ദേശീയ തിരഞ്ഞെടുപ്പിനായി പോളിംഗ് ബൂത്തിലേക്കുപോകാൻ തയ്യാറെടുക്കുന്നതിനിടെ യുകെ മലയാളികളെ ആശങ്കയിലാഴ്ത്തി മലയാളി ഡോക്ടറെ കാണാതായി.
ഇപ്സ്വിച്ചിൽ കുടുംബസമേതം താമസിച്ചിരുന്ന മലയാളി ഡോക്ടർ രാമസ്വാമി ജയറാമിനെ കാണാനില്ലെന്ന് കുടുംബമാണ് പോലീസിൽ പരാതി നൽകിയത്.
ജൂൺ 30 ഞായറാഴ്ച പുലർച്ചെ 5.45ന് വീട്ടിൽ നിന്ന് ഇറങ്ങിയ രാമസ്വാമി ജയറാമിനെ പിന്നീട് കണ്ടിട്ടില്ല. അദ്ദേഹം എവിടെപ്പോയി എന്നതിനെക്കുറിച്ചുള്ള ഒരുവിവരവും പൊലീസിന് ലഭിച്ചിട്ടില്ല.
56 വയസ്സുള്ള ഡോക്ടറെ കണ്ടെത്താൻ പോലീസ് പൊതുജനങ്ങളുടെ സഹായം അഭ്യർത്ഥിച്ചു. മെലിഞ്ഞ ശരീര പ്രകൃതിയും ഇരുണ്ട പറ്റെവെട്ടിയ മുടിയും കണ്ണട ധരിച്ചയാളുമാണെന്നാണ് നോട്ടീസിൽ പറയുന്നത്.
കാണാതാകുമ്പോൾ കടുംനീല / കറുത്ത ജാക്കറ്റ്, ഇളം നീല ജീൻസ്, കറുത്ത ട്രെയിനേഴ്സ് എന്നിവ ധരിച്ചിരുന്നു.
അതിനിടെ കുടുംബത്തിന്റെ ആശങ്ക വർധിപ്പിച്ച് ഡോക്ടറുടെ കാർ കണ്ടെത്തി. ചാരനിറത്തിലുള്ള സിട്രോൺ സി1 എന്ന കാർ പിന്നീട് ഇപ്സ്വിച്ചിലെ റാവൻസ്വുഡ് ഏരിയയിൽ ഉപേക്ഷിച്ച നിലയിലാണ് കണ്ടെത്തിയത്.
ഇതിൻ്റെ ഫലമായി, സഫോക്ക് ലോലാൻഡ് സെർച്ച് ആൻഡ് റെസ്ക്യൂ, എച്ച്എം കോസ്റ്റ്ഗാർഡ് എന്നിവയുടെ സഹായത്തോടെ സമീപ പ്രദേശങ്ങളിൽ - പ്രത്യേകിച്ച് ഓർവെൽ കൺട്രി പാർക്കിലും പരിസരത്തും - പോലീസ് തിരച്ചിൽ നടത്തുന്നു.
രാമസ്വാമിയെ കണ്ടിട്ടുണ്ടെന്ന് വിശ്വസിക്കുന്നവരോ, അദ്ദേഹം എവിടെയാണെന്ന് എന്തെങ്കിലും വിവരം ലഭിക്കുന്നവരോ, ഇപ്സ്വിച്ചിലെ ലാൻഡ്മാർക്ക് ഹൗസിലുള്ള ഡ്യൂട്ടി സർജൻ്റുമായി 101 എന്ന നമ്പറിൽ ബന്ധപ്പെടാൻ ആവശ്യപ്പെടുന്നു.