ലണ്ടൻ: സ്വന്തം ലേഖകൻ

യുകെയിൽ അംഗീകൃത തൊഴിൽ വിസകൾ ഇല്ലാത്ത അനവധിപ്പേർ യൂബർ ഈറ്റ്‌സ്, ഡെലിവറൂ, ജസ്റ്റ് ഈറ്റ് തുടങ്ങിയ ഭക്ഷ്യ - സാധന ഡെലിവറി കമ്പനികളിൽ ജോലിചെയ്യുന്നുണ്ടെന്ന് ഹോം ഓഫീസ്. ഇവരുടെ താമസ സ്ഥലങ്ങളിൽ നടത്തിയ റെയ്‌ഡിൽ മുപ്പതോളം പേരെ അറസ്റ്റുചെയ്തതായും ഇമിഗ്രേഷൻ ഉദ്യോഗസ്ഥർ അറിയിച്ചു.

അംഗീകൃത വിസയില്ലാത്ത മലയാളികൾ ഉൾപ്പടെ നിരവധിപ്പേർ ഈ കമ്പനികളിൽ ജോലിചെയ്യുന്നു. അധികം നിബന്ധനകൾ ഇല്ലാതെ വളരെയെളുപ്പം ജോലി ലഭിക്കുകയും താമസസ്ഥലം ഉൾപ്പടെ കിട്ടുകയും ചെയ്യും   എന്നതാണ് ഈ കമ്പനികളുടെ ആകർഷണീയത.

ഡെലിവറൂ, ഊബർ ഈറ്റ്‌സ് തുടങ്ങിയ വൻകിട കമ്പനികളിൽ ജോലിചെയ്യുന്ന 30 ഓളം ബ്രസീലിയൻ ഡെലിവറി റൈഡർമാരെ കഴിഞ്ഞദിവസം നടന്ന റെയ്‌ഡിൽ പിടികൂടിയിരുന്നു. ബ്രിസ്റ്റോളിൻ്റെ മധ്യഭാഗത്തുള്ള തിരക്കൊഴിഞ്ഞ റോഡരുകിൽ നിരനിരയായി നിർത്തിയിട്ടിരുന്ന  പഴകി ജീർണിച്ച കാരവാനുകളിലാണ് ഈ തൊഴിലാളികളെ താമസിപ്പിച്ചിരുന്നത്

അതേസമയം, മിനിമം കൂലിയിൽ താഴെയാണ് ഈ ജോലിയിലൂടെ സമ്പാദിക്കുന്നതെന്നും ആ വരുമാനംകൊണ്ട് അംഗീകൃത വിസയുണ്ടെങ്കിൽ പോലും നഗരത്തിൽ വാടകയ്ക്ക് വീടെടുത്ത് താമസിക്കാൻ കഴിയില്ലെന്നും ഇമിഗ്രേഷൻ എൻഫോഴ്‌സ്‌മെൻ്റ് ഓഫീസർമാർ റെയ്ഡ് ചെയ്ത കാരവൻ ക്യാമ്പ്‌മെൻ്റിൽ താമസിക്കുന്ന കുടിയേറ്റ തൊഴിലാളികൾ ആരോപിച്ചു.

ഒക്ടോബർ 3 ന് ഇവരുടെ റോഡരികിലെ കാരവൻ ക്യാമ്പ് ഇമിഗ്രേഷൻ എൻഫോഴ്സ്മെൻ്റ് ഓഫീസർമാർ റെയ്ഡ് ചെയ്തു, 17 പേരെ അറസ്റ്റ് ചെയ്യുകയും 13 പേരെ ലണ്ടനിലെ ഡിറ്റെൻഷൻ സെന്ററുകളിലേക്ക് കൊണ്ടുപോകുകയും ചെയ്തു. അവരിൽ ചിലർ വർഷങ്ങളായി വിസയില്ലാതെ രാജ്യത്ത് താമസിക്കുന്നവരാണെന്നും തെളിഞ്ഞു. അത്തരക്കാരെ വളരെവേഗം യുകെയിൽ നിന്നും നീക്കം ചെയ്യും. 

