നെതര്‍ലാന്‍ഡ്‌സിലെ മ്യൂസിയത്തില്‍ നിന്ന് 2,450 വര്‍ഷം പഴക്കമുള്ള സ്വര്‍ണ തലപ്പാവ് മോഷണം പോയി. ഈ മാസം 25 നാണ് വാതില്‍ ബോംബ് വച്ച് തകര്‍ത്ത് തലപ്പാവ് തകര്‍ന്നത്. ഏകദേശം 450 ബിസിയാണ് തലപ്പാവിന്റെ പഴക്കം കണക്കാക്കുന്നത്. തലപ്പാവിനൊപ്പം മറ്റു നാല് വിലയേറിയ പുരാ വസ്തുക്കളും കവര്‍ന്നിട്ടുണ്ട്. പോലീസ് പുറത്ത് വിട്ട സിസിടിവി ദൃശ്യങ്ങളില്‍ മൂന്ന് പേര്‍ ഡ്രെന്റ്‌സ് മ്യൂസിയത്തിന്റെ പുറംവാതില്‍ തുറക്കാന്‍ ശ്രമിക്കുന്നതും സ്‌ഫോടനവും തീയും ഉയരുന്നത് കാണാം. നിലവില്‍ ഇന്റര്‍പോളടക്കമുള്ള ഏജന്‍സികള്‍ സംഭവത്തില്‍ അന്വേഷണം നടത്തുന്നുണ്ട്. ഏകദേശം ഒരുകിലോയോളം തൂക്കം വരുന്ന സ്വര്‍ണ തലപ്പാവ് 1929 ല്‍ റൊമാനിയന്‍ ഗ്രാമത്തില്‍ നിന്നാണ് കണ്ടെത്തിയത്. ഏറെ കാലം ഗ്രാമത്തിലുള്ള കുട്ടികള്‍ കളിപ്പാട്ടമായും മറ്റും ഉപയോഗിച്ച തലപ്പാവ് പിന്നീട് പുരാവസ്തുവിദഗ്ധര്‍ കണ്ടെത്തി ഏറ്റെടുക്കുകയായിരുന്നു. ബുക്കാറെസ്റ്റിലെ റൊമാനിയയിലെ നാഷണല്‍ ഹിസ്റ്ററി മ്യൂസിയം ഡ്രെന്റ്‌സ് മ്യൂസിയത്തിന് വായ്പയായി നല്‍കിയതായിരുന്നു. നാഷണല്‍ ഹിസ്റ്ററി മ്യൂസിയത്തിനും ഡ്രെന്റ്‌സ് മ്യൂസിയത്തിനും ഇരുണ്ട ദിനമാണിന്ന് എന്നാണ് ഡ്രെന്റ്‌സ് മ്യൂസിയത്തിന്റെ ജനറല്‍ ഡയറക്ടര്‍ ഹാരി ടുപാന്‍ സംഭവത്തിനെപ്പറ്റി പ്രതികരിച്ചത്.

