ലണ്ടൻ: സ്വന്തം ലേഖകൻ

സൈബർ ആക്രമണം മൂലം ഓൺലൈൻ സർവ്വീസുകൾ മുടങ്ങിയതിനാൽ കഴിഞ്ഞ ചൊവ്വാഴ്‌ചയാണ് ലണ്ടനിലെ പ്രമുഖ ആശുപത്രികൾ ‘ക്രിട്ടിക്കൽ ഇൻസിഡന്റ്’ പ്രഖ്യാപിച്ചത്. സർജറികളും അപ്പോയിന്റ്മെന്റുകളും  അടക്കമുള്ള അടിയന്തരമല്ലാത്ത ചികിത്സകളെല്ലാം ഇതുമൂലം മാറ്റിവച്ചിരുന്നു.

ഒരാഴ്ച പിന്നിടുമ്പോഴും ലണ്ടനിലെ ആശുപത്രികളിലെ സേവനങ്ങൾ സാധാരണ നിലയിൽ ആയിട്ടില്ല. മാത്രമല്ല പല ആശുപത്രികളിലും സാധാരണ ചികിത്സകളും അനുബന്ധ  പ്രവർത്തനങ്ങളും കൂടുതൽ പ്രതിസന്ധിയിലും ആയിത്തീർന്നു.

ഇതേത്തുടർന്ന് മെഡിക്കൽ വിദ്യാർഥികളെ വോളണ്ടിയർമാരായി ഡ്യൂട്ടിക്ക് വിളിച്ച് അടിയന്തര സേവനങ്ങൾ നടത്തുകയാണ് പ്രമുഖ ആശുപത്രികൾ. 10 മുതൽ 12   മണിക്കൂറുകൾ വരെ നിർബന്ധിതമായി ഡ്യൂട്ടി ചെയ്യേണ്ടി വരുന്നുവെന്ന് മെഡിക്കൽ വിദ്യാർഥികൾ പറയുന്നു.  
ലണ്ടനിലെ പ്രശസ്തമായ സെൻറ് തോമസ് ഹോസ്പിറ്റലും കിംഗ്സ് കോളേജ് ഹോസ്പിറ്റലും അടക്കം  സൈബർ ആക്രമണം ബാധിച്ച് ചികിത്സകൾ മുടങ്ങിയവയിലുണ്ട്. 

പാത്തോളജി സ്ഥാപനമായ സിനോവിസ് നൽകുന്ന സേവനങ്ങളെ ലക്ഷ്യമിട്ട് സൈബർ ഹാക്കർമാർ മോചനദ്രവ്യം ആവശ്യപ്പെട്ട് നടത്തിയ ആക്രമണത്തിനുശേഷം ആശുപത്രികളിലെ ഓൺലൈൻ സേവനങ്ങൾ തടസ്സപ്പെടുകായായിരുന്നു.  ബ്ലഡ് ട്രാൻസ്ഫ്യൂഷനും ബ്ലഡ് ടെസ്‌റ്റ് ഫലങ്ങളും  ഉൾപ്പെടെയുള്ള സേവനങ്ങൾ ഇതുമൂലം സാരമായി തടസ്സപ്പെട്ടിരിക്കുകയാണ്.

ഗൈസ് ആൻഡ് സെൻ്റ് തോമസ് ട്രസ്റ്റിലെ ജീവനക്കാർക്ക് നൽകിയ  സന്ദേശത്തിൽ, ട്രെയിനി മെഡിക്കുകൾ 10 അല്ലെങ്കിൽ 12 മണിക്കൂർ ഷിഫ്റ്റുകളിൽ സന്നദ്ധസേവനം നടത്താൻ ആവശ്യപ്പെട്ടിട്ടുണ്ട്.

ബ്ളഡ്  ടെസ്റ്റ് അടക്കമുള്ളവയുടെ റിസൾട്ടുമായി ലാബിൽ നിന്നും ഡോക്ടർമാരുടെ അടുക്കലേക്കും ക്ലിനിക്കുകളിലേക്കും ഓപ്പറേഷൻ തിയേറ്ററിലേക്കുമൊക്കെ കാൽനടയായി എത്തിക്കുകയാണ് ഇപ്പോൾ മെഡിക്കൽ സ്‌റ്റുഡന്റ്‌സുകളെ ഏല്പിച്ചിട്ടുള്ള പ്രധാന ദൗത്യമെന്നറിയുന്നു.

അതേസമയം പാത്തോളജി റിസൾട്ടുകൾ ഇല്ലാതെ ക്ലിനിക്കൽ ചികിത്സകൾ നടത്തുവാനുള്ള തീരുമാനവും ആശുപത്രികൾ കൈക്കൊണ്ടിട്ടുണ്ട്. എന്നാൽ പാത്തോളജി റിപ്പോർട്ടില്ലാതെ ക്ലിനിക്കൽ തീരുമാനങ്ങൾ എടുക്കുന്നതിൽ ഗൈസിലും സെൻ്റ് തോമസിലും ട്രസ്റ്റ് ജീവനക്കാർ ആശങ്ക പ്രകടിപ്പിച്ചു.

