വരത്തനും ഭീഷ്മപര്‍വ്വവും പിന്നെ റിലീസിനൊരുങ്ങുന്ന ബൊഗെയ്ന്‍ വില്ല. അമല്‍ നീരദ് സംവിധാനം ചെയ്ത മൂന്ന് സിനിമകളില്‍ തുടര്‍ച്ചയായി അഭിനയിക്കാനായതിന്റെ ആഹ്ലാദത്തിലാണ് നിസ്താര്‍. ബൊഗെയ്ന്‍ വില്ലയുടെ ചിത്രീകരണം നടക്കുന്നതിനിടയില്‍ സെറ്റിലാരോടോ നിസ്താറിനെ ചൂണ്ടിക്കാട്ടി അമല്‍ നീരദ് പറഞ്ഞു: 'എന്റെ അടുത്തടുത്ത മൂന്ന് സിനിമകളില്‍ വര്‍ക്ക് ചെയ്ത ഒറ്റ ആര്‍ട്ടിസ്റ്റേയുള്ളൂ മലയാളത്തിന്‍, അയാളാണ് ദേ നില്‍ക്കുന്നത്. ' ബൊഗെയ്ന്‍ വില്ലയില്‍ ചെറുതെങ്കിലും ശ്രദ്ധിക്കപ്പെടുന്ന ഒരു കഥാപാത്രമായിരിക്കും തന്റേതെന്ന് നിസ്താര്‍ പറയുന്നു. രണ്ടേ രണ്ട് വാക്കുകളിലാണ് നിസ്താറിനോട് ബോഗെയ്ന്‍ വില്ലയിലെ കഥാപാത്രത്തെക്കുറിച്ച് അമല്‍ നീരദ് വിശദീകരിച്ചത്.
ഒരു ദിവസം ഉച്ച കഴിഞ്ഞ നേരത്താണ് നിസ്താറിന് അമല്‍ നീരദിന്റെ ഫോണ്‍ വന്നത്. 'നമ്മുടെ അടുത്ത പ്രോജക്ടില്‍ നിസ്താറിക്ക ഒരു ക്യാരക്ടര്‍ ചെയ്യണം. അത് വന്ന് ചെയ്‌തേ പറ്റൂ'. 'ചെയ്യാം അതിന് വേറെ ബുദ്ധിമുട്ടൊന്നുമി'ല്ലെന്ന് നിസ്താര്‍ പറഞ്ഞപ്പോള്‍ 'അല്ല ക്യാരക്ടര്‍ അറിയണ്ടേ 'യെന്നായി അമലിന്റെ ചോദ്യം. 'ആവശ്യമുണ്ടെങ്കിലല്ലേ എന്നെ വിളിക്കൂ. അല്ലെങ്കില്‍ വിളിക്കില്ലല്ലോ'യെന്നായിരുന്നു അമലിന്റെ ചോദ്യത്തിനുള്ള നിസ്താറിന്റെ മറുപടി.
'ക്രൂരനായ ഒരു ഫ്യൂഡല്‍ മാടമ്പി' ഒറ്റ വാചകത്തില്‍ അമല്‍ കഥാപാത്രത്തെക്കുറിച്ച് പറഞ്ഞു. അങ്ങോട്ടും ഇങ്ങോട്ടും അര്‍ഹിക്കുന്ന ബഹുമാനം കൊടുക്കുന്ന വല്ലാത്തൊരു സൗഹൃദമാണ് താനും അമലും തമ്മിലെന്ന് നിസ്താര്‍ പറയുന്നു. വരത്തനിലൂടെയാണ് നിസ്താര്‍ അമലിന്റെ ക്യാംപിലെത്തുന്നത്. രചയിതാക്കളായ സുഹാസും ഷറഫുവുമാണ് അമലിനോട് നിസ്താറിനെപ്പറ്റി പറയുന്നത്. തനിക്ക് ആ കക്ഷിയെ അറിയില്ലല്ലോയെന്ന് അമല്‍ പറഞ്ഞപ്പോള്‍ സുഹാസും ഷറഫുവും ഒഴിവ് ദിവസത്തെ കളിയും കാര്‍ബണിലെ ഒരു സീനും പെന്‍ഡ്രൈവില്‍ കോപ്പി ചെയ്ത് അമലിനെ കാണിച്ചു. രണ്ടും കണ്ട അമല്‍ ഇയാള്‍ തന്നെ മതിയെന്നുറപ്പിക്കുകയും ചെയ്തു.
