സ്വന്തം ലേഖകൻ

ഇനി സുരക്ഷിത ലിങ്കുകള്‍ മാത്രം എസ്എംഎസുകള്‍ക്കൊപ്പം മതിയെന്ന നിര്‍ദേശവുമായി ട്രായ്. വൈറ്റ്ലിസ്റ്റ് ചെയ്ത യുആര്‍എല്‍, എപികെഎസ്, ഒടിടി ലിങ്കുകള്‍ മാത്രമേ എസ്എംഎസില്‍ അയക്കാവൂ എന്നാണ് സേവനദാതാക്കള്‍ക്ക് ട്രായ് നല്‍കിയ നിര്‍ദേശത്തില്‍ പറയുന്നത്. ലിങ്കുകള്‍ വൈറ്റ് ലിസ്റ്റ് ചെയ്തിട്ടില്ലെങ്കില്‍ മെസേജുകള്‍ കൈമാറില്ലെന്നും ഒക്ടോബര്‍ ഒന്നിനകം ഇത് നടപ്പാക്കുമെന്നും ട്രായ് പറയുന്നു.

യുആര്‍എലുകള്‍ (യൂണിഫോം റിസോഴ്‌സ് ലോക്കേറ്റേഴ്‌സ്) അടങ്ങിയ മെസേജുകളുടെ സുരക്ഷ ഉറപ്പാക്കാനാണ് നിര്‍ദേശത്തിലുള്ളത്. 70,000-ലധികം ലിങ്കുകള്‍ വൈറ്റ്ലിസ്റ്റ് ചെയ്തുകൊണ്ട് 3,000-ലധികം രജിസ്റ്റേഡ് സെന്‍ഡര്‍മാരാണ് ഈ നിര്‍ദേശം പാലിച്ചിട്ടുള്ളത്. സുതാര്യവും സുരക്ഷിതവുമായ ആശയവിനിമയ സംവിധാനത്തെ പ്രോത്സാഹിപ്പിക്കുന്നതിനൊപ്പം ദോഷകരമായ ലിങ്കുകള്‍ തടയുകയും ഉപയോക്താവ് ആവശ്യപ്പെടാത്ത സന്ദേശങ്ങളില്‍ നിന്ന് സംരക്ഷണം നല്‍കുകയുമാണ് പുതിയ നീക്കത്തിന്റെ ലക്ഷ്യം.

നേരത്തെ മൊബൈല്‍ സേവനങ്ങള്‍ തടസപ്പെട്ടാല്‍ കമ്ബനിയോട് നഷ്ടപരിഹാരം ആവശ്യപ്പെടാമെന്ന വ്യവസ്ഥ ട്രായ് അവതരിപ്പിച്ചിരുന്നു. ഇത് സംബന്ധിച്ച് ടെലികോം സേവനങ്ങളുടെ ഗുണനിലവാരമാനദണ്ഡങ്ങള്‍ പരിഷ്‌കരിച്ചുകൊണ്ട് വിജ്ഞാപനവും പുറത്തിറക്കി. ട്രായിയുടെ പുതിയ വ്യവസ്ഥകളനുസരിച്ച് ജില്ലാതലത്തില്‍ 24 മണിക്കൂറില്‍ കൂടുതല്‍ മൊബൈല്‍ സേവനങ്ങള്‍ തടസപ്പെടുന്ന സാഹചര്യമുണ്ടായാല്‍ ഉപഭോക്താക്കള്‍ക്ക് കമ്ബനിയോട് നഷ്ടപരിഹാരം ആവശ്യപ്പെടാം. ഇത് നല്‍കാന്‍ കമ്ബനി ബാധ്യസ്ഥരുമാണ്. കൂടാതെ മാനദണ്ഡങ്ങള്‍ പാലിക്കാത്തതിനുള്ള പിഴ 50,000 രൂപയില്‍ നിന്ന് ഒരുലക്ഷമാക്കിയും ട്രായി ഉയര്‍ത്തി.

മാനദണ്ഡങ്ങളുടെ ലംഘനം അനുസരിച്ച് ഒരു ലക്ഷം, രണ്ട് ലക്ഷം, അഞ്ച് ലക്ഷം, പത്ത് ലക്ഷം എന്നിങ്ങനെ വിവിധ ഗ്രേഡുകളിലായാണ് പിഴ ഈടാക്കുക. മുന്‍പ് സെല്ലുലാര്‍ മൊബൈല്‍ സര്‍വീസുകള്‍, ബ്രോഡ്ബാന്‍ഡ് സര്‍വീസുകള്‍, ബ്രോഡ്ബാന്‍ഡ് വയര്‍ലെസ് സര്‍വീസുകള്‍ എന്നിവയ്ക്കായുള്ള മാനദണ്ഡങ്ങള്‍ക്ക് പകരമായാണ് പുതിയവ അവതരിപ്പിച്ചിരിക്കുന്നത്.