യുഎസ് സൈന്യത്തില്‍ നിന്നും ട്രാന്‍സ്‌ജെന്‍ഡര്‍മാരെ പുറത്താക്കുന്നതിനുള്ള ഉത്തരവില്‍ ഒപ്പുവെക്കാന്‍ ഒരുങ്ങി യുഎസ് പ്രസിഡന്റ് ഡൊണാള്‍ഡ് ട്രംപ്. ട്രാന്‍സ് വ്യക്തികളെ സൈന്യത്തില്‍ നിന്നു നീക്കാനുള്ള തീരുമാനത്തിനായിരിക്കും ജനുവരിയില്‍ യുഎസ് പ്രസിഡന്റ് ആയി അധികാരത്തിലെത്തുന്ന ട്രംപ് പ്രഥമ പരിഗണന നല്‍കുക എന്നാണ് വിവരം. ഇതിന്റെ ഭാഗമായുള്ള സുപ്രധാന ഉത്തരവില്‍ ഒപ്പുവെക്കാന്‍ ട്രംപ് തയ്യാറെടുക്കുകയാണ് എന്നാണ് റിപ്പോര്‍ട്ടുകള്‍. പ്രായം, സേവന കാലയളവ്, ആരോഗ്യം എന്നിവ നോക്കാതെ പുതിയ ഉത്തരവ് നിലവില്‍ വന്നാല്‍ 15000 ത്തോളം ട്രാന്‍സ്‌ജെന്‍ഡര്‍ വ്യക്തികള്‍ സൈന്യത്തില്‍ നിന്നും പുറത്താക്കപ്പെടും എന്നാണ് കണക്ക് കൂട്ട പെടുന്നത്. രാജ്യത്തെ സേവിക്കുന്നതിന് ജെന്‍ഡര്‍ നോക്കേണ്ട കാര്യമുണ്ടോ എന്ന് വിമര്‍ശകര്‍ അഭിപ്രായപ്പെടുമ്പോള്‍ ഇത് വിവാദമാക്കേണ്ട തീരുമാനം അല്ലെന്നും സൈന്യത്തിന്റെ ആധുനിക ആവശ്യങ്ങള്‍ക്ക് അനുസൃതമായി പ്രവര്‍ത്തിക്കാന്‍ ആകുന്നില്ല എന്നുമാണ് ട്രംപ് അനുകൂലികള്‍ വ്യക്തമാക്കുന്നത്. ട്രാന്‍സ്‌ജെന്‍ഡര്‍ വ്യക്തികളായ സൈനികരുടെ സേവനങ്ങള്‍ക്ക് നന്ദി പറഞ്ഞുകൊണ്ട് അവര്‍ക്ക് അര്‍ഹിക്കുന്ന ബഹുമാനത്തോടെ സര്‍വീസില്‍ നിന്ന് മാറ്റുകയാണ് വേണ്ടത് എന്നാണ് ഇവരുടെ പക്ഷം. സൈന്യത്തിലേക്ക് സേവന സന്നദ്ധരായി വന്നവരെ പുറത്താക്കാന്‍ ശ്രമിക്കുന്നത് പുതിയ ആളുകളെ സൈന്യത്തിലേക്ക് റിക്രൂട്ട് ചെയ്യാന്‍ സാധിക്കാത്ത സാഹചര്യത്തിലാണ് എന്ന വിമര്‍ശനവും ഉയരുന്നുണ്ട്. ട്രാന്‍സ്‌ജെന്‍ഡര്‍മാരെ സൈന്യത്തില്‍ ചേരുന്നതില്‍ നിന്നും ആദ്യതവണ പ്രസിഡന്റ് സ്ഥാനത്തെത്തിയപ്പോഴും ട്രംപ് വിലക്കിയിരുന്നു. ഇതുകൂടാതെ ട്രാന്‍സ്‌ജെന്‍ഡര്‍മാര്‍ക്ക് യു എസില്‍ ആരോഗ്യം, സ്‌പോര്‍ട്‌സ്, വിദ്യാഭ്യാസ മേഖലകളിലും നിയന്ത്രണമേര്‍പെടുത്തുമെന്നാണ് ലഭ്യമാകുന്ന വിവരം.

