പോലീസുകാര്‍ ശബരിമലയിലെ പതിനെട്ടാം പടിയില്‍ നിന്നും ഫോട്ടോഷൂട്ട് നടത്തിയത് വിവാദങ്ങള്‍ക്ക് ഇടയാക്കിയതോടെ സംഭവത്തില്‍ റിപ്പോര്‍ട്ട് ആവശ്യപ്പെട്ടിരിക്കുകയാണ് എഡിജിപി എസ് ശ്രീജിത്ത്. ഇക്കഴിഞ്ഞ തിങ്കളാഴ്ചയാണ് പതിനെട്ടാം പടിയില്‍ തിരിഞ്ഞുനിന്ന് പോലീസ് ഉദ്യോഗസ്ഥര്‍ ഫോട്ടോ എടുത്തത്. ചിത്രം സമൂഹമാധ്യമങ്ങളില്‍ പ്രചരിച്ചതോടെ ഇത് വിവാദങ്ങള്‍ക്ക് വഴിവെക്കുകയും ചെയ്തു. സംഭവം വിവാദമായതോടെ സന്നിധാനം സ്‌പെഷ്യല്‍ ഓഫീസര്‍ കെ ഇ ബൈജുവിനോട് എഡിജിപി എസ് ശ്രീജിത്ത് റിപ്പോര്‍ട്ട് ആവശ്യപ്പെട്ടിട്ടുണ്ട്. ആദ്യ ബാച്ചിലെ പോലീസുകാരാണ് ശബരിമല ഡ്യൂട്ടിക്ക് ശേഷം പതിനെട്ടാം പടിയില്‍ പുറംതിരിഞ്ഞു നിന്ന് ഫോട്ടോ എടുത്തത്. പുറം തിരിഞ്ഞു നിന്നുള്ള പോലീസുകാരുടെ ചിത്രങ്ങള്‍ സമൂഹമാധ്യമത്തില്‍ വ്യാപകമായി പ്രചരിച്ചതോടെ പോലീസുകാര്‍ക്കെതിരെ വിശ്വഹിന്ദു പരിഷത്ത് രംഗത്ത് വരികയും മുഖ്യമന്ത്രിയാണ് പോലീസ് ഉദ്യോഗസ്ഥര്‍ക്ക് ഇതിന് ഒത്താശ നല്‍കിയതില്‍ ഒന്നാംപ്രതിയെന്ന് ആരോപിക്കുകയും ചെയ്തു. വിശ്വഹിന്ദുപരിഷത്ത് സംസ്ഥാന പ്രസിഡന്റ് വിജിതമ്പി, ജനറല്‍ സെക്രട്ടറി വി ആര്‍ രാജശേഖരന്‍ എന്നിവരാണ് ആരോപണം ഉന്നയിച്ചത്. ആചാരലംഘനം നടത്തിയ ഉദ്യോഗസ്ഥര്‍ക്കെതിരെ കര്‍ശന നടപടികള്‍ സ്വീകരിക്കണമെന്നും അയ്യപ്പ വിശ്വാസികളായ ഉദ്യോഗസ്ഥരെ ഡ്യൂട്ടിക്ക് നിയോഗിക്കണമെന്നും സംഭവത്തില്‍ പ്രതിഷേധവുമായി രംഗത്തെത്തിയ കേരള ക്ഷേത്രസംരക്ഷണ സമിതിയുടെ സംസ്ഥാന സെക്രട്ടറി വി കെ ചന്ദ്രന്‍ ആവശ്യപ്പെട്ടു. മേല്‍ശാന്തിയും തന്ത്രിയും അടക്കമുള്ള ആചാര്യന്മാര്‍ പോലും നടയടച്ച് ഇറങ്ങുമ്പോള്‍ പുറകോട്ടാണ് ഇറങ്ങുന്നത് എന്നും അദ്ദേഹം പറഞ്ഞു.

