തിരുവനന്തപുരം: നെയ്യാറ്റിന്‍കര സമാധി വിവാദം കേരളക്കര ഒന്നാകെ ചര്‍ച്ച ചെയ്ത വിഷയം ആയിരുന്നു. തങ്ങളുടെ അച്ഛന്‍ മരണമടഞ്ഞതല്ല എന്നും സമാധി ആയതാണെന്നും സമാധി ഇടം പൊളിക്കാന്‍ അനുവധിക്കില്ലെന്നും അറിയിച്ചുണ്ടായ പ്രശ്നങ്ങള്‍ വലിയ വാര്‍ത്തയായി മാറിയിരുന്നു. സംഭവത്തില്‍ വലിയ വിവാദങ്ങള്‍ കെട്ടടങ്ങിയിട്ടും കേസ് അന്വേഷണം പുരോഗമിക്കുകയാണ്. ഇപ്പോഴിതാ നെയ്യാറ്റിന്‍കര ഗോപന്റെ മരണ സര്‍ട്ടിഫിക്കറ്റ് ആവശ്യപ്പെട്ടു കൊണ്ട് കുടുംബം എത്തിയിരിക്കുകയാണ്. ഗോപന്‍ മരിച്ചതല്ല സമാധിയായതാണ് എന്നായിരുന്നു കുടുംബം അന്ന് പറഞ്ഞിരുന്നത്. എന്നാല്‍ മരണത്തിലെ ദുരൂഹതയില്‍ പൊലീസ് അന്വേഷണം തുടരുന്നതിനാല്‍ തത്കാലം മരണ സര്‍ട്ടിഫിക്കറ്റ് നല്‍കാന്‍ കഴിയില്ലെന്ന് നെയ്യാറ്റിന്‍കര നഗരസഭ അറിയിച്ചു. ഗോപന്‍ സമാധിയായെന്ന കുടുംബത്തിന്റെ അവകാശവാദം വലിയ വിവാദത്തിലേക്ക് നീങ്ങിയിരുന്നു. മരണത്തിലെ ദുരൂഹത ഉന്നയിച്ചുള്ള നാട്ടുകാരുടെ പരാതിയില്‍ പൊലിസ് അന്വേഷണം നടക്കുന്നതിനിടെയാണ് കുടുംബം മരണ സര്‍ട്ടിഫിക്കറ്റ് ആവശ്യപ്പെടുന്നത്. ഇളയ മകന്‍ രാജസേനന്‍ മരണ സര്‍ട്ടിഫിറ്റ് വേണമെന്ന അപേക്ഷയുമായി കഴിഞ്ഞ ദിവസം നെയ്യാറ്റിന്‍കര നഗരസഭയിലെത്തി. കുടുംബം നല്‍കിയ കേസ് പരിഗണിക്കവെ ഹൈക്കോടതിയും മരണ സര്‍ട്ടിഫിക്കറ്റ് എവിടെയെന്ന് ചോദിച്ചിരുന്നു. പക്ഷെ ഗോപന്‍ മരിച്ചതല്ലെന്ന നിലപാടിലായിരുന്നു അന്ന് കുടുംബം. ഇതിനിടെ മൃതദേഹം പുറത്തെടുത്ത് പോസ്റ്റുുമോര്‍ട്ടം നടത്തി. മരണ കാരണം ഇനിയും വ്യക്തമായിട്ടുമില്ല. ആന്തരിക അവയവങ്ങളുടെ രാസ പരിശോധന ഫലം വന്നാല്‍ മാത്രമേ മരണ കാരണം വ്യക്തമാവുകയുള്ളൂ. പോസ്റ്റ്മോര്‍ട്ടം പരിശോധനകള്‍ക്ക് ശേഷം ഗോപനെ വീണ്ടും സംസ്‌കരിക്കുകയും ചെയ്തു. എന്നാല്‍ മരണത്തിലെ ദുരൂഹതയെ കുറിച്ചുള്ള അന്വേഷണം അവസാനിക്കാത്തിതിനാല്‍ മരണ സര്‍ട്ടിഫിക്കറ്റിനുള്ള അപേക്ഷ നഗരസഭ അധികൃതര്‍ സ്വീകരിച്ചില്ല. പൊലിസ് റിപ്പോര്‍ട്ട് വന്നതിന് ശേഷം മരണ സര്‍ഫിക്കറ്റ് സംബന്ധിച്ച തീരുമാനമെടുക്കാമെന്നാണ് നഗരസഭ അധികൃതര്‍ പറയുന്നത്. ഗോപന് ഹൃദ്രോഗവും പ്രമേഹ രോഗവും ഉണ്ടായിരുന്നുവെന്ന പോസ്റ്റ്മോര്‍ട്ടം ചെയ്ത ഡോക്ടര്‍മാര്‍ അറിയിച്ചിരുന്നു.

