ലണ്ടൻ: സ്വന്തം ലേഖകൻ

യുകെ മലയാളികളെ ഒന്നാകെ ഉലച്ച സംഭവമായിരുന്നു രണ്ടാഴ്ച്ച മുമ്പ് മാഞ്ചസ്റ്ററിലെ എൻ എച്ച് എസ് ആശുപത്രിയിൽ മലയാളിയായ സീനിയർ നഴ്സിന് രോഗിയുടെ കുത്തേറ്റ സംഭവം.57 വയസ്സുള്ള അച്ചാമ്മ ചെറിയാനെ ഒരു പ്രകോപനവുമില്ലാതെ ചികിത്സയ്ക്കായെത്തിയ രോഗിയായ യുവാവ് തലങ്ങും വിലങ്ങും കത്രികകൊണ്ട് കുത്തി പരുക്കേൽപിക്കുകയായിരുന്നു. 

അതീവ ഗുരുതര പരുക്കുകളോടെ വെന്റിലേറ്ററിൽ ആയിരുന്ന അച്ചാമ്മ ചെറിയാൻ, സുഖം പ്രാപിച്ചുവരുന്നു എന്ന വിവരമാണ് ആശുപത്രി വൃത്തങ്ങളിൽ നിന്നും ഇപ്പോൾ ലഭിക്കുന്നത്. എന്നാൽ നഴ്‌സിനെ  വെന്റിലേറ്ററിൽ നിന്നും മാറ്റിയോ എന്നകാര്യവും ഡിസ്ചാർജ് ചെയ്‌തോയെന്നും മറ്റുമുള്ള കൂടുതൽ വിവരങ്ങൾ റോയൽ ഓൾഡ്ഹാം ഹോസ്പിറ്റൽ അധികൃത പുറത്തുവിടുന്നില്ല.

ജീവിതകാലത്ത് എന്നും കൂടെ ഉണ്ടായേക്കാവുന്ന പരിക്കുകളാണ് അച്ചാമ്മ ചെറിയാന് ഏറ്റിരുന്നതെന്നാണ് ആദ്യദിവസങ്ങളിൽ ആശുപത്രി അധികൃതർ അറിയിച്ചിരുന്നത്.  അച്ചാമ്മയുടെ കഴുത്തിന് കത്രിക കൊണ്ടുള്ള കുത്തിൽ കാര്യമായ പരിക്കേറ്റിരുന്നു.  ഈ പരിക്കുകൾ എത്രമാത്രം സൗഖ്യമായി എന്നകാര്യവും ഇപ്പോൾ വ്യക്തമല്ല. 

ആശുപത്രി അധികൃതർക്ക് പുറമേ അച്ചാമ്മയുടെ കുടുംബവും ഇക്കാര്യങ്ങൾ വ്യക്തമാക്കാൻ തയ്യാറാകുന്നില്ല.  നിയമ നടപടികൾ മൂലം അതിന് കഴിയില്ലെന്നാണ് വിശദീകരണം. രണ്ട് കുട്ടികളുടെ  അമ്മ കൂടിയാണ് വർഷങ്ങളായി യുകെയിൽ ജോലിചെയ്തുവരുന്ന അച്ചാമ്മ.

അതിനിടെ ചില മലയാള ഓൺലൈൻ മാധ്യമങ്ങളിൽ പ്രസിദ്ധീകരിച്ച അച്ചാമ്മ ചെറിയാന്റെ ഫോട്ടോ മാറിപ്പോയതായും വിവാദം ഉടലെടുത്തിരുന്നു. മാഞ്ചസ്റ്ററിലെ തന്നെ മറ്റൊരു മലയാളി നഴ്സിന്റെയും ഭർത്താവിന്റെയും ഫോട്ടോയാണ് ചില മാധ്യമങ്ങൾ പ്രസിദ്ധീകരിച്ചത്. 

അവർ പരാതിയുമായി രംഗത്തെത്തിയതോടെ  പല മാധ്യമ വാർത്തകളിൽ നിന്നും ഫോട്ടോകൾ പിൻവലിക്കുകയും ചെയ്തിരുന്നു.  ചിലരൊക്കെ വാർത്തകൾ  തന്നെ പിൻവലിച്ചു. എന്നാൽ ഇതിനുപിന്നിൽ ഗൂഢാലോചനയുണ്ടെന്ന ആരോപണവും ഉയർന്നു.  മാധ്യമങ്ങളിൽ വാർത്ത വരാൻ താല്പര്യമില്ലാത്ത അച്ചാമ്മയുടെ കുടുംബം തന്നെ  ഈ വിധത്തിൽ പ്രചരിപ്പിച്ചതാണ് എന്നായിരുന്നു ആരോപണം.

