ജിദ്ദയിലെ ഇന്റര്നാഷണല് ഷോപ്പിംഗ് സെന്ററില് വന് അഗ്നിബാധ. നഗരത്തിലെ പ്രമുഖ വാണിജ്യ കേന്ദ്രങ്ങളിലൊന്നായ റൗദ ഡിസ്ട്രിക്റ്റില് മദീന റോഡില് മുറബ്ബ പാലത്തിനടുത്ത് ലെ-മെറിഡിയന് ഹോട്ടലിനോട് ചേര്ന്നാണ് ഇന്റര്നാഷണല് ഷോപ്പിംഗ് സെന്ററില് സ്ഥിതി ചെയ്യുന്നത്.
ഇന്നലെ രാവിലെ എട്ട് മണിക്കുണ്ടായ തീപിടുത്തത്തില് ഷോപ്പിംഗ് സെന്ററിനകത്തുള്ള സൂപ്പര് മാര്ക്കറ്റ് ഉള്പ്പെടെ നിരവധി ഷോപ്പുകള് കത്തിയമര്ന്നതായാണ് വിവരം. തീപിടുത്തത്തില് കോടിക്കണക്കിന് റിയാലിന്റെ നാശനഷ്ടം ഉണ്ടായിട്ടുണ്ടാവാം എന്നാണ് പ്രാഥമിക വിലയിരുത്തല്. അഗ്നിശമന രക്ഷാസേനയുടെ നിരവധി യൂനിറ്റുകള് എത്തി തീ നിയന്ത്രണ വിധേയമാക്കി.
നിരവധി മലയാളികള് ജോലിചെയ്യുന്ന വിവിധ ഷോപ്പുകള് അഗ്നിക്കിരയായിട്ടുണ്ട്. നാലര പതിറ്റാണ്ട് മുമ്പ് നിലവില് വന്ന 75,000 ചതുരശ്ര മീറ്റര് വിസ്തൃതിയില് വ്യാപിച്ചുകിടക്കുന്ന ഷോപ്പിംഗ് സെന്ററാണിത്. സൂപ്പര് മാര്ക്കറ്റ്, ആഭരണങ്ങള്, ഇലക്ട്രോണിക് വസ്തുക്കള്, വസ്ത്രങ്ങള്, വാച്ചുകള്, സുഗന്ധദ്രവ്യങ്ങള്, സൗന്ദര്യവര്ദ്ധക വസ്തുക്കള് തുടങ്ങി 200-ഓളം വിത്യസ്ത ഷോപ്പുകള് സെന്ററിനകത്തുണ്ട്. നിരവധി അന്താരാഷ്ട്ര ബിസിനസ് എക്സ്പോകള്ക്ക് വേദിയായ ഇന്റര്നാഷണല് ഷോപ്പിങ് സെന്റര് വിനോദസഞ്ചാരികളുടെ സ്ഥിരം സന്ദര്ശന കേന്ദ്രമാണ്. തീപിടിത്തത്തില് ആളപായം റിപ്പോര്ട്ട് ചെയ്യപ്പെട്ടിട്ടില്ല.