കുര്യൻ ജോർജ്ജ്

ബർമിംങ്ഹാമിലെ സട്ടൻ കോൾഡ്ഫീൽഡ് വിൻഡ്‌ലെ ലെഷർ സെൻ്റർ സ്റ്റേഡിയത്തിൽ വച്ച് ജൂൺ 20 ശനിയാഴ്ച നടന്ന യുക്മ ദേശീയ കായികമേള 2026 ന് ഉജ്ജ്വലമായ പരിസമാപ്തി. വിവിധ റീജിയണൽ കായികമേളകളിൽ മികവ് തെളിയിച്ച നൂറ് കണക്കിന് കായികതാരങ്ങൾ അണിനിരന്ന ദേശീയ കായികമേളയിൽ 227 പോയിൻ്റുകളോടെ തുടർച്ചയായ അഞ്ചാം തവണയും മിഡ്‌ലാൻഡ്സ് റീജിയൻ ചാമ്പ്യൻമാരായി. 158 പോയിൻ്റുകളോടെ യോർക്ക്ഷയർ റീജിയൻ രണ്ടാം സ്ഥാനത്തെത്തിയപ്പോൾ 77 പോയിൻ്റുകളോടെ നോർത്ത് വെസ്റ്റ് റീജിയൻ മൂന്നാം സ്ഥാനം കരസ്ഥമാക്കി.

യുക്മയുടെ നൂറ്റി അറുപത്തഞ്ചിലേറെ അംഗ അസ്സോസ്സിയേഷനുകളിൽ നിന്നുള്ള കായികതാരങ്ങൾ പങ്കെടുത്ത മേളയിൽ 106 പോയിൻ്റുകളോടെ മിഡ്‌ലാൻഡ്‌സിലെ വാർവിക്ക് ആൻ്റ് ലമിംങ്ടൺ മലയാളി അസ്സോസ്സിയേഷൻ (WALMA) ചാമ്പ്യൻ അസ്സോസ്സിയേഷൻ പദവി നിലനിർത്തിയപ്പോൾ 82 പോയിൻ്റുകളോടെ ഹൾ ഇൻഡ്യൻ മലയാളി അസ്സോസ്സിയേഷൻ (HIMA) രണ്ടാം സ്ഥാനവും 39 പോയിൻ്റുകളോടെ മലയാളി അസ്സോസ്സിയേഷൻ ഓഫ് പോർട്സ്മൌത്ത് മൂന്നാം സ്ഥാനവും കരസ്ഥമാക്കി. 

രാവിലെ 09.00 ന് ആരംഭിച്ച രജിസ്‌ട്രേഷൻ നടപടികൾ പൂർത്തിയാക്കി  ചെസ്റ്റ് നമ്പറുകൾ വിതരണം ചെയ്ത ശേഷം തുടങ്ങിയ മത്സരങ്ങൾ സമയക്രമം അനുസരിച്ച് തന്നെ പൂർത്തിയാക്കുവാൻ കഴിഞ്ഞത് സംഘാടക സമിതിയുടെ കൃത്യമായ ആസൂത്രണവും കായികതാരങ്ങളുടെയും വോളൻ്റിയേഴ്‌സിൻ്റെയും സഹകരണവും കൊണ്ട് കൂടിയാണ്. 

ബർമിംഗ്ഹാം സട്ടൻ കോൾഡ്ഫീൽഡിലെ വിൻഡ്‌ലി ലെഷർ സെൻ്റർ സ്റ്റേഡിയത്തിൽ നടന്ന വർണ്ണശബളമായ മാർച്ച് പാസ്റ്റിനെ തുടർന്ന് ഉദ്ഘാടന യോഗം ആരംഭിച്ചു. യുക്മ ദേശീയ ബാനറിന് പിന്നിൽ ദേശീയ ഭാരവാഹികളും റീജിയണൽ ബാനറുകളുടെ പിന്നിൽ റീജിയണൽ ഭാരവാഹികളും കായികതാരങ്ങളും അണിനിരന്ന മാർച്ച് പാസ്റ്റ് ഏറെ വർണ്ണാഭമായിരുന്നു. 2025 കായികമേള ചാമ്പ്യൻമാർ സംവഹിച്ച ദീപശിഖ നാഷണൽ സ്പോർട്സിൻ്റെ ചുമതല വഹിക്കുന്ന റെയ്മോൾ നിധീരി, പീറ്റർ താണോലിൽ എന്നിവർ ചേർന്ന് ഏറ്റുവാങ്ങി. ചടങ്ങിന് മോടി കൂട്ടുവാൻ ഫ്ളാഷ് മോബുകളും സംഘടിപ്പിച്ചിരുന്നു. 

