ആന്റണി കെ. പൗലോസ്: സ്‌പെഷ്യൽ റിപ്പോർട്ട്

യുകെയിലെ എൻഎച്ച്എസിൽ നഴ്‌സുമാർക്ക് മാത്രമല്ല അവസരം…  നിങ്ങൾക്ക് എൻഎച്ച്എസിൽ അഡ്മിനിസ്ട്രേറ്ററോ അക്കൗണ്ടന്റോ മാനേജരോ ആകണോ..? 

അല്ലെങ്കിൽ ഏതെങ്കിലും സ്വകാര്യസ്ഥാപനങ്ങളിൽ ബിസിനസ്സ് അഡ്മിനിസ്ട്രേറ്ററോ ചാർട്ടേർഡ് അക്കൗണ്ടന്റോ ആകണോ?

യുകെ യൂണിവേഴ്‌സിറ്റികളിൽ ലോയും എംബിഎയും സിഎയും ജേർണലിസവുമൊക്കെ പഠിച്ച് അവിടെത്തന്നെ ജോലി കണ്ടെത്തി സെറ്റിൽ ചെയ്യണോ? 

എങ്കിൽ എത്രയും വേഗം താഴെക്കാണുന്ന വിലാസത്തിൽ ഞങ്ങളെ ബന്ധപ്പെടുക:

കഴിഞ്ഞ ഒന്നുരണ്ട് മാസങ്ങളായി ഫെയ്‌സ്ബുക്കും യുട്യൂബും ഇൻസ്റ്റഗ്രാമും പോലുള്ള സോഷ്യൽ മീഡിയ പ്ലാറ്റ്‌ഫോമുകളിൽ നിറഞ്ഞുനിൽക്കുന്ന ചില പരസ്യങ്ങൾ ഈവിധമാണ്.

ഇതിന് വിശ്വാസ്യത വരുത്താൻ ഈ കാറ്റഗറികളിലെ യുകെയിലെ ജോലി ഒഴിവുകളുടെ നൂറുകണക്കിന് പരസ്യങ്ങൾ അവർ തെളിവായി കാണിച്ചുതരും. അവിടെയെല്ലാം നിങ്ങൾക്ക് അപേക്ഷിക്കാം എന്ന് പറയും.  പോരാത്തതിന് ഈ വിധത്തിൽ  യുകെയിലെ വിവിധ സ്ഥാപനങ്ങളിൽ ജോലിനേടിയ ചിലരേയും വിശ്വാസ്യതയ്ക്കായി അവതരിപ്പിക്കും. 

എന്നാൽ തിരിച്ചറിയുക.. ഈ പരസ്യങ്ങൾ പൂർണ്ണമായും വ്യാജമാണ്… തട്ടിപ്പാണ്… അബദ്ധജഢിലമാണ്. ഈ പരസ്യങ്ങളിൽ വിശ്വസിച്ച് ബന്ധപ്പെട്ട പലർക്കും ലക്ഷക്കണക്കിന് രൂപ നഷ്ടപ്പെട്ടുകഴിഞ്ഞു! 

അതുപോലെ ലക്ഷക്കണക്കിന് രൂപ മുടക്കി യുകെയിൽ ജോലിയും സെന്റിൽമെന്റും പ്രതീക്ഷിച്ച് എംബിഎയും ജേർണലിസവും നിയമവുമൊക്കെ പഠിക്കാനെത്തിയ വിദ്യാർത്ഥികളും വഞ്ചിതരായി.  വിജയകരമായി കോഴ്സ് പാസാകുന്ന അവരിൽ ചിലർക്ക് നിലവിലെ രണ്ടു വർഷത്തെ പോസ്റ്റ് സ്റ്റഡി വർക്ക് പെർമിറ്റ് പ്രകാരം മാത്രം വർക്ക് ചെയ്യാം.  അതിനുശേഷം നാട്ടിലേക്ക്  തിരിച്ചുപോകേണ്ടി തന്നെ വരും.