കോഴിക്കോട്: പന്തീരങ്കാവ് ഗാര്‍ഹിക പീഡനക്കേസില്‍ പ്രതി രാഹുല്‍ പി.ഗോപാല്‍ റിമാന്‍ഡില്‍. കോഴിക്കോട് ഫസ്റ്റ് ക്ലാസ് മജിസ്ട്രേറ്റ് കോടതിയാണ് റിമാന്‍ഡ് ചെയ്തത്. യുവതിയെ വീണ്ടും മര്‍ദിച്ചതില്‍ രാഹുലിനെതിരെ വധശ്രമത്തിനും ഭര്‍തൃപീഡനത്തിനും കേസെടുത്തിരുന്നു. ഇന്നലെ രാത്രിയാണ് കണ്ണിനും ചുണ്ടിനും കഴുത്തിനും പരിക്കുമായി യുവതിയെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. വീട്ടിലും ആംബുലന്‍സിലുംവെച്ച് ഭര്‍ത്താവ് രാഹുല്‍ പി.ഗോപാല്‍ മര്‍ദിച്ചെന്ന് യുവതി പൊലീസിനോട് പറഞ്ഞു. ഇന്നലെ പരാതി ഇല്ലെന്ന് എഴുതി നല്‍കി എങ്കിലും ഇന്ന് പരാതി നല്‍കുകയായിരുന്നു. പെണ്‍കുട്ടിയുടെ മൊഴി പോലീസ് രേഖപ്പെടുത്തി. പെണ്‍കുട്ടിയുടെ ആവശ്യപ്രകാരം സര്‍ട്ടിഫിക്കറ്റുകള്‍ രാഹുലിന്റെ വീട്ടില്‍ നിന്നും കണ്ടെടുക്കാനായി പോലീസ് വീട്ടില്‍ പരിശോധന നടത്തുകയാണ്. മദ്യപിച്ച് ബഹളമുണ്ടാക്കിയതിന് രാഹുലിനെ കഴിഞ്ഞ ദിവസം തന്നെ പൊലീസ് കരുതല്‍ തടങ്കലിലെടുത്തിരുന്നു. വധശ്രമം ഉള്‍പ്പെടെ ചുമത്തി നേരത്തെയെടുത്തിരുന്ന കേസ്, പരാതിയില്ലെന്ന് യുവതി ഹൈക്കോടതിയില്‍ സത്യവാങ്മൂലം നല്‍കിയതിനെ തുടര്‍ന്നാണ് അവസാനിപ്പിച്ചത്. ഇതേതുടര്‍ന്നാണ് യുവതി വീണ്ടും രാഹുല്‍ പി.ഗോപാലിനൊപ്പം പോയത്. ഒന്നരമാസം മുമ്പാണ് ആദ്യ കേസ് ഹൈക്കോടതി റദ്ദാക്കിയതിനെ തുടര്‍ന്ന് ഇരുവരും കോഴിക്കോട്ട് പന്തീരങ്കാവിലെ രാഹുലിന്റെ വീട്ടില്‍ താമസം തുടങ്ങിയത്. മകളെ ഫോണില്‍ വിളിക്കാനും സംസാരിക്കാനും രാഹുല്‍ സമ്മതിക്കില്ല. ഫോണ്‍ രാഹുല്‍ സ്വന്തം കയ്യിലാണ് വച്ചതെന്നും പെണ്‍കുട്ടിയുടെ അച്ഛന്‍ ആരോപിച്ചു. കഴിഞ്ഞ ദിവസം ഫോണ്‍ രാഹുല്‍ പൊട്ടിച്ചു കളഞ്ഞു. സമ്മര്‍ദം മൂലമാണ് ആദ്യത്തെ പരാതിയില്‍ നിന്ന് പിന്‍വാങ്ങിയത്. അന്ന് ഇനി വീഴ്ച ഉണ്ടാകില്ലെന്ന് രാഹുല്‍ ബോധിപ്പിച്ചു, മകളോട് ക്ഷമയും പറഞ്ഞു. അങ്ങനെയാണ് കേസില്‍ നിന്ന് പിന്മാറിയതെന്നും അച്ഛന്‍ ചൂണ്ടിക്കാട്ടി. ഭക്ഷണത്തില്‍ ഉപ്പു പോരെന്നതടക്കമുള്ള കാരണങ്ങള്‍ പറഞ്ഞ് ഭര്‍ത്താവ് തന്നെ ക്രൂരമായി മര്‍ദ്ദിച്ചെന്ന പുതിയ പരാതിയുമായാണ് യുവതി പോലീസിനെ സമീപിച്ചത്. മുഖത്തും ശരീരത്തിലും മര്‍ദ്ദനമേറ്റത്തിന്റെ പാടുകളും ആയി ഇന്നലെ രാത്രി കോഴിക്കോട് മെഡിക്കല്‍ കോളേജില്‍ എത്തിയ യുവതി ഇന്നലെ രാവിലെയാണ് സ്വന്തം വീട്ടുകാര്‍ക്കൊപ്പം പൊലീസില്‍ പരാതി നല്‍കാന്‍ എത്തിയത്.

