ലണ്ടൻ: സ്വന്തം ലേഖകൻ

കെന്റിലെ പ്രശസ്‌തമായ  സ്വകാര്യ ആശുപത്രിയായിരുന്നു ഫോർഡ്‌കോംബ് ഹോസ്പിറ്റൽ. എന്നാൽ ഇപ്പോൾ ഇതൊരു എൻ എച്ച് എസ് ഹോസ്പിറ്റലായാണ് പ്രവർത്തിക്കുന്നത്. 

നഴ്സുമാരും കെയറർമാരും അടക്കം നിരവധി മലയാളി സ്റ്റാഫുകളും ഈ സ്വകാര്യ ആശുപത്രിയിൽ ജോലിചെയ്തിരുന്നു. ഇവിടെ ജോലിചെയ്തിരുന്ന 170 സ്ഥിരജീവനക്കാരും ഇനിമുതൽ എൻ എച്ച് എസ് സ്റ്റാഫുകൾ ആയി മാറും. 

മൈഡ്‌സ്റ്റോൺ ആൻഡ്  ടേൺബ്രിഡ്ജ് വെൽസ് എൻഎച്ച്എസ് ട്രസ്റ്റാണ് (എംടിഡബ്ല്യു) ഈ സ്വകാര്യ ആശുപത്രിയും അതുൾപ്പെടുന്ന സ്ഥലവും വാങ്ങിയത്. കഴിഞ്ഞ മാർച്ചുമാസത്തിൽ ആയിരുന്നു ഏറ്റെടുക്കൽ.

അതിനുശേഷം നിർമ്മാണ പ്രവർത്തനങ്ങളും അറ്റകുറ്റപ്പണികളും നടത്തിവരികയായിരുന്നു. അത് പൂർത്തീകരിച്ച് തിങ്കളാഴ്ച്ച മുതൽ  ഫോർഡ്‌കോംബ് ഹോസ്പിറ്റലിൽ ആദ്യത്തെ രോഗികളെ സ്വാഗതം ചെയ്തു.

ചികിത്സയ്ക്കായി മാസങ്ങൾ കാത്തിരിക്കേണ്ടി വന്ന കെൻ്റിലും മെഡ്‌വേയിലുമുള്ള ആയിരക്കണക്കിന് രോഗികൾക്ക് ആശ്വാസം  പകരുന്നതാണ് എൻഎച്ച്എസ് ട്രസ്റ്റിന്റെ നടപടി. ഇതുമൂലം സ്ഥലങ്ങളിലെ  കുടുതൽപ്പേർക്ക് സൗജന്യ ചികിത്സ ലഭിക്കാൻ വഴിയൊരുങ്ങും.

ടേൺബ്രിഡ്ജ് വെൽസിനടുത്തുള്ള മുൻ സ്വകാര്യ ആശുപത്രി ഏറ്റെടുക്കുന്നത്, കെൻ്റിലും മെഡ്‌വേയിലുമുടനീളമുള്ള എൻഎച്ച്എസ് രോഗികളെ വലിയൊരളവുവരെ  സഹായിക്കുമെന്ന് ട്രസ്റ്റ് അധികൃതരും അവകാശപ്പെട്ടു.

ഫോർഡ്‌കോംബ് ഹോസ്പിറ്റൽ പ്രധാനമായും ചെവി, മൂക്ക്, തൊണ്ട, ട്രോമ, ഓർത്തോപീഡിക്സ്, ഗ്യാസ്ട്രോഎൻട്രോളജി, ഡയഗ്നോസ്റ്റിക്സ്, എൻഡോസ്കോപ്പി എന്നിവയിലാകും ആധുനിക പരിചരണം നൽകുക.

ഏകദേശം 1,600 രോഗികളെ ചികിത്സയ്ക്കായി MTW ലേക്ക് മാറ്റിക്കഴിഞ്ഞു, മാർച്ച് അവസാനത്തോടെ മൊത്തം 2,500 രോഗികളെക്കൂടി ചികിത്സിക്കാൻ സജ്ജമാകുമെന്നും ട്രസ്റ്റ് പറയുന്നു.

ഈ ഏരിയയിൽ ഏറ്റവും കൂടുതൽ സമയം ചികിത്സ  കാത്തിരിക്കുന്ന രോഗികൾക്ക് കുറഞ്ഞ സമയത്തിനുള്ളിൽ ചികിത്സ ലഭ്യമാക്കാൻ ഇതുമൂലം കഴിയുമെന്ന് എംടിഡബ്ല്യു ചീഫ് എക്സിക്യൂട്ടീവ് മൈൽസ് സ്കോട്ട് പറഞ്ഞു.

ട്രസ്റ്റ് 2024 മാർച്ചിൽ സ്‌പയർ ഹെൽത്ത്‌കെയറിൽ നിന്നാണ്  ആശുപത്രി വാങ്ങിയത്. 6 മാസത്തെ പരിവർത്തന കാലയളവിന് ശേഷം, ആദ്യത്തെ രോഗികൾ തിങ്കളാഴ്ച എത്തിത്തുടങ്ങിയതായും ജനങ്ങളിൽ നിന്ന് നല്ല പ്രതികരണം ലഭിക്കുന്നതാണ് ട്രസ്റ്റ് അധികൃതർ വ്യക്തമാക്കി.

സൈറ്റ് നൽകുന്ന അധിക സൗകര്യങ്ങൾ, മൈഡ്‌സ്റ്റോണിലെയും ടൺബ്രിഡ്ജ് വെൽസിലെയും ട്രസ്റ്റിൻ്റെ ആശുപത്രികളിൽ ശേഷി വർദ്ധിപ്പിക്കുന്നതിന് MTW-യെ പ്രാപ്തമാക്കുമെന്നും ട്രസ്റ്റ് അധികൃതർ കണക്കുകൂട്ടുന്നു.

 രാജ്യമെങ്ങും എൻഎച്ച്എസ് കടുത്ത സാമ്പത്തിക പ്രതിസന്ധി നേരിടുന്ന ഘട്ടത്തിൽ,  ഇതുപോലൊരു ഏറ്റെടുക്കൽ നടത്തിയ മൈഡ്സ്റ്റോൺ ട്രസ്റ്റ് ഭാരവാഹികൾ;  അഭിനന്ദനാർഹമായ പ്രവർത്തനമാണ് കാഴ്ചവച്ചതെന്നും പ്രാദേശിക ഭരണകർത്താക്കൾ അറിയിച്ചു.