![](https://britishpathram.com/malayalamNews/97376-uni.jpg)
ലണ്ടൻ നഗരത്തിന്റെ മുഖമുദ്രയാണ് ബിഗ് ബെൻ. ഒരു മുതുമുത്തച്ഛനെപ്പോലെ ബ്രിട്ടന്റെ ചരിത്രകഥകൾ ഏറെ പറയാനുണ്ട് വെസ്ററ്മിൻസ്റ്ററിലെ ഈ പടുകൂറ്റൻ ക്ളോക്ക് ടവറിന്. എന്നാൽ ഇന്നുമുതൽ ബിഗ് ബെൻ ഒരു യുകെ മലയാളി കുടുംബത്തിന്റെ കഥപറയുന്നു!
യുകെയിലേക്ക് കുടിയേറിയ മലയാളികളുടെ കിനാവും കണ്ണീരും നിറഞ്ഞ കഥകളും ബിഗ് ബെന്നിനറിയാം. യുകെയിലെ മലയാളി ജീവിതത്തിന്റെ, അധികമാരും അറിയാത്ത ജീവിത കഥ തുറന്നുകാട്ടുകയാണ് ഇന്ന് റിലീസ് ചെയ്യുന്ന ബിഗ് ബെൻ സിനിമ. യുകെ മലയാളിയായ ബിനൊ അഗസ്റ്റിൻ ഒരുക്കുന്ന ചിത്രത്തിന് ‘ബിഗ് ബെൻ’ എന്നപേര് നൽകിയതിനു പിന്നിലും ഈ തിരിച്ചറിവുതന്നെ.
യുകെയിലെ മലയാളി കുടുംബങ്ങളുടേയും കുടിയേറ്റത്തിന്റെയും അസ്ഥിത്വം പ്രധാനമായും നഴ്സുമാരിലാണ്. സ്വന്തം നാടും വീടും വിട്ട് ജീവിതസ്വപ്നങ്ങൾ പൂവണിയിക്കാൻ യുകെയിലേക്ക് കുടിയേറിയവർ. അവരിൽ ചിലരുടെയെങ്കിലും ജീവിതം ഇപ്പോഴും നൊമ്പരക്കാഴ്ചകളുടേതാണ്.
വ്യക്തി സ്വാതന്ത്ര്യത്തിന്റെ പറുദീസയായി അറിയപ്പെടുന്ന രാജ്യം. അവിടെയും അടിച്ചമർത്തപ്പെട്ട സ്ത്രീത്വത്തിന്റെ അടക്കിപ്പിടിച്ച തേങ്ങലുകൾ മലയാളി കുടുംബങ്ങളിലെ ഇടനാഴികകളിൽ കേൾക്കാം.
ബിഗ് ബെന്നിലൂടെ ബിനോ തുറന്നുപറയാൻ ശ്രമിക്കുന്നതും അതുതന്നെ. പല കുടുംബങ്ങളിലേയും പ്രശ്നങ്ങൾക്കു പിന്നിൽ സാമ്പത്തിക അസമത്വത്താൽ പുരുഷത്വം അടിച്ചമർത്തപ്പെടുമ്പോൾ സംഭവിക്കുന്നതാണെന്ന് പൊതുവേയൊരു ധാരണയുണ്ട്. അതിൽ നിന്നും വ്യത്യസ്തമാണ് സിനിമയുടെ ഇതിവൃത്തം ചുരുളഴിയുമ്പോൾ കാണാൻ കഴിയുക.
യുകെയിൽപ്പോലും ഇന്നും കുടിയേറ്റ മലയാളി കുടുംബങ്ങളിലെ സ്ത്രീ ജീവിതങ്ങൾ അനുഭവിക്കുന്ന ദുഃഖവും ദുരിതവും സ്വാതന്ത്ര്യമില്ലായ്മയും തുറന്നുകാട്ടുകയാണ് സിനിമ. കഥാപാത്രങ്ങൾ പൊതുസമൂഹത്തിന്റെ പ്രതീകമായി മാറുന്നു. അതുകൊണ്ടുതന്നെ ഒരു സ്ത്രീപക്ഷ സിനിമ എന്ന വിമർശനവും ഉയർന്നേക്കാം. എങ്കിലും അത് വിലയിരുത്തേണ്ടത് സിനിമ മുഴുവൻ കണ്ട് കഥയറിഞ്ഞശേഷം നടത്തുന്ന വിലയിരുത്തലുകളിലൂടെയാകണം.