ഹൈദരാബാദ് : ഇനി മുതല്‍ രാത്രി 11 മണി കഴിഞ്ഞുള്ള സിനിമാ ഷോകള്‍ക്ക് 16 വയസിന് താഴെയുള്ള കുട്ടികളെ അനുവദിക്കരുതെന്ന് കോടതി. കുട്ടികളെ സിനിമാ ഷോയ്ക്ക് അനുവദിക്കരുതെന്ന് തെലങ്കാന ഹൈകോടതി ആണ് അറിയിച്ചിരിക്കുന്നത്. രാവിലെ 11നു മുന്‍പും രാത്രി 11നു ശേഷവും കുട്ടികളുടെ പ്രവേശനം വിലക്കണമെന്നു സംസ്ഥാന സര്‍ക്കാരിനോട് കോടതി നിര്‍ദേശിച്ചു. ജസ്റ്റിസ് വിജയസെന്‍ റെഡ്ഡിയുടെ ബെഞ്ചാണ് നിര്‍ദ്ദേശം നല്‍കിയത്. തിയറ്ററുകളിലും തിയറ്റര്‍ കോംപ്ലക്‌സുകളിലും മള്‍ട്ടിപ്ലക്‌സുകളിലും ഈ നിയന്ത്രണം ബാധകമാകും. രാത്രി 11 മണി മുതല്‍ രാവിലെ 11 മണി വരെ നിയന്ത്രണം നടപ്പാക്കുന്ന കാര്യം തിയറ്ററുടമകളുമായി ചര്‍ച്ച ചെയ്ത് തീരുമാനിക്കണം. അത് വരെ 11 മണിക്ക് ശേഷം കുട്ടികളെയും കൊണ്ട് തിയറ്ററില്‍ വരുന്നത് വിലക്കണമെന്നാണ് ഉത്തരവ്. ഉത്സവകാലത്തും റിലീസ് സമയത്തും സിനിമകള്‍ക്ക് ടിക്കറ്റ് നിരക്ക് പരിധിയില്ലാതെ ഉയര്‍ത്തുന്നതിനും അര്‍ധരാത്രി പ്രീമിയറുകള്‍ നടത്തുന്നതിനും എതിരായ ഹര്‍ജി പരിഗണിക്കുകയായിരുന്നു ഹൈക്കോടതി. തെലങ്കാനയില്‍ നിലവില്‍ ഒരു ദിവസത്തെ അവസാനഷോ അവസാനിക്കുന്നത് പുലര്‍ച്ചെ 1.30-യ്ക്കാണ്. കുട്ടികളുടെ സുരക്ഷ കണക്കിലെടുത്താണ് ഇത്തരമൊരു ഉത്തരവ് പുറപ്പെടുവിക്കുന്നതെന്നും കോടതി വ്യക്തമാക്കി.

