ലണ്ടൻ: സ്വന്തം ലേഖകൻ

യുകെയിലെ ഈവർഷത്തെ പുതുവത്സര ആഘോഷ പരിപാടികളെല്ലാം വെള്ളത്തിൽ മുങ്ങും. യുകെ അംഗരാജ്യങ്ങളിൽ ഏതാണ്ട് എല്ലായിടത്തും ഒരേപോലെ മഞ്ഞും മഴയും കാറ്റും വെള്ളപ്പൊക്കവും ന്യൂ ഇയർ ദിനംവരെ തുടരുമെന്നാണ് മെറ്റ് ഓഫീസ് മുന്നറിയിപ്പ്.

പുതുവത്സര രാവിലും  പുതുവത്സര ദിനത്തിലും യുകെയുടെ ചില ഭാഗങ്ങളിൽ മണിക്കൂറിൽ 70 മൈൽ വേഗതയിൽ കാറ്റടിയ്ക്കും. അതോടൊപ്പം മഴ, മഞ്ഞ്, എന്നിവയ്ക്കുള്ള യെല്ലോ കാലാവസ്ഥാ മുന്നറിയിപ്പുകളും നൽകിയിട്ടുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

നോർത്തേൺ അയർലൻഡ്, നോർത്തേൺ ഇംഗ്ലണ്ട്, സ്കോട്ട്ലൻഡിൻ്റെ ചില ഭാഗങ്ങൾ എന്നിവിടങ്ങളിലും  യുകെയുടെ ഭൂരിഭാഗം ഭാഗങ്ങളിലും ചൊവ്വാഴ്ച മുതൽ യെല്ലോ വാണിംഗ് നിലവിലുണ്ട്.

യെല്ലോ മുന്നറിയിപ്പുകളുടെ പുതിയ പരമ്പര തിങ്കളാഴ്ച വെളുപ്പിനെ 00:00 GMT മുതൽ പ്രാബല്യത്തിൽ വരാൻ തുടങ്ങുകയും ജനുവരി 2 ന് 06:00 GMT വരെ ചില പ്രദേശങ്ങളിൽ നിലനിൽക്കുകയും ചെയ്യും.

മഞ്ഞുപെയ്ത്തിനു പുറമേ, കനത്ത മഴയെത്തുടർന്നുള്ള വെള്ളപ്പൊക്കം വ്യാപകമായ ഗതാഗത തടസ്സത്തിനും കാരണമാകുമെന്ന് മുന്നറിയിപ്പുകളിൽ പറയുന്നു. അതിനാൽത്തന്നെ ന്യൂ ഇയർ രാത്രിയിലേയും ദിനത്തിലേയും  ആഘോഷത്തിനു പോകുന്നവർ പ്രത്യേക ജാഗ്രതാ മുൻകരുതലുകൾ എടുക്കണമെന്നും ആവശ്യപ്പെടുന്നു.

ആഘോഷങ്ങൾക്ക് വീടുവിട്ടിറങ്ങുന്നവരും യാത്രചെയ്യുന്നവരും മഞ്ഞ്, മഴ, കാറ്റ് എന്നീ പ്രതികൂല കാലാവസ്ഥകളെയെല്ലാം പ്രതിരോധിക്കാൻ കഴിയുന്ന തയ്യാറെടുപ്പുകൾ നടത്തേണ്ടതുണ്ട്. റോഡ്, റെയിൽ, വ്യോമ ഗതാഗത മാർഗങ്ങളെയെല്ലാം പ്രതികൂല കാലാവസ്ഥ കാര്യമായി ബാധിക്കും.

പുതുവത്സര രാവിൽ, പടിഞ്ഞാറൻ സ്കോട്ട്ലൻഡിൻ്റെ ചില ഭാഗങ്ങളിൽ 100-140 മില്ലിമീറ്റർ (3.9-5.5 ഇഞ്ച്) വരെ മഴ പെയ്തേക്കാം, ഇത് പ്രാദേശിക വെള്ളപ്പൊക്കത്തിലേക്ക് നയിച്ചേക്കാം. രാജ്യത്തിൻ്റെ വടക്കൻ ഭാഗങ്ങളിലും മഞ്ഞുവീഴ്ച ഉണ്ടായേക്കാം.

ഇംഗ്ലണ്ട്, നോർത്തേൺ അയർലൻഡ്, വെയിൽസ് എന്നിവിടങ്ങളിലും മഴ പെയ്യും. വെയിൽസിൽ പ്രത്യേകിച്ച് മഴ കനത്തതാകും. എല്ലായിടത്തും കാറ്റുണ്ടാകുമെങ്കിലും, സതേൺ ഇംഗ്ലണ്ടിൽ അത് വളരെ കുടുതലാകും.

സ്കോട്ടിഷ് പരിസ്ഥിതി സംരക്ഷണ ഏജൻസി (സെപ) വടക്കുപടിഞ്ഞാറൻ, സെൻട്രൽ ഹൈലാൻഡ് എന്നിവിടങ്ങളിലെ ആളുകളോട് വെള്ളപ്പൊക്കം പ്രതീക്ഷിക്കുന്നതിനാൽ എന്തിനും ഒഴിപ്പിക്കാൻ തയ്യാറായിരിക്കാൻ അഭ്യർത്ഥിച്ചു.

എഡിൻബറോയിൽ നടക്കുന്ന സ്കോട്ട്‌ലൻഡിലെ ഏറ്റവും വലിയ ഹോഗ്മാനേ ആഘോഷത്തിൽ പങ്കെടുക്കുന്നവർ എല്ലാ കാലാവസ്ഥയ്ക്കും അനുയോജ്യമായ വസ്ത്രം ധരിക്കാനും അപ്‌ഡേറ്റുകൾക്കായി സോഷ്യൽ മീഡിയ പരിശോധിക്കാനും നിർദ്ദേശിക്കുന്നു.

പുതുവർഷത്തിൽ യാത്ര ചെയ്യുന്നവരും പ്ലാനുകളുള്ളവരും ഏറ്റവും പുതിയ കാലാവസ്ഥാ പ്രവചനങ്ങൾ പരിശോധിക്കാൻ അഭ്യർത്ഥിക്കുന്നു. വെളുപ്പിനേയും പ്രഭാതത്തിലും കനത്ത മുടൽമഞ്ഞിനും സാധ്യത. ആ സമയങ്ങളിൽ യാത്രചെയ്യുന്നവർ, കാഴ്ച മറഞ്ഞും ഐസിൽ തെന്നിയും  വാഹനങ്ങൾ  കൂട്ടിയിടിക്കാനും നിയന്ത്രണം വിടാനുമുള്ള സാധ്യത മുൻകൂട്ടി കണ്ട്  ജാഗ്രത പാലിക്കണം.

ന്യൂ ഇയർ ദിനത്തിൽ യുകെയിലുടനീളം ന്യൂനമർദത്തിൻ്റെ മറ്റൊരു മേഖല നീങ്ങുന്നതിനാൽ കൂടുതൽ വ്യാപകമായ തടസ്സം പ്രതീക്ഷിക്കുന്നു. ഏറ്റവും ശക്തമായ കാറ്റ് ഇംഗ്ലണ്ടിലും വെയിൽസിലും ആയിരിക്കും, തെക്കും പടിഞ്ഞാറും തീരങ്ങളിലും കുന്നുകളിലും 70 മൈൽ വേഗതയിൽ കാറ്റ് വീശും.

യുകെയിൽ ഉടനീളം 30 മില്ലിമീറ്റർ കനത്ത മഴയാണ് പ്രതീക്ഷിക്കുന്നത്. വെയിൽസിൽ ബുധനാഴ്ച മഴ ശക്തമാകുമെന്ന് പ്രവചനമുണ്ട്, ഇത് വെള്ളപ്പൊക്കത്തിന് കാരണമാകും.

വടക്കൻ അയർലൻഡ്, സ്കോട്ട്ലൻഡ്, വടക്കൻ ഇംഗ്ലണ്ട് എന്നിവിടങ്ങളിൽ മഞ്ഞുവീഴ്ച ഗതാഗത തടസ്സത്തിന് ഇടയാക്കിയേക്കാം. ചില പ്രദേശങ്ങളിൽ 10 സെൻ്റീമീറ്റർ മഞ്ഞുവീഴ്ച ഉണ്ടാകുമെന്ന് കാലാവസ്ഥാ നിരീക്ഷകർ പറഞ്ഞു.

കാലാവസ്ഥ ദുഷ്‌കരമായതിനാൽ ചില ലൈനുകളിലെ ട്രെയിനുകളുടെ വേഗത കുറയ്ക്കേണ്ടിവരുമെന്ന് നെറ്റ്‌വർക്ക് റെയിൽ അറിയിച്ചു.

കനത്ത മൂടൽമഞ്ഞ് വാരാന്ത്യത്തിൽ യുകെയിലെ ചില പ്രധാന വിമാനത്താവളങ്ങളിൽ നൂറുകണക്കിന് വിമാനങ്ങൾക്ക് തടസ്സം സൃഷ്ടിച്ചതിനെ തുടർന്നാണ് യെല്ലോ  കാലാവസ്ഥാ മുന്നറിയിപ്പ് .

ഗാറ്റ്‌വിക്ക് എയർപോർട്ട് ഞായറാഴ്ചയും കാലതാമസം റിപ്പോർട്ട് ചെയ്തു. കൂടാതെ മാഞ്ചസ്റ്റർ, ഗ്ലാസ്‌ഗോ, കാർഡിഫ് എന്നിവിടങ്ങളിലെ വിമാനങ്ങളെയും വെള്ളി, ശനി ദിവസങ്ങളിൽ കാഴ്ചക്കുറവ് ബാധിച്ചു.

31നു  ബുധനാഴ്ച രാത്രിയും തടസ്സം തുടർന്നേക്കും. ജനുവരി 2 വ്യാഴാഴ്ച പുലർച്ചെവരെ ഈ കാലാവസ്ഥ തുടരും. എന്നാൽ വ്യാഴാഴ്ച മുതൽ അടുത്ത വാരാന്ത്യം വരെ മഞ്ഞുവീഴ്ച്ച കനക്കുകയും  എല്ലായിടത്തും തണുപ്പ് വ്യാപകമായിരിക്കുകയും  ചെയ്യും.

മിക്ക സ്ഥലങ്ങളിലും പകൽ സമയത്ത് വരണ്ടതും വെയിലുമുള്ള കാലാവസ്ഥ  ആയിരിക്കും. എന്നാൽ ശീതകാല മഴ വടക്കൻ പ്രദേശങ്ങളെ ബാധിക്കുകയും പകലും മഞ്ഞുമൂടിയ അവസ്ഥയിലേക്ക് നയിക്കുകയും ചെയ്യും. രാത്രി അതിശൈത്യവും മൈനസിലേക്ക് താപനില താഴുകയും ചെയ്തേക്കാം.