മലയാളികള്ക്ക് ഇന്നും മറക്കാനാവാത്ത രണ്ടു പേരാണ് പരീക്കുട്ടിയും കറുത്തമ്മയും. വര്ഷങ്ങള്ക്ക് മുന്പ് ഒറുമിച്ച ആ കഥാപാത്രങ്ങള് ഒരുമിച്ച ഒരു ഫോട്ടോ ആണ് ഇപ്പോള് സോഷ്യല് മീഡിയയില് വൈറല്.
തിക്കുറിശ്ശി ഫൗണ്ടേഷന് തമ്പാനൂര് റെയില്വേ ഓഡിറ്റോറിയത്തില് സംഘടിപ്പിച്ച തിക്കുറിശ്ശി ജന്മദിനാഘോഷ പരിപാടി ഉദ്ഘാടനം ചെയ്ത ശേഷം ഷീല പോയത് കണ്ണമ്മൂലയിലുള്ള മധുവിന്റെ വീട്ടിലേക്കായിരുന്നു. ഷീലയെ മധുവും കുടുംബാംഗങ്ങളും മധുരം നല്കി സ്വീകരിച്ചു. ഒരുമിച്ച് അഭിനയിച്ച സിനിമകളുടെ വിശേഷങ്ങളും വീട്ടുവിശേഷങ്ങളും പങ്കുവച്ചു.
'കുറച്ച് വര്ഷം മുന്പ് ശംഖുംമുഖം തീരത്തിലൂടെ നടന്നപ്പോള് മകളുടെ പ്രായമുള്ള ഒരു സ്ത്രീ ഓടിയെത്തി മോനെ പരീക്കുട്ടി എന്ന് വിളിച്ച ഓര്മ്മ ഏറെ ആവേശത്തോടെയാണ് മധു പങ്കുവെച്ചത്. അവരുടെ മനസില് പരീക്കുട്ടി ഇന്നും ചെറുപ്പമാണ് എന്ന് മധു കൂട്ടിച്ചേര്ത്തു.
ചെമ്മീന് എന്നും മലയാളികളുടെ മനസില് മായാതെ കിടക്കുന്നുണ്ടെന്നും ഇരുവരും പറഞ്ഞു. തിക്കുറിശ്ശി ഫൗണ്ടേഷന് ചെയര്മാന് ബേബി മാത്യു സോമതീരം ഒപ്പമുണ്ടായിരുന്നു. ഫോട്ടോ എടുക്കാന് നേരത്ത് കുറച്ച് റൊമാന്റിക്കായിട്ട് ഇരിക്ക് ഷീലേ എന്ന മധുവിന്റെ കമന്റ് ചിരിപടര്ത്തി. എത്രതന്നെ, ആരെയൊക്കെ കണ്ടാലും നമ്മുടെ കൂടെ അഭിനയിച്ച ആള്ക്കാരെ കണ്ടപ്പോഴുള്ള സന്തോഷം അതൊരു വേറെ തന്നെയാ അല്ലേ എന്ന ഷീലാമ്മയുടെ ചോദ്യത്തിന് മധു അതേ എന്ന ഭാവത്തില് തലയാട്ടി.
വീണ്ടും വരണം എന്ന് പറഞ്ഞ് തന്റെ കറുത്തമ്മയ്ക്ക് ആലിംഗനവും ചുംബനവും നല്കിയാണ് പരീക്കുട്ടി യാത്രയാക്കിയത്. സാഹിത്യമേഖലയിലെ സമഗ്ര സംഭാവയ്ക്കുള്ള ആദരവ് ഷീല സാഹിത്യകാരന് ഡോ.ജോര്ജ് ഓണക്കൂറിന് സമര്പ്പിച്ചു.