18
MAR 2021
THURSDAY
1 GBP =108.45 INR
1 USD =84.09 INR
1 EUR =91.53 INR
ലണ്ടന്‍ മൃഗശാലയില്‍ നിന്നും പറന്ന് പോയത് വംശനാശഭീഷണി നേരിടുന്ന അത്യപൂര്‍വ്വ രണ്ട് മക്കാവു തത്തകള്‍, തിരികെ കണ്ടെത്തിയത് നൂറ് കിലോമീറ്റര്‍ അകലെ നിന്നും
Story Dated: 2024-10-31
ലണ്ടന്‍ മൃഗശാലയില്‍ നിന്നും പറന്ന് പോയ രണ്ട് മക്കാവു തത്തകളും അവയുടെ പ്രത്യേകതകളും ആണ് വാര്‍ത്തയാകുന്നത്. വംശനാശഭീഷണി നേരിടുന്ന രണ്ട് മക്കാവു തത്തകള്‍ ആയിരുന്നു മൃഗശാലയില്‍ നിന്നും രക്ഷപ്പെട്ട് പറന്ന് പോയത്.
രണ്ട് വയസ്സുള്ള രണ്ട് ബ്ലൂ ത്രോട്ടഡ് മക്കാവുകളായ ലില്ലിയും മാര്‍ഗോട്ടുമാണ് മൃഗശാലയില്‍ നിന്നും രക്ഷപ്പെട്ടത്. ഒക്ടോബര്‍ 21 -ന് അവയുടെ ദിനചര്യകള്‍ക്കായി പുറത്തിറക്കിയപ്പോഴാണ് തത്തകള്‍ പറന്ന് പോയത്. തുടര്‍ന്ന് ഇവയെ കണ്ടെത്തുന്നതിനായി മൃഗശാല അധികൃതര്‍ നടത്തിയ തീവ്രമായ തിരച്ചിലിന് ഒടുവില്‍ മൃഗശാലയില്‍ നിന്ന് 60 മൈലിലേറെ ദൂരെ നിന്ന് ഇവയെ കണ്ടെത്തുകയായിരുന്നു.
തത്തകള്‍ പറന്നുപോയ ഉടന്‍ തന്നെ മൃഗശാല അധികൃതര്‍ തത്തകളെ കാണുന്നവര്‍ മൃഗശാലയില്‍ വിവരം അറിയിക്കണമെന്നും അവയ്ക്ക് ഭക്ഷണം നല്‍കരുതെന്നും അഭ്യര്‍ത്ഥിച്ച് കൊണ്ട് ഔദ്യോഗിക പ്രസ്താവന പുറത്തിറക്കിയിരുന്നു. ലണ്ടന്‍ നഗരം വളരെ ശബ്ദായമാനമായ നഗരമാണന്നും അതിനാല്‍ അവയെ കണ്ടെത്തുക വളരെ ബുദ്ധിമുട്ടാണെന്നും പറഞ്ഞ് കൊണ്ടുള്ള ഔദ്യോഗിക പ്രസ്താവനയില്‍ തത്തകളെ കണ്ടെത്താനുള്ള ശ്രമങ്ങള്‍ തങ്ങള്‍ വിപുലീകരിച്ചതായും അറിയിച്ചിരുന്നു. കൂടാതെ സൂര്യകാന്തി വിത്തുകള്‍, പരിപ്പ് തുടങ്ങിയവയെല്ലാം തത്തകള്‍ കഴിക്കുമെങ്കിലും ആരും അവയെ ലാളിക്കാനോ ഭക്ഷണം കൊടുക്കാനോ ശ്രമിക്കരുതെന്നും അധികൃതര്‍ അറിയിച്ചു. കൂടാതെ തത്തകളെ കണ്ടെത്തുന്നവര്‍ അവയുടെ ഫോട്ടോയും കൃത്യമായ സ്ഥലവും തങ്ങള്‍ക്ക് അയച്ച് നല്‍കണമെന്നും പ്രസ്താവനയില്‍ പറഞ്ഞിരുന്നു.