യുകെ: എയര്‍ ഇന്ത്യ കൊച്ചി - യുകെ വിമാന സര്‍വീസുകള്‍ നിര്‍ത്തലാക്കുന്നു എന്ന വാര്‍ത്ത ഇടിത്തീ ആയി യുകെയിലെ പ്രവാസി മലയാളി സമൂഹത്തിന്റെ ഇടയില്‍ പടര്‍ന്ന ക്ഷണത്തില്‍ തന്നെ അടിയന്തിര ഇടപെടലുകളുമായി ഓഐസിസി (യുകെ). അഞ്ചു ലക്ഷത്തോളം പ്രവാസ മലയാളി സമൂഹത്തിന്റെ വ്യോമ യാത്രകള്‍ക്ക് വിപരീത പ്രത്യാഘാതം ഉണ്ടാക്കുന്ന ഈ തീരുമാനം പുനര്‍വിചിന്തനം ചെയ്യണമെന്നും അനുകൂലമായ തീരുമാനം അധികൃതരില്‍ നിന്നും ഉണ്ടാകണമെന്നും അഭ്യര്‍ത്ഥിച്ചുകൊണ്ട് എയര്‍ ഇന്ത്യ എംഡി & സിഇഓ ക്യാമ്പെല്‍ വില്‍സന്‍, യുകെയിലെ വ്യോമയാന മന്ത്രി മൈക്ക് കെയ്ന്‍ എന്നിവര്‍ക്ക് ഓഐസിസി (യുകെ) - യുടെ നേതൃത്വത്തില്‍ നിവേദനം സമര്‍പ്പിച്ചു. പ്രശ്‌നത്തില്‍ അടിയന്തിര ഇടപെടലും ഇന്ത്യ ഗവണ്മെന്റിന്റെ പിന്തുണയും ആവശ്യപ്പെട്ട് ഇന്ത്യന്‍ വ്യോമയാന മന്ത്രി കിഞ്ചരപ്പു റാം മോഹന്‍ നായ്ഡു ഇന്ത്യന്‍ ഹൈ കമ്മീഷന്‍ ഓഫീസ് എന്നിവര്‍ക്കും ജനപ്രതിനിധികളുടെ പിന്തുണ തേടി ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി എം പി, കെപിസിസി അധ്യക്ഷന്‍ കെ സുധാകരന്‍ എംപി, പ്രതിപക്ഷ നേതാവ് വി ഡി സതീശന്‍ എംഎല്‍എ, ഫ്രാന്‍സിസ് ജോര്‍ജ് എംപി എന്നിവര്‍ക്കും സംഘടന നിവേദനം നല്‍കി. ഓഐസിസി (യുകെ) നാഷണല്‍ കമ്മിറ്റിയെ പ്രതിനിധീകരിച്ച് നാഷണല്‍ പ്രസിഡന്റ് ഷൈനു ക്ലെയര്‍ മാത്യൂസ് ആണ് ഓണ്‍ലൈന്‍ മുഖേന നിവേദനം കൈമാറിയത്. നേരത്തെ, എയര്‍ ഇന്ത്യ വിമാന സര്‍വീസുകളുടെ അടിക്കടി ഉണ്ടാകുന്ന സര്‍വീസ് റദ്ധാക്കലുകളും തന്‍മൂലം യാത്രക്കാര്‍ അനുഭവിക്കുന്ന ബുദ്ധിമുട്ടുകളും, ഗാട്വിക്കില്‍ ഇപ്പോള്‍ അവസാനിക്കുന്ന എയര്‍ ഇന്ത്യ സര്‍വീസുകള്‍ ബിര്‍മിങ്ഹാം / മാഞ്ചസ്റ്റര്‍ വരെ നീട്ടണമെന്നുമുള്ള ആവശ്യങ്ങളും മാസങ്ങള്‍ക്ക് മുന്‍പ് ഓഐസിസി (യുകെ) - യുടെ നേതൃത്വത്തില്‍ അധികൃതരുടെ ശ്രദ്ധയില്‍ പെടുത്തിയിരുന്നു. കൊച്ചി - യുകെ വ്യോമ സര്‍വീസുകള്‍ എയര്‍ ഇന്ത്യ നിര്‍ത്തലാക്കുന്ന പക്ഷം, സമൂഹത്തിലെ വിവിധ തുറകളില്‍പ്പെട്ട യാത്രക്കാര്‍ക്കുണ്ടാകുന്ന ബുദ്ധിമുട്ടുകളും നിവേദനത്തില്‍ വിവരിച്ചിട്ടുണ്ട്. കുട്ടികള്‍ / പ്രായമായവര്‍ എന്നിവരുമായി യാത്രചെയ്യുന്നവര്‍, രോഗികളായ യാത്രക്കാര്‍, സ്‌കൂള്‍ തുറക്കുന്ന സമയത്ത് കുട്ടികളുമായി യാത്ര ചെയ്യുന്നവര്‍ എന്നിങ്ങനെ നിരവധി യാത്രക്കാരെ ദുരിതത്തിലാക്കുന്ന തീരുമാനം പുനപരിശോധയ്ക്ക് വിധേയമാക്കണമെന്നും അനുഭാവപൂര്‍വ്വം പരിഗണിച്ചു ഉചിതമായ തീരുമാനം എടുക്കണമെന്നുമാണ് ഓഐസിസി (യുകെ) സമര്‍പ്പിച്ച നിവേദനത്തില്‍ പ്രധാനമായും ആവശ്യപ്പെട്ടിരിക്കുന്നത്. 2020 ഓഗസ്റ്റ് 28ന് ആരംഭിച്ച കൊച്ചി - യുകെ എയര്‍ ഇന്ത്യ വിമാന സര്‍വീസിനെ പ്രതിവാരം ആയിരത്തോളം യാത്രക്കാര്‍ ആശ്രയിക്കുന്നുവെന്നാണ് കണക്കുകള്‍. ഡല്‍ഹി, ബാംഗ്ലൂര്‍ മുംബൈ, ഗോവ എന്നിവിടങ്ങളില്‍ നിന്നും യു കെയിലേക്ക് നടത്തുന്ന എയര്‍ ഇന്ത്യ പ്രതിവാര സര്‍വീസുകളുടെ എണ്ണം വര്‍ധിപ്പിച്ചിട്ടും കൊച്ചിയോട് അധികൃതര്‍ ചിറ്റമ്മ നയം തുടരുകയായിരുന്നു. ഇതിനിടയിലാണ് മാര്‍ച്ച് 29 ന് ശേഷം കൊച്ചി - യുകെ എയര്‍ ഇന്ത്യ വിമാന സര്‍വീസുകള്‍ ഉണ്ടാകില്ല എന്ന ഞെട്ടിപ്പിക്കുന്ന വാര്‍ത്ത പുറത്തു വന്നിരിക്കുന്നത്. ഔദ്യോഗികമായി ഈ വിവരം എയര്‍ ഇന്ത്യ പുറത്തിറക്കിയിട്ടില്ലെങ്കിലും സമൂഹ മാധ്യമ പ്ലാറ്റ്‌ഫോമായ 'എക്‌സ്' - ലെ ഒന്നില്‍ കൂടുതല്‍ അക്കൗണ്ടില്‍ ഈ വിവരം പ്രചരിക്കുന്നുണ്ട്. ഇപ്പോഴുണ്ടായ വിഷയവുമായി ബന്ധപ്പെട്ടു അധികൃതരുമായി നേരിട്ട് ബന്ധപ്പെടാന്‍ ശ്രമിച്ചു വരുകയാണെന്നും, വരും ദിവസങ്ങളില്‍ ഓഐസിസി (യുകെ) - യുടെ നേതൃത്വത്തിലുള്ള ഇടപെടലുകള്‍ കൂടുതല്‍ ശക്തമാക്കുമെന്നും നാഷണല്‍ പ്രസിഡന്റ് ഷൈനു ക്ലെയര്‍ മാത്യൂസ് പറഞ്ഞു.

