![](https://britishpathram.com/malayalamNews/97098.jpg)
യുകെ മലയാളികള് ഒന്നടങ്കം വിഷമിച്ച ദിവസമായിരുന്നൂ ഇന്നലെ, ബാസില്ഡണില് താമസിച്ചിരുന്ന പെണ്കുട്ടിയെ പെട്ടന്ന് കാണാതാവുകയായിരുന്നൂ. ആശങ്കയുടെ മണിക്കൂറുകൾ ആശ്വാസത്തിന് വഴിമാറിയപ്പോൾ, പെൺകുട്ടിയുടെ മാതാപിതാക്കൾക്കൊപ്പം ആശ്വാസ നിശ്വാസമുതിർത്ത് യുകെ മലയാളികൾ.
വീട്ടിൽ നിന്ന് കാണാതായതു മുതൽ സോഷ്യൽ മീഡിയകളിൽ നിറഞ്ഞുനിൽക്കുകയായിരുന്നു പതിനഞ്ചുകാരിയായ മലയാളി കൗമാരക്കാരി. സോഷ്യൽ മീഡിയയിലൂടെ അറിയപ്പെടുന്ന യുകെ മലയാളികളെല്ലാം ഇതേക്കുറിച്ചുള്ള വാർത്തകൾ നൽകി.
യുട്യൂബിലും ഫെയ്സ്ബുക്കിലുമെല്ലാം പതിനഞ്ചുകാരിയുടെ മുഖം നിറഞ്ഞുനിന്നു. അതോടെ ഒട്ടുമിക്ക യുകെ മലയാളികളും വിവരമറിഞ്ഞു. അറിഞ്ഞവർ മറ്റുള്ളവരെ അറിയിച്ചു. പെൺകുട്ടി കാണാതായ സ്ഥലത്തിന് സമീപമുള്ളവർ കണ്ണും കാതും തുറന്ന് അന്വേഷണത്തിനുമിറങ്ങി. അന്വേഷണങ്ങൾക്ക് അധികം വൈകാതെ തന്നെ ഫലമുണ്ടായി. നാടകീയ മണിക്കൂറുകൾക്കൊടുവിൽ തീർത്തും അപ്രതീക്ഷിതമായി കണ്ടെത്തൽ. ആശങ്കയുടെ നിമിഷങ്ങൾക്ക് അവസാനം.
എസ്സെക്സിന് സമീപം താമസിക്കുന്ന മലയാളി കുടുംബത്തിലെ രണ്ട് മക്കളിൽ ഒരാളായ പെണ്കുട്ടിയെയാണ് വെള്ളിയാഴ്ച്ച വൈകുന്നേരത്തോടെ കാണാതായത്. വീട്ടുകാർ വിവരം ഉടൻ പോലീസിൽ അറിയിക്കുകയും സോഷ്യൽ മീഡിയയിലൂടെ പങ്കുവയ്ക്കുകയും ചെയ്തു.
യുകെയിലെ പത്താം വർഷ വിദ്യാർഥിനിയാണ്. കൊല്ലം ജില്ലയിൽ നിന്ന് വർഷങ്ങൾക്ക് മുൻപ് യുകെയിൽ എത്തിയതാണ് ഈ കുടുംബം. ജൂണ് 14 വെള്ളിയാഴ്ച പെണ്കുട്ടിയെ കാണാതായപ്പോൾ ആദ്യം ഏതെങ്കിലും സുഹൃത്തുക്കളുടെ വീട്ടിൽ പോയതാകാമെന്ന് കുടുംബാംഗങ്ങൾ കരുതി.
ആ വിധത്തിലെ അന്വേഷണങ്ങൾ ഫലം കാണാതെ വന്നപ്പോഴാണ് പോലീസിൽ റിപ്പോര്ട്ട് ചെയ്തത്. തുടർന്ന് ഫോട്ടോയടക്കം പുറത്തുവിട്ട് പോലീസ് നടത്തിയ അന്വേഷണത്തിൽ ശനിയാഴ്ച്ച ഉച്ചകഴിഞ്ഞ് ട്രെയിനില് ലണ്ടനിലേക്ക് യാത്ര ചെയ്തതായി സംശയിക്കാവുന്ന സിസിടിവി ദൃശ്യങ്ങൾ ലഭിച്ചു.
അതിനാൽ ഈ സമയത്ത് ട്രെയിനിൽ ലണ്ടനിലേക്ക് യാത്രചെയ്തവര് എന്തെങ്കിലും വിവരം ലഭിക്കുകയാണെങ്കില് അറിയിക്കണമെന്നും പോലീസ് ആവശ്യപ്പെട്ടിരുന്നു. വിവരം പുറത്തുവന്നതോടെ സോഷ്യൽ മീഡിയകളിൽ യുകെ മലയാളികൾ ഫോട്ടോയും സിസിടിവി ദൃശ്യങ്ങളും പങ്കുവച്ച് നടത്തിയ അന്വേഷണം ഒടുവിൽ ഫലം കണ്ടു.
ശനിയാഴ്ച്ച സന്ധ്യയ്ക്ക് ഏഴുമണിയോടെ ഈ പെൺകുട്ടി കവന്ട്രി യൂണിവേഴ്സിറ്റി പരിസരത്തു നടക്കുന്നത് ശ്രദ്ധയില് പെട്ട, യൂണിവേഴ്സിറ്റി വിദ്യാർത്ഥികളായ മലയാളി യുവാക്കളിൽ ചിലരാണ് അത് കാണാതായ ഫോട്ടോയിലുള്ള പെണ്കുട്ടിയെ
തിരിച്ചറിഞ്ഞത്. ഉടൻതന്നെ ഇവർ സമീപവാസികളായ മറ്റ് മലയാളികളെ വിവരമറിയിച്ചു.
