ജയിലിന്റെ മതില്കെട്ടിനകത്തേക്ക് മദ്യക്കുപ്പിയും ബീഡിയും ചെമ്മീന് റോസ്റ്റും അടക്കമുള്ള പൊതികള് എറിഞ്ഞയാളെ പൊലീസ് പിടികൂടി. മൂവാറ്റുപുഴ സ്പെഷ്യല് സബ് ജയിലിന്റെ മതില്ക്കെട്ടിനകത്തേക്കാണ് ഇവയെല്ലാം അടങ്ങിയ പൊതി എറിഞ്ഞത്.
സംഭവത്തില് തൃക്കാക്കര എച്ച്എംടി കോളനി കുന്നത്ത് കൃഷ്ണകൃപ വീട്ടില് വിനീത് (32) മൂവാറ്റുപുഴ പൊലീസിന്റെ പിടിയിലായി. മോഷണക്കേസില് സബ്ജയിലില് കഴിയുന്ന സഹോദരന് വേണ്ടിയാണ ഇങ്ങനെ ചെയ്തതെന്നാണ് ഇയാള് പൊലീസിനോട് പറഞ്ഞത്.
ഇന്നലെ സഹോദരനെ കാണാന് വിനീത് സബ് ജയിലില് എത്തിയിരുന്നു. ജയിലില് പ്രവേശിക്കുന്നതിന് മുന്പാണ് മദ്യം അടക്കം വലിച്ചെറിഞ്ഞത്.ഒരു പൊതിയില് ഒരു കുപ്പി മദ്യവും മിനല് വാട്ടറുമായിരുന്നു. മറ്റൊന്നില് പതിനഞ്ച് കൂട് ബീഡിയും മൂന്നാമത്തെ പൊതിയില് ഒരു ലൈറ്ററും 7 പായ്ക്കറ്റ് ചെമ്മീന് റോസ്റ്റുമാണ് ഉണ്ടായിരുന്നത്. സാധനങ്ങള് അടുക്കളയുടെ പിന്ഭാഗത്താണ് വന്നുവീണത്. ജയില് സൂപ്രണ്ടിന്റെ പരാതിയെ തുടര്ന്ന് നടത്തിയ അന്വേഷണത്തിലാണ് പ്രതി പിടിയിലായത്.