യൂസ്ഡ് കാര് ഷോറൂമില് നടന്നത് 102 കോടി രൂപയുടെ കള്ളപ്പണ ഇടപാട്. മലയാളത്തിലെ പ്രമുഖ സിനിമാ താരങ്ങളും ഇന്ത്യന് ക്രിക്കറ്റ് താരവും ഉള്പ്പെടെ നിരവധി പ്രമുഖര് ഉള്പ്പെട്ട കള്ളപ്പണ ഇടപാട് സംബന്ധിച്ച വിവരങ്ങളാണ് ഇപ്പോള് പുറത്തുവരുന്നത്. മലപ്പുറം സ്വദേശി മുജീബ് റഹ്മാന്റെ ഉടമസ്ഥതയിലുള്ള 'റോയല് ഡ്രൈവ്' എന്ന സ്ഥാപനത്തില് ആദായ നികുതി വകുപ്പ് നടത്തിയ പരിശോധനയിലാണ് കോടികളുടെ കള്ളപ്പണ ഇടപാട് കണ്ടെത്തിയത്.
ആദായനികുതി വകുപ്പ് കോഴിക്കോട് ഡിവിഷന് അന്വേഷണ വിഭാഗമാണ് പരിശോധന നടത്തിയത്. കുറച്ചുമാസങ്ങളായി റോയല് ഡ്രൈവ് കേന്ദ്രീകരിച്ച് കള്ളപ്പണ ഇടപാട് നടക്കുന്നുണ്ടെന്ന സംശയത്തെ തുടര്ന്നാണ് കാര് ഷോറൂമിന്റെ തിരുവനന്തപുരം, എറണാകുളം, മലപ്പുറം, കോഴിക്കോട് ശാഖകളില് രണ്ടു ദിവസമായി റെയ്ഡ് നടത്തിയത്. സിനിമ, കായിക മേഖലകളിലെ ദേശീയ തലത്തിലെ പ്രമുഖര് അടക്കമുള്ളവരുടെ കള്ളപ്പണ ഇടപാടുകള് കണ്ടെത്തിയതിനെ തുടര്ന്ന് അവര്ക്കു നോട്ടിസ് അയയ്ക്കാന് ആദായനികുതി വകുപ്പു തീരുമാനിച്ചു.