മയക്കുമരുന്ന് ലഹരിയില് തട്ടികൊണ്ട് പോകല് നാടകം കളിച്ച മൂന്ന് അംഗ സംഘത്തെ നാട്ടുകാര് തടഞ്ഞ് നിര്ത്തി പൊലീസില് ഏല്പ്പിച്ചു. സംഭവവുമായി ബന്ധപ്പെട്ട് ഒരു യുവതിയുടെയും വെള്ളത്തൂവല് സ്വദേശി ജോജി (35). ആലപ്പുഴ സ്വദേശി പ്രവീണ് രാജ് (34) എന്നിവരുടെ പേരില് പൊലീസ് കേസ്സ് രജിസ്റ്റര് ചെയ്തു.അടിമാലി കല്ലാര് ഭാഗത്ത് ശനിയാഴ്ച രാത്രി 9 നായിരുന്നു സംഭവം.
എറണാകുളം സ്വദേശികളായ ആറ് അംഗ സംഘം വെള്ളിയാഴ്ച്ചയാണ് മൂന്നാറിലെത്തി മുറിയെടുത്തത്. മൂന്ന് സ്ത്രീകളും, മൂന്ന് പുരുഷന്മാരുമായിരുന്നു സംഘത്തില് ഉണ്ടായിരുന്നത്. ഇവര് കുരിശുപാറ ഭാഗത്തെ റിസോര്ട്ടില് റൂം എടുത്തു.
ശനിയാഴ്ച ഉച്ചയോടെ രണ്ട് പുരുഷന്മാരും ഒരു യുവതിയും കാറില് അടിമാലിയിലെത്തി കല്ലാറില് എത്തി. കല്ലാറില് എത്തിയപ്പോള് കാര് തകരാറിലായി. ഇതോടെ യുവതി തന്നെ തട്ടിക്കൊണ്ട് പോകുന്നതായി നാട്ടുകാരോട് വിളിച്ച് പറഞ്ഞു. സംഭവം ശ്രദ്ധയില്പ്പെട്ട സമീപത്തെ വര്ക്ക്ഷോപ്പ് നടത്തിപ്പുകാര് നാട്ടുകാരുടെ സഹായത്തോടെ യുവതിയെ രക്ഷിക്കാന് ശ്രമിച്ചു.
യുവതിയുടെ ആരോപണം സത്യമാണെന്ന കരുതി യുവതിയെ രക്ഷിക്കാന് നാട്ടുകാരില് ചിലര് ചുറ്റുംകൂടി. ഇതിനിടെ യുവതിയും യുവാക്കളും മയക്കുമരുന്ന് ലഹരിയിലാണെന്നും കണ്ടെത്തി. ഇതിനിടെ പൊലീസിലും നാട്ടുകാര് വിവരം അറിയിച്ചു. യുവതിയുടെ മൊഴിയുടെ അടിസ്ഥാനത്തില് കുരിശുപാറയിലെ റിസോര്ട്ടില് എത്തി തെളിവെടുപ്പ് നടത്തി. ഒപ്പമുണ്ടായിരുന്ന രണ്ടു പേരെ കസ്റ്റഡിയില് എടുക്കുകയും ചെയ്തു.
ഇതിനിടെ യുവതിയുടെ ലഹരി വിട്ടു. തങ്ങള് സുഹൃത്തുക്കളാണെന്നും തങ്ങളെ വിട്ടയ്ക്കണം എന്നാവശ്യപ്പെട്ട് യുവതി പൊലീസിനോട് തട്ടി കയറി. തട്ടിക്കൊണ്ട്പോകുന്നത് സംബന്ധിച്ച് താന് ലഹരിയില് തമാശയ്ക്ക് പറഞ്ഞതാണെന്നായിരുന്നു യുവതിയുടെ മൊഴി. എറണാകുളത്തെ സ്വകാര്യ കമ്ബനിയില് ജോലി ചെയ്യുന്നവരാണ് സംഘമെന്ന് ഇവര് മൊഴി നല്കി. പൊലീസ് റിസോര്ട്ടില് എത്തി ഇവര് ഒരുമിച്ച് വന്നതാണെന്ന് ബോദ്ധ്യപ്പെട്ട് താക്കീതു നല്കി ജാമ്യത്തില് വിട്ടയച്ചു.