നയന്‍താര അഭിനയിച്ച ഗാനരംഗം ആസ്വദിച്ച് കാണുന്ന മക്കള്‍ ഉയിരിന്റെയും ഉലകിന്റെയും വീഡിയോ ആണ് ഇപ്പോള്‍ സോഷ്യല്‍ മീഡിയ കീഴടക്കുന്നത്. നാനും റൗഡി താന്‍ എന്ന ചിത്രത്തിലെ 'തങ്കമേ....' എന്ന് തുടങ്ങുന്ന ഗാനം ആസ്വദിച്ച് കാണുന്ന കുഞ്ഞുങ്ങളുടെ വീഡിയോ ആണ് വൈറലാകുന്നത്. പാട്ടിന്റെ വരികള്‍ക്ക് ഒപ്പം പാടാനും ഇരുവരും മറക്കുന്നില്ല. തങ്കമേ ഉന്നത്താന്‍ എന്നും അപ്പപ്പോ എന്നൊക്കെ ആര്‍ത്തുവിളിച്ചുള്ള കുഞ്ഞുങ്ങളുടെ വീഡിയോ കാണാന്‍ വളരെ ക്യൂട്ടാണ്. വിഘ്നേഷ് ശിവന്റെ ഇന്‍സ്റ്റഗ്രാം പേജിലാണ് വീഡിയോ പങ്കുവെച്ചിരിക്കുന്നത്. വീട്ടില്‍ ബെഡില്‍ ഇരുന്ന് ടിവിയില്‍ നോക്കും ഉയിരും ഉലകവും ഒന്നിച്ചാണ് അമ്മയുടെ ഗാനരംഗം ആസ്വദിച്ച് കാണുന്നത്. കമന്റ് ബോക്സ് നിറയെ നയന്‍സിന്റെയും വിക്കിയുടെയും പൊന്നോമനമക്കളുടെ ക്യൂട്ട്നെസിനെക്കുറിച്ചുള്ള കമന്റുകള്‍ മാത്രമേയുള്ളൂ. വിവാഹത്തിന് മുന്‍പ്, നയന്‍താരയും വിഗ്നേഷ് ശിവനും പരസ്പരം വിളിച്ചിരുന്ന പേരുകളാണ് ഉയിര്‍, ഉലകം എന്നത്. മക്കള്‍ പിറന്നപ്പോള്‍, അതേ പേരുകള്‍ തന്നെ അവര്‍ ഇരട്ട സഹോദരങ്ങള്‍ക്ക് നല്‍കുകയായിരുന്നു. ഈ പേരുകളിലൂടെ മക്കള്‍ എന്നാല്‍ തങ്ങള്‍ക്ക് ജീവനും ലോകവുമാണ് എന്ന് പറയാതെ പറയുക കൂടിയായിരുന്നു നയന്‍സും വിക്കിയും. ഉയിരിന്റെ യഥാര്‍ത്ഥ പേര് രുദ്രോനില്‍ എന്‍.ശിവ എന്നും ഉലകിന്റെ പേര് ദൈവിക് എന്‍.ശിവ എന്നുമാണ്. 2022 ജൂണ്‍ 9 നാണ് നയന്‍താരയും വിഘ്നേഷ് ശിവനും വിവാഹിതരായത്. വാടക ഗര്‍ഭപാത്രത്തിന്റെ സഹായത്തോടെയാണ് നയന്‍താരയും വിഗ്നേഷ് ശിവനും രണ്ടു മക്കളുടെ മാതാപിതാക്കളായത്. തങ്ങളുടെ സിനിമാ കരിയറിനൊപ്പം തന്നെ പാരന്റിംഗിനും ഏറെ പ്രാധാന്യം നല്‍കി ബാലന്‍സ്ഡ് ആയാണ് നയന്‍താരയും വിഘ്നേഷ് ശിവനും ഇപ്പോള്‍ മുന്നോട്ടു പോകുന്നത്. വളരെ സെലക്റ്റീവായി മാത്രം സിനിമകള്‍ ചെയ്ത് ബാക്കി സമയമത്രയും മക്കള്‍ക്കൊപ്പം