വീഡിയോ കോണ്ഫെറെന്സിങ് സേവനദാതാവായ സൂമിന്റെ വോയിസ് കോള് സേവനങ്ങള് ഇനി ഇന്ത്യയിലും ലഭ്യമാകും. പുതിയ രീതി അനുസരിച്ച് ഇനി മുതല് സൂം സേവനങ്ങള് ഉപയോഗിച്ച് പബ്ലിക് സ്വിച്ച്ഡ് ടെലിഫോണ് നെറ്റ്വര്ക്കിലൂടെ പ്രാദേശിക നമ്പറുകളുള്പ്പെടെ ഇന്ത്യയില് ഏത് ഫോണ് നമ്പറിലേക്കും വിളിക്കാന് സാധിക്കും എന്നാണ് പുറത്ത് വരുന്ന വിവരം.
മറ്റു നമ്പറുകളില് നിന്ന് ഇന്കമിങ് കോളുകള് സ്വീകരിക്കാനും സാധിക്കും. 2023 ഏപ്രിലിലാണ് ഇന്ത്യയിലെമ്പാടും തങ്ങളുടെ ഫോണ് സേവനങ്ങള് നല്കാനുള്ള അനുമതി കേന്ദ്ര ടെലികോം വകുപ്പില് നിന്നും സൂമിന് ലഭിച്ചത്.
തങ്ങള്ക്ക് അനുമതി ലഭിച്ചതിനെ തുടര്ന്ന് സൂമിന്റെ ക്ലൗഡ് സംവിധാനമായ പിബിഎക്സ് സേവനങ്ങള് ഇന്ത്യയിലെമ്പാടും എത്തിക്കാനുള്ള സൗകര്യങ്ങള് ഉടന് വികസിപ്പിക്കുമെന്നാണ് കമ്പനിക്ക് വേണ്ടി പ്രോഡക്റ്റ് ആന്ഡ് എഞ്ചിനീയറിംഗ് പ്രസിഡന്റ് വെല്ച്ചാമി ശങ്കര്ലിംഗം അറിയിച്ചത്.
നിലവില് സൂമില് പണം നല്കിയ വരിക്കാരായ ആളുകള്ക്ക് ഈ പുതിയ സംവിധാനം നേരത്തെ ഉണ്ടായിരുന്നതിനൊപ്പം പുതിയ ഫീച്ചറായാണ് വരിക. ഇതുമായി ബന്ധപ്പെട്ട പ്രധാനപ്പെട്ട ബിസിനസ് അപ്പ്ളിക്കേഷനുകളുമായും കോണ്ടാക്ട് സെന്ററുകളുമായും ഹാര്ഡ്വെയര് ദാതാക്കളുമായും ഈ സംവിധാനം വച്ച് ബന്ധപ്പെടാന് സാധിക്കും.
ആദ്യഘട്ടത്തില് സൂം ഫോണ് സര്വീസ് ലഭ്യമാവുക പുനെയിലായിരിക്കുമെന്നാണ് കമ്പനി അറിയിക്കുന്നത്. കര്ണാടക, തമിഴ്നാട്, ആന്ധ്രപ്രദേശ്, മുംബൈ, ഡെല്ഹി എന്നിവിടങ്ങളിലേക്ക് രണ്ടാംഘട്ടത്തിലും സേവനം വ്യാപിപ്പിക്കും.