യൂട്യൂബ് വ്ലോഗറില് നിന്നും മിനിസ്ക്രീന് അവതാരകനിലേക്ക് എത്തിയ താരമാണ് കാര്ത്തിക് സൂര്യ. വളരെ വ്യത്യസ്തമായ അവതരണ ശൈലി തന്നെയാണ് കാര്ത്തികിനെ ശ്രദ്ധിക്കപ്പെടാന് സഹായിച്ചത്. ആ വ്യത്യസ്തത കാര്ത്തിക്കിന്റെ വീഡിയോകളിലും ഉണ്ടെന്ന് ഓരോ തവ താരം തെളിയിച്ചു കൊണ്ടിരിക്കുകയാണ്.
കഴിഞ്ഞ ദിവസം വൈറലായ കാര്ത്തിക്കിന്റെ ഒരു വീഡിയോ സോഷ്യല് മീഡിയയില് തന്നെ വലിയ ചര്ച്ചയായി മാറി. മുപ്പത് ലക്ഷത്തിന് അടുത്ത് സബ്സ്ക്രൈബേഴ്സുള്ള യുട്യൂബ് ചാനലിലൂടെ കാര്ത്തിക് പുറത്തുവിട്ട അറുപത് സെക്കന്റില് അറുപത് സ്ഥലങ്ങള് എന്ന വീഡിയോ കേരളത്തിന്റെ ടൂറിസം മന്ത്രി മുഹമ്മദ് റിയാസ് വരെ ഷെയര് ചെയ്തിരുന്നു.
മാത്രമല്ല സിനിമാ താരം മഞ്ജു വാര്യര് അടക്കമുള്ള നിരവധി പേരാണ് ഈ വീഡിയോ ശ്രദ്ദിച്ചത്. മഞ്ജു വാര്യര് കാര്ത്തിക്കിന്റെ ഈ വൈറല് റീല് ഇന്സ്റ്റഗ്രാമില് സ്റ്റോറിയാക്കിയിരുന്നു. അത്രത്തോളം പ്രാധാന്യം കൊടുത്ത് സ്റ്റോറിയാക്കാന് മാത്രം എന്താണ് ആ റിലീലുള്ളതെന്ന് ചോദിച്ചാല്... കേരളം എന്താണ് എന്നത് കാര്ത്തിക്കിന്റെ പുതിയ റീലില് സംയോജിപ്പിച്ച് മനോഹരമായി കാണിച്ചിട്ടുണ്ട്.
വെറും അറുപത് സെക്കന്റ് മാത്രമുള്ള റീലിനായി കേരളത്തിലെ പതിനാല് ജില്ലകളിലും ഒമ്പത് ദിവസം കൊണ്ട് സഞ്ചരിച്ച് അറുപത് സ്ഥലങ്ങളില് നിന്നാണ് കാര്ത്തിക്ക് റീല് ചിത്രീകരിച്ചിരിക്കുന്നത്. ഓരോ ജില്ലയിലേയും പ്രധാനപ്പെട്ട സ്ഥലങ്ങളെല്ലാം റീലില് കാര്ത്തിക്ക് ഉള്ക്കൊള്ളിച്ചിട്ടുണ്ട്. ഒരോ ജില്ലയ്ക്കും വേണ്ടി വ്യത്യസ്ത വേഷവും ഷൂസും വരെ കാര്ത്തിക്ക് തയ്യാറാക്കിയിരുന്നു.
ഇപ്പോഴിതാ ദിവസങ്ങള് നീണ്ട പ്രയത്നത്തിലൂടെ ചിത്രീകരിച്ച അറുപത് സെക്കന്റ് ദൈര്ഘ്യമുള്ള വീഡിയോയ്ക്ക് വേണ്ടി എത്ര രൂപ തനിക്ക് ചിലവായെന്ന് വെളിപ്പെടുത്തുകയാണിപ്പോള് കാര്ത്തിക് സൂര്യ പുതിയ വീഡിയോയിലൂടെ. വെറൈറ്റി കണ്ടന്റിന് വേണ്ടി ചെയ്ത റീലാണെങ്കിലും കേരള ടൂറിസത്തിന് അതൊരു മുതല്ക്കൂട്ടായെന്നതില് സന്തോഷമുണ്ടെന്ന് പറഞ്ഞുകൊണ്ടാണ് കാര്ത്തിക് വീഡിയോ ആരംഭിച്ചത്.
തന്നെ കാണാനുള്ള ആഗ്രഹം മന്ത്രി മുഹമ്മദ് റിയാസ് പ്രകടിപ്പിച്ചിരുന്നുവെന്നും എന്നാല് അതിനൊരു സമയം കണ്ടെത്താന് കഴിയാത്തതിനാല് നേരിട്ട് പോയി അദ്ദേഹത്തോട് സംസാരിക്കാന് കഴിഞ്ഞില്ലെന്നും കാര്ത്തിക് പുതിയ വീഡിയോയില് പറഞ്ഞു. രണ്ട് ലക്ഷത്തോളം രൂപയാണ് വൈറലായ റീല് ചെയ്യാനായി കാര്ത്തിക്കിന് ചിലവായത്.
അതില് കാറിനുള്ള പെട്രോള്, വസ്ത്രം, ഭക്ഷണം, വീഡിയോ എഡിറ്റേഴ്സിന്റെ ശമ്പളം എന്നിവയെല്ലാം ഉള്പ്പെടും. റീലിനുവേണ്ടി 2500 കിലോമീറ്ററോളമാണ് കാര്ത്തിക് സൂര്യയും സംഘവും സഞ്ചരിച്ചത്. റീല് ചിത്രീകരിക്കുന്നതിനിടെ കാര്ത്തിക്കിന്റെ ഡ്രോണ് ഉള്പ്പടെയുള്ള ചില ഗാഡജന്റുകള്ക്ക് കേടുപാടുകള് സംഭവിക്കുകയും ചെയ്തു. വ്യത്യസ്തമായ ആശയം എടുത്ത് മനോഹരമായി ചെയ്ത കാര്ത്തിക്കിന് അഭിനന്ദന പ്രവാഹമാണ് സോഷ്യല്മീഡിയയില്.