ചെലവഴിക്കുകയാണ് ഇരുവരും. തമിഴകത്തെ പവര്‍ കപ്പിളാണ് നയന്‍താരയും വിഘ്നേഷ് ശിവനും. ഇപ്പോള്‍ കുഞ്ഞുങ്ങള്‍ കണ്ട് ആസ്വദിച്ച അതേ ഗാനമുള്ള സിനിമ തന്നെയാണ് കഴിഞ്ഞ ദിവസങ്ങളില്‍ വിവാദങ്ങള്‍ക്ക് തിരികൊളുത്തിയതും. നാനും റൗഡി താന്‍ ചിത്രത്തിലെ ബി.ടി.എസ് രംഗങ്ങള്‍ പകര്‍പ്പ് അവകാശം ലംഘിച്ച്, നയന്‍താരയുടെ ജീവിതകഥ പറയുന്ന ഡോക്യുമെന്ററിയില്‍ ഉപയോഗിച്ചതിന് നടനും ഈ ചിത്രത്തിന്റെ നിര്‍മാതാവുമായ ധനുഷ് 10 കോടി നഷ്ടപരിഹാരം ആവശ്യപ്പെട്ടിരുന്നു. ഈ വിവാദം കെട്ടടങ്ങാതെ നില്‍ക്കുകയാണ് ഇപ്പോഴും. ഇതിന് പിന്നാലെയാണ് വിഘ്നേഷ് ശിവന്‍ ഈ വീഡിയോ പുറത്തുവിട്ടത്.

ഒരു സിനിമാ പാരമ്പര്യവും ഇല്ലാതെ സിനിമയിലെത്തി തന്റേതായ സ്ഥാനം സ്വന്തമാക്കിയ താരമാണ് ആസിഫ് അലി. ആസിഫിന് മാത്രം കഴിയുന്ന പല കഥാപാത്രങ്ങളും താരം ചെയ്തു കഴിഞ്ഞു. ഇനിയും ഇതനുമപ്പുറം ആരാധകര്‍ താരത്തില്‍ നിന്നും പ്രതീക്ഷിക്കുന്നുണ്ട്. ആസിഫ് അലി നായകനായി അഭിനയിച്ച ലാല്‍ ജൂനിയര്‍ രചനയും സംവിധാനവും നിര്‍വഹിച്ച് 2013ല്‍ പുറത്തിറങ്ങിയ സിനിമയായിരുന്നു ഹണി ബീ. നിരവധി താര നിരകള്‍ ഉണ്ടായിരുന്ന ചിത്രത്തിന് അടുത്ത ഭാഗവും ഇറങ്ങിയിരുന്നു. ചിത്രത്തില്‍ സെബാന്‍ എന്ന സെബാസ്റ്റ്യന്‍ ആയിട്ടാണ് നടന്‍ അഭിനയിച്ചത്. തന്റെ ഇഷ്ട കഥാപാത്രങ്ങളില്‍ ഒന്നാണ് ഹണി ബീയിലെ സെബാന്‍ എന്ന് പറയുകയാണ് ആസിഫ് അലി. മിക്കവര്‍ക്കും ഇഷ്ടമുള്ള ഒരു സിനിമയാണ് ഹണി ബീ. ആ സിനിമയുടെ അടുത്ത ഭാഗം പ്രതീക്ഷിക്കാമോയെന്ന് ചോദിച്ചപ്പോള്‍ ആസിഫ് അതിന് പറഞ്ഞ മറുപടിയാണ് വൈറലാകുന്നത്. ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് നടന്റെ വെളിപ്പെടുത്തല്‍. 