ഇന്ത്യ - സിംഗപ്പൂര്‍ എയര്‍ലൈന്‍സിന്റെ ബജറ്റ് സ്ഥാപനമായ സ്‌കൂട്ട്, ഓസ്ട്രിയയിലെ വിയന്നയിലേക്കും ഫിലിപ്പൈന്‍സിലെ ഇലോയിലോ സിറ്റിയിലേക്കും നേരിട്ടുള്ള വിമാന സര്‍വീസുകള്‍ ആരംഭിക്കും. രണ്ട് ക്യാബിന്‍ ക്ലാസുകളിലായി 329 യാത്രക്കാരെ വഹിക്കാന്‍ ശേഷിയുള്ള ബോയിംഗ് ഡ്രീംലൈനറില്‍ 2025 ജൂണ്‍ 3-ന് ആരംഭിക്കുന്ന വിയന്നയിലേക്കുള്ള വിമാനങ്ങള്‍ ആഴ്ചയില്‍ മൂന്ന് തവണ സര്‍വീസ് നടത്തും. ഇലോയ്‌ലോ സിറ്റിയിലേക്കുള്ള വിമാനങ്ങള്‍ 112 സീറ്റുകളുള്ള എംബ്രയര്‍ ഇ190-ഇ2 വിമാനത്തില്‍ 2025 ഏപ്രില്‍ 14 മുതല്‍ ആഴ്ചയില്‍ രണ്ടുതവണയായി സര്‍വീസുകള്‍ ആരംഭിക്കുകയും ക്രമേണ 2025 ജൂണ്‍ മുതല്‍ ആഴ്ചയില്‍ നാല് തവണയാക്കുകയും ചെയ്യും. വിയന്നയിലേക്കും ഇലോയിലോ സിറ്റിയിലേക്കും ഉള്ള വിമാനങ്ങള്‍ സ്‌കൂട്ടിന്റെ വെബ്സൈറ്റ്, മൊബൈല്‍ ആപ്പ് വഴിയും മറ്റ് മാര്‍ഗങ്ങളിലൂടെയും ബുക്ക് ചെയ്യാം. ചെന്നൈയില്‍ നിന്ന് ഇലോയിലോ സിറ്റിയിലേക്കുള്ള വണ്‍വേ ഇക്കോണമി ക്ലാസ് നിരക്കുകള്‍ 11,740 രൂപയിലും അമൃതസറില്‍ നിന്ന് ഇലോയിലോ സിറ്റിയിലേക്കുള്ള നിരക്കുകള്‍ 13,648 രൂപയിലും ആരംഭിക്കുന്നു. വിയന്നയിലേക്കുള്ള യാത്രയ്ക്ക്, ഇക്കോണമി ക്ലാസില്‍ ചെന്നൈയില്‍ നിന്ന് 30,320.91 രൂപയും അമൃതസറില്‍ നിന്ന് 32,283.91 രൂപയിലും നിരക്കുകള്‍ ആരംഭിക്കുന്നു.വിയന്നയിലേക്കുള്ള സ്‌കൂട്ട്പ്ലസ് നിരക്കുകള്‍ ചെന്നൈയില്‍ നിന്ന് 70,482.07 രൂപയിലും അമൃതസറില്‍ നിന്ന് 72,410.07 രൂപയിലും ആരംഭിക്കുന്നു. എല്ലാ നിരക്കുകളും നികുതികള്‍ ഉള്‍പ്പെടെയുള്ളതാണ്.

വാഷിങ്ടണ്‍: ബഹിരാകാശ യാത്രികരായ സുനിത വില്യംസിനെയും വില്‍മോറിനെയും തിരികെ കൊണ്ടു വരണമെന്ന് മസ്‌കിനോട് ട്രംപ്.  അന്താരാഷ്ട്ര ബഹിരാകാശ നിലയത്തില്‍ (ഐഎസ്എസ്) കുടുങ്ങിക്കിടക്കുന്ന ബഹിരാകാശയാത്രികരെ എത്രയും വേഗം തിരികെ കൊണ്ടുവരണമെന്നാണ് യുഎസ് പ്രസിഡന്റ് ഡോണള്‍ഡ് ട്രംപ് സ്‌പേസ് എക്‌സിനോട് ആവശ്യപ്പെട്ടിരിക്കുന്നത്. ഇലോണ്‍ മസ്‌ക് തന്നെയാണ് ഈ കാര്യം അറിയിച്ച് എത്തിയത്. തങ്ങള്‍ അത് ചെയ്യുമെന്നും ബൈഡന്‍ ഭരണകൂടം അവരെ ഇത്രയും കാലം അവിടെ ഉപേക്ഷിച്ചത് ഭയാനകമാണെന്നും മസ്‌ക് എക്സ് പോസ്റ്റില്‍ പറഞ്ഞു. മസ്‌കിന്റെ പോസ്റ്റിന് താഴെ ബൈഡന്‍ ഭരണകൂടത്തിനെ വിമര്‍ശിച്ച് ട്രംപും പ്രതികരിച്ചു. 