സ്വന്തം ലേഖകൻ

'പറവ' എന്ന ആദ്യ ചിത്രത്തിലൂടെ തന്നെ പ്രേക്ഷകര്‍ക്ക് ഏറെ പ്രിയപ്പെട്ടതായി മാറിയ താരമാണ് ഗോവിന്ദ്. പര് കേട്ടാല്‍ ചിലപ്പോള്‍ ആളുകള്‍ക്ക് മനസ്സിലായില്ലെങ്കിലും കാണുമ്പോഴും ഹസീബ് എന്ന കഥാപാത്രത്തിന്റെ പേര് കേള്‍ക്കുമ്പോഴും എല്ലാവര്‍ക്കും വളരെ പെട്ടന്ന് തന്നെ മനസ്സിലാകും ആരാണെന്ന്.

ഈ താരം ഇപ്പോള്‍ പഠനമെല്ലാം നിറുത്തി തട്ടുകട നടത്തുകയാണ്. 16 വര്‍ഷം മുന്‍പു അച്ഛന്‍ വാസുദേവ് പൈ മരണമടഞ്ഞതിനു ശേഷം വീടുകളില്‍ പ്രസവ ശുശ്രൂഷയ്ക്കും മറ്റും പോയാണു അമ്മ ചിത്ര കുടുംബം നോക്കിയത്. പിന്നീടാണ് ചായക്കച്ചവടം തുടങ്ങിയത്. ചെറളായി മഞ്ഞഭഗവതി ക്ഷേത്രത്തിനു മുന്‍വശം വീടിനു സമീപത്താണ് ഗോവിന്ദും അമ്മയും ചേട്ടനും കൂടി നടത്തുന്ന കട. പ്ലസ് ടുവോടെ പഠനം നിര്‍ത്തിയ ഗോവിന്ദ് അമ്മയ്ക്കും ചേട്ടനുമൊപ്പം മുഴുവന്‍ സമയവും തട്ടുകടയിലാണ്.

വൈകിട്ട് 7 മണിയോടെ തുറക്കുന്ന കടയില്‍ രാത്രി 12 വരെ നല്ല തിരക്കുണ്ടാകും. കറികളും, ദോശമാവ് തയ്യാറാക്കലും ഒക്കെയായി ഉച്ചയോടെ തന്നെ ഇവര്‍ സജീവമാകും . ജീവിക്കാന്‍ വേണ്ടിയാണ് താന്‍ തട്ടുകട നടത്തുന്നതെന്ന് ഗോവിന്ദ് പറയുന്നു.മട്ടാഞ്ചേരി ടിഡി ഹൈസ്‌കൂളില്‍ പത്താം ക്ലാസില്‍ പഠിക്കുമ്പോഴാണു ഗോവിന്ദ് പറവ സിനിമയില്‍ അഭിനയിക്കുന്നത്.
'പഠിപ്പിച്ചിട്ട് കാര്യമില്ലെന്ന് വീട്ടുകാര്‍ക്ക് മനസിലായി. പ്ലസ്ടു വരെ പഠിച്ചു. സിനിമ കിട്ടുമ്പോള്‍ നീ സിനിമ ചെയ്‌തോ അല്ലാത്തപ്പോള്‍ കട നോക്കി നടത്തിക്കോ എന്നാണ് വീട്ടില്‍ പറയുന്നത്. എപ്പോഴും സിനിമ കൊണ്ട് ജീവിതം മുന്നോട്ട് കൊണ്ടു പോകാന്‍ പറ്റില്ല. സ്‌കൂള്‍ കുട്ടിയായിട്ടുള്ള റോളുകളാണ് ഇപ്പോള്‍ വരുന്നതെല്ലാം. എനിക്കിപ്പോള്‍ 25 വയസ്സുണ്ട്. കുറച്ചു കൂടി ചലഞ്ചിങ് ആയിട്ടുള്ള വേഷങ്ങള്‍ ചെയ്യാനാണ് താല്‍പര്യം. ' - ഗോവിന്ദ് പറയുന്നു.