യുക്മ ദേശീയ കായികമേള 2026 ൻ്റെ ഔപചാരികമായ ഉദ്ഘാടനം യുക്മ ദേശീയ പ്രസിഡൻ്റ് അഡ്വ. എബി സെബാസ്റ്റ്യൻ പതാക ഉയർത്തി നിർവ്വഹിച്ചു. യുകെ മലയാളികൾക്കിടയിൽ പുതിയൊരു കായിക സംസ്‌കാരം വളർത്തിയെടുക്കുവാൻ യുക്മ നടത്തുന്ന ശ്രമങ്ങൾക്ക് ശക്തമായ പിന്തുണ നൽകുന്ന അംഗ അസ്സോസ്സിയേഷനുകളെയും യുക്മ റീജിയണൽ നേതൃത്വങ്ങളെയും പ്രസിഡൻ്റ് തൻ്റെ ഉദ്ഘാടന പ്രസംഗത്തിൽ പ്രത്യേകം അഭിനന്ദിച്ചു. ഒരു മാസത്തിലേറെ നീണ്ടുനിന്ന റീജിയണൽ കായികമേളകളിൽ യുക്മയുടെ വിവിധ റീജിയണുകളിൽ നിന്ന് ലഭിച്ചത് വൻപിച്ച ജനപിന്തുണയായിരുന്നുവെന്ന് പ്രസിഡൻ്റ് പറഞ്ഞു. ജനറൽ സെക്രട്ടറി ജയകുമാർ നായർ സ്വാഗതം ആശംസിച്ച യോഗത്തിന് ജോയിൻ്റ് സെക്രട്ടറിയും കായികമേള കോർഡിനേറ്ററുമായ റെയ്മോൾ നിധീരി നന്ദി അറിയിച്ചു.

ട്രഷറർ ഷീജോ വർഗ്ഗീസ്, വൈസ് പ്രസിഡൻ്റ്മാരായ വർഗ്ഗീസ് ഡാനിയൽ, സ്മിത തോട്ടം, ജോയിൻ്റ് സെക്രട്ടറി സണ്ണിമോൻ മത്തായി, ജോയിൻ്റ് ട്രഷറർ പീറ്റർ താണോലിൽ, മുൻ ദേശീയ പ്രസിഡൻ്റ് ഡോ. ബിജു പെരിങ്ങത്തറ, ദേശീയ സമിതിയംഗങ്ങളായ ബിജു പീറ്റർ, ജോസ് വർഗ്ഗീസ്, ജോർജ്ജ് തോമസ്, സുരേന്ദ്രൻ ആരക്കോട്ട്, രാജേഷ് രാജ്, ബെന്നി അഗസ്റ്റിൻ, റീജിയണൽ പ്രസിഡൻ്റ്മാരായ അമ്പിളി സെബാസ്റ്റ്യൻ, അഡ്വ. ജോബി പുതുക്കുളങ്ങര, സുനിൽ ജോർജ്ജ്, ജിപ്സൺ തോമസ്, ജോബിൻ ജോർജ്ജ്, മുൻ ദേശീയ ട്രഷറർ ഡിക്സ് ജോർജ്ജ് തുടങ്ങിയവർ ഉദ്ഘാടന യോഗത്തിൽ സന്നിഹിതരായിരുന്നു. 

