സ്വന്തം ലേഖകൻ

സാധാരണയായി ഒരാളെ വിളിക്കുമ്പോള്‍ പേര് ഉപയോഗിക്കുകയാണ് പതിവ്. എന്നാല്‍ പേരിന് പകരം ഒരു പ്രത്യേക ഈണം ഉപയോഗിച്ച് ആളുകളെ വിളിക്കുന്നൊരു ഗ്രാമമുണ്ടെന്ന് പറഞ്ഞാല്‍ വിശ്വസിക്കുമോ? പക്ഷികളുടെ പാട്ടിനോട് സാമ്യമുള്ള വിസില്‍ ശബ്ദങ്ങളും സംഗീതത്തുടിപ്പുകളും കൊണ്ട് ആളുകള്‍ പരസ്പരം വിളിക്കുന്ന ഈ ഗ്രാമം ഇന്ത്യയുടെ വടക്കുകിഴക്കന്‍ സംസ്ഥാനമായ മേഘാലയയിലാണ്. കോങ്തോങ് (Kongthong) എന്നാണ് ഈ ഗ്രാമത്തിന്റെ പേര്. 'വിസിലിങ് വില്ലേജ്' അഥവാ വിസില്‍ ഗ്രാമം എന്ന പേരിലാണ് ഇത് അറിയപ്പെടുന്നത്.

ഓരോ വ്യക്തിക്കും ഓരോ ഈണം

മേഘാലയയിലെ ഈസ്റ്റ് ഖാസി ഹില്‍സ് ജില്ലയിലാണ് കോങ്തോങ് സ്ഥിതി ചെയ്യുന്നത്. ഇവിടുത്തെ ഏറ്റവും വലിയ പ്രത്യേകത ഓരോ വ്യക്തിക്കും സ്വന്തമായി ഒരു സംഗീതപ്പേര് ഉണ്ടെന്നതാണ്. ഒരു കുഞ്ഞ് ജനിക്കുമ്പോള്‍ അമ്മയാണ് അതിനായി ഒരു പ്രത്യേക ഈണം ഒരുക്കുന്നത്. പിന്നീട് ആ ഈണം കുഞ്ഞിനെ വിളിക്കാനുള്ള പേരായി മാറുന്നു. 'ജിങ്‌റ്വായ് ഇയാവ്‌ബെയ്' (Jingrwai Iawbei) എന്നാണ് ഈ പാരമ്പര്യം അറിയപ്പെടുന്നത്. 'അമ്മയുടെ സ്‌നേഹഗാനം' എന്നാണ് ഈ പേരിന്റെ അര്‍ഥം. കുഞ്ഞിനോടുള്ള സ്‌നേഹവും വാത്സല്യവും നിറഞ്ഞ ഈ ഈണം വ്യക്തിയുടെ ജീവിതത്തിലുടനീളം ഒരു പ്രത്യേക തിരിച്ചറിയലായി നിലനില്‍ക്കുന്നു.

വിസില്‍ ശബ്ദത്തില്‍ ആശയവിനിമയം

ഗ്രാമത്തിലൂടെ നടക്കുമ്പോള്‍ ഒരിടത്തുനിന്ന് മനോഹരമായൊരു വിസില്‍ ശബ്ദം കേള്‍ക്കാം. അല്‍പ്പസമയത്തിനകം മറ്റൊരിടത്തുനിന്ന് അതിന് മറുപടിയായി മറ്റൊരു ഈണവും ഉയര്‍ന്നേക്കാം. ആരെങ്കിലും സുഹൃത്തിനെ വിളിക്കുന്നതോ വീട്ടിലുള്ള ഒരാളെ അന്വേഷിക്കുന്നതോ ആയിരിക്കാം അത്.

ഓരോരുത്തരുടെയും ഈണം വ്യത്യസ്തമായതിനാല്‍ ആരെയാണ് വിളിക്കുന്നതെന്ന് തിരിച്ചറിയാന്‍ ഗ്രാമവാസികള്‍ക്ക് സാധിക്കും. ദൈര്‍ഘ്യമേറിയ ഈണത്തിനൊപ്പം ദൈനംദിന ആവശ്യങ്ങള്‍ക്കായി ചെറിയ ഈണങ്ങളും ഉപയോഗിക്കുന്ന പതിവുണ്ട്. സാധാരണ പേരുകള്‍ക്കും ഔദ്യോഗിക രേഖകളിലെ തിരിച്ചറിയലുകള്‍ക്കും പുറമേ ഈ സംഗീതപ്പേരുകളും ഇവിടത്തെ ജീവിതത്തിന്റെ ഭാഗമാണ്.