മോസ്‌കോ: റഷ്യയില്‍ നിയമവിരുദ്ധമായി കണക്കാക്കുന്ന ഉള്ളടക്കങ്ങള്‍ പ്രചരിപ്പിച്ചതിന് ടെലഗ്രാമിന് പിഴ. നിയമവിരുദ്ധമായ ഉള്ളടക്കങ്ങള്‍ നീക്കം ചെയ്യുന്നതില്‍ ടെലഗ്രാം പരാജയപ്പെട്ടുവെന്ന് കാണിച്ചാണ് ടെലഗ്രാമിന് റഷ്യന്‍ കോടതി പിഴ വിധിച്ചത്. ഏഴ് മില്യന്‍ റൂബിള്‍ (ഇന്ത്യന്‍ രൂപ ഏകദേശം 56.73 ലക്ഷം) ആണ് പിഴയായി ചുമത്തിയത്. റഷ്യന്‍ നിയമപ്രകാരം രാജ്യത്ത് അനുവദനീയമല്ലാത്ത ഉള്ളടക്കം പ്ലാറ്റ്‌ഫോമിലൂടെ പ്രചരിപ്പിച്ചു എന്നാണ് കുറ്റം. മയക്കുമരുന്ന് ഉപയോഗം, അപകരമായ വിനോദങ്ങള്‍, വീട്ടിലുണ്ടാക്കിയ ആയുധങ്ങളെയും സ്‌ഫോടക വസ്തുക്കളെയും കുറിച്ചുള്ള വിവരങ്ങള്‍, തീവ്രവാദികളോ ആയി പ്രഖ്യാപിക്കുന്ന ഗ്രൂപ്പുകള്‍ എന്നിവയെക്കുറിച്ചുള്ള പോസ്റ്റുകള്‍ നിരോധിതമാണ്. എന്നാല്‍ ഇതിനേക്കുറിച്ച് വിശദവിവരങ്ങള്‍ പുറത്തുവിടാന്‍ കോടതി തയാറായിട്ടില്ല. സമാനമായ മറ്റൊരു കേസില്‍ കഴിഞ്ഞ മാസം നാല് മില്യന്‍ റൂബിളും പിഴ ചുമത്തിയിരുന്നു. ആഗോള തലത്തില്‍ 900 മില്യന്‍ ഉപയോക്താക്കളുള്ള ടെലഗ്രാം നിലവില്‍ ലോകത്തിലെ ഏറ്റഴും വലിയ മെസേജിങ് പ്ലാറ്റ്‌ഫോമുകളിലൊന്നാണ്. റഷ്യയിലും വലിയ സൂസര്‍ ബേസാണ് ടെലഗ്രാമിനുള്ളത്. ഇന്ത്യ ഉള്‍പ്പെടെ നിരവധി രാജ്യങ്ങളില്‍ സമീപകാലത്ത് ടെലഗ്രാമിന് സര്‍ക്കാര്‍ തലത്തില്‍ തിരിച്ചടി നേരിട്ടിരുന്നു. ആഗസ്റ്റില്‍ ടെലഗ്രാം സി.ഇ.ഒ പാവേല്‍ ദുരോവ് പാരീസില്‍ അറസ്റ്റിലായിരുന്നു. ടെലഗ്രാമില്‍ നടക്കുന്ന നിയമവിരുദ്ധ പ്രവര്‍ത്തനങ്ങളുടെ പേരിലായിരുന്നു അറസ്റ്റ്. തുടര്‍ന്ന് പാവേല്‍ ദുരോവിനെതിരെ അന്വേഷണം നടത്താമെന്ന് ഫ്രഞ്ച് കോടതി ഉത്തരവിടുകയും ചെയ്തു. ദുരോവിന് ജാമ്യം അനുവദിച്ചുവെങ്കിലും ഫ്രാന്‍സ് വിടുന്നതിന് കോടതി വിലക്കേര്‍പ്പെടുത്തി. ഇതോടെ വിവിധ രാജ്യങ്ങളില്‍ ടെലഗ്രാം നിരോധിക്കുമെന്ന വാര്‍ത്തകളും സജീവമായി. ഇതിന്റെ ചുവടുപിടിച്ച് ഇന്ത്യയില്‍ ടെലഗ്രാം നിരോധനം ഏര്‍പ്പെടുത്തുമെന്ന പ്രചാരണവും സമൂഹമാധ്യമങ്ങളില്‍ സജീവമായി. എന്നാല്‍, നിലവില്‍ കേന്ദ്രസര്‍ക്കാര്‍ ടെലഗ്രാമിന് നിരോധനം ഏര്‍പ്പെടുത്തുന്നതിനുള്ള നീക്കങ്ങള്‍ തുടങ്ങിയിട്ടില്ലെന്നതാണ് യാഥാര്‍ഥ്യം. ടെലഗ്രാമിനെതിരെ ഉയര്‍ന്ന ആരോപണങ്ങള്‍ അന്വേഷിക്കാന്‍ കേന്ദ്രസര്‍ക്കാര്‍ നിര്‍ദേശം നല്‍കിയിട്ടുണ്ട്. പണം തട്ടല്‍, ചൂതാട്ടം ഉള്‍പ്പടെയുള്ള നിയമവിരുദ്ധ പ്രവര്‍ത്തനങ്ങള്‍ നടക്കുന്നുവെന്ന റിപ്പോര്‍ട്ടുകളെ തുടര്‍ന്നായിരുന്നു നിര്‍ദേശം.

പ്രായത്തെ വെല്ലുന്ന ബുദ്ധിയുമായി ഒരു പത്തൊമ്പതുകാരി ഗിന്നസ് വേള്‍ഡ് റെക്കോര്‍ഡില്‍ ഇടം നേടി. ജീവിതത്തിന്റെ റിയല്‍ ടേണിങ് പോയന്റില്‍ കരിയര്‍ തിരഞ്ഞെടുക്കേണ്ട സമയത്ത് ലോകത്തിലെ ഏറ്റവും പ്രായം കുറഞ്ഞ വനിത ചാര്‍ട്ടേഡ് അക്കൗണ്ടന്റ് എന്ന ഗിന്നസ് റെക്കോഡ് സ്വന്തമാക്കിയിരിക്കുകയാണ് ഒരു മിടുക്കി. നന്ദിനി അഗര്‍വാള്‍ എന്ന 19കാരി ആണ് ലോകത്തിലെ ഏറ്റവും പ്രായം കുറഞ്ഞ വനിത ചാര്‍ട്ടേഡ് അക്കൗണ്ടന്റ് എന്ന ഗിന്നസ് റെക്കോഡ് സ്വന്തമാക്കിയിരിക്കുന്നത്. മധ്യപ്രദേശിലെ മൊറേന സ്വദേശിയായ ഈ മിടുക്കി സി.എ ഫൈനല്‍ പരീക്ഷയില്‍ 800ല്‍ 614 മാര്‍ക്കോടെ അഖിലേന്ത്യ തലത്തില്‍ ഒന്നാം റാങ്ക് കരസ്ഥമാക്കി. 13ാം വയസ്സില്‍ പത്താം ക്ലാസ് ബോര്‍ഡ് പരീക്ഷയും 15ാം വയസ്സില്‍ 12ാം ക്ലാസ് പരീക്ഷയും എഴുതി വിജയിക്കാന്‍ നന്ദിനിക്കായി. തന്റെ സ്‌കൂള്‍ സന്ദര്‍ശിച്ച ഒരു ഗിന്നസ് റെക്കോഡ് ഉടമയില്‍നിന്ന് പ്രചോദനം ഉള്‍ക്കൊണ്ടാണ് നന്ദിനി ഈ നേട്ടത്തിലേക്ക് നടന്നുകയറിയത്. ഈ പ്രയാണത്തില്‍ നന്ദിനിക്ക് പിന്തുണയുമായി ജ്യേഷ്ഠന്‍ കൂടെയുണ്ടായിരുന്നു. അദ്ദേഹവും സി.എ പരീക്ഷകള്‍ക്ക് തയാറെടുക്കുകയായിരുന്നു. റാങ്ക് ലിസ്റ്റില്‍ നന്ദിനി ഒന്നാമതെത്തിയപ്പോള്‍ സഹോദരന്‍ 18ാം റാങ്ക് കരസ്ഥമാക്കി.