എന്താണ് യുകെയിലെ തൊഴിൽ - പഠന വിസകളിലെ സാധ്യതകളും യാഥാർത്ഥ്യവും?

യുകെയിലെ നിലവിലെ നിയമമനുസരിച്ച്, രാജ്യത്ത് ജോലിക്കാരെ ലഭ്യമല്ലാത്തതും മൈഗ്രെഷൻ അഡ്‌വൈസറി കമ്മിറ്റി കമ്മിറ്റി ഷോർട്ടേജ് ഒക്കപ്പേഷൻ ലിസ്റ്റിൽ ഉൾപ്പെടുത്തിയിട്ടുള്ളതുമായ തൊഴിൽ കാറ്റഗറികളിലേക്ക് മാത്രമേ, മലയാളികളും ഇന്ത്യക്കാരും അടക്കമുള്ള വിദേശികൾക്ക് അപേക്ഷിക്കാൻ കഴിയൂ. ഈ അടിസ്ഥാന നിയമം യുകെ ജോലി അന്വേഷിക്കുന്ന വിദേശിയായ  ഏതൊരാളും ഏറ്റവും ആദ്യം അറിഞ്ഞിരിക്കേണ്ട വസ്‌തുതയാണ്‌.

നഴ്‌സുമാർ, ഡോക്ടർമാർ, കെയറർമാർ, ഫിസിയോ തെറാപ്പിസ്റ്റുകൾ, ഫാർമസിസ്റ്റുകൾ, മാത്‍സ് അടക്കം ചില വിഷയങ്ങളിലെ അധ്യാപകർ, ഐടി എൻജിനീയർമാർ, മറ്റുചില എൻജിനീയറിങ് കാറ്റഗറികൾ, ഗ്രാഫിക് ഡിസൈനർമാർ, ആനിമേറ്റർമാർ തുടങ്ങിയ കാറ്റഗറികളിലുള്ള വിദേശികൾക്ക് മാത്രമേ നിലവിൽ യുകെ ജോലിക്കായി അപേക്ഷിക്കാൻ കഴിയൂ. നിലവിലെ സ്‌കിൽഡ് വർക്കർ വിസ അഥവാ ടൈയെർ ടു വിസ റൂട്ടിലൂടെ അപേക്ഷിക്കാൻ കഴിയൂ.

ഈ തൊഴിൽ തസ്തികകളുടെ കോഴ്‌സുകളിൽ യുകെയിൽ പഠിക്കുന്ന വിദേശ വിദ്യാർത്ഥികൾക്ക് മാത്രമേ, പഠനശേഷം യുകെയിൽ സ്ഥിരജോലി ജോലി ലഭിക്കുകയും അഞ്ചുവർഷത്തിനു ശേഷം സെറ്റിൽമെന്റിനായി അപേക്ഷിക്കാനും കഴിയൂ. 

നിലവിൽ ഏതുവിഷയത്തിലും അംഗീകൃത യുകെ യൂണിവേഴ്‌സിറ്റികളിൽ നിന്നും  ഗ്രാഡ്വേഷൻ വിജയകരമായി പൂർത്തിയാക്കുന്ന വിദ്യാർത്ഥികൾക്ക് രണ്ടുവർഷം വരെയും പോസ്റ്റ് ഗ്രാഡ്വേഷൻ, പിഎച്ച്ഡി വിദ്യാർത്ഥികൾക്ക് മൂന്നുവർഷം വരേയും യുകെയിൽ ഏത് തസ്തികകളിലും ജോലിചെയ്യാം.

എന്നാൽ അവർക്ക് അതിനുശേഷം സ്ഥിര നിയമനം   ലഭിക്കണമെങ്കിൽ ഷോർട്ടേജ് ഒക്കപ്പേഷൻ ലിസ്റ്റിലുള്ള തൊഴിൽ തസ്‌തികകൾ ആയിരിക്കണം പഠനവിഷയം.  