2024 ജൂണ്‍ 5 മുതല്‍ അന്താരാഷ്ട്ര ബഹിരാകാശ നിലയത്തില്‍ താമസിക്കുന്ന രണ്ട് ബഹിരാകാശയാത്രികരായ ബുച്ച് വില്‍മോര്‍, സുനിത വില്യംസ് എന്നിവര്‍ കുടുങ്ങിയ സാഹചര്യം ബൈഡന്‍ ഭരണകൂടം കൈകാര്യം ചെയ്തതില്‍ പ്രസിഡന്റ് ട്രംപ് നിരാശ പ്രകടിപ്പിച്ചു. 'ബൈഡന്‍ ഭരണകൂടം ബഹിരാകാശത്ത് ഉപേക്ഷിച്ച രണ്ട് ധീരരായ ബഹിരാകാശയാത്രികരെ കൊണ്ടുപോകാന്‍ ഞാന്‍ സ്‌പേസ് എക്‌സ് സ്ഥാപകന്‍ ഇലോണ്‍ മസ്‌കിനോട് ആവശ്യപ്പെട്ടു. അവര്‍ മാസങ്ങളായി അന്താരാഷ്ട്ര നിലയത്തില്‍ കാത്തിരിക്കുകയാണ്. ഇലോണ്‍ ഉടന്‍ തന്നെ യാത്ര തുടങ്ങും. എല്ലാവരും സുരക്ഷിതരായിരിക്കുമെന്ന് പ്രതീക്ഷിക്കുന്നു. ഇലോണ്‍ ആശംസകള്‍!' ട്രംപ് സോഷ്യല്‍ മീഡിയയില്‍ കുറിച്ചു. സ്‌പേസ് എക്‌സ് ബഹിരാകാശയാത്രികരെ തിരിച്ച് കൊണ്ടുവരുമെന്ന് മസ്‌ക് അറിയിച്ചു. യാത്രികരെ തിരിച്ചെത്തിക്കാന്‍ കാലതാമസം നേരിട്ടതില്‍ ബൈഡന്‍ ഭരണകൂടത്തെ അദ്ദേഹം വിമര്‍ശിച്ചു, 'ബൈഡന്‍ ഭരണകൂടം അവരെ ഇത്രയും കാലം അവിടെ ഉപേക്ഷിച്ചത് ഭയങ്കരമാണ്. ബഹിരാകാശയാത്രികര്‍ 'കുടുങ്ങിപ്പോയവര്‍' എന്നോ 'ഉപേക്ഷിക്കപ്പെട്ടവര്‍' എന്ന നിലയിലാണോ വിശേഷിപ്പിക്കേണ്ടതെന്നതില്‍ അറിയില്ലെന്നും മസ്‌ക് പോസ്റ്റില്‍ പറഞ്ഞു.

വാഷിങ്ടണ്‍: അമേരിക്കയില്‍ യാത്രാ വിമാനം സൈനിക ഹെലികോപ്റ്ററുമായി കൂട്ടിയിടിച്ച് തകര്‍ന്നു. വാഷിങ്ടണ്‍ ഡിസിയില്‍ റിഗന്‍ അന്താരാഷ്ട്ര വിമാനത്താവളത്തിന് സമീപം വെച്ചാണ് അപകടം. വിമാനത്തില്‍ 65 യാത്രക്കാര്‍ ഉണ്ടായിരുന്നു. രക്ഷാപ്രവര്‍ത്തനം തുടരുകയാണെന്ന് അധികൃതര്‍ വ്യക്തമാക്കി. അപകടത്തില്‍ ആളപായം സംബന്ധിച്ച് സ്ഥിരീകരണങ്ങള്‍ ഉണ്ടായിട്ടില്ല. കന്‍സാസിലെ വിചിതയില്‍ നിന്നും പുറപ്പെട്ട അമേരിക്കന്‍ എയര്‍ലൈന്‍സിന്റെ 5342 ഫ്ലൈറ്റാണ് അപകടത്തില്‍പ്പെട്ടത്. അപകടത്തെത്തുടര്‍ന്ന് റിഗന്‍ അന്താരാഷ്ട്ര വിമാനത്താവളത്തിലെ ടേക്ക് ഓഫും ലാന്‍ഡിങ്ങുമെല്ലാം നിര്‍ത്തിവെച്ചു.