കേംബ്രിഡ്ജ്‌ഷെയറിലെ ഒരു കുടുംബമാണ് തങ്ങളുടെ വീട്ടുമുറ്റത്തെ പൂന്തോട്ടത്തിലെ മരത്തില്‍ ഇരിക്കുന്ന അപൂര്‍വ തത്തകളെക്കുറിച്ച് മൃഗശാല ഉദ്യോഗസ്ഥരെ അറിയിച്ചത്. എന്നാല്‍ മൃഗശാലയിലെ പക്ഷിപാലകര്‍ സ്ഥലത്തെത്തിയപ്പോഴെക്കും അവ അവിടെ നിന്നും രക്ഷപ്പെട്ടു. പക്ഷേ തത്തകളെ വളരെ വേഗത്തില്‍ കണ്ടെത്താന്‍ പക്ഷിപാലകര്‍ക്ക് കഴിഞ്ഞു. ബ്രാംപ്ടണിലെ ഒരു വയലില്‍ നിന്നാണ് പിന്നീട് ഇവയെ പിടികൂടിയത്. രക്ഷാപ്രവര്‍ത്തനത്തിന് ശേഷം തത്തകള്‍ക്ക് ഭക്ഷണം നല്‍കി. പിന്നീട് ഇവയെ മൃഗശാലയിലേക്ക് തിരികെ കൊണ്ടു പോയി. ഇരുവരുടെയും ആരോഗ്യനില തൃപ്തികരമാണെന്നും ഇപ്പോള്‍ ക്വാറന്റീനിലാണെന്നും മൃഗശാല അധികൃതര്‍ അറിയിച്ചു. ക്വാറന്റിന് ശേഷം ഉടന്‍ തന്നെ ഇവയെ മാതാപിതാക്കളായ പോപ്പിയുടെയും ഒല്ലിയുടെയും ഒപ്പം താമസിപ്പിക്കും. ഈ ഇനത്തില്‍പ്പെട്ട 400 പക്ഷികള്‍ മാത്രമാണ് ഇനി അവശേഷിക്കുന്നതെന്നാണ് പൊതുവെ കരുതപ്പെടുന്നത്.
More Latest News
1200ഓളം വാനരന്മാര്‍ക്ക് ഭക്ഷണം നല്‍കണം, അയോധ്യ രാമക്ഷേത്രത്തിന്റെ പരിസരത്തുള്ള വാനരന്മാര്‍ക്ക് ഭക്ഷണം നല്‍കുന്നതിനായി ഒരുകോടി രൂപ സംഭാവനയായി നല്‍കി അക്ഷയ് കുമാര്‍
അയോധ്യ രാമക്ഷേത്രത്തിന്റെ പരിസരത്തുള്ള വാനരന്മാര്‍ക്ക് ഭക്ഷണം നല്‍കുന്നതിനായി അക്ഷയ് കുമാറിന്റെ സംഭാവന. ഒരുകോടി രൂപയാണ് താരം സംഭാവനയായി നല്‍കിയത്.
1200-ഓളം വാനരന്മാര്‍ക്ക് പ്രതിദിനം ഭക്ഷണം നല്‍കാനുള്ള സഹായമാണ് താരം നല്‍കിയിരിക്കുന്നതെന്നാണ് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തിരിക്കുന്നത്.
ആഞ്ജനേയ സേവ ട്രസ്റ്റിനാണ് പണം കൈമാറിയത്. മാതാപിതാക്കളായ ഹരി ഓമിന്റെയും അരുണ ഭാട്ടിയുടെയും ഭാര്യാപിതാവ് രാജേഷ് ഖന്നയുടെയും പേരിലാണ് അക്ഷയ് കുമാര്‍ പണം നല്‍കിയത്. ജഗത്ഗുരു സ്വാമി രാഘവാചാര്യ ജി മഹാരാജിന്റെ കീഴിലുള്ള ട്രസ്റ്റാണ് ആഞ്ജനേയ സേവ ട്രസ്റ്റ്.
അയോധ്യയിലേക്കുളള ദീപാവലി സമ്മാനമായിട്ടാണ് അക്ഷയ് കുമാറിന്റെ തീരുമാനമെന്ന് താരത്തിന് ഒപ്പമുളളവര്‍ പറഞ്ഞു.ജീവകാരുണ്യ പ്രവര്‍ത്തനങ്ങള്‍ ചെയ്യുന്നതില്‍ മുന്നില്‍ നില്‍ക്കുന്ന ബോളിവുഡ് താരങ്ങളിലൊരാളാണ് അക്ഷയ് കുമാര്‍.
