മിനിസ്ക്രീന് പ്രേക്ഷകര്ക്കും കോമഡി പ്രേമികള്ക്കും ഇന്നും തീരാവേദനയാണ് കൊല്ലം സുധിയുടെ മരണം. സ്റ്റാര് മാജിക്ക് വേദിയിലെ നിറ സാന്നിധ്യമായിരുന്നു കൊല്ലം സുധി. അതുകൊണ്ട് തന്നെ സ്റ്റാര് മാജിക്ക് താരങ്ങളെല്ലാം ആ കുടുംബത്തിനൊപ്പം നില്ക്കുകയായിരുന്നു. കൊല്ലം സുധിയുടെ മരണ ശേഷം ആ കുടുംബത്തെ ചേര്ത്ത് നിറുത്താന് സ്റ്റാര് മാജിക്ക് അവതാരക ലക്ഷ്മി നക്ഷത്ര മറന്നില്ല.
എപ്പോഴും സുധിയുടെ കുടുംബത്തെ സന്ദര്ശിച്ചും രേണുവിനെയും കുട്ടികളെയും ആശ്വസിപ്പിച്ചും ലക്ഷ്മി നക്ഷത്ര ഒപ്പമുണ്ടായിട്ടുണ്ട്. ഇപ്പോഴിതാ രേണുവിന് സുധിയുടെ ഓര്മ്മകള് എന്നും മനസ്സില് നിറയാന് ഒരു വലിയ സമ്മാനം ആണ് നല്കിയിരിക്കുന്നത്.
സുധിയുടെ ഗന്ധം പെര്ഫ്യൂം ആക്കിമാറ്റിയിരിക്കുകയാണ് അവതാരക ലക്ഷ്മി നക്ഷത്ര. സുധിയുടെ ഭാര്യ രേണുവിന്റെ ആഗ്രഹ പ്രകാരമാണിത് ചെയ്തിരിക്കുന്നത്. ദുബായ് മലയാളിയായ യൂസഫ് ആണ് സുധിയുടെ ഗന്ധം പെര്ഫ്യൂമാക്കി മാറ്റിയത്. ഇതിന്റെ ദൃശ്യങ്ങള് ലക്ഷ്മി തന്റെ യുട്യൂബ് വീഡിയോയില് പങ്കുവച്ചിട്ടുണ്ട്.
അപകടത്തില് മരിക്കുന്ന സമയം സുധി ധരിച്ചിരുന്ന വസ്ത്രങ്ങള് രേണു സൂക്ഷിച്ചുവച്ചിരുന്നു. മരിച്ചവരുടെ മണം അവരുടെ വസ്ത്രങ്ങളില് നിന്ന് തിരിച്ചറിഞ്ഞ് അത് പെര്ഫ്യൂമാക്കി മാറ്റുന്നവരുണ്ടെന്നും തന്റെ ഭര്ത്താവിന്റെ മണവും അത്തരത്തില് ചെയ്യണമെന്നും അതിന് സഹായിക്കാമോയെന്നും രേണു ലക്ഷ്മിയോട് ആഗ്രഹം പ്രകടിപ്പിച്ചു. തുടര്ന്നാണ് ലക്ഷ്മി ദുബായിലെത്തി പെര്ഫ്യൂം തയ്യാറാക്കുന്ന യൂസഫിനെ സമീപിച്ചത്.
'രേണു ഇങ്ങനെ ഒരാവശ്യം പറഞ്ഞപ്പോള് പലരും പറഞ്ഞത് യൂസഫ് ഭായിയുടെ പേരാണ്. എന്തിനിത് വീഡിയോയാക്കി നാട്ടുകാരെ കാണിക്കണം, രഹസ്യമായി രേണുവിനെ ഏല്പ്പിച്ചാല്പോരെ എന്ന് പലരും ചോദിച്ചു. നിങ്ങള് പറഞ്ഞയാളുടെ അടുത്ത് ഞാനെത്തി എന്ന് പറയാന് കൂടിയാണ് ഈ വീഡിയോ. മാത്രമല്ല, ഇതുപോലെ ചെയ്യാന് ആഗ്രഹിക്കുന്നവര്ക്ക് ഈ വീഡിയോ ഒരു പ്രചോദനമാവട്ടെ'- താരം വ്യക്തമാക്കി.
കഴിഞ്ഞദിവസം ലക്ഷ്മി തന്റെ യുട്യൂബില് പങ്കുവച്ച ഈ വീഡിയോ ഇതുവരെ ഒരു ദശലക്ഷത്തിലധികം പേരാണ് കണ്ടത്. നാല്പത്തിനായിരത്തിനടുത്ത് ലൈക്കുകളും ലഭിച്ചു. 'പ്രിയപ്പെട്ട സുധി ചേട്ടന്റെ മണം പെര്ഫ്യൂം ആക്കി' എന്ന ക്യാപ്ഷനോടുകൂടിയാണ് വീഡിയോ പങ്കുവച്ചിരിക്കുന്നത്.