ലണ്ടൻ: സ്വന്തം ലേഖകൻ

ഇസ്രയേലും ഹമാസും ലെബനനും തമ്മിലുള്ള യുദ്ധം കൊടുമ്പിരികൊള്ളുകയും ഇറാനും യെമനും അടക്കമുള്ള രാജ്യങ്ങൾ യുദ്ധതിൽ ഇടപെടുകയും ചെയ്‌തതോടെ, മിഡിൽ - ഈസ്റ്റ് യൂറോപ്പ് വ്യോമഗതാഗതം താറുമാറായി മാറി.

യുദ്ധഭീതി നിമിത്തം നിരവധി വിമാനങ്ങൾ വൈകുകയും റദ്ദാക്കുകയും ചെയ്തതോടെ, ഈ മേഖലയിലെ പല വിമാനത്താവളങ്ങളിലും യാത്രക്കാർ മണിക്കൂറുകളോളം കുടുങ്ങി. ബ്രിട്ടീഷ് എയർവേസിന്റേത് അടക്കമുള്ള വിമാനങ്ങൾ വഴിതിരിച്ചുവിടുകയോ യാത്രകൾ മണിക്കൂറുകളോളം വൈകുകയും ചെയ്‌തു. 

ഹമാസും ഹിസ്‌ബൊള്ളയുമായുള്ള ഇസ്രയേലിന്റെ യുദ്ധത്തിൽ അപ്രതീക്ഷിതമായി ഇറാൻ കൂടി ഇടപെട്ടതാണ് സ്ഥിതിഗതികൾ ഇത്രയേറെ കലുഷിതമാക്കിയത്. 180 തിലേറെ മിസൈലുകൾ ഇറാൻ തൊടുത്തുവിട്ടിരുന്നു.

ഇതിന് തിരിച്ചടി നൽകുമെന്ന് ഇസ്രായേൽ പ്രഖ്യാപിച്ചതും അതേക്കുറിച്ചുള്ള ഇസ്രയേലിന്റെ തയ്യാറെടുപ്പ് വാർത്തകൾ പ്രചരിച്ചതുമാണ് മിഡിൽ ഈസ്റ്റിനുമുകളിലെ ആകാശ യാത്രകൾ കലുഷിതമാക്കി മാറ്റിയത്. യുറോപ്പിലാകട്ടെ റഷ്യ - യുക്രൈൻ യുദ്ധവും ഭീഷണിയായി തുടരുന്നു.

ബ്രിട്ടനും ഇന്ത്യയും അടക്കമുള്ള പല രാജ്യങ്ങളും യുദ്ധമേഖലകളിലേക്കുള്ള വിമാന സർവ്വീസുകൾ ഏതാണ്ട് പൂർണ്ണമായിത്തന്നെ നിർത്തിക്കഴിഞ്ഞു. ലെബനൻ, ഇസ്രായേൽ, ഇറാൻ, പാലസ്തീൻ എന്നിവിടങ്ങളിൽ നിന്നുള്ള ബ്രിട്ടീഷ് പൗരന്മാർ എത്രയുംവേഗം അവിടെനിന്നും മാറണമെന്നും ബ്രിട്ടീഷ് വിദേശകാര്യ മന്ത്രാലയം നിർദ്ദേശിച്ചിട്ടുണ്ട്.

ഇറാന്റെ ആക്രമണത്തിന് ഇസ്രായേൽ തിരിച്ചടി 

നൽകുമെന്നുള്ളത്  ഉറപ്പായ കാര്യമാണ്. ഇറാന്റെ ആണവകേന്ദ്രങ്ങൾ വരെ ആക്രമിക്കപ്പെട്ടേക്കാം. അതൊരുപക്ഷേ, മേഖലയിൽ ആണവയുദ്ധത്തിനുവരെ വഴിവയ്ക്കുകയും ചെയ്യും. ഇതിന്റെ ഭീതിയിലാണ് ഇപ്പോൾ ഗൾഫ് രാജ്യങ്ങൾ. 