ഇന്ത്യയൊട്ടാകെയുള്ള ലൊക്കേഷനില്‍ എഴുപതോളം പ്രമുഖതാരങ്ങളെ അണിനിരത്തി 'ഒരു അന്വേഷണത്തിന്റെ തുടക്കം'! ചിത്രത്തിന്റെ റിലീസ് നവംബര്‍ 8ന്
ഉന്നത പൊലീസ് ഉദ്യോഗസ്ഥനായിരുന്ന പി എം കുഞ്ഞിമൊയ്തീന്‍ അദ്ദേഹത്തിന്റെ പോലീസ് ഡിപ്പാര്‍ട്‌മെന്റിലെ സേവന കാലത്ത് ഒരു കേസുമായ് ബന്ധപ്പെട്ട സൂചനകളും അനുമാനങ്ങളും തന്റെ ഡയറിയില്‍ കുറിച്ചിട്ടിരുന്നു. വര്‍ഷങ്ങള്‍ക്ക് ശേഷം അദ്ദേഹത്തിന്റെ മകനും നടന്‍, സംവിധായകന്‍, നിര്‍മ്മാതാവ് എന്നീ മേഖലകളില്‍ ശ്രദ്ധേയനുമായ എം എ നിഷാദ് ഡയറിയിലെ വരികള്‍ വികസിപ്പിച്ച് തിരക്കഥയെഴുതി സംവിധാനം ചെയ്ത സിനിമയാണ് 'ഒരു അന്വേഷണത്തിന്റെ തുടക്കം'. പ്രേക്ഷക പ്രീതിയും നിരൂപക പ്രശംസയും നേടിയ ഒരുപിടി മികച്ച ചിത്രങ്ങള്‍ പ്രേക്ഷകര്‍ക്ക് സമ്മാനിച്ച ബെന്‍സി പ്രൊഡക്ഷന്‍സിന്റെ ബാനറില്‍ കെ വി അബ്ദുല്‍ നാസറാണ് ചിത്രം നിര്‍മ്മിച്ചത്. എഞ്ചിനിയറിംഗ് ബിരുദധാരിയും മാധ്യമ പ്രവര്‍ത്തകനുമായ ജീവന്‍ തോമസ്സിന്റെ തിരോധാനവും വാകത്താനം കൂട്ടക്കൊലക്കേസ്സിന്റെ ചുരുളുകളുമാണ് ചിത്രത്തിന്റെ പ്രമേയം. ഷൈന്‍ ടോം ചാക്കോ, സമുദ്രകനി, മുകേഷ്, വാണി വിശ്വനാഥ്, അശോകന്‍, ബൈജു സന്തോഷ് എന്നിവരോടൊപ്പം 70ഓളം താരങ്ങളെയാണ് ചിത്രത്തിനായ് അണിനിരത്തിയിരിക്കുന്നത്. ഈ ഇന്‍വെസ്റ്റിഗേഷന്‍ ചിത്രത്തിലെ മറ്റൊരു സുപ്രധാന കഥാപാത്രം സംവിധായകന്‍ നിഷാദ് തന്നെയാണ് അവതരിപ്പിക്കുന്നത്. U/A സര്‍ട്ടിഫിക്കറ്റോടെ നവംബര്‍ 8 മുതല്‍ ചിത്രം തിയറ്ററുകലിലെത്തും.
'ജീവന്‍ തോമസ് തിരോധാനം കോട്ടയം ക്രൈം ബ്രാഞ്ചിനെകൊണ്ട് അന്വേക്ഷിക്കാന്‍ സര്‍ക്കാര്‍ ഉത്തരവിറക്കിയിട്ടുണ്ട്' എന്ന സംഭാഷണത്തോടെ ആരംഭിക്കുന്ന ചിത്രത്തിന്റെ ട്രെയിലര്‍ അടുത്തിടെയാണ് പുറത്തുവിട്ടത്. മിനിറ്റുകള്‍ക്കുള്ളില്‍ വൈറലായ ട്രെയിലറിന് ഗംഭീര റെസ്‌പോണ്‍സാണ് ലഭിച്ചത്. 185 അടി നീളമുള്ള ചിത്രത്തിന്റെ വാള്‍ പോസ്റ്ററും സോഷ്യല്‍ മീഡിയകളില്‍ ശ്രദ്ധ നേടിയിരുന്നു. മലയാള സിനിമാ ചരിത്രത്തില്‍ ആദ്യമായാണ് ഒരു സിനിമക്കായ് 185 അടി വലിപ്പമുള്ള വാള്‍ പോസ്റ്റര്‍ ഉപയോഗിക്കുന്നത്. താരസമ്പുഷ്ടമായ ചിത്രത്തിലെ ഒട്ടുമിക്ക തരങ്ങളെയും വാള്‍ പോസ്റ്ററില്‍ കാണാം എന്നതാണ് പ്രത്യേകത. പൊന്നാനി കര്‍മ്മാ ബീച്ചിന് സമീപമുള്ള റോഡിനോട് ചേര്‍ന്നുള്ള ചുവരിലാണ് പോസ്റ്റര്‍ പതിച്ചിരിക്കുന്നത്.