വ്യക്തിഗത ചാമ്പ്യൻമാർ:-

കിഡ്‌സ് - ജയ്‌ഡൻ തോമസ് സിബു (മലയാളി അസ്സോസ്സിയേഷൻ സ്‌റ്റോക്ക്പോർട്ട്), അൻവി നായർ (ലീഡ്സ് മലയാളി അസ്സോസ്സിയേഷൻ)

സബ് ജൂണിയർ - ആരോൺ വിൻസൻ്റ് (അമ്മ മലയാളം മാൻസ്ഫീൽഡ്), ജയ്ശിവ് രാജേഷ് (WALMA വാർവിക്ക്), എഥാൻ ദീപു (HlMA ഹൾ), കൈര ഫെർണാണ്ടസ് (WALMA വാർവിക്ക്)

ജൂണിയേഴ്‌സ് - നഥാൻ ടോബി (LIMA ലിവർപൂൾ), റിയാന ജോസഫ് (WALMA വാർവിക്ക്)

സീനിയേഴ്സ് - ധ്യാൻ കൃഷ്‌ണ (അമ്മ മലയാളം മാൻസ്ഫീൽഡ്), ജെനിറ്റ വർഗ്ഗീസ് (എക്സിറ്റർ മലയാളി അസ്സോസ്സിയേഷൻ)

അഡൽററ്സ് - രാഹുൽ രാജൻ (NMCA നോട്ടിംഗ്ഹാം), ടിൻ്റു മെൽവിൻ (സർഗ്ഗം സ്റ്റീവനേജ്)

സീനിയർ അഡൽറ്റ്സ് - ജോസ് പാറയ്ക്കൽ (WALMA വാർവിക്ക്), സിന്ധു ലിൻ്റോ (മലയാളി അസ്സോസ്സിയേഷൻ ഓഫ് പോർട്സ്മൌത്ത്)

സൂപ്പർ സീനിയർ - സജി തോമസ് (മലയാളി അസ്സോസ്സിയേഷൻ ഓഫ് പോർട്സ്മൌത്ത്), എലിസബത്ത് മാത്യു (HIMA ഹൾ).

യുക്മ പ്രസിഡൻ്റ്  അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ജോയിൻ്റ് സെക്രട്ടറി റെയ്‌മോൾ നിധീരി എന്നിവരുടെ മേൽനോട്ടത്തിൽ ദേശീയ, റീജിയണൽ ഭാരവാഹികളും വിവിധ അംഗ അസ്സോസ്സിയേഷൻ ഭാരവാഹികളും ഉൾപ്പടെ അൻപതോളം വോളൻ്റിയർമാരാണ് മത്സരങ്ങൾ നിയന്ത്രിച്ചത്. രണ്ട് ട്രാക്കുകളിലായി റെയ്‌സ് ഇനങ്ങളും രണ്ട് ജംപിംങ് പിറ്റുകളിൽ ജംപ് ഇനങ്ങളും ഷോട്ട്പുട്ട് പിച്ചിൽ ഷോട്ട്പുട്ടും ഒരേ സമയം നടത്തുവാൻ സാധിച്ചത് സമയബന്ധിതമായി മത്സരങ്ങൾ പൂർത്തിയാക്കുവാൻ ഏറെ സഹായകരമായി. 

വർഗ്ഗീസ് ഡാനിയൽ, സുരേന്ദ്രൻ ആരക്കോട്ട്, സുനിൽ ജോർജ്ജ്, ജോബിൻ ജോർജ്ജ്, അജു തോമസ്, ബിജോയ് പി വർഗ്ഗീസ്, ഡിനു ഡൊമിനിക്, റോസ്‌മി ജോബി, റയാൻ ജോബി എന്നിവർ ഒന്നാം ട്രാക്കിലെ മത്സരങ്ങൾ നിയന്ത്രിച്ചപ്പോൾ രണ്ടാം ട്രാക്കിൽ സ്മിത തോട്ടം, രേവതി അഭിഷേക്, ടെസ്സി മാത്യു, ഡാഫിനി എൽദോസ്, ബിജോ തോമസ്, ആഷ ജോബിൻ, ജിമീഷ് ജോസഫ്, ജിബിൻ പി ജോയ് എന്നിവർ മത്സരങ്ങൾ നിയന്ത്രിച്ചു.

