അന്യായമായി പിരിച്ചുവിടപ്പെടുന്ന വിദേശ കെയറര്മാര്ക്ക് നിയമപരമായ സംരക്ഷണം ഉറപ്പു വരുത്തുന്ന നിര്ണ്ണായക വിധിയുമായി എംപ്ലോയ്മെന്റ് ജഡ്ജ്. ലണ്ടന് ആസ്ഥാനമായുള്ള ഹെല്ത്ത് കെയര് പ്രൊവൈഡറായ ക്ലിനിക്ക പ്രൈവറ്റ് ഹെല്ത്ത്കെയര്, ഇന്ത്യന് വംശജനായ കിരണ്കുമാര് റാത്തോഡിനെ 2023-ല് പിരിച്ചുവിട്ടതിന് 13,000 പൗണ്ട് നല്കണമെന്ന് എംപ്ലോയ്മെന്റ് ജഡ്ജിയായ നടാഷ ജോഫ് ഇടക്കാല വിധി പുറപ്പെടുവിച്ചു. ജോലിയില്ല എന്ന് പറഞ്ഞാണ് റാത്തോഡിനെ പിരിച്ചുവിട്ടത്. മുഴുവന് സമയ ജോലി വാഗ്ദാനം ചെയ്ത് യുകെയിലെത്തിയ അദ്ദേഹത്തിനും മറ്റ് സഹപ്രവര്ത്തകര്ക്കും ഇതോടെ ജോലി നഷ്ടപ്പെടുകയായിരുന്നു. ഇതിനെതിരെയാണ് അദ്ദേഹം നിയമ നടപടി സ്വീകരിച്ചത്. എന്തായാലും പുതിയ വിധിന്യായം അത്തരം ഡസന് കണക്കിന് കേസുകള്ക്കാണ് വഴിയൊരുക്കുന്നത്.
റാത്തോഡിനെ പ്രതിനിധീകരിച്ച തൊഴില് അവകാശ കേന്ദ്രത്തിലെ തൊഴില് മേധാവി ശര്മിള ബോസ് പറഞ്ഞു: ''ഇത് വളരെ പ്രധാനപ്പെട്ട ഒരു വിധിയാണ്. ഒരു കെയര് വര്ക്കര് ഇത്തരത്തിലുള്ള വിധി നേടുന്നത് ഇതാദ്യമാണ്.'' കുടിയേറ്റ ആരോഗ്യ പ്രവര്ത്തകരുടെ സുപ്രധാന വിജയമാണിതെന്ന് റോയല് കോളേജ് ഓഫ് നഴ്സിംഗിന്റെ ആക്ടിംഗ് മേധാവി നിക്കോള റേഞ്ചര് പറഞ്ഞു. സോഷ്യല് കെയര് രംഗത്ത് ചൂഷണം വ്യാപകമാണെന്ന് ഞങ്ങള്ക്കറിയാവുന്നതിനാല് ഈ കേസ് അവസാനത്തേതല്ല.. അടുത്ത ഗവണ്മെന്റ് അടിയന്തിര അന്വേഷണം ആരംഭിക്കുകയും തൊഴില് നിലവാരം ഉയര്ത്തിപ്പിടിക്കുന്നുവെന്ന് ഉറപ്പാക്കാന് നടപടിയെടുക്കുകയും ചെയ്യേണ്ടത് കുടിയേറ്റ കെയര് തൊഴിലാളികള്ക്ക് അത്യന്താപേക്ഷിതമാണ്.''
റാത്തോഡിന്റെ കേസ് ഗാര്ഡിയന് വെളിപ്പെടുത്തിയ ഡസന് കണക്കിന് മറ്റ് കേസുകള്ക്കും ദിശാസൂചകമാകും. 30-ലധികം ആളുകള് ഇമിഗ്രേഷന് ഏജന്റുമാര്ക്ക് 20,000 പൗണ്ട് വരെ നല്കിയതായി ഗാര്ഡിയന് വെളിപ്പെടുത്തിയിരുന്നു. ജോലിക്കായി പലരും കിടപ്പാടം വരെ പണയപ്പെടുത്തിയാണ് ഏജന്റുമാര്ക്ക് വലിയ തുകകള് നല്കി രാജ്യത്ത് എത്തുന്നത്. സ്ഥിരമായ ജോലി സുരക്ഷിതമാക്കാന് കഴിയാതെ, കടം വീട്ടാന് കഴിയില്ലെന്ന ഭയത്താല് ഇവര് നാട്ടിലേക്ക് മടങ്ങാന് തയ്യാറല്ല.