കിംഗ്സ് കോളേജ് ഹോസ്പിറ്റൽ എൻഎച്ച്എസ് ഫൗണ്ടേഷൻ ട്രസ്റ്റും ഗൈസ്, സെൻ്റ് തോമസ് എൻഎച്ച്എസ് ഫൗണ്ടേഷൻ ട്രസ്റ്റും ലഭിച്ചിരുന്ന ഓൺലൈൻ സേവനങ്ങളെ തടസ്സപ്പെടുത്തിയ ആക്രമണം നടത്തിയത് ‘ ക്വിലിൻ’  എന്ന് വിളിക്കുന്ന റഷ്യൻ ഹാക്കർ ഗ്രൂപ്പാണെന്ന്  കണ്ടെത്തിയിട്ടുണ്ട്.

റോയൽ ബ്രോംപ്ടണിലെയും ഹെയർഫീൽഡിലെയും ആശുപത്രികളിലെ സർജറി, ട്രാൻസ്പ്ലാൻറ് ഓപ്പറേഷനുകളെ ആക്രമണം ബാധിച്ചതായി കരുതുന്നു. എവലിന ലണ്ടൻ ചിൽഡ്രൻസ് ഹോസ്പിറ്റലിനെയും പ്രാഥമിക ശുശ്രൂഷാ സേവനങ്ങളെയും പോലും ആക്രമണം ബാധിച്ചു.

"രോഗീപരിചരണ തടസ്സം" കുറയ്ക്കുന്നതിന് സ്റ്റാഫ് "രാത്രി മുഴുവനും" പ്രവർത്തിക്കുകയാണെന്ന് എൻഎച്ച്എസ് ലണ്ടൻ്റെ വക്താവ് വ്യക്തമാക്കി.

വാർഡുകളിലെ ജീവനക്കാർ ഇപ്പോൾ പേപ്പർ റിസൾട്ടുകൾ കൈമാറുന്ന രീതികൾ ഉപയോഗിക്കുകയും രക്തപ്പകർച്ച ബാഗുകളിൽ മാനുഷികമായി ഒപ്പിടുകയും ചെയ്യുന്ന രീതി അവലംബിക്കുന്നു. ഇത് വലിയ കാലതാമസത്തിനും ഇടയാക്കുന്നു. രക്ത പരിശോധന റിപ്പോർട്ടുകൾ കൈമാറാനുള്ള "ഫ്ലോർവാക്കർ" ആയി മെഡിക്കൽ വിദ്യാർത്ഥികളെ ഉപയോഗിക്കുകയും ചെയ്യുന്നു.

തടസ്സം ഇനിയും ഏതാനും ആഴ്ചകൾ നീണ്ടുനിൽക്കുമെന്നും പ്രാദേശിക എൻഎച്ച്എസ് ഇംഗ്ലണ്ട് ടീം പ്രശ്നപരിഹാരം  ഏകോപിപ്പിക്കുന്നുണ്ടെന്നും ആശുപത്രി അധികൃതർ അറിയിച്ചു. 

സൈബർ ആക്രമണം ബാധിച്ച എല്ലാവരോടും ഖേദം പ്രകടിപ്പിക്കുന്നതായി എൻഎച്ച്എസ് ലണ്ടൻ്റെ വക്താവ് പറഞ്ഞു.

"പത്തോളജി സേവനങ്ങൾ വൈവിധ്യമാർന്ന ചികിത്സകളിൽ അവിഭാജ്യമാണ്,  ഈ ആക്രമണം കാരണം നിരവധി ഓപ്പറേഷനുകളും അപ്പോയിൻ്റ്‌മെൻ്റുകളും റദ്ദാക്കേണ്ടി വന്നു. തടസ്സം പൂർണ്ണമായി വിലയിരുത്തുന്നതിനും ഡാറ്റ കൃത്യമാണെന്ന് ഉറപ്പാക്കുന്നതിനും ഞങ്ങൾ ഇപ്പോഴും ആശുപത്രികളുമായും പ്രാദേശിക ജിപി സേവനങ്ങളുമായും പ്രവർത്തിക്കുന്നു.” 

ആശുപത്രിയിലേക്ക് വരേണ്ടെന്ന് പ്രത്യേക അറിയിപ്പുകൾ ലഭിക്കാത്ത  രോഗികൾക്ക്  പതിവുപോലെ അപ്പോയിന്റ്മെന്റുകൾക്കായി ആശുപത്രിയിൽ എത്താമെന്നും അധികൃതർ അറിയിച്ചു.