ലണ്ടൻ: സ്വന്തം ലേഖകൻ

കോവിഡിനും ഡോക്ടർമാരുടെ സമരങ്ങൾക്കും ശേഷം  മറ്റൊരു കടുത്ത പ്രതിസന്ധിയിലേക്ക് നീങ്ങുകയാണ് യുകെയിലെ എൻഎച്ച്എസ് ആശുപത്രികളും ആരോഗ്യ പരിപാലന കേന്ദ്രങ്ങളും. രാജ്യത്തെ ഏതാണ്ട് എല്ലാസ്ഥലങ്ങളിലും ഒരേപോലെ നേരിടുന്ന ഡെന്റിസ്റ്റുകളുടെ കടുത്ത ക്ഷാമം ആണ് പുതിയ പ്രതിസന്ധി. 

ദന്ത ഡോക്ടർമാരെ കാണാൻ നാലുവർഷം വരെ കാത്തിരിക്കേണ്ട ഗതികേടിലാണ് യുകെയുടെ ചില ഭാഗങ്ങളിലുള്ള രോഗികൾ. അതായത് പല്ലുവേദന മാറ്റാൻ എൻഎച്ച്എസിൽ പോയി പല്ലുപറിക്കാൻ കാത്തിരുന്നാൽ പല്ല് തനിയെ കൊഴിഞ്ഞാലും ഡോക്ടറെ കാണാനാകില്ലെന്ന് ചുരുക്കം!

വിവരാവകാശ നിയമപ്രകാരം ഒരു ദേശീയ മാധ്യമം നടത്തിയ അന്വേഷണത്തിൽ ലഭിച്ച കണക്കുകൾ, ഡെവണിലെയും കോൺവാളിലെയും ആളുകൾ ഒരു ദന്തരോഗവിദഗ്ദ്ധൻ്റെ അടുത്ത് രജിസ്റ്റർ ചെയ്യാൻ പോലും ശരാശരി 1,441 ദിവസം കാത്തിരിക്കുന്നുവെന്ന് കാണിക്കുന്നു.

അതേ പ്രദേശത്തെ കുട്ടികളുടെ ദന്ത ചികിത്സയ്ക്കായി ആളുകൾ  മൂന്ന് വർഷവും എട്ട് മാസവും കാത്തിരിക്കുന്നുവെന്നും വിവരാവകാശ വെളിപ്പെടുത്തലുകൾ  വ്യക്തമാക്കുന്നു.

“നിർഭാഗ്യവശാൽ ഈ ഞെട്ടിക്കുന്ന കണക്കുകൾ രാജ്യത്തുടനീളം കാണുന്നത് ആവർത്തിക്കുന്നു. യുകെ ദന്തചികിത്സ കടുത്ത പ്രതിസന്ധിയിലാണെന്ന്  ഇത് വ്യക്തമാക്കുന്നു.” അസോസിയേഷൻ ഓഫ് ഡെൻ്റൽ ഗ്രൂപ്പിൻ്റെ ചെയർമാൻ നീൽ കാർമൈക്കൽ പറഞ്ഞു.

എൻഎച്ച്എസ് ദന്തപരിചരണത്തിൽ ചികിത്സയ്ക്കായി എത്തിയ 97 ശതമാനം ആളുകൾക്കും ഡോക്ടറെ കാണാതെ മടങ്ങേണ്ടിവന്നുവെന്നും കനാഷണൽ സ്റ്റാറ്റിസ്റ്റിക്സ് എക്‌സ്പീരിയൻസ് ഓഫീസിൽ നിന്നുള്ള കണക്കുകളും തെളിയിക്കുന്നു. 

എൻഎച്ച്എസിൽ ദന്തചികിത്സയ്ക്കായി എത്തിയവരിൽ, ദന്തഡോക്ടർ ഇല്ലാത്തതിനാൽ, 33.5 ശതമാനം പേർക്ക് ചികിത്സ നിഷേധിക്കപ്പെട്ടു. രോഗികളിൽ 21.3 ശതമാനം പേർ യഥാസമയം പല്ലുപറിക്കൽ ഉൾപ്പടെ നടത്താത്തതിനാൽ ഇപ്പോഴും വേദനതിന്നു കഴിയുകയാണ്.

എൻഎച്ച്എസ് ഡെന്റിസ്റ്റിനെ കാണാൻ എത്തിയവരുടെ ബുദ്ധിമുട്ടുകളുടെ കൗതുകകരമായ  നിരവധി വാർത്തകൾ സോഷ്യൽ മീഡിയകളിലൂടെ പ്രചരിക്കുന്നു. 7 വർഷംവരെ ചികിത്സയ്ക്കായി കാത്തിരുന്നുവെന്നും ഒടുവിൽ പല്ലുകളെല്ലാം തനിയെ കൊഴിഞ്ഞുവെന്നും ഒരാൾ പോസ്റ്റിട്ടു.

വാറിംഗ്ടണിലെ ഒരു എൻഎച്ച്എസ് ദന്തഡോക്ടറുടെ അടുത്ത് അപ്പോയിന്റ്മെന്റ്  നേടുന്നതിനായി 100-ലധികം ആളുകൾ പുലർച്ചെ 2.30 ന് തന്നെ ക്യൂവിൽ നിന്നതായി റിപ്പോർട്ടുകളുണ്ട്.

ഫെബ്രുവരിയിൽ ബ്രിസ്റ്റോളിൽ ഡെന്റിസ്റ് കേന്ദ്രത്തിലെ രോഗികളുടെ തിരക്ക് പോലീസ് ഇടപെട്ടാണ് നിയന്ത്രിച്ചത്. വെസ്റ്റ്ബ്രൂക്കിലെ മൈ ഡെന്റിസ്റ് സെന്ററിന് പുറത്ത് മണിക്കൂറുകളോളം കാത്തുനിന്ന രോഗികൾ ഒടുവിൽ വീടുകളിൽ നിന്നും കസേരകൾ കൂടി കൊണ്ടുവന്നാണ്  ഇരിപ്പുറപ്പിച്ചത്.

ദന്ത ഡോക്ടർമാരുടെ എണ്ണം കൂട്ടുകയും ഡെന്റിസ്റ് സെന്ററുകൾ കൂടുതൽ ആധുനിക വത്കരിക്കുകയുമാണ് ഇതിനുള്ള പരിഹാരമെന്നും വിദഗ്ദ്ധർ  ചൂണ്ടിക്കാണിക്കുന്നു. അതിനായി ഇന്ത്യ അടക്കമുള്ള വിദേശ രാജ്യങ്ങളിൽ നിന്ന് ഡെന്റിസ്റ്റുകളെ വ്യാപകമായി റിക്രൂട്ടുചെയ്യണം. 

എന്നാൽ അത്തരം നടപടികൾക്ക് ലേബർ സർക്കാരും ഇതുവരെ പച്ചക്കൊടി കാട്ടുകയോ പദ്ധതികൾക്കുള്ള ഫണ്ട് അനുവദിക്കുകയോ ചെയ്തിട്ടില്ലെന്നത്, എൻഎച്ച്എസിന്റെ പല്ലുവേദന ഉടനൊന്നും മാറില്ലെന്ന ദുസ്സൂചനയാണ് നൽകുന്നത്.