ലോകത്തിലെ ഏറ്റവും ഉയരം കൂടിയ സ്ത്രീയായ റുമൈസ ഗെല്‍ഗിയും ലോകത്തിലെ ഏറ്റവും ഉയരം കുറഞ്ഞ സ്ത്രീയായ ജ്യോതി ആംഗേയും തമ്മില്‍ കണ്ടുമുട്ടി. ഗിന്നസ് വേള്‍ഡ് റെക്കോര്‍ഡ്‌സ് തങ്ങളുടെ 20 -ാം വാര്‍ഷികം ആഘോഷിച്ച വേളയിലാണ് ലോകം തികച്ചും സവിശേഷമായ ഈ രംഗത്തിന് സാക്ഷ്യം വഹിച്ചത്. ലണ്ടനിലെ ആഡംബര ഹോട്ടലായ സവോയിയിലാണ് ഇരുവരും തമ്മില്‍ കണ്ടുമുട്ടിയത്. റുമൈസയും ജ്യോതിയും ഒരു ചായക്ക് മുന്നില്‍ ഒരുമിച്ചപ്പോള്‍ അത് വളരെ സവിശേഷമായ മുഹൂര്‍ത്തമായി മാറി, ലോകത്തിന് വലിയ കൗതുകം സമ്മാനിച്ച കാഴ്ചയും. 215.16 സെന്റിമീറ്റര്‍ ( 7 അടി 7 ഇഞ്ച് ) ആണ് തുര്‍ക്കിക്കാരിയായ റുമൈസയുടെ ഉയരം. എന്നാല്‍, ഈ ഉയരം വെറുതെ വന്നതല്ല, 'വീവര്‍ സിന്‍ഡ്രോം' എന്ന ജനിതക രോഗത്തിന്റെ ഭാഗമായാണ് റുമൈസയ്ക്ക് ഇത്രയും അസാധാരണമായ ഉയരമുണ്ടായതത്രെ. അതുപോലെ തന്നെ ഈ ഉയരം കാരണം അവള്‍ക്കുണ്ടായ ആരോഗ്യപ്രശ്‌നങ്ങളും ചില്ലറയല്ല. എന്നിരുന്നാലും ഗിന്നസ് വേള്‍ഡ് റെക്കോര്‍ഡ്‌സ് ലോകത്തിലെ ഏറ്റവും ഉയരമുള്ള സ്ത്രീയായി തെരഞ്ഞെടുത്തത് അവളില്‍ ഈ വേദനകള്‍ക്കിടയിലും സന്തോഷമുണ്ടാക്കിയിരുന്നു. അതേസമയം ജ്യോതി ആംഗേയുടെ നീളം രണ്ടടിയാണ്, 61.95 സെന്റീമീറ്റര്‍. അക്കന്‍ഡ്രോപ്ലാസിയ എന്ന അവസ്ഥയാണ് ജ്യോതിയുടെ ഈ ഉയരക്കുറവിന് കാരണം. ഫുജി ടിവിയില്‍ വന്ന ഒരു റിയാലിറ്റി ഷോയിലൂടെയാണ് ജ്യോതി പ്രശസ്തി നേടിയത്. എന്തായാലും ഇരുവരും ഈ കണ്ടുമുട്ടല്‍ വളരെ ഹൃദ്യമായ അനുഭവമായിട്ടാണ് പറയുന്നത്. ഉയരത്തിന്റെ കാര്യത്തില്‍ വലിയ വ്യത്യാസമുണ്ടെങ്കിലും പൊതുവായ പല കാര്യങ്ങളും തങ്ങളെ ചേര്‍ത്തു നിര്‍ത്തുന്നു എന്നും ഇവര്‍ പറയുന്നു. തന്നില്‍ നിന്നും ഇത്രയും വ്യത്യാസമുള്ള ഒരാളെ കണ്ടുമുട്ടുമെന്ന് കരുതിയില്ല, ഇത് വലിയ സന്തോഷമുണ്ടാക്കുന്നു എന്നാണ് റുമൈസ പറഞ്ഞത്.