ഹേമ കമ്മിറ്റി റിപ്പോര്ട്ടിന് ശേഷം പുറത്തു വന്ന പല തുറന്നു പറച്ചിലുകളില് കേട്ട ഒരു പ്രധാനപ്പെട്ട കാര്യമാണ് പല നടിമാരുടെയും മുറിയുടെ വാതിലില് രാത്രികാലങ്ങളില് മുട്ടിയിരുന്നു എന്ന വെളിപ്പെടുത്തല്. ഇത്തരം അനുഭവം ഉണ്ടായിരുന്നെന്നും പലപ്പോഴായി മോശം അനുഭവങ്ങള് ഉണ്ടായിരുന്നെന്നും പറഞ്ഞ് നിരവധി നടിമാര് തങ്ങളുടെ അനുഭവം പങ്കുവെച്ചിട്ടുമുണ്ട്. ഇപ്പോഴിതാ മുട്ടിയ വാതില് അവസരത്തിനായി തുറന്നു കൊടുത്തിട്ടുണ്ടോ എന്ന യുട്യൂബറുടെ ചോദ്യത്തിന് മുഖത്തടിക്കുന്ന മറുപടി നല്കിയിരിക്കുകയാണ് നടിയും ബിഗ് ബോസ് ഷോ മത്സരാര്ത്ഥിയും ഗായികയും ആയ മനീഷ കെ.എസ്. അവതാരകന്റെ ചോദ്യത്തിന് തക്ക മറുപടിയും താരം കൊടുക്കുന്നുണ്ട്.
തട്ടീം മുട്ടീം എന്ന പരമ്പരയിലൂടെ പ്രേക്ഷകര്ക്ക് പരിചിതയായിരുന്ന മനീഷ പ്രേക്ഷകരിലേക്ക് ഇറങ്ങി ചെന്ന ഷോയായിരുന്നു ബിഗ് ബോസ് റിയാലിറ്റി ഷോ. താരം മികച്ച ഒരു ഡബ്ബിങ് ആര്ട്ടിസ്റ്റും ഗായികയു കൂടിയാണ്.
മനീഷയെ ചൊടിപ്പിച്ച അവതാരകന്റെ ചോദ്യം ഇങ്ങനെ: ''പല പ്രോഗ്രാമിലും പങ്കെടുത്ത് നല്ല ബന്ധങ്ങള് ചേച്ചിക്കും ഉണ്ട്. എന്നിരുന്നാലും കാലഘട്ടത്തിന് അനുസരിച്ച് ചേച്ചിക്ക് സഞ്ചരിക്കാന് പറ്റാത്തത് കൊണ്ട് പല അവസരങ്ങളും നഷ്ടമായിട്ടുണ്ട്. അതുകൊണ്ട് മുട്ടുന്ന കാലഘട്ടം ആയത് കൊണ്ട് കണക്ട് ചെയ്ത് ചോദിക്കുവാ, ആരെങ്കിലും മുട്ടിയപ്പോള് ചേച്ചിയുടെ നിലനില്പ്പിനും ചേച്ചിയുടെ അവസരത്തിനും വേണ്ടി മുട്ടിയ വാതില് തുറന്ന് കൊടുത്തിട്ടുണ്ടോ?''
നടി മനീഷയുടെ മറുപടി ഇങ്ങനെ: നിന്റെ അമ്മയോട് പോയി ചോദിക്ക്. മറുപടി കേട്ട അവതാരകന് മുഖത്തടിക്കുന്നതുപോലെ തോന്നിക്കാണും ആവശ്യമില്ലാത്ത ചോദ്യങ്ങള് നിനക്കിത്തിരി കൂടുതലാണ് അതെനിക്ക് പലവട്ടം മനസ്സിലായിട്ടുണ്ട് എന്നും മനീഷ പറഞ്ഞു.
