അപസ്മാരം പിടിപെടുന്നത് നിയന്ത്രിക്കാന് തലയോട്ടിയില് ഘടിപ്പിച്ച പുതിയ ഉപകരണം വിജയകരമായി പരീക്ഷിക്കുന്ന ലോകത്തിലെ ആദ്യത്തെ രോഗിയായി മാറിയിരിക്കുകയാണ് സോമര്സെറ്റില് നിന്നുള്ള 13 കാരന് ഓറാന് നോള്സന്. തലച്ചോറിലേക്ക് വൈദ്യുത സിഗ്നലുകള് ആഴത്തില് അയയ്ക്കുന്ന ന്യൂറോസ്റ്റിമുലേറ്റര്, ഓറാന്റെ ജീവിതത്തെ സാധാരണ നിലയില് ആക്കിത്തീര്ത്തിരിക്കുകയാണ്. ലോകമെമ്പാടുമുള്ള ലക്ഷക്കണക്കിന് അപസ്മാര രോഗികള്ക്കും അവരുടെ കുടുംബങ്ങള്ക്കും ശുഭ പ്രതീക്ഷ നല്കുന്നതാണ് ഈ ഉപകരണത്തിന്റെ കുറ്റമറ്റ രീതിയിലുള്ള പ്രവര്ത്തനം.
തന്റെ മകന് ഇപ്പോള് വളരെ സന്തോഷവാനാണെന്നും മെച്ചപ്പെട്ട ജീവിതം നയിക്കുന്നുവെന്നും അവന്റെ അമ്മ ജസ്റ്റിന് ബിബിസിയോട് പറഞ്ഞു. ലണ്ടനിലെ ഗ്രേറ്റ് ഓര്മണ്ട് സ്ട്രീറ്റ് ഹോസ്പിറ്റലില് നടന്ന ഒരു ട്രയലിന്റെ ഭാഗമായി ഒക്ടോബറിലാണ് ഓറന് ഈ ഉപകരണം ഘടിപ്പിച്ചത്. മൂന്നാം വയസ്സില്ലാണ് ബാലന് അപസ്മാരത്തിന്റെ ലക്ഷണങ്ങള് കണ്ടു തുടങ്ങിയത്. അതിനുശേഷം,നൂറുകണക്കിന് തവണ അവന് അപസ്മാരം ഉണ്ടായി. ഇത് അവന്റെ ബാല്യകാലം മുഴുവന് അപഹരിച്ചുവെന്ന് അവന്റെ അമ്മ പറയുന്നു. ഓറാന് നിലത്തു വീണതും, ശക്തമായി കുലുങ്ങിയതും, ബോധം നഷ്ടപ്പെട്ടതും ഉള്പ്പെടെ, വ്യത്യസ്തമായ പല പ്രശ്നങ്ങളും ഉണ്ടായി.
ചില സമയങ്ങളില് അവന് ശ്വാസോച്ഛ്വാസം നിര്ത്തുമെന്നും അവനെ പുനരുജ്ജീവിപ്പിക്കാന് അടിയന്തിര മരുന്ന് ആവശ്യമാണെന്നും അവര് പറഞ്ഞു. ഓറാന് ഓട്ടിസവും എഡിഎച്ച്ഡിയും ഉണ്ട്. എന്നാല് അവന്റെ അപസ്മാരമാണ് ഏറ്റവും വലിയ തടസ്സമെന്ന് ജസ്റ്റിന് പറയുന്നു.