ഇംഗ്ലണ്ട്: കേംബ്രിഡ്ജ് സെന്റ് തോമസ് ഇന്ത്യന്‍ ഓര്‍ത്തഡോക്‌സ് ചര്‍ച്ച് വിശുദ്ധ ദേവാലയ കൂദാശ ഫെബ്രുവരി 1- ന് നടത്തപ്പെടും. മലങ്കര ഓര്‍ത്തഡോക്സ് സഭയുടെ യു.കെ, യൂറോപ്പ് & ആഫ്രിക്ക ഭദ്രാസന മെത്രാപ്പോലീത്ത അഭി. എബ്രഹാം മാര്‍ സ്‌തേഫാനോസ് മുഖ്യകാര്‍മികത്വം വഹിക്കും. നാളെ വെള്ളിയാഴ്ച വൈകിട്ട് 5:00 ന് സന്ധ്യ നമസ്‌കാരം 5:45-ന് വിശുദ്ധ ദേവാലയത്തിന്റെ കൂദാശയുടെ ആദ്യഭാഗം ദേവാലയ കൂദാശയ്ക്ക് ഇടവക മെത്രാപ്പോലീത്തയും, ഇടവക വികാരി മാത്യൂസ് കുറിയാക്കോസും നേതൃത്വം നല്‍കും. ശേഷം ഫെബ്രുവരി-1 ശനിയാഴ്ച 7:30-ന് പ്രഭാത നമസ്‌കാരവും 8:30-ന് വിശുദ്ധ ദേവാലയത്തിന്റെ കൂദാശയുടെ രണ്ടാം ഭാഗം 10:00-ന് വിശുദ്ധ കുര്‍ബാന. വൈകിട്ട് 3:00 മണിക്ക് പൊതുസമ്മേളനം (CB23 3RD പാപ്വര്‍ത്ത് വില്ലേജ് ഹാള്‍) സ്വാഗത പ്രസംഗം. ഇടവക വികാരി മാത്യൂസ് കുറിയാക്കോസ് പൊതുസമ്മേളനത്തിന്റ് അദ്ധ്യക്ഷന്‍ ഇടവക മെത്രാപ്പോലീത്ത അഭി. എബ്രഹാം മാര്‍ സ്‌തേഫാനോസ് പൊതു സമ്മേളനം ഉദ്ഘാടനം ചെയ്യും. മുഖ്യഅതിഥി: IAN SOLLOM (MP ST.NEOTS & MID CAMBRIDGESHIRE) MAYOR NIK JOHNSON (CAMBRIDGESHIRE & PETERBOROUGH COMBINED AUTHORITY) MAYOR BAIJU THITTALA (CAMBRIDGE CITY COUNCIL) REV FR.VARGHESE MATHEW(DIOCESAN SECRETARY) കൃതജ്ഞത റോബിന്‍ തോമസ് (ഇടവക സെക്രട്ടറി). ഒപ്പം യു.കെ ഭദ്രാസനത്തിലെ വിവിധ ദേവാലയങ്ങളിലെ വൈദികര്‍, സഭാ പ്രതിനിധികള്‍, മാനേജിങ് കമ്മിറ്റി അംഗങ്ങള്‍, സഭാവിശ്വാസികളും ചടങ്ങില്‍ ഭാഗമാകും. ഈസ്റ്റ് ആംഗ്ലിയ മേഖലയിലെ മലങ്കര ഓര്‍ത്തഡോക്‌സ് സുറിയാനി സഭയുടെ ആദ്യത്തെ പള്ളിയാണ്. 2005 - ന്റ് തുടക്കത്തില്‍ ഈ പ്രദേശത്തേക്ക് കുടിയേറിയ മലങ്കര ഓര്‍ത്തഡോക്‌സ് സഭയിലെ വിശ്വാസികളുടെ ആഗ്രഹത്തില്‍ നിന്നാണ് ഈ ഇടവക സ്ഥാപിതമായത്. സഭയുടെ പാരമ്പര്യങ്ങളിലും, അനുഷ്ഠാനങ്ങളിലും സര്‍വ്വശക്തനായ ദൈവത്തെ ആരാധിക്കുന്നതിനായി റവ.ഫാ.ഏബ്രഹാം തോമസിന്റേയും ലണ്ടന്‍ സെന്റ് ഗ്രിഗോറിയോസ് ഇടവക വികാരി (ഭദ്രാസന മെത്രപ്പോലീത്ത) ഈ പ്രദേശത്തെ സഭാ വിശ്വാസികളുടെ പരിശ്രമ ഫലവുമായി കേംബ്രിഡ്ജ്  ഷെയറിലെ പാപ്വവേര്‍ത്തില്‍ ആദ്യത്തെ വിശുദ്ധ കുര്‍ബാന 2006-ന്റ് തുടക്കത്തില്‍ നടത്തപ്പെട്ടു. 