രോള്‍ റൂം വാട്സ്ആപ്പ് നമ്പറിലേക്ക് ഭീഷണി സന്ദേശം വന്നത്. അഞ്ച് കോടി തന്നില്ലെങ്കില്‍ സല്‍മാന്‍ ഖാനെയും 'മേം സിക്കന്ദര്‍ ഹും' എന്ന പാട്ടെഴുതിയ ആളെയും കൊലപ്പെടുത്തുമെന്നായിരുന്നു ഭീഷണി.
ഇനി പാട്ടെഴുതാന്‍ പറ്റാത്ത രീതിയിലാകും അദ്ദേഹത്തിന്റെ അവസ്ഥയെന്നും ധൈര്യമുണ്ടെങ്കില്‍ സല്‍മാന്‍ ഖാന് രക്ഷിക്കട്ടേയെന്നും സന്ദേശത്തില്‍ ഉണ്ടായിരുന്നു. ലോറന്‍സ് ബിഷ്ണോയ് സംഘത്തിന്റെ പേരിലായിരുന്നു സന്ദേശം. സൊഹൈല്‍ തന്നെയായിരുന്നു ഭീഷണി സന്ദേശം അയച്ചത്.
പാട്ട് ഹിറ്റാകാനും തന്നെ നാലാള്‍ അറിയാനും വേണ്ടിയാണ് സൊഹൈല്‍ ഈ കൈവിട്ട കളിക്ക് ഇറങ്ങിയതെന്ന് പൊലീസ് പറയുന്നു. രാഷ്ട്രീയ നേതാവ് ബാബ സിദ്ദീഖി കൊല്ലപ്പെട്ടതിന് പിന്നാലെ ലോറന്‍സ് ബിഷ്ണോയ് സംഘത്തിന്റെ പേരില്‍ സല്‍മാന്‍ ഖാന് ഇടയ്ക്കിടെ ഭീഷണി സന്ദേശങ്ങള്‍ വരുന്നുണ്ട്. അതിനാല്‍ കനത്ത സുരക്ഷയാണ് നടന് ഏര്‍പ്പെടുത്തിയിരിക്കുന്നത്. റായ്ച്ചൂരിനടത്തുള്ള മാനവി ഗ്രാമത്തില്‍ വെച്ചാണ് സൊഹൈലിനെ പൊലീസ് പിടികൂടിയത്. സൊഹൈലിനെ മുംബൈ കോടതിയില്‍ ഹാജരാക്കി. രണ്ട് ദിവസത്തേക്ക് പൊലീസ് കസ്റ്റഡിയില്‍ വിട്ടു.
ഗ്രേറ്റര്‍ മാഞ്ചസ്റ്റര്‍ മലയാളി ഹിന്ദു കമ്മ്യൂണിറ്റി നടത്തിവരാറുള്ള മണ്ഡലകാല തീര്‍ത്ഥാടനം ഈ മാസം 23ന് നടക്കും, ബര്‍മ്മിംഗ്ഹാം ധര്‍മ്മശാസ്താ ക്ഷേത്രത്തില്‍ ഭക്തി സാന്ദ്രമായ ചടങ്ങുകള്‍
കഴിഞ്ഞ പത്ത് വര്‍ഷങ്ങളായി ഗ്രേറ്റര്‍ മാഞ്ചസ്റ്റര്‍ മലയാളി ഹിന്ദു കമ്മ്യൂണിറ്റി നടത്തിവരാറുള്ള മണ്ഡലകാല തീര്‍ത്ഥാടനം ബര്‍മ്മിംഗ്ഹാം ധര്‍മ്മശാസ്താ ക്ഷേത്രത്തിലേക്ക് ഈമാസം 23ന് നടത്തുന്നു. ഭക്തര്‍ നെയ്യ് മുദ്ര നിറച്ച് ഇരുമുടി കെട്ടേന്തി രാവിലെ 10 മണിയ്ക്ക് മാഞ്ചസ്റ്റര്‍ രാധാകൃഷ്ണ ക്ഷേത്രത്തില്‍ നിന്ന് ആചാര അനുഷ്ഠാനങ്ങളേടുള്ള ഭക്തി സാന്ദ്രമായ തീര്‍ത്ഥയാത്ര പുറപ്പെട്ട് ബാലാജി ക്ഷേത്രത്തില്‍ എത്തിച്ചേരുന്നതാണ്.