നല്ലൊരു കുടുംബകഥ പ്രേക്ഷകരിൽ സസ്പെൻസ് ത്രില്ലറിന്റെ ഉത്കണ്ഠ നിറച്ച് മെല്ലെ മെല്ലെ ചുരുളഴിയുമ്പോൾ ഇതൊരു നവാഗത സംവിധായകന്റെ ചിത്രമെന്നുപോലും തോന്നില്ല. യുകെ മലയാളികളുടെ ജീവിതത്തിൽ സാധാരണ സംഭവിക്കാറുള്ള കോമഡികളും മറ്റ് അനുഭവങ്ങളും സിനിമയിൽ ഉൾപ്പെടുത്താനും സംവിധായകൻ ശ്രദ്ധിച്ചിട്ടുണ്ട്.
പുതുമുഖങ്ങളായ അനു മോഹൻ, അദിതി രവി എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. ഇവർക്കൊപ്പം പ്രശസ്ത താരങ്ങളായ മിയ ജോർജ്ജ്, വിനയ് ഫോർട്ട്, ബിജു സോപാനം, നിഷാ സാരംഗ് എന്നിവരും വേഷമിടുന്നു. യുകെ മലയാളികളും മലയാള സിനിമാ താരങ്ങളും ചേർന്നുള്ള ഒരു കോമ്പിനേഷനാണ് കഥാപാത്രങ്ങൾക്ക് ജീവനേകുന്നത്.
ലണ്ടൻ, അയർലൻഡ്, ബേസിൽഡൺ, ഗാറ്റ്വിക്ക് എയർപോർട്ട്, മുംബൈ, കൊച്ചി എന്നിവിടങ്ങളിലായിരുന്നു പ്രധാന ചിത്രീകരണം. 60 ദിവസംകൊണ്ട് ചിത്രീകരണം പൂർത്തിയാക്കാനായി. ബേസിൽഡണിലും സമീപ പ്രദേശങ്ങളിലുമുള്ള നിരവധി യുകെ മലയാളികളും അപ്രധാന കഥാപാത്രങ്ങളായി മുഖം കാണിക്കുന്നുണ്ട്.
രണ്ടുപതിറ്റാണ്ടായി യുകെ മലയാളികളുടെ ജീവിതത്തിൽ ബിനോ അഗസ്റ്റിൻ എന്ന കലാകാരനുണ്ട്. ഒരു ഫോട്ടോഗ്രാഫറായി യുകെ ജീവിതം തുടങ്ങിയ ബിനോ, ചിത്രങ്ങൾ പകർത്തുന്നതിനൊപ്പം അനുഭവിച്ചറിഞ്ഞ യഥാർത്ഥ ജീവിതകഥകളും മനസ്സിന്റെ ചൂളയിൽ കാച്ചിയെടുത്തു.
സിനിമ എന്ന മോഹത്തിലേക്കുള്ള യാത്രയ്ക്ക് ബിനോ തുടക്കമിട്ടത് ക്യാമറക്കണ്ണുകളിലൂടെയാണ്. ഒരു ക്യാമറ സ്വന്തമാക്കിയതിനുശേഷം അസ്സോസിയേഷന്റെയും സുഹൃത്തുക്കളുടെയും വീഡിയോ എടുക്കുന്നതായിരുന്നു ആദ്യപ്രവർത്തനം. 2012 കാലഘട്ടത്തില് ബ്രിട്ടീഷ് പത്രത്തിന് വേണ്ടിയും ബിനോ ക്യാമറ ചെയ്തിട്ടുണ്ട്. അതും പ്രതിഫലമൊന്നൂം ഇല്ലാതെ പ്രവർത്തിച്ചുവെന്നത് ഈ യുവാവിന് ഫ്രെയിമുകളോടുള്ള അഭിനിവേശം തുറന്നുകാട്ടുന്നു. തുടര്ന്ന് ഷോര്ട്ട് ഫിലിം സംവിധാനം ചെയ്ത് കഴിവ് തെളിയിച്ചു. ബിനോ സംവിധാനം ചെയ്ത എഡ്ജ് ഓഫ് സാന്ട്രി എന്ന ഷോര്ട്ട് ഫിലിം യുകെയിലെ മലയാളികള് ഇരുകൈയും നീട്ടി സ്വീകരിച്ചിരുന്നൂ.
അതിലൊരു കഥയാണ് ഇപ്പോൾ ബിഗ് ബെന്നിലൂടെ പുറത്തുവരുന്നത്. കണ്ടുപഴകിയ ഇതിവൃത്തങ്ങളിൽ നിന്നും വ്യത്യസ്ഥമായി, യഥാർത്ഥ ജീവിതതിൽ നിന്നും അടർത്തിയെടുത്ത ആരും പറയാത്തൊരു കഥ. മനസ്സിൽ പതിഞ്ഞൊരു യഥാർത്ഥ ജീവിതകഥ. പത്തുകൊല്ലത്തോളം അത് മനസ്സിന്റെ ചൂളയിലിട്ട് പാകപ്പെടുത്തി ഒടുവിൽ സിനിമയെന്ന മോഹം യാഥാർഥ്യമാക്കി, അതിന് അഭ്രപാളികളിൽ ജീവൻ നൽകുകയാണ് ബിനോ ബിഗ് ബെന്നിലൂടെ. കഴിഞ്ഞ കുറച്ച് വര്ഷങ്ങളായി ഈ കഥ സിനിമയാക്കുന്നതിന്റെ പുറകെയായിരുന്നു. നേരത്തേ റിലീസ് ചെയ്ത സിനിമയിലെ പാട്ടുകള് ഇതിനോടകം തന്നെ ഹിറ്റായി.
മലയാളത്തിലെ സൂപ്പര് നടി മഞ്ജു വാര്യരുടെയും ജയസൂര്യയുടെയും ഫേസ്ബുക്ക് പേജുകള് വഴി പുറത്തു വന്ന ബിഗ് ബെൻ ടീസറിന് വമ്പിച്ച വരവേല്പാണ് സിനിമ പ്രേമികള് നല്കിയത്. അതുകൊണ്ടുതന്നെ ചിത്രത്തെ ആഗോള മലയാളികൾ സ്വീകരിക്കുമെന്നും വൻ വിജയമാകുമെന്നുമുള്ള ആത്മവിശ്വാസത്തിലാണ് സംവിധായകനും അണിയറ പ്രവർത്തകരും.
യുകെയില് ഒട്ടുമിക്ക നഗരങ്ങളിലും കേരളത്തിലെ പ്രമുഖ തിയേറ്ററുകളിലും ബിഗ് ബെന് ഇന്ന് റിലീസ് ചെയ്യുമെന്നും വിതരണക്കാര് അറിയിച്ചു. കൊച്ചി ഇടപ്പള്ളിയിലെ വനിത - വിനീത തിയേറ്ററിൽ ഇന്നുരാവിലെ 10 മണിക്കുള്ള മോർണിംഗ് ഷോയിലൂടെയാണ് ബിഗ് ബെൻ വെള്ളിത്തിരയിലെ ജൈത്രയാത്ര തുടങ്ങുക.
More Latest News
സിറ്റിവെസ്റ്റ് മലയാളി അസോസിയേഷന്റെ ഓണാഘോഷ പരിപാടി, 'അത്തപ്പൂവും നുള്ളി'യുടെ ആദ്യ പോസ്റ്റര് പ്രകാശനം ചെയ്ത് മേയര് ബേബി പെരേപ്പാടന്
![](https://britishpathram.com/malayalamNews/thumb/97426-uni.jpg)
വിശുദ്ധ തോമാശ്ലീഹായുടെയും വിശുദ്ധ അല്ഫോന്സാമ്മയുടെയും തിരുനാള് ഇന്ന്, ഡെര്ബി സെന്റ് ജോസഫ് ദേവാലയത്തില് ഉച്ചകഴിഞ്ഞ് കൊടിയേറ്റ്
![](https://britishpathram.com/malayalamNews/thumb/97425-uni.jpg)
ന്യൂയോര്ക്കിലെ മ്യൂസിയത്തില് നിന്നും മോഷണം പോയ മുന് അമേരിക്കന് പ്രസിഡന്റ് തിയോഡര് 'ടെഡ്ഡി' റൂസ്വെല്റ്റിന്റെ വാച്ച് തിരികെ ലഭിച്ചു, ലഭിക്കുന്നത് 37 വര്ഷത്തിന് ശേഷം!!!
![](https://britishpathram.com/malayalamNews/thumb/97424-uni.jpg)
ആവേശത്തിലെ രംഗണ്ണന് മറ്റൊരു എതിരാളി, ശരീരം മുഴുവന് ഇങ്ങനെ സ്വര്ണം ഇട്ട് നടക്കുന്ന 'ദ ഗോള്ഡന് മാന് ഓഫ് ബിഹാര്'
![](https://britishpathram.com/malayalamNews/thumb/97423-uni.jpg)
ഇന്നാണ് എന്റെ വിവാഹം, ആ സന്തോഷ വാര്ത്ത സോഷ്യല് മീഡിയയിലൂടെ അറിയിച്ച് സ്റ്റാര് മാജിക്ക് താരം ഐശ്വര്യ രാജീവ്, ഹല്ദി ദിവസത്തെ ചിത്രങ്ങള് സോഷ്യല് മീഡിയയില് വൈറല്
![](https://britishpathram.com/malayalamNews/thumb/97422-uni.jpg)