ഹൈദരാബാദ്: ഗണപതി പൂജ ആഘോഷങ്ങള് നടന്നപ്പോള് തെലങ്കാനയില് നടന്ന ഒരു ലഡ്ഡുവിന്റെ ലേലം ഏറെ ഞെട്ടിക്കുന്നതായിരുന്നു. ലഡ്ഡു ലേലത്തില് വിറ്റു പോയത് റെക്കോര്ഡ് തുകയ്ക്കാണ്.
ആഘോഷങ്ങളുടെ സമാപനത്തിന് മുന്നോടിയായി നടന്ന ലേലത്തില് ആണ് ഒരു ലഡ്ഡു റെക്കോര്ഡ് തകര്ത്ത് വിറ്റു പോയത്. തെലങ്കാന രംഗ റെഡ്ഡി ജില്ലയിലെ ബന്ദ്ലഗുഡ ജാഗിര് ഏരിയയിലെ കീര്ത്തി റിച്ച്മണ്ട് വില്ലസിലായിരുന്നു ലേലം.
ലേലത്തില് 1.87 കോടി രൂപയാണ് ഗണപതി ലഡ്ഡുവിന് ലഭിച്ചത്. കഴിഞ്ഞവര്ഷത്തെ റെക്കോര്ഡ് ഭേദിക്കുന്നതാണ് ഇത്തവണത്തെ ലേലത്തുക. കഴിഞ്ഞവര്ഷം 1.26 കോടിയായിരുന്നു ഇതേ ലേല വേദിയില് ലഡ്ഡുവിന് ലഭിച്ചത്. ഇത്തവണ 61 കോടിയുടെ വര്ധന. 2022ലെ ലേലത്തില് 60 ലക്ഷം രൂപയായിരുന്നു ലേലത്തുക.
100 പേരാണ് ലേലത്തില് പങ്കെടുത്തത്. ഇവരെ 25 പേര് വീതമുള്ള നാല് ടീമുകളായി തിരിച്ചായിരുന്നു ലേലം. ഇതിലൊരു ടീമാണ് ലേലം പിടിച്ചത്. ഈ തുക പാവപ്പെട്ടവരെ സഹായിക്കാന് സംഭാവന ചെയ്യും. കഴിഞ്ഞ വര്ഷം ലേലത്തില് നിന്ന് ലഭിച്ച തുകയും സമാനരീതിയിലായിരുന്നു ഉപയോഗിച്ചത്.
ഇതിനിടെ, ഗണപതി ആഘോഷത്തിന്റെ അവസാന ദിവസം 1994 മുതല് വര്ഷം തോറും ലേലം ചെയ്തുവരുന്ന ബാലാപൂര് ഗണേഷ് ലഡ്ഡുവും ഇത്തവണ റെക്കോര്ഡ് തുകയ്ക്കാണ് ലേലത്തില് പോയത്. തിങ്കളാഴ്ച രാവിലെ ബിജെപി നേതാവ് കോലന് ശങ്കര് റെഡ്ഡി 30.1 ലക്ഷം രൂപയ്ക്കാണ് ലഡ്ഡു ലേലത്തില് വാങ്ങിയത്.
കഴിഞ്ഞ വര്ഷം 27 ലക്ഷമായിരുന്നു ഈ ലഡ്ഡുവിന് ലഭിച്ചത്. 1994ല് കര്ഷകനായ കോലന് മോഹന് റെഡ്ഡി 450 രൂപയ്ക്ക് വാങ്ങിയതോടെയാണ് ബാലാപൂര് ഗണേശ് ലഡ്ഡു ലേലം ചെയ്യുന്ന പതിവ് ആരംഭിച്ചത്.