'ഹണി ബീ മിക്കവര്‍ക്കും ഇഷ്ടമുള്ള സിനിമയാണ്. ആ സിനിമയുടെ അടുത്ത പാര്‍ട്ട് പ്രതീക്ഷിക്കാമോയെന്ന് ചോദിച്ചാല്‍, അതിന് ഞാനല്ല ജീന്‍ പോളാണ് മറുപടി പറയേണ്ടത്. എനിക്ക് സത്യത്തില്‍ ഒരുപാട് ആഗ്രഹമുണ്ട്. എന്റെ ഇഷ്ട കഥാപാത്രങ്ങളില്‍ ഉള്‍പ്പെടുന്ന ഒന്നാണ് അതിലെ സെബാന്‍ എന്ന കഥാപാത്രം,' ആസിഫ് അലി പറയുന്നു. എന്റെ സിനിമയിലെ സ്റ്റൈലിങ്ങിനെ കുറിച്ച് ചോദിച്ചാല്‍, സത്യത്തില്‍ എന്റെ പേഴ്സണല്‍ ലൈഫിലും കുറച്ച് സ്റ്റൈല്‍ കോണ്‍ഷ്യസായ ആളാണ് ഞാന്‍. അതുകൊണ്ട് തന്നെ സ്റ്റൈലിങ്ങില്‍ എന്റേതായ ഒരു ഐഡന്റിറ്റി കൊണ്ടുവരാന്‍ എനിക്ക് ഒരുപാട് ഇഷ്ടമാണ്. അത്തരത്തില്‍ വ്യത്യസ്തമായ സ്റ്റൈലിലും ലുക്കിലും ചെയ്യാന്‍ സാധിക്കുന്ന സിനിമ വരണമെന്ന് ഞാന്‍ ആഗ്രഹിക്കുന്നുണ്ട്. ഇതുവരെയുള്ള സിനിമ നോക്കുകയാണെങ്കില്‍ ഹണി ബീ അത്തരത്തില്‍ ഒരു നല്ല സിനിമയായിരുന്നു. ഹണി ബീ പോലെയുള്ള ഒരു സിനിമ വരികയാണെങ്കില്‍ തീര്‍ച്ചയായും ഞാനത് ചെയ്തിരിക്കും,' ആസിഫ് അലി പറയുന്നു.

'സൂഫിയും സുജാതയും' എന്ന ചിത്രത്തില്‍ സൂഫിയായ് വേഷമിട്ട് പ്രേക്ഷക ഹൃദയം കവര്‍ന്ന താരമാണ് ദേവ് മോഹന്‍. 2020-ലാണ് 'സൂഫിയും സുജാതയും' പ്രേക്ഷകരിലേക്കെത്തുന്നത്. തന്റെ ആദ്യ സിനിമയിലൂടെ തന്നെ കാണികളെ ആകര്‍ഷിക്കാന്‍ താരത്തിന് സാധിച്ചു. ഇപ്പോള്‍ തിയറ്ററുകളില്‍ മികച്ച പ്രതികരണങ്ങളോടെ പ്രദര്‍ശനം തുടരുന്ന 'പരാക്രമം' ദേവ് മോഹന്റെ എട്ടാമത്തെ സിനിമയാണ്. ചിത്രത്തില്‍ തികച്ചും വ്യത്യസ്തമായ ഗെറ്റപ്പിലാണ് താരം പ്രത്യക്ഷപ്പെടുന്നത്. നവംബര്‍ 22ന് തിയറ്റര്‍ റിലീസ് ചെയ്ത ചിത്രം അര്‍ജ്ജുന്‍ രമേശാണ് തിരക്കഥ എഴുതി സംവിധാനം ചെയ്തത്. 2021-ല്‍ രണ്ടാമത്തെ ചിത്രമായ 'ഹോം' ഉം 2022-ല്‍ മൂന്നാമത്തെ ചിത്രമായ 'പന്ത്രണ്ട്' ഉം ചെയ്ത ശേഷം ദേവ് മോഹന്‍ നേരെ പോയത് തെലുങ്കിലേക്കാണ്. സമന്തായോടൊപ്പം 'ശാകുന്തളം'ത്തില്‍ സുപ്രധാന വേഷം കൈകാര്യം ചെയ്തതോടെ മലയാളത്തിന് പുറമെ തെലുങ്കിലും ചുവടുറപ്പിച്ചു. അദിതി റാവുവിന്റെയും സമന്തായുടെയും നായകനായ് എത്തിയ ദേവ് മോഹന് സൗത്ത് ഇന്ത്യയില്‍ വലിയ സ്വീകാര്യതയാണ് ലഭിച്ചത്. ഇന്ന് ഏറെ ആരാധകരുള്ളൊരു താരമായ് മാറിയിരിക്കുകയാണ് ദേവ് മോഹന്‍. തെലുങ്കില്‍ നിന്നും ഒരുപാട് ഓഫറുകള്‍ വരുന്നുണ്ടെങ്കിലും മലയാളത്തില്‍ തുടരാനാണ് താരം ഇഷ്ടപ്പെടുന്നത്. 