2007 ജൂണില്‍ അന്നത്തെ യു.കെ, കാനഡ, യൂറോപ്പ് ഭദ്രാസനത്തിലെ കാലംചെയ്ത ഡോ.തോമസ് മാര്‍ മക്കാറിയോസ് മെത്രാപ്പോലീത്ത ഈ ഇടവകയെ ഒരു സ്വതന്ത്ര ഇടവകയാക്കി ഉയര്‍ത്തി. 2014 ജൂലൈ മാസത്തില്‍ ഈ പള്ളിയും, അനുബന്ധ സ്ഥലവും ഇടവക സ്വന്തമായി വാങ്ങിക്കുകയും തുടര്‍ന്ന് 2016 ല്‍ ഇന്നത്തെ മാത്യകയില്‍ നവീകരിക്കുന്നതിനു വേണ്ട ശ്രമങ്ങള്‍ തുടങ്ങുകയും ചെയ്തു. 2018 ജുലായില്‍ അന്നത്തെ ഭദ്രാസന മെത്രപ്പോലിത്ത അഭി: മാത്യൂസ് മാര്‍ തീമോത്തിയോസ് നവീകരിച്ച ദേവാലയത്തിന്റെ കല്ലിടില്‍ കര്‍മ്മം നിര്‍വ്വഹിക്കുകയും പ്രാത്ഥന ശുശ്രൂഷ നിര്‍വ്വഹിക്കുകയും ചെയ്തു. ഇടവക പൊതുയോഗ തീരുമാനപ്രകാരം 2025 ജനുവരി 31, ഫെബ്രുവരി -1-നും ഇടവകയുടെ കൂദാശ നടത്തുന്നതിനുള്ള തീരുമാനമുണ്ടാവുകയായിരുന്നു. ഇന്ന് നിലവല്‍ ഇടവകയില്‍ 50 ല്‍ പരം കുടുംബ അംഗങ്ങളും, ഒപ്പം പഠനത്തിനായി എത്തിയ വിദ്യാര്‍ത്ഥികളും, ആരോഗ്യ മേഖലയിലേക്ക് കടന്നുവന്ന വിശ്വാസികളും വിശുദ്ധ ആരാധനയില്‍ പങ്കെടുത്ത് വരുന്നു. സഭയുടെ കാനോനികമായ എല്ലാ അനുഷ്ഠാനങ്ങളും ശുശ്രൂഷകളും ചിട്ടയായി നടത്തുന്നതിന് ഈ ഇടവക എന്നും മുന്‍പില്‍ തന്നെയാണ്. ഈ ദേവാലയ കൂദാശ കര്‍മ്മത്തിലേക്ക് എല്ലാവരെയും കര്‍തൃനാമത്തില്‍ സ്വാഗതം ചെയ്യുന്നു. REV.FR.MATHEWS KURIAKOS (VICAR 07832999325) SECRETARY ROBIN THOMAS (07841385777) TREASURER BINOJ VARGHESE (07708327018) CONVENER SUKU DANIEL (07952916136) JOINT CONVENER ANILRAJU (07877332931) PUBLICITY CONVENER JITHOSH JOHN (07908174434)

നടി നിഖില വിമലിന്റെ സഹോദരി അഖില വിമല്‍ സന്യാസം സ്വീകരിച്ചതായി റിപ്പോര്‍ട്ടുകള്‍. എന്നാല്‍ ഈ വാര്‍ത്തയോട് പ്രതികരിക്കാതെ നടി നിഖിലയും സഹോദരി അഖിലയും. അഖില തലപ്പാവ് വെച്ച് സന്യാസ വേഷത്തില്‍ നില്‍ക്കുന്ന ചിത്രം പ്രചരിച്ചതോടെയാണ് ഈ കാര്യം എല്ലാവരും അറിയുന്നത്. ഈ ചിത്രം പങ്കുവെച്ചത് അഖിലയുടെ ഗുരുവായ അഭിനവ ബാലാനന്ദ ഭൈരവയ ആണ്. ഇദ്ദേഹത്തിന്റെ ഫെയ്‌സ്ബുക്ക് കുറിപ്പും ഇതിനോടകം ചര്‍ച്ചയാകുകയാണ്. ഡിസംബര്‍ 12 ന് സന്യാസ വേഷത്തിലുള്ള ഒരു ചിത്രം അഖില ഫേസ്ബുക്കില്‍ പങ്കുവച്ചിരുന്നു. പിന്നീട് അഖില കുറിപ്പൊന്നും പങ്കുവച്ചില്ലെങ്കിലും 'ജൂനാ പീഠാധീശ്വര്‍ ആചാര്യ മഹാ മണ്ഡലേശ്വര്‍ സ്വാമി അവധേശാനന്ദ ഗിരി മഹാരാജില്‍ നിന്നും എന്റെ ശിഷ്യയായ അഖില ഇന്ന് അവന്തികാ ഭാരതി എന്ന നാമത്തിലേക്ക് എത്തി എന്ന 'അഭിനവ ബാലാനന്ദഭൈരവയുടെ കുറിപ്പാണ് ഈ വിഷയം ചര്‍ച്ചയാവാന്‍ കാരണം. അഭിനവ പങ്കുവച്ച ഗുരുവിനൊപ്പമുള്ള ചിത്രത്തില്‍ സന്യാസ വേഷത്തില്‍ കാവി തലപ്പാവ് ധരിച്ചിരിക്കുന്ന അഖിലയെയും കാണാം. ചിത്രത്തിലുള്ളത് സിനിമാതാരം നിഖില വിമലിന്റെ സഹോദരിയല്ലേ എന്ന് നിരവധി പേര് കമന്റ്‌റ് ചെയ്യുന്നുണ്ട്. 'ജൂനാ പീഠാധീശ്വര്‍ ആചാര്യ മഹാ മണ്ഡലേശ്വര്‍ സ്വാമി അവധേശാനന്ദ ഗിരി മഹാരാജില്‍ നിന്നും സന്യാസവും മഹാ മണ്ഡലേശ്വര്‍ പദവിയും സ്വീകരിച്ചു സലില്‍ ചേട്ടന്‍ എന്നതില്‍ നിന്ന് ആനന്ദവനം ഭാരതി എന്ന നാമത്തിലേക്കും, ശാസ്ത്രാധ്യയനത്തില്‍ എന്റെ ശിഷ്യ കൂടിയായ അഖില ഇന്ന് അവന്തികാ ഭാരതി എന്ന നാമത്തിലേക്കും എത്തിയതില്‍ കാശ്മീര ആനന്ദഭൈരവ പരമ്പരയുടെ അഭിനന്ദനങ്ങള്‍ അറിയിക്കുന്നു. ധര്‍മ്മപ്രചരണത്തിനും ധര്‍മ്മസംരക്ഷണത്തിനുമായുള്ള അഖാഡയുടെ പ്രവര്‍ത്തനങ്ങള്‍ കേരളത്തിലും ഭാരതത്തിലുടനീളവും വ്യാപിപ്പിപ്പ് ഭാരതത്തിന്റെ പാരമ്പര്യം ഉയര്‍ത്തുവാന്‍ രണ്ട് പേര്‍ക്കും സാധ്യമാകട്ടെ എന്ന് ദേവിയോട് പ്രാര്‍ത്ഥിച്ച് കൊണ്ട്, നമോ നമ: ശ്രീ ഗുരുപാദുകാഭ്യാം അഭിനവ ബാലാനന്ദഭൈരവ' എന്നാണ് ഫേസ്ബുക്ക് കുറിപ്പ്. കലാമണ്ഡലം വിമലാദേവിയുടെയും എം. ആര്‍ പവിത്രന്റെ മകളാണ് അഖില വിമലും നടി നിഖില വിമലും. നിഖില വിമല്‍ ബാലതാരമായി സിനിമയിലെത്തിയപ്പോള്‍ പഠനത്തിലാണ് അഖില വിമല്‍ ശ്രദ്ധ കേന്ദ്രീകരിച്ചത്. ഡല്‍ഹിയിലെ ജെ.എന്‍.യുവില്‍ തിയേറ്റര്‍ ആര്‍ട്‌സിലായിരുന്നു ഗവേഷണം. ഇതിന് ശേഷം ഹാര്‍വാര്‍ഡ് യൂണിവേഴ്‌സിറ്റിയില്‍ മെലോണ്‍ സ്‌കൂള്‍ ഒഫ് തിയേറ്റര്‍ ആന്‍ഡ് പെര്‍ഫോമന്‍സ് റിസര്‍ച്ച് ഫെലോയായിരുന്നു.