ഗുരുവായൂരിൽ വച്ച് താലിചാർത്തൽ നടന്നാൽ ഹൈന്ദവ മലയാളികൾ, വിവാഹം സ്വർഗത്തിൽ നടന്ന പ്രതീതിയിലാകും. ഓണത്തിനുമുമ്പ് സെപ്റ്റംബർ എട്ടിന് ഞായറാഴ്ച്ച 334 പേരുടെ റെക്കോർഡ് വിവാഹവും ഗുരുവായൂരിൽ അരങ്ങേറിയിരുന്നു.
അതുപോലെ ഇംഗ്ലണ്ടുകാർക്ക് വിവാഹം കഴിക്കാൻ ഏറ്റവും പ്രിയങ്കരമായ ഒരിടം ലണ്ടൻ പട്ടണ നടുവിലുണ്ട്. ഒരു നൂറ്റാണ്ടിന്റെ പഴമയും പ്രൗഢിയും ചരിത്രവും പേറുന്ന സെൻട്രൽ ലണ്ടനിലെ ഓൾഡ് മാരിൽബോൺ ടൗൺ ഹാളാണ് ഇംഗ്ലണ്ടിലെ ഏറ്റവും പ്രശസ്തമായ വിവാഹ വേദി. ഒക്ടോബർ 1 ചൊവ്വാഴ്ച, ചരിത്രമെഴുതിയ മാരത്തോൺ വിവാഹത്തിനും മാരിൽബോൺ ടൗൺ ഹാൾ വേദിയായി. ഒന്നിനുപിന്നാലെ ഒന്നായി നൂറോളം വിവാഹങ്ങളാണ് അന്നേദിനം ഇവിടെ അരങ്ങേറിയത്.
പൊതുവേ വിവാഹത്തോട് വിരക്തിയുള്ള ആധുനിക ബ്രിട്ടീഷ് സമൂഹത്തിൽ, നൂറോളം വിവാഹങ്ങൾ ഒരേവേദിയിൽ നടത്താനായി എന്നതുതന്നെ ചരിത്രമായി. ഗുരുവായൂർ ക്ഷേത്രത്തിലേതുപോലെ ഒരു പ്രത്യേക മതവിഭാഗക്കാരുടെ മാത്രം വിവാഹമല്ല ഇവിടെ നടക്കാറുള്ളത്. എല്ലാവിധ മതക്കാർക്കും ലോകത്തിലെ ഏതുരാജ്യക്കാർക്കും ജാതിമത, വർഗവംശ വ്യത്യാസമില്ലാതെ ഇവിടെവച്ച് വിവാഹിതരാകാം.
സെൻട്രൽ ലണ്ടനിലെ ഓൾഡ് മാരിൽബോൺ ടൗൺ ഹാളിന് ലണ്ടൻ നഗരത്തിന്റെ നൂറുവർഷത്തെ ജനജീവിതവുമായി ഇഴചേർന്ന ബന്ധമാണുള്ളത്. അതിൻ്റെ നൂറാം ജന്മദിനം ആഘോഷിക്കുന്നതിനായി ചൊവ്വാഴ്ച സംഘടിപ്പിച്ച ബാക്ക്-ടു-ബാക്ക് ചടങ്ങുകളിൽ ഒന്നായാണ് മാരത്തോൺ വിവാഹവും അരങ്ങേറിയത്. സർ പോൾ മക്കാർട്ട്നി, സർ റിംഗോ സ്റ്റാർ, ലിയാം ഗല്ലഗർ എന്നിവരുടെ വിവാഹങ്ങൾ ഉൾപ്പെടെ നിരവധി സെലിബ്രിറ്റി വിവാഹങ്ങൾ ഈ വേദിയിൽ നടന്നിട്ടുണ്ട്. പൗരാണിക കെട്ടിടത്തിലെ ഏറ്റവും വലിയ മുറിയായ വെസ്റ്റ് മിൻസ്റ്റർ റൂമിൽ വച്ചായിരുന്നു കൂടുതൽ വിവാഹങ്ങളും. കെട്ടിടത്തിന്റെ മധ്യഭാഗത്ത് മരഭിത്തികൾകൊണ്ട് നിർമ്മിച്ച വലിയൊരു മുറിയാണിത്. പുതിയ ദമ്പതികളെ പ്രണയാതുരരായി മാറ്റുന്ന വെളിച്ച - ശബ്ദവിന്യാസവും ഈ മുറിയ്ക്കുണ്ട്.
വിവാഹിതരായത് പുതിയ ദമ്പതികൾ മാത്രമല്ല. നേരത്തേ വിവാഹിതരായിട്ട് ഇവിടെവച്ച് സ്വപ്ന സാക്ഷാത്കാരത്തിനായി ഒരിക്കൽകൂടി വിവാഹിതരായവരുണ്ട്. അതുപോലെ സാധാരണ ദമ്പതികൾക്കു പുറമേ, സ്വവർഗാനുരാഗികളും ലിംഗമാറ്റത്തിനു വിധേയരായവരും ചരിത്രദിനം താലിചാർത്തി. എങ്കിലും കുടുതലും പരമ്പരാഗത രീതിയിലുള്ള ക്രിസ്ത്യൻ വിവാഹങ്ങൾ ആയിരുന്നു. പലരാജ്യങ്ങളിൽ നിന്നും കുടിയേറി ലണ്ടനിൽ താമസിക്കുന്നവർ ഉണ്ടായിരുന്നെങ്കിലും ചരിത്ര മാരത്തോൺ വിവാഹത്തിൽ പങ്കെടുത്തവരിൽ മലയാളികളെ ആരേയും കാണുവാൻ കഴിഞ്ഞില്ല.