കോട്ടയം, കുട്ടിക്കാനം. തെങ്കാശി, കുറ്റാലം, കൊച്ചി, പഞ്ചാബ്, ദുബായ് എന്നിവിടങ്ങളിലായ് ചിത്രീകരണം പൂര്‍ത്തിയാക്കിയ ചിത്രത്തിലെ മറ്റ് സുപ്രധാന വേഷങ്ങള്‍ സുധീഷ്, ശിവദ, ദുര്‍ഗ കൃഷ്ണ, മഞ്ജു പിള്ള, സ്വാസിക, അനുമോള്‍, ആഭിജ, പ്രശാന്ത് അലക്‌സാണ്ടര്‍, ജോണി ആന്റണി, വിജയ് ബാബു, സുധീര്‍ കരമന, ഇര്‍ഷാദ്, ജാഫര്‍ ഇടുക്കി, രമേശ് പിഷാരടി, ഷഹീന്‍ സിദ്ദിഖ്, കോട്ടയം നസീര്‍, കൈലാഷ്, ബിജു സോപാനം, കലാഭവന്‍ ഷാജോണ്‍, സായികുമാര്‍, കലാഭവന്‍ നവാസ്, പി ശ്രീകുമാര്‍, ശ്യാമപ്രസാദ്, ബാബു നമ്പൂതിരി, പ്രമോദ് വെളിയനാട്, നവനീത് കൃഷ്ണ, സന്ധ്യ മനോജ്, പൊന്നമ്മ ബാബു, സ്മിനു സിജോ, അനു നായര്‍, സിനി എബ്രഹാം, ദില്‍ഷ പ്രസാദ്, ഗൗരി പാര്‍വതി, മഞ്ജു സുഭാഷ്, ജയകൃഷ്ണന്‍, ജയകുമാര്‍, ജയശങ്കര്‍, അനീഷ് ഗോപാല്‍, ചെമ്പില്‍ അശോകന്‍, ചാലി പാലാ, രാജേഷ് അമ്പലപ്പുഴ, അനീഷ് കാവില്‍, നവനീത് കൃഷ്ണ, ലാലി പി എം, അനന്തലക്ഷ്മി, അനിതാ നായര്‍, ഗിരിജാ സുരേന്ദ്രന്‍, ഭദ്ര, പ്രിയാ രാജീവ്, അഞ്ജലീന എബ്രഹാം, ജെനി, അഞ്ചു ശ്രീകണ്ഠന്‍, സുന്ദര്‍ പാണ്ട്യന്‍, സാബുഅമി, അനീഷ് ഗോപാല്‍, രാജേഷ് അമ്പലപ്പുഴ തുടങ്ങിയവരാണ് കൈകാര്യം ചെയ്തത്.
ക്രൈം ബ്രാഞ്ച് എസ് പി ആയും ഇടുക്കി എസ് പി ആയും ദീര്‍ഘകാലം സേവനമനുഷ്ടിച്ച ഉദ്യോഗസ്ഥനാണ് കുഞ്ഞുമൊയ്തീന്‍. ഡി ഐ ജി റാങ്കില്‍ സര്‍വീസില്‍ നിന്ന് വിരമിച്ച അദ്ദേഹത്തിന്റെ വീശിഷ്ട സേവനത്തിന് പ്രസിഡന്റില്‍ നിന്നും രണ്ട് തവണ സ്വര്‍ണ്ണ മെഡല്‍ ലഭിച്ചിട്ടുണ്ട്.
