ലണ്ടൻ: സ്വന്തം ലേഖകൻ

ചെറിയ ഇടവേളയ്ക്കുശേഷം സീനിയർ ഡോക്‌ടർമാർ  വീണ്ടും സമരത്തിലേക്ക് പോകുന്നു. നോർത്തേൺ അയർലാൻഡിലാണ് ഡോക്ടർമാരുടെ സംഘടനയായ ബ്രിട്ടീഷ് മെഡിക്കൽ അസ്സോസിയേഷൻ  (ബി.എം.എ) ഈ മാസം അവസാനം സമരം നടത്തുമെന്ന് പ്രഖ്യാപിച്ചിട്ടുള്ളത്.

ഇതിനെ അനുകൂലിച്ച് നോർത്തേൺ അയർലൻഡിലെ കൺസൾട്ടന്റുമാർ വോട്ടുചെയ്‌തതായും  ബി.എം.എ അറിയിച്ചു. അഞ്ചാഴ്ചത്തെ ബാലറ്റിൻ്റെ ഫലം അനുസരിച്ച്  ജൂൺ 26 മുതൽ 27 വരെ 24 മണിക്കൂർ വാക്കൗട്ടിൽ നോർത്തേൺ അയർലൻഡിലെ കൺസൾട്ടൻ്റുകൾ പങ്കെടുക്കും.

എൻ.എച്ച്എസ് ആശുപത്രികളെ സമരം കാര്യമായി ബാധിക്കുമെന്നതിനാൽ, സമരദിനങ്ങളിൽ അപ്പോയിന്റ്മെന്റുകൾ ബുക്കുചെയ്തിട്ടുള്ള അടിയന്തര ആവശ്യമുള്ള രോഗികൾ, ഡോക്ടറെ കാണുന്നത് മാറ്റിവയ്ക്കണമെന്ന് നോർത്തേൺ അയർലൻഡ് എൻഎച്ച്എസ് അറിയിച്ചു.

ശമ്പളവുമായി ബന്ധപ്പെട്ട് ദീർഘകാലമായി നിലനിൽക്കുന്ന തർക്കത്തിൻ്റെ ഭാഗമായാണ് സമര തീരുമാനം. വോട്ട് ചെയ്തവരിൽ 92% പേരും പണിമുടക്കിന് അനുകൂലമായി വോട്ട് ചെയ്തു. നോർത്തേൺ അയർലണ്ടിലെ എൻഎച്ച്എസ് ആശുപത്രികളിൽ നിലവിൽത്തന്നെ ഡോക്ടർമാരുടെ കുറവ് രൂക്ഷമായതിനാൽ, സിനിയർ ഡോക്ടർമാരുടെ സമരം മൂലം സ്ഥിതി  കൂടുതൽ മോശമാകാൻ സാധ്യതയുണ്ടെന്ന് ബ്രിട്ടീഷ് മെഡിക്കൽ അസോസിയേഷൻ (ബിഎംഎ) മുന്നറിയിപ്പ് നൽകി.

2008/2009 മുതൽ കൺസൾട്ടൻ്റുമാരുടെ വേതനം "30% ത്തിലധികം" കുറഞ്ഞതായി BMA ചൂണ്ടിക്കാട്ടുന്നു.  അതേസമയം നിരന്തര സമരത്തിനുശേഷം ഇംഗ്ലണ്ടിലെ കൺസൾട്ടൻ്റുകൾക്ക് അടുത്തിടെ ഒരു പുതിയ ശമ്പള ഓഫർ ലഭിച്ചിരുന്നു. അതിന് തത്തുല്യമായ രീതിയിയിൽ നോർത്തേൺ അയർലണ്ടിലെ സീനിയർ ഡോക്ടർമാരുടെ ശമ്പളവും ഉയർത്തണമെന്നാണ് ആവശ്യം.

നോർത്തേൺ അയർലണ്ടിലെ കൺസൾട്ടൻറുകൾക്ക് ലഭിക്കുന്നതിൻ്റെ ഇരട്ടി ശമ്പളമാണ് നിലവിൽ അയർലണ്ടിലെ കൺസൾട്ടൻ്റുമാർക്ക് ലഭിക്കുന്നതെന്നും റിപ്പോർട്ടിൽ പറയുന്നു.

അതേസമയം ബിഎംഎയുമായി ശമ്പള ചർച്ചകൾ തുടരുകയാണെന്ന് ആരോഗ്യ വകുപ്പ് അറിയിച്ചു.

"കൂടുതൽ ചർച്ചകൾ  ഈ ആഴ്ച ആസൂത്രണം ചെയ്തിട്ടുണ്ട്, ഇംഗ്ലണ്ടിലെ വേതന സെറ്റിൽമെൻ്റ് ഉൾപ്പെടെയുള്ള ശമ്പള ഓഫറുകൾ നല്കാൻ  കഴിയുമോയെന്ന് പരിശോധിക്കും" വക്താവ് വ്യക്തമാക്കി.

ബാലറ്റ് ഫലത്തിന് ശേഷം സംസാരിച്ച ബിഎംഎയിൽ നിന്നുള്ള ഡോ ഫാരൻ, ശമ്പള ഓഫർ സുഗമമാക്കുന്നതിന് ആരോഗ്യമന്ത്രി അടിയന്ത്രര നടപടിയെടുക്കണമെന്ന് ആവശ്യപ്പെട്ടു.

“ഡോക്ടർമാരില്ലാതെ ആരോഗ്യ സേവനം പ്രവർത്തിക്കില്ല. രോഗികളുടെ പരിചരണത്തിന് ആത്യന്തികമായി നേതൃത്വം നൽകുന്നത് കൺസൾട്ടൻ്റുകളാണ്, 

അവർ ഭാവിയിലെ ഡോക്ടർമാരേയും  പരിശീലിപ്പിക്കുന്നു, അവർ നവീകരിക്കുകയും ഗവേഷണം ചെയ്യുകയും നയിക്കുകയും ചെയ്യുന്നു. അവർ ചെയ്യുന്ന സേവനങ്ങൾക്ക്  ശരിയായ പ്രതിഫലം നൽകേണ്ടതുണ്ട്.

“ഈ സമരം ആരോഗ്യമന്ത്രിക്ക് പ്രവർത്തിക്കേണ്ട ഒരു ശക്തമായ സന്ദേശമായിരിക്കുമെന്നും” വക്താവ് പറഞ്ഞു.

നോർത്തേൺ അയർലണ്ടിൽ ഏകദേശം 1200 കൺസൾട്ടൻ്റ് അംഗങ്ങളുണ്ടെന്ന് ബിഎംഎ അറിയിച്ചു, എന്നാൽ എൻഐയിൽ പ്രവർത്തിക്കുന്ന 2012 ലെ ഡബ്ല്യുടിഇ (മുഴുവൻ സമയ തുല്യത) കൺസൾട്ടൻ്റുകൾക്ക് പണിമുടക്കാൻ അർഹതയുണ്ട്.

നോർത്തേൺ അയർലണ്ടിലെ ജൂനിയർ ഡോക്ടർമാർ ശമ്പളത്തെ വർദ്ധനവിനായി ഈവർഷം മാർച്ചിൽ ആദ്യമായി പണിമുടക്ക് നടത്തിയിരുന്നു. അതുപോലെ ഇംഗ്ലണ്ടിലെ ജൂനിയർ ഡോക്ടർമാർ ഇപ്പോഴും സമരങ്ങൾ തുടരുകയുമാണ്.