തലമുറകളിലൂടെ കൈമാറുന്ന സ്‌നേഹത്തിന്റെ അടയാളം

ഇത് വെറുമൊരു കൗതുകകരമായ ആശയവിനിമയ രീതി മാത്രമല്ല. ഖാസി സമൂഹത്തിന്റെ പാരമ്പര്യത്തോടും കുടുംബബന്ധങ്ങളോടും ചേര്‍ന്നുനില്‍ക്കുന്ന സാംസ്‌കാരിക ആചാരം കൂടിയാണിത്. പൂര്‍വികരെയും കുടുംബത്തിന്റെ വേരുകളെയും ഓര്‍മിപ്പിക്കുന്ന ഈ പാരമ്പര്യം തലമുറകളായി കൈമാറിവരുന്നു. പ്രാദേശിക വിശ്വാസമനുസരിച്ച് ഒരാള്‍ മരിച്ചാല്‍ ആ വ്യക്തിക്കായി സൃഷ്ടിച്ച ഈണവും പിന്നീട് മറ്റൊരാള്‍ക്കായി ഉപയോഗിക്കാറില്ല. ഓരോ വ്യക്തിയുടെയും ഈണം അയാളുടെ തനതായ തിരിച്ചറിയലായാണ് കണക്കാക്കപ്പെടുന്നത്.

പ്രകൃതിഭംഗി ആസ്വദിക്കാനും പോകാം

സംഗീതപ്പേരുകള്‍ മാത്രമല്ല കോങ്തോങിന്റെ ആകര്‍ഷണം. പച്ചപ്പുനിറഞ്ഞ മലനിരകളും കാടുകളും ഗ്രാമീണ വഴികളും മഞ്ഞുമൂടിയ കാഴ്ചകളുമെല്ലാം സഞ്ചാരികള്‍ക്ക് മനോഹരമായ അനുഭവം സമ്മാനിക്കുന്നു. പരമ്പരാഗത ജീവിതരീതികളും പ്രകൃതിയോട് ചേര്‍ന്നുള്ള ജീവിതവും അടുത്തറിയാന്‍ ആഗ്രഹിക്കുന്നവര്‍ക്ക് അനുയോജ്യമായ ഇടമാണിത്. ചുറ്റുപാടുകളിലെ ഓറഞ്ച് തോട്ടങ്ങളും പ്രാദേശികമായി ഉല്‍പാദിപ്പിക്കുന്ന തേനും ഇവിടത്തെ മറ്റൊരു പ്രത്യേകതയാണ്. തിരക്കേറിയ വിനോദസഞ്ചാര കേന്ദ്രങ്ങളില്‍നിന്ന് മാറി ശാന്തമായ അന്തരീക്ഷത്തില്‍ സമയം ചെലവഴിക്കാനും ഇവിടം തിരഞ്ഞെടുക്കാം.

മേഘാലയയുടെ തലസ്ഥാനമായ ഷില്ലോങ്ങില്‍നിന്ന് ഏകദേശം 5560 കിലോമീറ്റര്‍ അകലെയാണ് കോങ്തോങ് ഗ്രാമം. ഷില്ലോങ്ങില്‍നിന്ന് ടാക്‌സികളിലൂടെയും ലഭ്യമായ ഷെയര്‍ഡ് വാഹനങ്ങളിലൂടെയും ഇവിടേക്ക് എത്താം. മലയോര വഴികളിലൂടെയുള്ള യാത്ര തന്നെ പ്രകൃതിഭംഗി ആസ്വദിക്കാനുള്ള അവസരമാണ്. ഗ്രാമത്തിലേക്ക് പോകാന്‍ സ്വകാര്യ വാഹനം മുന്‍കൂട്ടി ക്രമീകരിക്കുന്നത് സൗകര്യപ്രദമായിരിക്കും. പൊതുഗതാഗതത്തിന്റെ ലഭ്യതയും മടക്കയാത്രയ്ക്കുള്ള സൗകര്യങ്ങളും യാത്രയ്ക്ക് മുമ്പ് ഉറപ്പാക്കുന്നത് നല്ലതാണ്. കൂടുതല്‍ സാഹസികമായി യാത്ര ചെയ്യാന്‍ ആഗ്രഹിക്കുന്നവര്‍ക്ക് വനപാതകളും ഗ്രാമീണ പ്രദേശങ്ങളും ഉള്‍പ്പെടുന്ന ട്രെക്കിങ് യാത്രകളും പരിഗണിക്കാം. ഒക്ടോബര്‍ മുതല്‍ ഏപ്രില്‍ വരെയുള്ള കാലയളവ് സന്ദര്‍ശനത്തിന് പരിഗണിക്കാവുന്നതാണ്. മഴക്കാലത്ത് വഴികള്‍ വഴുക്കലുള്ളതാകാനും യാത്ര തടസ്സപ്പെടാനും സാധ്യതയുണ്ട്.