''എന്ത് ഊള ചോദ്യങ്ങളാടോ താന് ചോദിക്കുന്നത്, മുട്ടുമ്പോള് തുറക്കുന്നത് ആണോ എക്സ്പീരിയന്സ്? ഈ ഇന്റര്വ്യൂ എന്ന് പറഞ്ഞു ഇവിടെ മാധ്യമങ്ങള് കൊണ്ട് ഇരുത്തുമ്പോള് എല്ലാവരെയും ഞാന് പറയുന്നില്ല. പ്രത്യേകിച്ച് നിനക്ക് കുറച്ച് അനാവശ്യ ചോദ്യങ്ങള് ചോദിക്കുന്നത് കൂടുതല് ആണ്. അത് വൈറല് ആവാന് ആണോ എന്നറിയില്ല, പക്ഷേ എന്നെപോലെയുള്ള ഒരു ആര്ട്ടിസ്റ്റിന്റെ അടുത്ത് ഇത്തരം ചോദ്യങ്ങള് ചോദിക്കുന്നത് ശരിയല്ല.
വീട്ടില് പോയി അമ്മയോട് ചോദിക്കുമോ ഇങ്ങനെ, അല്ലെങ്കില് പെങ്ങളോട് ചോദിക്കുമോ. നിങ്ങളുടെ വീട്ടുകാര് സിനിമയില് ഉണ്ടെങ്കിലും ഇല്ലെങ്കിലും അവരും സ്ത്രീകളല്ലെ. അമ്മയും പെങ്ങളും എന്നു പറഞ്ഞപ്പോള് നിനക്ക് കൊണ്ടു. അവരാരും സിനിമയില് ഇല്ല എന്നൊരു മറ നീ വച്ചു. നിങ്ങള് ആളും തരവും നോക്കി ചോദ്യങ്ങള് ചോദിക്കൂ. ഇങ്ങനെയൊരു ചോദ്യത്തിന്റെ പ്രസക്തി തന്നെ എന്താണ്. അവസരത്തിനു വേണ്ടി തുറന്നു കൊടുത്തിട്ടുണ്ടോ എന്ന് ഒരു സ്ത്രീയുടെ അടുത്ത് എങ്ങനെ ചോദിക്കാന് തോന്നി. നിന്നെപ്പോലുള്ള ഒരാളുടെ അടുത്ത് ഈ ചോദ്യത്തിന് ഉത്തരം പറയേണ്ട ബാധ്യതപോലും പ്രത്യേകിച്ച് എനിക്കില്ല.
എനിക്കു പരിചയമുള്ള ആളുകള്പോലും ഇത്തരം ചോദ്യങ്ങള് എന്റെ നേരെ ചോദിച്ചാല് ചെപ്പക്കുറ്റി അടിച്ച് പൊളിക്കും. എന്നെ അറിയാവുന്ന ആളല്ലേ നീ. ഞങ്ങളൊക്കെ സിനിമയില് പോകുന്നതിന്റെ അര്ഥം, എല്ലാവര്ക്കും മുട്ടിയാല് തുറക്കപ്പെടും എന്നാണോ. സിനിമയില് മാത്രമല്ല ഇതു നടക്കുന്നത്. കുടുംബത്തിലും നടക്കുന്നില്ലേ.''-മനീഷയുടെ വാക്കുകള്.
ഇതിനു മുമ്ബ് 'ഡിഎന്എ' എന്ന സിനിമയുടെ പ്രമോഷന് അഭിമുഖത്തിനിടെ നടി ഹന്ന റെജി കോശയ്ക്കും സമാനമായ അനുഭവം ഉണ്ടായിരുന്നു. അഭിമുഖത്തിന് ഇടയില് കാസ്റ്റിങ് കൗച്ചുമായി ബന്ധപ്പെട്ട് നിലവാരമില്ലാത്ത രീതിയിലുള്ള ചോദ്യമായിരുന്നു ഹന്നയ്ക്ക് നേരിടേണ്ടി വന്നത്. തുടര്ന്ന് ഹന്നയും സഹതാരം അഷ്കര് സൗദാനും അഭിമുഖത്തില് നിന്ന് ഇറങ്ങിപ്പോയി.