ഉപതെരഞ്ഞെടുപ്പ് മണ്ഡലങ്ങളില്‍ പ്രചരണം ശക്തമാക്കി ഇന്ത്യന്‍ ഓവര്‍സീസ് കോണ്‍ഗ്രസ്സ് കേരള ചാപ്റ്റര്‍, ആദ്യഘട്ടം ടി ഷര്‍ട്ടുകള്‍ പുറത്തിറക്കി: കെപിസിസി വര്‍ക്കിങ് പ്രസിഡന്റ് ടി സിദ്ദിഖ് ഉദ്ഘാടനം നിര്‍വഹിച്ചു
യുകെ: കേരളത്തില്‍ നടക്കുന്ന ഉപതെരഞ്ഞെടുപ്പില്‍ ഐഓസി യുകെ കേരള ചാപ്റ്ററിന്റെ നേരത്വത്തില്‍ നടക്കുന്ന പ്രചാരണ പ്രവര്‍ത്തനങ്ങളുടെ തുടക്കം കുറിച്ച് കൊണ്ട് സ്ഥാനാര്‍ഥികളുടെ ചിത്രം ആലേഖനം ചെയ്ത ടി ഷര്‍ട്ടിന്റെ പ്രകാശനം കെപിസിസി വര്‍ക്കിങ് പ്രസിഡന്റ് ടി സിദ്ദിഖ് നിര്‍വഹിച്ചു. മുന്‍ മന്ത്രിയും കെപിസിസി രാഷ്ട്രീയ കാര്യ സമിതി അംഗം എ പി അനില്‍കുമാര്‍ മുഖ്യാതിഥി ആയിരുന്നു. യുകെ യില്‍ നിന്നെത്തിയ നിരവധി പ്രവര്‍ത്തകര്‍ സന്നിഹിതരായിരുന്നു. ഐഒസി കോര്‍ഡിനേറ്റര്‍ അഷീര്‍ റഹ്‌മാന്‍ നേതൃത്വം നല്‍കി.
വയനാട് ലോകസഭ മണ്ഡലം, പാലക്കാട്, ചേലക്കര നിയമസഭാ മണ്ഡലങ്ങള്‍ എന്നിവിടങ്ങളിലേക്കുള്ള ഉപതെരഞ്ഞെടുപ്പിലെ യുഡിഎഫ് സ്ഥാനാര്‍ഥിളുടെ പ്രചരണ പരിപാടികളില്‍ സജീവ സാനിധ്യമായിരിക്കുകയാണ് യുകെയിലെ ഇന്ത്യന്‍ ഓവര്‍സീസ് കോണ്‍ഗ്രസ് - കേരള ചാപ്റ്റര്‍ പ്രവര്‍ത്തകര്‍. വീടുകളില്‍ വോട്ടുതേടിയും മണ്ഡലതല പ്രവര്‍ത്തനങ്ങളിലും ഐഒസി പ്രവര്‍ത്തകര്‍ സജീവമായി രംഗത്തുണ്ട്. സംഘടനയുടെ സോഷ്യല്‍ മീഡിയ വിങ്ങും പ്രചരണ രംഗത്ത് സജീവമാണ്.
ഉപതെരഞ്ഞെടുപ്പ് പ്രഖ്യാപിച്ച ദിവസം തന്നെ യുഡിഎഫ് സ്ഥാനാര്‍ഥി പ്രഖ്യാപനം നടത്തിയതും സംഘടനാ ശക്തി പൂര്‍ണ്ണതോതില്‍ വെളിവാക്കികൊണ്ടും യുഡിഎഫ് നടത്തുന്ന ചിട്ടയായ പ്രവര്‍ത്തനം പ്രവര്‍ത്തകര്‍ക്ക് പുത്തന്‍ ഉണര്‍വ് പകര്‍ന്നിട്ടുണ്ട്.
വരും ദിവസങ്ങളില്‍ യുകെയില്‍ നിന്നും കൂടുതല്‍ പ്രവര്‍ത്തകര്‍ നാട്ടിലെത്തി പ്രവര്‍ത്തനങ്ങളുടെ ഭാഗമാകുന്നത്തോടെ ഐഒസിയുടെ നേതൃത്വത്തിലുള്ള പ്രചരണം കൂടുതല്‍ ശക്തമാകുമെന്ന് ഐഒസി കേരള ചാപ്റ്റര്‍ പ്രസിഡന്റ് സുജു ഡാനിയേല്‍ പറഞ്ഞു.
