സ്വന്തം ലേഖകൻ

അയോധ്യ രാമക്ഷേത്രത്തില്‍ ചോര്‍ച്ചയുള്ളതായി കഴിഞ്ഞ ദിവസമാണ് പ്രധാന പുരോഹിതന്‍ പറഞ്ഞത്. എന്നാല്‍ ഇതേ കുറിച്ച് വ്യക്തമാക്കിയിരിക്കുകയാണ് നിര്‍മാണത്തിന് മേല്‍നോട്ടം വഹിക്കുന്ന ശ്രീരാം ജന്മഭൂമി തീര്‍ത്ഥക്ഷേത്ര ട്രസ്റ്റ്.

പണി പൂര്‍ത്തിയാകാത്തതു കൊണ്ടാണ് മഴ വെള്ളം ഒലിച്ചതെന്നാണ് ട്രസ്റ്റ് വ്യക്തമാക്കിയിരിക്കുന്നത്. രാമവിഗ്രഹം സ്ഥാപിച്ച ശ്രീകോവിനകത്തേക്ക് ഒരു തുള്ളി വെള്ളം കയറിയിട്ടില്ലെന്നും ട്രസ്റ്റ് അവകാശപ്പെട്ടു. ക്ഷേത്രത്തിന്റെ മേല്‍ക്കൂരയില്‍ ചോര്‍ച്ചയുണ്ടെന്ന മുഖ്യപുരോഹിതന്‍ ആചാര്യ സത്യേന്ദ്രദാസിന്റെ പ്രതികരണത്തിലാണ് ട്രസ്റ്റിന്റെ വിശദീകരണം.

ഇതിനു പിന്നാലെ ട്രസ്റ്റ് ചെയര്‍പേഴ്‌സണ്‍ നൃപേന്ദ്ര മിശ്ര ക്ഷേത്രത്തില്‍ പരിശോധന നടത്തിയിരുന്നു. നിര്‍മാണത്തില്‍ അപാകമില്ലെന്നും ഇലക്ട്രിക് വയറുകള്‍ക്കായി സ്ഥാപിച്ച പൈപ്പുകളിലൂടെയാണ് മഴവെള്ളം അകത്തെത്തിയതെന്നും അദ്ദേഹം വിശദീകരിച്ചു. രണ്ടാം നിലയുടെ നിര്‍മാണം നടന്നു കൊണ്ടിരിക്കുകയാണ്. അതിന്റെ മേല്‍ക്കൂര കഴിയുന്നതോടു കൂടി മഴവെള്ളം വീഴുന്നത് ഇല്ലാതാകും- മിശ്ര മാധ്യമങ്ങളോട് പറഞ്ഞു.

ദര്‍ശനത്തിനെത്തുന്ന ഭക്തകര്‍ക്ക് എല്ലാ സൗകര്യവും ഒരുക്കിയിട്ടുണ്ടെന്ന് മിശ്ര കൂട്ടിച്ചേര്‍ത്തു. മേല്‍ക്കൂരയില്‍ സുരക്ഷയ്ക്കായി പാളി നിര്‍മിച്ചിട്ടുണ്ട്. ഇത് താല്‍ക്കാലികമാണ്. രണ്ടാം നില പൂര്‍ത്തിയാകുന്ന വേളയില്‍ എടുത്തു കളയും. ആദ്യ നിലയിലെ ഇലക്ട്രിക്കല്‍ വാട്ടര്‍ പ്രൂഫിങ്, ഫ്‌ളോറിങ് ജോലികള്‍ നടന്നു കൊണ്ടിരിക്കുകയാണ്. മേല്‍ക്കൂര ചോരുന്നു എന്ന രീതിയിലാണ് കാര്യങ്ങള്‍ അവതരിപ്പിക്കപ്പെട്ടത്. അതല്ല, പൈപ്പുകള്‍ക്കിടയിലൂടെ വെള്ളം ഒലിച്ചിറങ്ങുകയായിരുന്നു - അദ്ദേഹം പറഞ്ഞു.

ജനുവരി 22ന് പ്രധാനമന്ത്രി നരേന്ദ്രമോദി ഉദ്ഘാടനം ചെയ്ത്, ആറു മാസങ്ങള്‍ക്കകമാണ് രാമക്ഷത്രത്തില്‍ ചോര്‍ച്ച റിപ്പോര്‍ട്ട് ചെയ്തത്. 'ആദ്യമഴ പെയ്തപ്പോള്‍ തന്നെ ക്ഷേത്രത്തിന് ഉള്ളിലേക്ക് വെള്ളം വന്നു. ജനുവരി 22നാണ് ക്ഷേത്രത്തില്‍ പ്രാണപ്രതിഷ്ഠ നടന്നത്. എത്രയോ എഞ്ചിനീയര്‍മാര്‍ ഇവിടെയുണ്ടായിരുന്നു. എന്നിട്ടും ചോര്‍ച്ചയുണ്ടായത് ആശ്ചര്യകരമാണ്. മേല്‍ക്കൂരയില്‍നിന്ന് വെള്ളം ചോര്‍ന്നൊലിക്കുന്നു. ഇങ്ങനെ സംഭവിക്കുമെന്ന് കരുതിയിരുന്നില്ല.' എന്നാണ് ചോര്‍ച്ചയെ കുറിച്ച് ആചാര്യ സത്യേന്ദ്ര ദാസ് വാര്‍ത്താ ഏജന്‍സിയായ എഎന്‍ഐയോട് പറഞ്ഞിരുന്നത്.