ഇന്ത്യന് സൂപ്പര് ലീഗില് എഫ് സി ഗോവയുടെ താരമായിരുന്ന നോഹ സദൗയിയെ ക്ലബിലെത്തിച്ച് കേരളാ ബ്ലാസ്റ്റേഴ്സ്. രണ്ട് വര്ഷത്തേയ്ക്കാണ് കരാര് ഒപ്പിട്ടിരിക്കുന്നത്. 30കാരനായ മുന്നേറ്റ താരം ഇന്ത്യന് സൂപ്പര് ലീഗില് 54 മത്സരങ്ങളില് കളിച്ചിട്ടുണ്ട്. രണ്ട് സീസണുകളിലായി 29 ഗോളുകളും 16 അസിസ്റ്റുകളും താരം സംഭാവന ചെയ്തു.
2021-ല് നോഹ മൊറോക്കയുടെ ദേശീയ ടീമില് അരങ്ങേറ്റം കുറിച്ച നോഹ രാജ്യത്തിനായി നാല് മത്സരങ്ങളിലാണ് താരം കളിച്ചിട്ടുള്ളത്. 2020ല് ആഫ്രിക്കന് നേഷന്സ് ചാമ്പ്യന്ഷിപ്പിന്റെ സെമി ഫൈനല്, ഫൈനല് മത്സരങ്ങളില് രാജ്യത്തെ പ്രതിനിധീകരിച്ചു. 2020ല് ആഫ്രിക്കന് നേഷന്സ് കപ്പ് നേടിയ മൊറോക്ക ടീമില് നോഹ അംഗമായിരുന്നു.
2013-ല് ഇസ്രായേല് പ്രീമിയര് ലീഗ് ക്ലബ് മക്കാബി ഹൈഫയില് തുടങ്ങി നിരവധി സുപ്രധാന നീക്കങ്ങളിലൂടെയാണ് നോഹയുടെ പ്രൊഫഷണല് കരിയര് ആരംഭിച്ചത്. തുടര്ന്ന് മെര്ബത്ത് എസ്.സി, എന്പ്പി എസ്.സി, എം.സി ഔജ, രാജാ കാസബ്ലാങ്ക, എ.എസ് ഫാര് എന്നീ ക്ലബ്ബുകളില് കളിച്ചിട്ടുണ്ട്. പിന്നീട് 2022 ല് ഐഎസ്എല് ക്ലബ്ബായ എഫ്സി ഗോവയില് എത്തി.
നോഹയുടെ വരവ് ക്ലബിനെ കൂടുതല് ശക്തിപ്പെടുത്തുമെന്ന് കേരളാ ബ്ലാസ്റ്റേഴ്സ് അധികൃതര് പ്രതികരിച്ചു. ബ്ലാസ്റ്റേഴ്സിനൊപ്പം കളിക്കാനുള്ള താരത്തിന്റെ ആഗ്രഹത്തെ അഭിനന്ദിക്കുന്നതായും ക്ലബ് അധികൃതര് വ്യക്തമാക്കി. മഞ്ഞപ്പടയ്ക്കൊപ്പം ചേരുന്നതില് ഏറെ ആവേശത്തിലാണെന്ന് മൊറോക്കന് മുന്നേറ്റ താരം പ്രതികരിച്ചു. ആവേശകരമായ യാത്രയുടെ ഭാഗമാകാന് താന് കാത്തിരിക്കുകയാണെന്നും നോഹ സദൗയി വ്യക്തമാക്കി.