മലയാള സിനിമയിലെ തൂണുകള് എന്നാണ് മമ്മൂക്കയെയും ലാലേട്ടനേയും എല്ലാവരും വിശേഷിപ്പിക്കുന്നത്. ഇരുവരും ഒന്നിച്ച ചിത്രങ്ങളെല്ലാം മലയാളികള് ഉത്സവം പോലെ കണ്ട ചിത്രങ്ങളാണ്. ഇനി ആ കോംപോ എന്നാണ് സ്ക്രീനില് കാണുക എന്ന് കാത്തിരുന്നവര്ക്ക് ആ സന്തോഷ വാര്ത്ത ഇങ്ങെത്തി.
താരരാജാക്കന്മാര് ആയ മമ്മൂട്ടിയും മോഹന്ലാലും വീണ്ടും ഒന്നിക്കുകയാണ്. ആരാധകരുടെ ആഗ്രഹം പോലെ തന്നെ ഇരുവരെയും പ്രധാന കഥാപാത്രങ്ങളാക്കി സിനിമ ഉടന് പുറത്ത് വരും.
സംവിധായകന് മഹേഷ് നാരായണന് ആണ് ചിത്രത്തിന്റെ സംവിധായകന്. മമ്മൂട്ടിയുടെ നിര്മ്മാണക്കമ്പനി ആയ മമ്മൂട്ടികമ്പനിയും മോഹന്ലാലിന്റെ നിര്മ്മാണക്കമ്പനി ആശീര്വാദ് സിനിമാസും ചേര്ന്നാണ് സിനിമയുടെ നിര്മ്മാണം നിര്വഹിക്കുക.
ശ്രീലങ്കയായിരിക്കും സിനിമയുടെ പ്രധാന ലൊക്കേഷന് എന്നാണ് പുറത്ത് വരുന്ന റിപ്പോര്ട്ട്. 30 ദിവസത്തോളമായിരിക്കും ശ്രീലങ്കയില് ചിത്രീകരണം നടക്കുന്നത് എന്നാണ് സൂചന. നേരത്തെ മമ്മൂട്ടിയും,മോഹന്ലാലും ഒന്നിച്ചുള്ള ഫോട്ടോ സമൂഹമാധ്യമങ്ങളില് പങ്കു വെച്ചിരുന്നു. ആ സമയം തന്നെ ഇരുവരും ഒന്നിക്കുന്നു എന്ന തരത്തില് റൂമറുകള് ഉയര്ന്നിരുന്നു. മമ്മൂട്ടി കമ്പനിയ്ക്ക് കൈ കൊടുത്ത് ആശിര്വാദ് സിനിമാസ്' എന്ന ക്യാപ്ഷനോടെ നിര്മ്മാതാവ് ആന്റണി പെരുമ്പാവൂര് പങ്കുവെച്ച ചിത്രങ്ങളാണ് ചര്ച്ചയ്ക്ക് കാരണമായത്.
സിനിമയുടെ ചിത്രീകരണവുമായി ബന്ധപ്പെട്ട് ഈ മാസം 15ന് ചിത്രത്തിന്റെ അണിയറപ്രവര്ത്തകര് ശ്രീലങ്കന് പ്രധാനമന്ത്രി ദിനേശ് ഗുണവര്ധനയുമായി കൂടിക്കാഴ്ച നടത്തിയിരുന്നു. പ്രധാനമന്ത്രിയുടെ വസതിയില് വെച്ച് നടത്തിയ കൂടിക്കാഴ്ചയില് സംവിധായകന് മഹേഷ് നാരായണനൊപ്പം നിര്മ്മാതാക്കളായ ആന്റോ ജോസഫ്, സിവി സാരഥി, എംപി യാദമിനി ഗുണവര്ധന തുടങ്ങിയവരും ഭാഗമായിരുന്നു. ശ്രീലങ്കയ്ക്ക് പുറമെ കേരളത്തിലും ഡല്ഹിയിലും മറ്റ് വിദേശ രാജ്യങ്ങളിലും ചിത്രീകരണമുണ്ടാകും എന്നാണ് സൂചന. പതിനൊന്ന് വര്ഷങ്ങള്ക്ക് ശേഷമാണ് മമ്മൂട്ടിയും മോഹന്ലാലും ഒരു സിനിമയ്ക്കായി ഒന്നിക്കുന്നത്.