ലഖ്നൗ: മഹാ കുംഭമേളയില്‍ തിക്കിലും തിരക്കിലും 30 പേര്‍ മരിച്ചതായി യുപി സര്‍ക്കാര്‍. സംഭവത്തില്‍ 60പേര്‍ക്ക് പരിക്കേല്‍ക്കുകയും ചെയ്തതായാണ് റിപ്പോര്‍ട്ടില്‍ പറയുന്നത്. സംഭവത്തില്‍ ജുഡീഷ്യല്‍ അന്വേഷണം പ്രഖ്യാപിച്ച് യുപി സര്‍ക്കാര്‍. മരിച്ചവരില്‍ 25 പേരെ തിരിച്ചറിഞ്ഞതായും പൊലീസ് വ്യക്തമാക്കി. മൗനി അമാവാസി ദിനത്തിലെ സ്‌നാനത്തിനായി വന്‍ ജനാവലി എത്തിയതോടെ ബാരിക്കേഡുകള്‍ തകര്‍ന്നതാണ് ദുരന്ത കാരണം. പുലര്‍ച്ചെ ഒരു മണിയോടെയുണ്ടായ ദുരന്തത്തില്‍ മരണ വിവരങ്ങള്‍ പുറത്തുവിടാത്ത ഉത്തര്‍പ്രദേശ് സര്‍ക്കാരിന്റെ നടപടിക്കെതിരെ പ്രതിപക്ഷം രൂക്ഷവിമര്‍ശനം നടത്തിയിരുന്നു. അപകടത്തിലേക്ക് നയിച്ച കാരണങ്ങള്‍ കണ്ടെത്താന്‍ മൂന്നംഗ അന്വേഷണ സമിതിക്ക് ആണ് രൂപം നല്‍കിയത്. വിരമിച്ച ജഡ്ജി ഹര്‍ഷ് കുമാര്‍ നേതൃത്വം നല്‍കുന്ന മൂന്നംഗ അന്വേഷണ സമിതിയില്‍ മുന്‍ ഡിജിപി വി കെ ഗുപ്ത, വിരമിച്ച ഐഎഎസ് ഉദ്യോഗസ്ഥന്‍ ഡി കെ സിംഗ് എന്നിവരും ഉള്‍പ്പെടുമെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് അറിയിച്ചു. മരിച്ചവരുടെ ബന്ധുക്കള്‍ക്ക് 25 ലക്ഷം രൂപ വീതം നഷ്ടപരിഹാരം നല്‍കുമെന്നും ആദിത്യനാഥ് പ്രഖ്യാപിച്ചു. മരണസംഖ്യ ഇനിയും ഉയര്‍ന്നേക്കുമെന്നാണ് സൂചന. പരിക്കേറ്റ പലരുടെയും നില ഗുരുതരമാണ്. വിഐപികള്‍ക്ക് അപകട ദിവസം പ്രവേശനം നല്‍കിയിരുന്നില്ലെന്നും യുപി സര്‍ക്കാര്‍ വ്യക്തമാക്കി. മുഴുവന്‍ സംഭവത്തിലും പ്രത്യേക പൊലീസ് അന്വേഷണം നടത്തുമെന്നും മുഖ്യമന്ത്രി പറഞ്ഞു. ഇത്തരമൊരു ദുരന്തം എങ്ങനെ സംഭവിച്ചു എന്നതിനെക്കുറിച്ച് ആഴത്തിലുള്ള അന്വേഷണം പ്രധാനമാണ്. ദാരുണമായ സംഭവത്തെക്കുറിച്ച് ആഴത്തിലുള്ള അന്വേഷണത്തിനായി ചീഫ് സെക്രട്ടറിയും ഡിജിപിയും വ്യാഴാഴ്ച മഹാ കുംഭമേള സന്ദര്‍ശിക്കുമെന്നും അദ്ദേഹം കൂട്ടിച്ചേര്‍ത്തു.