അതേസമയം യുകെയിലെ ഒട്ടുമിക്ക ഇംഗ്ലീഷ് മാധ്യമങ്ങളിലും അച്ചാമ്മയുടെയും ഭർത്താവിന്റെയും ചിത്രങ്ങൾ അടക്കമാണ് വാർത്ത വന്നത്. മാഞ്ചസ്റ്റർ ആശുപത്രിയിൽ നഴ്സിനു കുത്തേറ്റ വിവരം യുകെയിലെ ദേശീയ മാധ്യമങ്ങൾ ഉടൻതന്നെ നൽകിയിരുന്നെങ്കിലും പിന്നെയും ദിവസങ്ങൾ കഴിഞ്ഞാണ് മലയാളം മാധ്യമങ്ങളിൽ വാർത്തവന്നത്.

റോയൽ ഓൾഡ്ഹാം ഹോസ്പിറ്റലിലെ അക്യൂട്ട് മെഡിക്കൽ യൂണിറ്റിൽ നൈറ്റ് ഡ്യൂട്ടിയിലിരിക്കെയാണ് ഈമാസം പതിനൊന്നിന് ശനിയാഴ്ച്ച രാത്രി പതിനൊന്നരയോടെ അച്ചാമ്മ ചെറിയാന് കുത്തേറ്റത്. യുകെയിൽ അഭയാർഥിയായെത്തിയ റുമോൻ ഹക്ക് എന്ന 37 കാരനാണ് ഒരു പ്രകോപനവുമില്ലാതെ ചികിത്സയ്ക്കിടെ അച്ചാമ്മയെ ഡ്യൂട്ടി റൂമിലെ തന്നെ കത്രിക പിടിച്ചുവാങ്ങി തലങ്ങും വിലങ്ങും കുത്തിയത്.

പോലീസ് അറസ്റ്റുചെയ്‌ത ഓൾഡ്‌ഹാമിലെ റോയ്‌ട്ടൺ നിവാസിയായ ഹക്കെന്ന പ്രതിയെ, ചൊവ്വാഴ്ച മാഞ്ചസ്റ്റർ മജിസ്‌ട്രേറ്റ് കോടതി റിമാൻഡ് ചെയ്‌തിരുന്നു. ഫെബ്രുവരി 18നാണ് മാഞ്ചസ്റ്റർ ക്രൗൺ കോർട്ടിൽ ഹഖിനെ അടുത്തതായി ഹാജരാക്കുക.

ഈ ആക്രമസംഭവം യുകെയിലെ മലയാളി നഴ്‌സുമാരിൽ വലിയ ആശങ്കയും ഭീതിയും ഉയർത്തി. പ്രത്യേകിച്ച് സമീപവർഷങ്ങളിൽ യുകെയിലേക്ക് എത്തിയ ജൂനിയർ നഴ്‌സുമാരിൽ. മഞ്ഞുകാലം തുടങ്ങിയശേഷം പല ആശുപത്രികളിലേയും അവസ്ഥ യുദ്ധകാല സമാനവും ആയിരുന്നു.

അതിനിടെ യുകെയിലെ എൻഎച്ച്എസ് ആശുപത്രികളിൽ രോഗികളുടേയും  ബന്ധുക്കളുടേയും ആക്രമണത്തിന് ഇരയാകുന്ന നഴ്‌സുമാരുടെ എണ്ണം കുത്തനെ ഉയർന്നതായി ഏറ്റവും പുതിയ കണക്കുകൾ തെളിയിക്കുന്നു. നിരവധി ഹെൽത്ത് കെയർ അസിസ്റ്റന്റുമാരും ഡോക്ടർമാരും പരുക്കേറ്റവരിൽ ഉൾപ്പെടുന്നു.

കോവിഡിനുശേഷം ആളുകളുടെ  മാനസികാവസ്ഥയിൽ തന്നെ മാറ്റം വന്നിട്ടുള്ളതായാണ് ആരോഗ്യവിദഗ്‌ധരുടെ  വിലയിരുത്തൽ. ആശുപത്രിയിലെ രോഗികളുടെ എണ്ണത്തിലും കാര്യമായ വർധനവുണ്ടായി.

ഹെൽത്ത് സർവീസ് ജേണലിൻ്റെയും യൂണിസണിൻ്റെയും വിവരാവകാശ അഭ്യർത്ഥനകളോട് എൻഎച്ച്എസ് ട്രസ്റ്റുകളുടെ മുക്കാൽ ഭാഗവും പ്രതികരിച്ചത് അനുസരിച്ച് ആക്രമിക്കപ്പെടുന്ന സ്റ്റാഫുകളുടെ യഥാർത്ഥ കണക്ക് വളരെ കൂടുതലാണെന്ന് കരുതണം.

അതായത് എൻഎച്ച്എസ് ഇംഗ്ലണ്ടിൽ മാത്രം റിപ്പോർട്ട് ചെയ്യപ്പെടുന്ന, സ്റ്റാഫുകൾക്ക് എതിരേയുള്ള ആക്രമ സംഭവങ്ങൾ പ്രതിദിനം ഏകദേശം 200-ലധികം ആണെന്ന യാഥാർത്ഥ്യം തികച്ചും ആശങ്കാജനകമായ സ്ഥിതിവിശേഷമാണ് ഉയർത്തുന്നത്.