ഉപതെരഞ്ഞെടുപ്പ് പ്രചരണ പ്രവര്‍ത്തനങ്ങള്‍ക്കും ഏകോപനത്തിനുമായി അപ്പച്ചന്‍ കണ്ണഞ്ചിറ കണ്‍വീനറായിക്കൊണ്ട് ഒരു തെരഞ്ഞെടുപ്പു പ്രചരണ കമ്മിറ്റിയും രൂപീകരിച്ചിട്ടുണ്ട്. യുകെ കോര്‍ഡിനേറ്റര്‍ ബോബിന്‍ ഫിലിപ്പ്, മീഡിയ കോര്‍ഡിനേറ്റര്‍ റോമി കുര്യാക്കോസ്, ജോയിന്റ് കണ്‍വീനര്‍മാരായി സുരാജ് കൃഷ്ണന്‍, നിസാര്‍ അലിയാര്‍, ജെന്നിഫര്‍ ലിജു എന്നിവരുടെ നേതൃത്വത്തിലാണ് തെരഞ്ഞെടുപ്പ് പ്രചരണ കമ്മിറ്റിയുടെ പ്രവര്‍ത്തനം. വിവിധ പരിപാടികളുടെ ഏകോപനത്തിനായി കമ്മിറ്റി അംഗങ്ങളെയും ചുമതലപ്പെടുത്തിയിട്ടുണ്ട്.
ബോളിവുഡ് നടന്‍ സല്മാന് ഖാനെതിരെ വധഭീഷണി: രണ്ടു കോടി നല്‍കിയില്ലെങ്കില്‍ സല്‍മാനെ വധിക്കുമെന്ന് സന്ദേശം അയച്ച ആള്‍ പൊലീസ് കസ്റ്റഡിയില്‍
ബോളിവുഡ് നടന്‍ സല്മാന് ഖാനെതിരെ വധഭീഷണി മുഴക്കിയ ആള്‍ പൊലീസ് കസ്റ്റഡിയില്‍. ഇന്നലെ രണ്ടു കോടി രൂപ ആവശ്യപ്പെട്ട് കൊണ്ടാണ് വധഭീഷണി മുഴക്കിയത്.
ഇന്നലെ മുതല്‍ ഈ അജ്ഞാത സന്ദേശത്തിന് പിന്നാലെയായിരുന്നു പൊലീസ്. ഇയാളെയാണ് ഇപ്പോള്‍ പൊലീസ് അറസ്റ്റ് ചെയ്തത്. ബാന്ദ്ര ഈസ്റ്റ് സ്വദേശി അസം മുഹമ്മദ് മുസ്തഫയെയാണ് ഇപ്പോള്‍ മുംബൈ പൊലീസ് അറസ്റ്റ് ചെയ്തത്.
ഇന്നലെ വന്ന സന്ദേശത്തില്‍ രണ്ടു കോടി നല്‍കിയില്ലെങ്കില്‍ സല്‍മാനെ വധിക്കുമെന്നായിരുന്നു സന്ദേശം. വാട്സ്ആപ്പ് സന്ദേശമായിരുന്നു വന്നത്. അതേസമയം സല്മാന് ഖാനെതിരെയുള്ള ഭീഷണി സന്ദേശം മുംബൈ പൊലീസിന്റെ ട്രാഫിക് കണ്‍ട്രോള്‍ റൂമിലേക്കാണ് എത്തിയത്. തുടര്‍ന്ന് കേസ് രജിസ്റ്റര്‍ ചെയ്ത് വര്‍ലി പൊലീസിന്റെ പ്രത്യേക സംഘം നടത്തിയ വിശദമായ അന്വേഷണത്തിലാണ് നിലവില്‍ പ്രതിയെ പിടികൂടിയത്.
നേരത്തെ തന്നെ ഗുണ്ടാ നേതാവ് ലോറന്‍സ് ബിഷ്‌ണോയിയുടെ സംഘാംഗം എന്ന് അവകാശപ്പെട്ട് സല്മാന് വധഭീഷണി സന്ദേശം ലഭിച്ചിരുന്നു. കഴിഞ്ഞ ദിവസം സല്‍മാനും കൊല്ലപ്പെട്ട എന്‍.സി.പി നേതാവ് ബാബ സിദ്ദീഖിയുടെ മകനുമായ സീഷാനും നേരെ വധഭീഷണി മുഴക്കിയ സംഭവത്തില്‍ 20കാരന്‍ ഗഫ്‌റാന്‍ ഖാന്‍ എന്നയാളെ പൊലീസ് അറസ്റ്റ് ചെയ്തിരുന്നു.