വരത്തന്‍ റിലീസായതിന്റെ പിറ്റേന്ന് നിസ്താറിനെ അമല്‍ വിളിച്ചു. 'സിനിമയ്ക്ക് നല്ല അഭിപ്രായമുണ്ട്. നിസ്താറിക്കയുടെ ക്യാരക്ടറിനും 'എന്റെ അച്ഛനും (അന്തരിച്ച എഴുത്തുകാരനും അദ്ധ്യാപകനുമായ സി. ആര്‍. ഓമനക്കുട്ടന്‍) ആ റോള്‍ ചെയ്തത് പുതിയ ആളാണല്ലേ നന്നായി ചെയ്തിട്ടു'ണ്ടെന്ന് പറഞ്ഞു ഭീഷ്മ പര്‍വ്വത്തിന്റെ ടീസര്‍ റിലീസ് ചെയ്യുന്ന ദിവസവും നിസ്താറിനെ അമല്‍ വിളിച്ചു 'ഒന്ന് കാണണേ' അന്ന് ആ ടീസര്‍ കണ്ടതിന്റെ ഞെട്ടലും എക്‌സൈറ്റ്‌മെന്റും ഇന്നും മാറിയിട്ടില്ലെന്ന് നിസ്താര്‍ പറയുന്നു.
'കണ്ണിലെ ചിരിയും, ചിരിയിലെ ക്രൗര്യവും'. ഇക്കഴിഞ്ഞ ഓണക്കാലത്ത് തിയേറ്ററുകളില്‍ ഇടിമുഴക്കം സൃഷ്ടിച്ച ടൊവിനോ തോമസിന്റെ ത്രീഡി ചിത്രം അജയന്റെ രണ്ടാം മോഷണ (ARM) ത്തിലെ നിസ്താര്‍ അവതരിപ്പിച്ച ചാത്തൂട്ടി നമ്പ്യാര്‍ എന്ന വില്ലനെ കണ്ട് സഹൃദയനായ പ്രേക്ഷകരിലൊരാള്‍ ഫേസ്ബുക്കില്‍ ഇങ്ങനെ കുറിച്ചു :' ആ ചിരിയില്‍ നിറയുന്ന ക്രൗര്യം ഗംഭീരമാക്കിയിട്ടുണ്ട്. നമ്പ്യാരുടെ കണ്ണിലെ ചിരി കുറച്ചധികം നാള്‍ പിന്തുടരും'. ചാത്തുട്ടി നമ്പ്യാര്‍ അപകടം പിടിച്ചൊരു കഥാപാത്രമായിരുന്നുവെന്ന് നിസ്താര്‍ പറയുന്നു. 'ആ പേരില്‍ത്തന്നെ അയാളുടെ മാടമ്പിത്തരവും ധാര്‍ഷ്ട്യവുമുണ്ട് പക്ഷേ പ്രേക്ഷകന് അങ്ങനെ ആദ്യമേ തോന്നാനും പാടില്ല. മകളോടുള്ള അമിത വാത്സല്യവും പണ്ട് ഒരു കീഴാളനില്‍ നിന്ന് മേലാളനായ തനിക്ക് പന്തം കൊണ്ട് മുഖത്ത് (അഭിമാനത്തിനും) ഏറ്റ അടിയുടെ പകയും മാടമ്പിയെന്ന ധാര്‍ഷ്ട്യവുമൊക്കെ ചേര്‍ന്ന് സങ്കീര്‍ണ്ണതകളേറെയുള്ള കഥാപാത്രമാണ് ചാത്തുട്ടി നമ്പ്യാര്‍ സ്‌ക്രിപ്ട് വായിക്കാതെയാണ് ഞാന്‍ അഭിനയിച്ചത്.