ഇതുമൂലം സാധാരണഗതിയിൽ ഗൾഫ് വഴി കേരളത്തിലേക്കും ഇന്ത്യയിലെ മറ്റ് സ്ഥലങ്ങളിലേക്കും  യാത്രചെയ്തിരുന്ന, യുകെ, യുഎസ്, യൂറോപ്യൻ രാജ്യങ്ങൾ എന്നിവിടങ്ങളിലെ പ്രവാസി മലയാളികൾ അടക്കമുള്ള ഇന്ത്യക്കാർ, ഇപ്പോൾ യാത്രകൾ മുംബൈ, ഡെൽഹി ബാഗ്ലൂർ തുടങ്ങിയ വിമാനത്താവളങ്ങൾ വഴിയാക്കിയിട്ടുണ്ട്.

അതേസമയം, ഹീത്രൂവില്‍ നിന്നും മുംബൈയിലേക്കും തിരിച്ചുമുള്ള ബ്രിട്ടീഷ് എയര്‍വേയ്‌സിന്റെ സര്‍വ്വീസ് ഒക്ടോബര്‍ 2, 3, 4 തീയതികളിൽ മുന്നറിയിപ്പില്ലാതെ  റദ്ദാക്കിയതും പ്രശ്നം കൂടുതൽ കലുഷിതമാക്കി.

മിഡിൽ ഇസ്റ്റിലേക്കും ഗൾഫ് രാജ്യങ്ങളിലേക്കുമുള്ള വിനോദസഞ്ചാരികൾ പോലും ഇപ്പോൾ യാത്രകൾ, മറ്റിടങ്ങളിലേക്ക് മാറ്റുകയോ റദ്ദാക്കുകയോ ചെയ്യുന്നു. അക്ഷരാർത്ഥത്തിൽ, യുദ്ധത്തിലെ ഇറാന്റെ അപ്രതീക്ഷിത ഇടപെടലോടെ ഗൾഫ് മേഖലയാകെ സ്‌തംഭനാവസ്ഥയിലുമായി  മാറി. 

ഹീത്രൂവില്‍ നിന്നും ദുബായിലേക്ക് പറന്ന ബ്രിട്ടീഷ് എയര്‍വേയ്‌സ് വിമാനം ഭീഷണിമൂലം യാത്രാമദ്ധ്യേ സൈപ്രസ്സിലെ ലാര്‍ണാകയിലേക്ക് തിരിച്ചുവിട്ടു. അതുപോലെ സിംഗപ്പൂരില്‍ നിന്നും ഹീത്രൂവിലേക്കുള്ള വിമാനം സാധാരണ റൂട്ട് അടച്ചതിനാല്‍ ദുബൈയ് വഴി തിരിച്ചുവിടേണ്ടതായി വന്നു. 

സാധാരണയായി യൂറോപ്പില്‍ നിന്നുള്ള വിമാനങ്ങള്‍ ഗള്‍ഫ് നാടുകളിലേക്കോ തെക്കന്‍ ഏഷ്യയിലേക്കോ പറക്കുന്നത് ജര്‍മ്മനി, ഓസ്ട്രിയ,ബാള്‍ക്കന്‍, തുര്‍ക്കി വഴിയാണ്. പിന്നീട് സിറിയ കഴിഞ്ഞ് തെക്ക് കിഴക്ക് ഭാഗത്തേക്ക് തിരിയും. അതിനുശേഷം സാധാരണ യാത്രാമാര്‍ഗ്ഗം ഇറാഖോ ഇറാനോ മുകളിലൂടെ ഗള്‍ഫ് നാടുകളിലേക്കാകും.