വിവരമറിഞ്ഞ കവന്ട്രിയിലെ ഒരു മലയാളി കുടുംബം ഉടന് പെണ്കുട്ടിയെ കണ്ടെത്തിയ ലൊക്കേഷനിലെത്തി. പെൺകുട്ടിയെ തടഞ്ഞുനിർത്തി വിവരങ്ങൾ ചോദിച്ചു. ആസമയം തന്നെ വിദ്യാർത്ഥികൾ വിവരം അറിയിച്ചതനുസരിച്ച് പോലീസും സ്ഥലത്തെത്തി പെൺകുട്ടിയെ ഏറ്റുവാങ്ങി മാതാപിതാക്കളെ വിളിക്കുകയായിരുന്നു.
അതോടെയാണ് മാതാപിതാക്കൾക്ക് ശ്വാസം നേരെവീണത്. പെണ്കുട്ടിയുടെ സഹോദരി മുന്പ് കവന്ട്രി യൂണിവേഴ്സിറ്റിയില് പഠിച്ചിട്ടുള്ള സമയത്ത് ഇവിടെ വന്നിട്ടുള്ളതിനാൽ, ആ പരിചയം വച്ചാണ് 120 മൈല് ദൂരത്തോളം സഞ്ചരിച്ച് കവൻട്രിവരെ എത്തിയതെന്ന് പിതാവ് പറഞ്ഞു.
സോഷ്യൽ മീഡിയയിലൂടെ വിവരം അതിവേഗം യുകെയെങ്ങും എത്തിയപ്പോൾ അതുവരെ ആശങ്കയോടെ അന്വേഷിച്ചുനടന്നവർക്കും ആശ്വാസം… ആഹ്ളാദം. അന്വേഷണത്തിൽ സഹകരിച്ച എല്ലാവർക്കും സോഷ്യൽ മീഡിയയിലൂടെ കുട്ടിയുടെ മാതാപിതാക്കൾ നന്ദി അറിയിച്ചു. പോലീസിന്റെ സംരക്ഷനയിലുള്ള പെണ്കുട്ടി ഞായറാഴ്ച്ച കുടുംബാംഗങ്ങൾക്കൊപ്പം എത്തുമെന്ന് കരുതുന്നു.
അത്യാവശ്യഘട്ടത്തിൽ പരസ്പരം സഹായിക്കുന്ന യുകെയിലെ മലയാളി കൂട്ടായ്മയുടെ മറ്റൊരു ഉദാഹരണം കൂടിയായി ഈ സംഭവം മാറി. സോഷ്യൽ മീഡിയയ്ക്കുള്ള പങ്കും പ്രാധാന്യവും കൂടി വെളിപ്പെടുത്തുന്ന സംഭവം, സുമനസ്സുകളുടെ പരസ്പര സഹകരണത്തിന്റെയും സാമൂഹ്യപ്രതിബദ്ധതയുടേയും കൂടി പ്രതിഫലനമായും മാറുന്നു.
More Latest News
ഗ്രേറ്റ് ബ്രിട്ടന് സീറോ മലബാര് രൂപതാ ഇവാഞ്ചലൈസേഷന് കമ്മീഷന്റെ നേതൃത്വത്തില് ദമ്പതികള്ക്കായി ത്രിദിന ധ്യാനം, ആടുത്ത മാസം 21 മുതല് 23 വരെ ഫാ.ജോസഫ് മുക്കാട്ടും സിസ്റ്റര് ആന് മരിയയും നയിക്കും
![](https://britishpathram.com/malayalamNews/thumb/97288-uni.jpg)
സ്റ്റോക്കിലെയും പരിസര പ്രദേശങ്ങളിലും ഉള്ള മലയാളി സമൂഹങ്ങളെ സംഗീത ലഹരിയിലാഴ്ത്തി 'മധുരിക്കും ഓര്മകളെ', സ്റ്റോക്ക് മ്യൂസിക് ഫൌണ്ടേഷന് ഒരുക്കിയ സംഗീതരാവില് മലയാളം-തമിഴ്-ഹിന്ദി മെലടികളുടെ പെരുമഴ
![](https://britishpathram.com/malayalamNews/thumb/97287-uni.jpg)
പശുവിന് പാല് കുഞ്ഞുങ്ങള്ക്ക് കൊടുക്കുന്നത് നല്ലതാണോ? ആരോഗ്യ വിദഗ്ദര് പറയുന്നത് ഇങ്ങനെ
![](https://britishpathram.com/malayalamNews/thumb/97286-uni.jpg)
ഇനി മുതല് വാട്സ്ആപ്പ്, ഫെയ്സ്ബുക്ക്, ഇന്സ്റ്റഗ്രാം എന്നിവയില് എല്ലാം എഐ അസിസ്റ്റന്റ് ലഭ്യം, അറിയിച്ച് മെറ്റ
![](https://britishpathram.com/malayalamNews/thumb/97285-uni.jpg)
സലാം എയര് ചെന്നൈ- മസ്ക്കറ്റ് പുതിയ വിമാന സര്വീസ് പ്രഖ്യാപിച്ചു, ജൂലൈ 11ന് സര്വീസ് ആരംഭിക്കും
![](https://britishpathram.com/malayalamNews/thumb/97284-uni.jpg)