CADET പ്രോജക്റ്റിന്റെ ഭാഗമായ ഓറാന് കഠിനമായ അപസ്മാരത്തിനുള്ള ആഴത്തിലുള്ള മസ്തിഷ്ക ഉത്തേജനത്തിന്റെ സുരക്ഷയും ഫലപ്രാപ്തിയും വിലയിരുത്തുന്ന പരീക്ഷണങ്ങളുടെ ഒരു പരമ്പരയിലൂടെയാണ് കടന്നു പോയത്. ഗ്രേറ്റ് ഓര്ക്കണ്ട് സ്ട്രീറ്റ് ഹോസ്പിറ്റല്, യൂണിവേഴ്സിറ്റി കോളേജ് ലണ്ടന്, കിംഗ്സ് കോളേജ് ഹോസ്പിറ്റല്, യൂണിവേഴ്സിറ്റി ഓഫ് ഓക്സ്ഫോര്ഡ് എന്നിവയാണ് ഈ പരീക്ഷണങ്ങളില് പങ്കാളികളായത്.
പിക്കോസ്റ്റിം ന്യൂറോ ട്രാന്സ്മിറ്റര് നിര്മ്മിച്ചിരിക്കുന്നത് യുകെ കമ്പനിയായ ആംബര് തെറാപ്പിറ്റിക്സാണ്. തലച്ചോറിലെ വൈദ്യുത പ്രവര്ത്തനത്തിന്റെ അസാധാരണമായ വ്യതിയാനങ്ങളാണ് അപസ്മാരത്തിന് കാരണമാകുന്നത്. വൈദ്യുതധാരയുടെ സ്ഥിരമായ പള്സ് പുറപ്പെടുവിക്കുന്ന ഉപകരണം, ഇത്തരം അസാധാരണമായ സിഗ്നലുകളെ തടയയുകയോ തടസ്സപ്പെടുത്തുകയോ ചെയ്യും. ഏകദേശം എട്ട് മണിക്കൂര് നീണ്ടുനിന്ന ശസ്ത്രക്രിയ 2023 ഒക്ടോബറിലാണ് നടന്നത്.
കണ്സള്ട്ടന്റ് പീഡിയാട്രിക് ന്യൂറോ സര്ജന് മാര്ട്ടിന് ടിസ്ഡാളിന്റെ നേതൃത്വത്തിലുള്ള സംഘം, ന്യൂറോണല് വിവരങ്ങളുടെ പ്രധാന റിലേ സ്റ്റേഷനായ തലാമസില് എത്തുന്നതുവരെ ഓറന്റെ തലച്ചോറിലേക്ക് രണ്ട് ഇലക്ട്രോഡുകള് ആഴത്തില് ഘടിപ്പിച്ചു. ലീഡുകളുടെ അറ്റങ്ങള് ന്യൂറോസ്റ്റിമുലേറ്ററുമായി ബന്ധിപ്പിച്ചിരിക്കുന്നു. 35 സെന്റീമീറ്റര് ചതുരവും 0.6 സെന്റീമീറ്റര് കനവുമുള്ള ഉപകരണം, അസ്ഥി നീക്കം ചെയ്ത ഓറന്റെ തലയോട്ടിയിലെ ഒരു വിടവിലാണ് സ്ഥാപിച്ചത്. ന്യൂറോസ്റ്റിമുലേറ്റര് ചുറ്റുമുള്ള തലയോട്ടിയില് സ്ക്രൂ ചെയ്തു.
ന്യൂറോസ്റ്റിമുലേറ്റര് ഓണാക്കുന്നതിന് മുമ്പ് ഓറാന് ഓപ്പറേഷനില് നിന്ന് കരകയറാന് അവന് ഒരു മാസത്തെ സമയം നല്കി. ഉപകരം ഓണായിരിക്കുമ്പോള് അവന് പ്രത്യേകിച്ച് ഒരു അനുഭവമോ അസ്വസ്ഥതയോ അനുഭവപ്പെടില്ല. ടിവി കാണുന്നത് പോലെ, അവന് ആസ്വദിക്കുന്ന എല്ലാ കാര്യങ്ങളിലും അവര് ഏര്പ്പെടും. വയര്ലെസ് ആയി അവന് എല്ലാ ദിവസവും ഉപകരണം റീചാര്ജ് ചെയ്യാനും കഴിയും.