ഭക്തി സാന്ദ്രമായ നാമസങ്കീര്‍ത്തന ഭജനയ്ക്ക് ശേഷം നെയ്യ് അഭിഷേകം നവാഭിഷേകം പൂജകള്‍ക്ക് ശേഷം ദീപാരാധനയും ഹരിവരാസനം പാടി നടയടക്കുയും ചെയ്യുന്നു. അതിനു ശേഷം അന്നദാനവും ഉണ്ടായിരിക്കും. രാത്രി ഒന്‍പത് മണിയോടുകൂടി ഈ വര്‍ഷത്തെ തീര്‍ത്ഥാടനത്തിന് സമാപനം ആവും. അനുഷ്ഠാനങ്ങളോട് നടക്കുന്ന ഈ ഭക്തി സാന്ദ്രമായ ചടങ്ങുകളില്‍ പങ്കെടുക്കുവാന്‍ എല്ലാ അയ്യപ്പ ഭക്തരെയും ക്ഷണിക്കുന്നു.
കൂടുതല്‍ വിവരങ്ങള്‍ക്ക് ബന്ധപ്പെടുക
ഹരികുമാര്‍: 07403344590
ഗോപകുമാര്‍: 07932672467
സുധീര്‍: 07554 933007
യുകെയില്‍ രംഗ് ഇന്റര്‍നാഷണല്‍ കുച്ചുപ്പുഡി ഫെസ്റ്റിവലില്‍ മലയാളിയായ അരുണിമയുടെ പ്രത്യേക നൃത്താവതരണം, ഈ മാസം 17ന് കെന്‍സിംഗ്ടണില്‍
രംഗ് ഇന്റര്‍നാഷണല്‍ കുച്ചുപ്പുഡി ഫെസ്റ്റിവലില്‍ യുകെ മലയാളിയായ അരുണിമ കുമാര്‍ നൃത്തം അവതരിപ്പിക്കുവാന്‍ എത്തുന്നു. ഈമാസം 17ന് ഞായറാഴ്ച ലണ്ടന്‍ കെന്‍സിംഗ്ടണിലെ ഭവനില്‍ വൈകുന്നേരം അഞ്ചു മണിക്കാണ് അരുണിമയുടെ പ്രത്യേക നൃത്താവതരണം നടക്കുക. നാലിനും 85 വയസിനും ഇടയില്‍ പ്രായമുള്ള 100ഓളം കലാകാരന്മാരാണ് വേദിയില്‍ എത്തുക.
വൈകുന്നേരം അഞ്ചു മണിക്ക് മുഖ്യാതിഥി വിളക്ക് കൊളുത്തുന്നതോടെ ഉദ്ഘാടനവും കലാകാരന്മാരെ പ്രോത്സാഹിപ്പിക്കുന്നതിനുള്ള ലഘു പ്രഭാഷണവും തുടര്‍ന്ന് സംഗീത നാടക അക്കാദമി അവാര്‍ഡ് ജേതാവ് അരുണിമ കുമാറിന്റെ നേതൃത്വത്തിലുള്ള കലാപരിപാടികളും നടക്കും. ഹൗസ് ഓഫ് ലോര്‍ഡ്‌സിലെയും കോമണ്‍സിലെയും നിരവധി അംഗങ്ങളും ഈ മെഗാ ഇവന്റില്‍ പങ്കെടുക്കും.
ബ്രിട്ടനിലെ ഏറ്റവും പ്രശസ്തമായ, അവാര്‍ഡ് നേടിയ കുച്ചിപ്പുഡി സ്ഥാപനങ്ങളിലൊന്നാണ് അരുണിമ കുമാര്‍ ഡാന്‍സ് കമ്പനി. ആഗോളതലത്തില്‍ അംഗീകൃത നര്‍ത്തകിയും അധ്യാപികയും നൃത്തസംവിധായകയുമായ അരുണിമ കുമാറിന്റേത് ബ്രിട്ടനിലെ ഏറ്റവും വലിയ കുച്ചിപ്പുടി സ്ഥാപനമാണ്. അഞ്ചു രാജ്യങ്ങളിലായി 200-ലധികം വിദ്യാര്‍ത്ഥികളുണ്ട് അരുണിമയ്ക്ക്.
Most Read
British Pathram Recommends