വിസയും ജോലിയും ലഭിക്കുന്നതിനായി ഇന്ത്യയിലെ ഒരു ഇമിഗ്രേഷന് ഏജന്റിന് 22,000 പൗണ്ട് നല്കിയാണ് താന് 2023ല് യുകെയില് എത്തിയതെന്ന് റാത്തോഡ് പറഞ്ഞു. ഒരു വര്ഷം 23,000 പൗണ്ടിന് മുകളില് ആഴ്ചയില് 39 മണിക്കൂര് ജോലി ചെയ്യുന്ന, ഒരു കെയര് അസിസ്റ്റന്റായിരിക്കുമെന്ന് വ്യക്തമാക്കി ക്ലിനിക്കില് നിന്ന് സ്പോണ്സര്ഷിപ്പ് സര്ട്ടിഫിക്കറ്റ് അദ്ദേഹത്തിന് ലഭിച്ചു.
ബ്രിട്ടനിലെത്തിയ റാത്തോഡ് ഒരു ഇന്ഡക്ഷന് കോഴ്സും മൂന്ന് ദിവസത്തെ പരിശീലനവും പൂര്ത്തിയാക്കി, പക്ഷേ പിന്നീട് അദ്ദേഹത്തിന് ജോലിയൊന്നും ലഭിച്ചില്ല. എന്തുകൊണ്ടാണ് തനിക്ക് ഷിഫ്റ്റുകള് നല്കാത്തത് എന്ന് അദ്ദേഹം ചോദിച്ചപ്പോള് പറഞ്ഞു: ''നിങ്ങളില് ഭൂരിഭാഗം പേരും ആഗ്രഹിച്ചതുപോലെ, ഓരോ ഷിഫ്റ്റിലും ദീര്ഘനേരം വരുന്ന കെയര് ഹോമുകളില് നിങ്ങള്ക്കെല്ലാവര്ക്കും അനുയോജ്യമായ ഷിഫ്റ്റുകള് കണ്ടെത്തുന്നത് വളരെ ബുദ്ധിമുട്ടാണ് എന്നാണ് അവര് പറഞ്ഞതെന്ന് അദ്ദേഹം പറയുന്നു.
ജോലി നല്കാത്തതില് വീണ്ടും പ്രതിഷേധിക്കാന് 2023 നവംബറില് തൊഴിലുടമയെ ഫോണില് വിളിച്ചെന്നും അവര്ക്കെതിരെ നിയമനടപടി സ്വീകരിക്കുമെന്ന് ഭീഷണിപ്പെടുത്തിയെന്നും റാത്തോഡ് പറയുന്നു. അടുത്ത ദിവസം തന്നെ പിരിച്ചുവിടല് നോട്ടീസ് ലഭിച്ചു, 'തൊഴില് ദാതാവിനോടുള്ള അനുസരണക്കേട് സംബന്ധിച്ച നിരവധി വാക്കാലുള്ള മുന്നറിയിപ്പുകള് ശ്രദ്ധിക്കുന്നതില് പരാജയപ്പെട്ടതിനാല് റാത്തോഡിനെ പിരിച്ചുവിടുകയാണെന്നാണ് നോട്ടീസില് പറയുന്നത്.
കേസ് നടന്നുകൊണ്ടിരിക്കുകയാണ്. എന്നാല് ജൂണിലെ ഒരു ഇടക്കാല വിധിയില്, തന്റെ അന്യായമായ പിരിച്ചുവിടല് കേസില് റാത്തോഡ് വിജയിക്കുമെന്ന് ജഡ്ജ് കണ്ടെത്തി. അതിനാല് അദ്ദേഹത്തെ പിരിച്ചുവിട്ട തീയതിക്കും കേസ് അവസാനിക്കുന്നതിനും ഇടയില് നല്കപ്പെടാത്ത എല്ലാ വേതനവും നല്കണം. ഇത് കുറഞ്ഞത് 13,000 പൗണ്ട് വരും, കേസ് എത്രത്തോളം നീണ്ടുനില്ക്കും എന്നതിനെ ആശ്രയിച്ച് ഒരുപക്ഷേ തുക ഇതിലും വളരെ കൂടുതലായിരിക്കും.