2023-ല്‍ 'വാലാട്ടി', 'പുള്ളി' എന്നീ ചിത്രങ്ങളിലും അഭിനയിച്ചു. 'പരാക്രമം'ത്തില്‍ ദേവ് മോഹന്റെ കഥാപാത്രത്തിന് രണ്ട് കാലഘട്ടങ്ങളുണ്ട്. 18 വയസ്സുകാരനായ് പ്രത്യക്ഷപ്പെടാന്‍ വലിയ മേക്കോവര്‍ തന്നെ താരം നടത്തിയിട്ടുണ്ട്. 30കളിലെത്തിയ ഒരു നടന്‍ 18 വയസ്സുള്ളൊരാളായ് സ്‌ക്രീനില്‍ പ്രത്യക്ഷപ്പെടുക എന്നത് അത്ര എളുപ്പമുള്ള കാര്യമല്ല. 'സൂഫിയും സുജാതയും' പ്രേക്ഷക പ്രീതിയും നിരൂപക പ്രശംസയും നേടുന്നതോടൊപ്പം ചിത്രത്തിലെ അഭിനയത്തിന് നിരവധി പുരസ്‌കാരങ്ങളും ദേവ് മോഹനെ തേടിയെത്തി. മികച്ച പുതു താരത്തിനുള്ള മൂന്ന് പുരസ്‌കാരങ്ങളാണ് ഈ ഒരൊറ്റ സിനിമയിലൂടെ ദേവ് മോഹന്‍ സ്വന്തമാക്കിയത്.

യുകെ: കേരളത്തിലെ ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ഥികള്‍ നേടിയ അവിസ്മരണീയ വിജയത്തില്‍ ഓഐസിസി (യുകെ)യുടെ ആഭിമുഖ്യത്തില്‍ യുകെയിലെ വിവിധ സ്ഥലങ്ങളില്‍ ആഹ്ലാദ പ്രകടനങ്ങളും മധുര വിതരണവും സംഘടിപ്പിച്ചു. പലയിടങ്ങളിലും പ്രവര്‍ത്തകര്‍ കേക്ക് മുറിച്ചു സന്തോഷം പങ്കിടുകയും കൊടിതോരണങ്ങളും മുദ്രാവാക്യം വിളികളുമായി ആഹ്ലാദപ്രകടനം സംഘടിപ്പിക്കുകയും ചെയ്തു. യുകെയിലെ മാഞ്ചസ്റ്ററിലും ബാസില്‍ഡണിലും സംഘടിപ്പിച്ച വിജയാഘോഷ പരിപാടികള്‍ ഒഐസിസി (യുകെ) നാഷണല്‍ പ്രസിഡന്റ് ഷൈനു ക്ലെയര്‍ മാത്യൂസ് ഉദ്ഘാടനം ചെയ്തു. മാഞ്ചസ്റ്റര്‍ റീജിയന്റെ ആഭിമുഖ്യത്തില്‍ ബോള്‍ട്ടനില്‍ സംഘടിപ്പിച്ച ആഘോഷങ്ങള്‍ക്ക് ഒഐസിസി (യുകെ) ഔദ്യോഗിക വക്താവ് റോമി കുര്യാക്കോസ് നേതൃത്വം നല്‍കി. നാഷണല്‍ കമ്മിറ്റി അംഗം ബേബി ലൂക്കോസ്, റീജിയന്‍ പ്രതിനിധികളായ ജിപ്സണ്‍ ജോര്‍ജ് ഫിലിപ്സ്, സജി വര്‍ഗീസ് എന്നിവര്‍ പ്രസംഗിച്ചു. യുഡിഎഫ് നേടിയ ഗംഭീര വിജയം പ്രവര്‍ത്തകര്‍ കേക്ക് മുറിച്ചും മധുരവിതരണം നടത്തിയും കൊടിതോരണങ്ങളും മുദ്രാവാക്യം വിളികളുമായാണ് ആഘോഷമാക്കിയത്. ഋഷിരാജ്, റോബിന്‍, ബിന്ദു ഫിലിപ്പ്, ജില്‍ജോ, റിജോമോന്‍ റെജി, എല്‍ദോ നെല്ലിക്കല്‍ ജോര്‍ജ്, ജേക്കബ് വര്‍ഗീസ്, അനുരാജ്, റീന റോമി, ഹെയ്സല്‍ മറിയം തോമസ് തുടങ്ങിയവര്‍ പങ്കെടുത്തു. ഒഐസിസി (യുകെ) വൈസ് പ്രസിഡന്റ് ഫിലിപ്പ് കെ ജോണ്‍ നേതൃത്വം നല്‍കിയ ബാസില്‍ഡണ്‍ യൂണിറ്റിന്റെ ആഭിമുഖ്യത്തില്‍ സംഘടിപ്പിച്ച ആഘോഷ പരിപാടികളില്‍ സംഘടനയുടെ നാഷണല്‍ / റീജിയന്‍ ഭാരവാഹികളും മറ്റു പ്രവര്‍ത്തകരും പങ്കെടുത്തു. വര്‍ഗീയതയ്ക്കും സ്വജനപക്ഷപാതത്തിനും എതിരെ ജനനങ്ങള്‍ കേന്ദ്ര - സംസ്ഥാന സര്‍ക്കാരുകള്‍ക്ക് നല്‍കിയ ശക്തമായ താക്കീതാണ് യുഡിഎഫ് നേടിയ മിന്നും വിജയമെന്ന് നാഷണല്‍ പ്രസിഡന്റ് ഷൈനു ക്ലെയര്‍ മാത്യൂസ് പറഞ്ഞു. വരും ദിവസങ്ങളില്‍ യുകെയിലെ മറ്റു സ്ഥലങ്ങളിലും സമാനമായ ആഘോഷ പരിപാടികള്‍ സംഘടിപ്പിക്കുമെന്നും കൂട്ടിച്ചേര്‍ത്തു. ഉപതെരഞ്ഞെടുപ്പിന്റെ പ്രചരണ വേളയില്‍ പാലക്കാട്, ചേലക്കര, വയനാട് മണ്ഡലങ്ങളില്‍ ഓഐസിസി (യുകെ)യുടെ നേതൃത്വത്തില്‍ രൂപീകരിച്ച 50 അംഗ കര്‍മ്മസേനയുടെ നേതൃത്വത്തില്‍ നടത്തിയ പ്രവര്‍ത്തനം ഏവരുടെയും പ്രശംസ പിടിച്ചു പറ്റിയിരുന്നു. നേരിട്ടുള്ള വോട്ടഭ്യര്‍ത്ഥന, ഗൃഹ സന്ദര്‍ശനം, വാഹന പര്യടനം തുടങ്ങിയ പ്രവര്‍ത്തനങ്ങളിലൂടെ ശക്തമായ പ്രചരണമാണ് യുഡിഎഫ് സ്ഥാനാര്‍ഥികളുടെ വിജയത്തിനായി സംഘടന നടത്തിയത്. പ്രചാരണ പ്രവര്‍ത്തനങ്ങള്‍ക്ക് മാത്രമായി നാഷണല്‍ പ്രസിഡന്റ് ഷൈനു ക്ലെയര്‍ മാത്യൂസ്, ഔദ്യോഗിക വക്താവ് റോമി കുര്യാക്കോസ് എന്നിവര്‍ യുകെയില്‍ നിന്നും കേരളത്തില്‍ എത്തിയിരുന്നു. വയനാട് മണ്ഡലത്തിലെ പ്രവര്‍ത്തനങ്ങളില്‍ വൈസ് പ്രസിഡന്റ് ഫിലിപ്പ് കെ ജോണും സജീവ സാനിധ്യമായിരുന്നു.