ഒക്ടോബര്‍ 25നാണ് സീഷാന്‍ സിദ്ദീഖിയുടെ ഓഫിസിലേക്ക് ഭീഷണി സന്ദേശം ലഭിച്ചത്. ഉടനെ തന്നെ പണം നല്‍കണമെന്നും ഇല്ലെങ്കില്‍ സല്‍മാനെയും സീഷനെയും വധിക്കുമെന്നുമായിരുന്നു ആ സന്ദേശം. ബിഷ്‌ണോയിയുമായുള്ള ശത്രുത അവസാനിപ്പിക്കാന്‍ അഞ്ച് കോടിയാണ് അന്ന് അവര്‍ ആവശ്യപ്പെട്ടത്
ഡല്‍ഹിയില്‍ വായു മലിനീകരണം, ദീപാവലി ദിനമായതിനാല്‍ ആഘോഷത്തോട് അനുബന്ധിച്ച് വായു മലിനീകരണം കൂടുതല്‍ രൂക്ഷമാകാന്‍ സാധ്യത
ഡല്‍ഹിയിലെ വായു മലിനീകരണം അതീവ രൂക്ഷമാകുന്ന സാഹചര്യത്തിലെന്ന് റിപ്പോര്‍ട്ട്. ഇന്ന് ദീപാവലി ദിനമായതിനാല്‍ ആഘോഷത്തോട് അനുബന്ധിച്ച് വായു മലിനീകരണം കൂടുതല്‍ രൂക്ഷമാകാന്‍ സാധ്യതയുണ്ട്.
ദീപാവലി ആഘോഷങ്ങള്‍ ആരംഭിച്ചതോടെ വായുഗുണ നിലവാര നിരക്ക് വീണ്ടും 300 നു മുകളില്‍ എത്തി നില്‍ക്കുകയാണ്. ആഘോഷങ്ങള്‍ അവസാനിച്ചു കഴിയുന്നതോടെ അടുത്ത രണ്ട് ദിവസങ്ങളില്‍ മലിനീകരണം കൂടുതല്‍ കടുക്കും എന്നാണ് മുന്നറിയിപ്പില്‍ പറയുന്നത്.
ഡല്‍ഹിയില്‍ ഇതനു മുന്‍പും ഇത്തരത്തില്‍ വായു മലിനീകരണം റിപ്പോര്‍ട്ട് ചെയ്തിട്ടുണ്ട്. ഇത്തരം ആഘോഷ വേളയില്‍ ഡല്‍ഹിയില്‍ വായു മലിനീകരണ പ്രശ്നങ്ങള്‍ കടുക്കാറാണ് പതിവ്. പ്രത്യേകിച്ച് ദീപാവലി ആഘോഷങ്ങള്‍ക്ക് ശേഷം വായു മലിനീകരണത്തിന്റെ പ്രശ്നങ്ങള്‍ എല്ലായ്പ്പോഴും കൂടാറുണ്ട്. ഇതില്‍ നിന്നെല്ലാം മാറ്റം വരാന്‍ അധിക ദിവസങ്ങള്‍ എടുക്കേണ്ടി വരാറുണ്ട്.
അതേസമയം ഡല്‍ഹിയിലെ വായു മലിനീകരണത്തിന്റെ പ്രധാനകാരണം അയല്‍ സംസ്ഥാനങ്ങളിലെ കാര്‍ഷിക അവശിഷ്ടങ്ങള്‍ കത്തിക്കുന്നത് അല്ലെന്ന് സെന്റര്‍ ഫോര്‍ സയന്‍സ് ആന്‍ഡ് എന്‍വിയോണ്‍മെന്റ് വ്യക്തമാക്കിയിട്ടുണ്ട്.
മലിനീകരണത്തിന്റെ 95 ശതമാനവും വാഹനങ്ങളില്‍ നിന്നുള്ള പുകയില്‍ നിന്ന് ആണെന്നാണ് റിപ്പോര്‍ട്ട്. 4.44% മാത്രമാണ് കാര്‍ഷിക അവശിഷ്ടങ്ങളില്‍ നിന്നും ഉള്ളതെന്നും റിപ്പോര്‍ട്ടിലുണ്ട്.
Most Read
British Pathram Recommends