20 ഓളം ഇമിഗ്രേഷൻ എൻഫോഴ്‌സ്‌മെൻ്റ് ഓഫീസർമാരും പോലീസ് ഓഫീസർമാരും അർദ്ധരാത്രി ക്യാമ്പ്‌മെൻ്റിലേക്ക് ഇടിച്ചുകയറിയതായി ഡെലിവറൂ , യൂബർ ഈറ്റ്‌സ് എന്നിവയിൽ ജോലിചെയ്യുന്ന സ്ത്രീകൾ അടക്കമുള്ളവർ പറഞ്ഞു. പുലർച്ചെ 4 മണിക്ക് അവർ എത്തി, വാതിലിൽ ശക്തമായി മുട്ടുകയും കാരവൻ വാതിലുകൾ തുറക്കാൻ ആക്രോശിക്കുകയും ചെയ്തു - ഞങ്ങളിൽ പലരും ഭയന്ന് അലറിവിളിച്ചു. ഉദ്യോഗസ്ഥർ മൃഗങ്ങളെപ്പോലെ ഞങ്ങളോട് പെരുമാറിയെന്നും പിടിയിലായവർ ആരോപിക്കുന്നു. 

നിയമവിരുദ്ധമായി ജോലിചെയ്യുന്ന അനധികൃത ലേബർമാരെ  ഡിറ്റെൻഷൻ സെന്ററുകളിൽ തടങ്കലിൽ വയ്ക്കുകയും വേഗത്തിൽ നീക്കം ചെയ്യുകയും നാടുകടത്തൽ വേഗത്തിലാക്കുമെന്നും നയമായി ലേബർ പാർട്ടി പ്രഖ്യാപിച്ചിരുന്നു.

"അനധികൃത ജോലിയും നിയമവിരുദ്ധ തൊഴിലാളികളെ ചൂഷണം ചെയ്യുന്ന കമ്പനികൾക്കെതിരെയും കർശന  നടപടിയെടുക്കാൻ  ഞങ്ങൾ തീരുമാനിച്ചിരിക്കുന്നു." ബ്രിസ്റ്റോളിലെ റെയ്ഡിന് അതിർത്തി സുരക്ഷാ, റെഫ്യൂജി  മന്ത്രി ആഞ്ചെല ഈഗിൾ റെയ്‌ഡിന് പിന്തുണ നൽകി. 

സാധുവായ വിസയോ മറ്റ് തരത്തിലുള്ള ഇമിഗ്രേഷൻ ഡോക്യുമെൻ്റേഷനുകളോ ഇല്ലാത്ത 800,000 നും 12 ലക്ഷത്തിനും ഇടയിൽ രേഖകളില്ലാത്ത കുടിയേറ്റക്കാർ യുകെയിലുണ്ടെന്ന് കണക്കാക്കപ്പെടുന്നു. ഇവരിൽ ഒരുലക്ഷത്തിലേറെപ്പേർ ഇന്ത്യക്കാരാണെന്നാണ് യുകെ ഹോം ഓഫീസിന്റെ വാദം.  

എന്നാൽ ഇന്ത്യൻ സർക്കാർ ഇക്കാര്യം അംഗീകരിക്കുന്നില്ല. അതുകൊണ്ടുതന്നെ രേഖകൾ ഇല്ലാത്തവരെ തിരികെ കൊണ്ടുപോകാൻ കഴിയില്ലെന്നും ഇന്ത്യൻ സർക്കാർ വ്യക്തമാക്കിയിട്ടുണ്ട്.

ഇന്ത്യ ഇവരെ തിരികെ സ്വീകരിച്ചില്ലെങ്കിൽ, ഇന്ത്യക്കാർക്ക് വിസകൾ നൽകുന്നതുതന്നെ നിർത്തലാക്കണമെന്ന് ആവശ്യപ്പെട്ട റോബർട്ട് ജെൻറിക്ക് ആണ്  അടുത്ത കൺസർവേറ്റീവ് പാർട്ടി നേതാവാകാൻ മത്സരിക്കുന്ന അവസാന രണ്ടുപേരിൽ ഒരാളെന്നതും, ഭാവിയിൽ, ടോറികൾ അധികാരത്തിൽ വന്നാലും ഇന്ത്യയുമായുള്ള സുഗമമായ നയതന്ത്രബന്ധം തടസ്സപ്പെടുമോയെന്ന സംശയവും ഉയർത്തുന്നു.