ഇന്ധന വിലയ്ക്കെതിരെ യൂത്ത് കോണ്ഗ്രസിന്റെ 100 കിലോമീറ്റര് സൈക്കിള് ചവിട്ടിയുള്ള പ്രതിഷേധത്തിനിടെയിലെ ഒരു 'തമാശ' ആണ് സാമൂഹ്യ മാധ്യമങ്ങളില് ഇപ്പോള് വൈറലാകുന്നത്. സൈക്കിള് ചവിട്ടുന്നതിനിടെ യൂത്ത് കോണ്ഗ്രസ് സംസ്ഥാന അധ്യക്ഷന് ഷാഫി പറമ്പില് എംഎല്എ സഹപ്രവര്ത്തകരോട് പറഞ്ഞ തമാശയാണ് സോഷയല്മീഡിയയില് നിറയുന്നത്.
സൈക്കിള് യാത്രക്കിടെ 'ഞാനപ്പഴേ പറഞ്ഞതാ പദയാത്ര മതിയെന്ന്' എന്ന് ഷാഫി പറയുന്നതാണ് വീഡിയോയിലുള്ളത്. അപ്പോള് ആരാണ് ഈ ഐഡിയ സജസ്റ്റ് ചെയ്തത് എന്ന പ്രവര്ത്തകന്റെ ചോദ്യത്തിന് താന് തന്നെയെന്ന് ഷാഫി ആംഗ്യം കാണിക്കുന്നുമുണ്ട്.
ഇതുപറയുന്ന സമയത്ത് ലൈവ് പോകുന്നുണ്ട് എന്ന് ഒരു പ്രവര്ത്തകന് ഷാഫിയെ ഓര്മ്മിപ്പിക്കുകയും ഉടനടി ലൈവ് ഡിലീറ്റ് ചെയ്യാന് ഷാഫി പറയുന്നതും വീഡിയോയില് കാണാം. ഈ വീഡിയോയാണ് ഈ മണിക്കൂറുകളില് വലിയ ട്രോളുകളായി പ്രചരിക്കുന്നത്.
എന്നാല് സഗസ്ഥാന സര്ക്കാരിനെതിരെ ഒരു വാക്ക് മിണ്ടാത്ത ഡിവൈഎഫ്ഐക്കാരാണ് 100 കിലോമീറ്റര് സൈക്കിള് യാത്ര നടത്തിയ ഷാഫിയെ പരിഹസിക്കുന്നതെന്ന് കോണ്ഗ്രസും തിരിച്ചടിച്ചു. ആലപ്പുഴ ജില്ലയിലെ കായംകുളം മുതല് തിരുവനന്തപുരം വരെ സൈക്കിള് റാലി പ്രതിഷേധം വന് ജനശ്രദ്ധ ആകര്ഷിച്ചിരുന്നു.