ജംപ് പിറ്റ് വണ്ണിൽ സണ്ണിമോൻ മത്തായി, ബിജു പീറ്റർ, ജോസ് വർഗ്ഗീസ്, ടോംബിൽ കണ്ണത്ത്, സോജ് ജയപ്രകാശ് എന്നിവരും 
ജംപ് പിറ്റ് രണ്ടിൽ രാജേഷ് രാജ്, അമ്പിളി മാത്യൂസ്, ലൂയീസ് മേനാച്ചേരി, പോൾ ജോസഫ്, രാജപ്പൻ വർഗ്ഗീസ്, നിഥിൻ കാളിച്ചത് എന്നിവരും മത്സരങ്ങൾ നിയന്ത്രിച്ചു. 

ഷോട്ട്പുട്ട് മത്സരങ്ങൾക്ക് പീറ്റർ താണോലിൽ, സാജു സലിംകുട്ടി, സജീവ് സെബാസ്റ്റ്യൻ, റൂബിച്ചൻ, ബാബു തോട്ടം എന്നിവർ നേതൃത്വം നൽകി.

രജിസ്ട്രേഷൻ നടപടികൾ ഷീജോ വർഗ്ഗീസ്, അഡ്വ. ജോബി പുതുക്കുളങ്ങര എന്നിവരുടെ നേതൃത്വത്തിൽ പൂർത്തിയാക്കിയപ്പോൾ ഓഫീസ് നിർവ്വഹണം ജിപ്സൺ തോമസ്, ബെന്നി അഗസ്റ്റിൻ, തേജു മാത്യൂസ് എന്നിവർ വളരെ ഭംഗിയായി നിർവ്വഹിച്ചു.

ഡോ. ബിജു പെരിങ്ങത്തറ, ഡോ. ശീതൾ മാർക്ക് എന്നിവരുടെ നേതൃത്വത്തിലുള്ള മെഡിക്കൽ ടീം കായികതാരങ്ങൾക്കും കാണികൾക്കും ആവശ്യമായ അടിയന്തിര മെഡിക്കൽ സേവനങ്ങൾ സ്‌റ്റേഡിയത്തിൽ ലഭ്യമാക്കി.

ജോബി തോമസ്, ദേവലാൽ സഹദേവൻ, ഡിക്സ് ജോർജ്ജ് എന്നിവരടങ്ങിയ ടീം കായികമേളയുടെ മീഡിയ വിഭാഗത്തിന് നേതൃത്വം നൽകി. സ്‌റ്റേഡിയത്തിലെ അനൌൺസ്മെൻ്റ് പതിവ് പോലെ ജിനോ സെബാസ്റ്റ്യൻ വളരെ ഭംഗിയായി നിർവ്വഹിച്ചു. 

എൻഡ്ലെസ്സ് ഫ്രെയിം പ്രൊഡക്ഷൻസിലെ വിനോദ് രമേശ്, വിപിൻ രാജ് എന്നിവരാണ് കായികമേളയുടെ ഫോട്ടോകളും വീഡിയോകളും പകർത്തിയത്. സാജു വർഗ്ഗീസ് സ്‌റ്റേഡിയത്തിലെ സൌണ്ട് ക്രമീകരണങ്ങൾ നിർവ്വഹിച്ചു. കേരള കഫേ കവൻട്രിയുടെ ഭക്ഷണ കൌണ്ടറിലൂടെ രുചികരമായ വിഭവങ്ങൾ മിതമായ നിരക്കിൽ വിതരണം ചെയ്തു.

യുക്മ ദേശീയ കായികമേളയിൽ പങ്കെടുത്ത മുഴുവൻ കായികതാരങ്ങൾക്കും കായികപ്രേമികൾക്കും ഈ കായികമേള വിജയകരമായി സംഘടിപ്പിക്കുവാൻ സഹകരിച്ച മുഴുവനാളുകൾക്കും യുക്‌മ ദേശീയ സമിതി നന്ദി അറിയിച്ചു.

ദേശീയ കായികമേളയുടെ കൂടുതൽ ചിത്രങ്ങൾ കാണുവാനായി താഴെ കൊടുത്തിരിക്കുന്ന ലിങ്കിൽ ക്ലിക്ക് ചെയ്യുക:

https://drive.google.com/drive/folders/1hqQZdaJXRCszDgcwYknz9Y3agM3_9qZ7?usp=sharing