എന്നാല്‍, ഇറാന്റെ മിസൈല്‍ ആക്രമണം കാരണം വ്യോമമാര്‍ഗ്ഗം അടച്ചതോടെ കൂടുതല്‍ ദൈര്‍ഘ്യമേറിയ റൂട്ടുകളെ ആശ്രയിക്കേണ്ട സാഹചര്യമാണിപ്പോള്‍ വിമാനങ്ങൾക്കുള്ളത്. അതിരാവിലെ ലണ്ടനില്‍ നിന്നും ദോഹയിലേക്ക് ഇന്നലെ യാത്രതിരിച്ച ഖത്തര്‍ എയര്‍വേയ്‌സ് വിമാനം തെക്ക് കിഴക്ക് ദിശയിലേക്ക് പറന്ന് ഏഥന്‍സ് വഴി കിഴക്കന്‍ മെഡിറ്ററേനിയന് മുകളിലൂടെ ഈജിപ്ത്, സിനായ് ഉപദ്വീപ് വഴി ചെങ്കടലിന് മുകളിലെത്തി കിഴക്കോട്ട് തിരിഞ്ഞ് സൗദി അറേബ്യയുടെ മദ്ധ്യത്തിലൂടെ പറന്നാണ് ദോഹയില്‍ എത്തിയത്. ഇതുവഴി യാത്രാദൂരത്തില്‍ 500 മൈല്‍ അധികമായി കൂട്ടിച്ചേര്‍ക്കപ്പെട്ടു.

യാത്രാസമയത്തില്‍ ഒരുമണിക്കൂറോളം കൂടിയെന്ന് മാത്രമല്ല, യാത്രക്കാരുടെ മേൽ അധികച്ചിലവ് ടിക്കറ്റ് ചാർജ്ജ് വർദ്ധനവായി അടിച്ചേൽപ്പിക്കാനുള്ള തയ്യാറെടുപ്പിലാണ് വിമാനക്കമ്പനികൾ.

ഈ റൂട്ടിലുള്ള എല്ലാ വിമാനങ്ങള്‍ക്കും ഇത്തരം പ്രതിസന്ധികള്‍ അഭിമുഖീകരിക്കേണ്ടതായി വന്നിരിക്കുന്നു. സിംഗപ്പൂര്‍ എയര്‍ലൈന്‍സിന്റെ സിംഗപ്പൂരില്‍ നിന്നും ഹീത്രൂവിലേക്കുള്ള വിമാനം ഇപ്പോള്‍ ഇന്ത്യ, അഫ്ഗാനിസ്ഥാന്‍, തുര്‍ക്ക്‌മെനിസ്ഥാന്‍ വഴിയാണ് പോകുന്നത്. ലക്ഷ്യസ്ഥാനങ്ങളിൽ എത്തിച്ചേരാൻ ഇത് സാധാരണയിലും അധികസമയം യാത്രയ്ക്കായി എടുക്കുന്നു. 

ഇറാനെതിരെയുള്ള ഇസ്രയേലിന്റെ തിരിച്ചടി എപ്പോൾ ഏതുവിധത്തിൽ എന്നതിന്റെ ആശങ്കയിൽ കഴിയുകയാണ് മിഡിൽ ഈസ്‌റ്റ്  രാജ്യങ്ങളോടൊപ്പം പ്രവാസികളും. കഴിഞ്ഞതവണ ഇതേപോലെ ഇസ്രയേലിനുനേരെ ഇറാൻ മിസ്സൈൽ ആക്രമണം നടത്തിയപ്പോൾ, ഒരാഴ്ചയ്ക്കുശേഷം മൂന്ന് മിസ്സൈലുകൾ  മാത്രമയച്ചാണ് ഇസ്രായേൽ തിരിച്ചടിച്ചത്. 

അതിലെ രണ്ടു മിസ്സൈലുകൾ ഇറാന്റെ ആണവകേന്ദ്രത്തിന്റെ വ്യോമസുരക്ഷാ സംവിധാനവും റഡാറുകളും തകർത്തു. മൂന്നാമത്തെ മിസ്സൈൽ  ലക്ഷ്യംതെറ്റി വീഴുകയും ചെയ്‌തു. ഇറാന്റെ ആണവകേന്ദ്രങ്ങൾ തങ്ങളുടെ മിസ്സൈലുകൾക്ക് അപ്രാപ്യമല്ലെന്ന് തെളിയിക്കുകയായിരുന്നു ഇസ്രയേലിന്റെ ലക്ഷ്യമെന്ന് യുദ്ധതന്ത്രജ്ഞർ വിലയിരുത്തുന്നു. അതുകൊണ്ടുതന്നെ വരാനിരിക്കുന്ന തിരിച്ചടി ലോകജനതയിൽ  കൂടുതൽ ആശങ്കയുണർത്തുന്നത് തന്നെയാകും.