യുകെബിഎയുടെ വെബ്‌സൈറ്റിൽ നിലവിൽ ഷോർട്ടേജ് ഒക്കപ്പേഷൻ ലിസ്റ്റിൽ ഉൾപ്പെടുത്തിയിട്ടുള്ള ജോബ് തസ്‌തികകൾ ഏതൊക്കെയെന്ന് വ്യക്തമാക്കി നൽകിയിട്ടുണ്ട്. തൊഴിൽ - പഠന വിസയ്ക്കായി പണം മുടക്കുകയും  അപേക്ഷിക്കുകയും ചെയ്യുന്നതിനുമുമ്പ് അത് വിശദമായി പരിശോധിക്കുക.

നിലവിൽ യുകെയിൽ സ്ഥിരജോലിയിലുള്ള നഴ്‌സുമാർ, ഇതര സ്‌കിൽഡ് വർക്കർമാർ എന്നിവരുടെ ജീവിത പങ്കാളികൾക്ക് ഡിപെൻഡന്റ് വിസയിലെത്തി അനുവദനീയമായ ജോലികളെല്ലാം ചെയ്യുവാൻ കഴിയും. എന്നാൽ വിദ്യാർത്ഥികളുടേയും കെയറർമാരുടേയും ഡിപെൻഡന്റ് വിസകൾ സർക്കാർ ഇപ്പോൾ നിർത്തലാക്കിയിട്ടുണ്ട്.

അതുപോലെ യുകെയിലേക്ക് എളുപ്പത്തിൽ കുടിയേറാനുള്ള മറ്റൊരു വിസ മാർഗമായിരുന്നു ഗോൾഡൻ വിസ. 2 മില്യൺ ബ്രിട്ടീഷ് പൗണ്ട് അഥവാ രണ്ടുകോടി രൂപയിലേറെ നിക്ഷേപിക്കാൻ കഴിയുന്നവർക്ക് യുകെയിൽ ബിസിനസ്സ് സംരംഭങ്ങൾ തുടങ്ങാനും അഞ്ചുവർഷത്തിനുശേഷം സെറ്റിൽമെന്റിനും  അനുവദിക്കുന്നതായിരുന്നു ഈ വിസ റൂട്ട്.

എന്നാൽ ഗോൾഡൻ വിസ അഥവാ ഇൻവെസ്റ്റർ വിസ എന്നറിയപ്പെട്ടിരുന്ന ടൈയെർ 1 വിസറൂട്ട് 2022 ഫെബ്രുവരി മുതൽ സർക്കാർ നിർത്തലാക്കി.

എങ്കിലും ഗോൾഡൻ വിസയിൽ നിലവിലുള്ളവർക്ക് ഗ്ലോബൽ ടാലന്റ് വിസ, ഇന്നൊവേറ്റർ വിസ എന്നീ കാറ്റഗറികളിലേക്ക് മാറാനുള്ള അനുവാദം യോഗ്യതയുടെ അടിസ്ഥാനത്തിൽ സർക്കാർ അനുവദിക്കുന്നു.

അതിനാൽ യുകെയിലേക്ക് വരാൻ ആഗ്രഹിക്കുന്ന തൊഴിൽ അന്വേഷകരും വിദ്യാർത്ഥികളും പരസ്യങ്ങൾ കണ്ട് എടുത്തുചാടി പണവും മറ്റും നഷ്ടപ്പെടുത്താതെ, ഈ യാഥാർത്ഥ്യങ്ങൾ സഗൗരവം മനസ്സിലാക്കി, ആവശ്യമെങ്കിൽ ഏതെങ്കിലും വിശ്വസ്‌തരായ ഇമ്മിഗ്രേഷൻ കൺസൾട്ടന്റുമാരുടെയും സോളിസിറ്റർമാരുടെയും ഉപദേശങ്ങൾ അനുസരിച്ചുമാത്രം പ്രവർത്തിക്കുക.