ഓരോ സീനും എടുക്കും മുന്‍പ് അതിന്റെ മുന്‍പും പിന്‍പും എന്താണ് സംഭവിക്കുകയെന്നും സീനിന്റെ മൂഡുമൊക്കെ സംവിധായകന്‍ ജിതിന്‍ ലാലിനോടും തിരക്കഥാകൃത്ത് സുജിത്ത് നസ്യാരോടും ചോദിച്ച് മനസ്സിലാക്കുമായിരുന്നു. നമ്പ്യാരുടെ ഉളളിലെ പൊട്ടിത്തെറി പുറത്തേക്ക് വരാതെ ഉള്ളില്‍ തന്നെ ഒതുക്കി നിറുത്തി പെര്‍ഫോം ചെയ്യാനാണ് ശ്രമിച്ചത്.
സൗബിന്‍ ഷാഹിര്‍ നായകനാകുന്ന ആബേലാണ് നിസ്താര്‍ അഭിനയിച്ച് പൂര്‍ത്തിയാക്കിയ ചിത്രം. നവാഗതനായ അനീഷ് ജോസ് മൂത്തേടന്‍ സംവിധാനം ചെയ്യുന്ന ചിത്രത്തില്‍ സൗബിന്റെ അച്ഛനായി മുഴുനീള വേഷമാണ് നിസ്താറിന് 'സ്‌നേഹവാത്സല്യങ്ങളും കാര്‍ക്കശ്യവും അല്‍പം പിശുക്കുമൊക്കെയുള്ള ഒരച്ഛന്‍'. സുരേഷ് ഗോപി നായകനായുന്ന ജാനകി വേഴ്‌സസ് സ്റ്റേറ്റ് ഒഫ് കേരള (JSK) യാണ് നിസ്താര്‍ അഭിനയിച്ച് പൂര്‍ത്തിയാക്കിയ മറ്റൊരു ചിത്രം നവാഗതനായ പ്രവീണ്‍ നാരായണനാണ് സംവിധായകന്‍. മലയാളത്തിലും ഇതര ഭാഷകളിലുമായി ചില വെബ് സീരീസുകളിലും നിസ്താര്‍ വേഷമിടുന്നുണ്ട്. 'ടൈപ്പ് കാസ്റ്റ് ചെയ്യപ്പെടുമെന്ന പേടി കാരണം വളരെ സൂക്ഷിച്ചേ കഥാപാത്രങ്ങള്‍ തെരഞ്ഞെടുക്കുന്നുള്ളൂവെന്ന തീരുമാനത്തിലാണ് നിസ്താര്‍.
More Latest News
സ്ത്രീകള്‍ തമ്മില്‍ നടന്ന വഴക്കും വാക്കേറ്റം, പിടിച്ചു മാറ്റാന്‍ ചെന്ന വ്യക്തിക്ക് വെട്ടേറ്റു, സംഭവം എറണാകുളം പറവൂര്‍ പുത്തന്‍വേലിക്കരയില്‍
മൊബൈല്‍ ഉപയോഗിച്ചാല്‍, ഉറക്കം വരികയോ കോട്ടുവാ ഇടുകയോ കണ്ണടഞ്ഞു പോവുകയോ ചെയ്താല്‍ ഉടന്‍ ബസില്‍ അപായമണി ഉയരും;പുത്തന്‍ വിദ്യയുമായി കെഎസ്ആര്‍ടിസി
ബോംബ് ഭീഷണി: എയര്‍ ഇന്ത്യയുടെ ഡല്‍ഹി ചിക്കാഗോ വിമാനം കാനഡയിലെ ഇഖാലൂട് വിമാനത്താവളത്തില്‍ ഇറക്കി, യാത്രക്കാരെ വിമാനത്താവളത്തിലേക്ക് മാറ്റിയെന്നും എയര്‍ ഇന്ത്യ
ബൈക്ക് യാത്രക്കാരനെ ഇടിച്ച ശേഷം കാര്‍ നിര്‍ത്താതെ പോയ സംഭവം: നടന്‍ ശ്രീനാഥ് ഭാസിയുടെ ഡ്രൈവിങ് ലൈസന്‍സ് ആര്‍ടിഒ സസ്പെന്ഡ് ചെയ്തു
സ്വകാര്യതാ നയങ്ങള്‍ ലംഘിച്ചു: ഒരു മാസത്തിനുള്ളില്‍ വാട്ട്‌സ്ആപ്പ് നിരോധിച്ചത് എട്ട് ദശലക്ഷത്തിലധികം ഇന്ത്യന്‍ അക്കൗണ്ടുകള്‍!!!
Most Read
British Pathram Recommends
