യുകെയിലേക്ക് അനധികൃതമായി കുടിയേറുകയോ അഭയം തേടുകയോ ചെയ്യുന്നവരെ ഹോട്ടലുകളില് താമസിപ്പിക്കുന്നതിനായുള്ള ചെലവ് പ്രതിദിനം 8 മില്യണ് പൗണ്ടായി ഉയര്ന്നതായി ഹോം ഓഫീസിന്റെ വാര്ഷിക റിപ്പോര്ട്ട്. തിങ്കളാഴ്ച കോമണ്സിനെ അഭിസംബോധന ചെയ്യുമ്പോള് ഇത് പ്രതിദിനം 6 മില്യണ് പൗണ്ടാണെന്ന് ആഭ്യന്തര സെക്രട്ടറി സുവല്ല ബ്രാവര്മാന് പറഞ്ഞിരുന്നു.
യുകെയിലേക്ക് അനധികൃതമായി പ്രവേശിക്കുകയോ അഭയം തേടുകയോ ചെയ്യുന്നവരുടെ എണ്ണം റെക്കോര്ഡ് നിലവാരത്തില് എത്തിയതോടെ ഇവരെ താമസിപ്പിക്കുന്നതിനായി ഹോട്ടലുകളുടെ ഉപയോഗം കഴിഞ്ഞ കുറച്ച് വര്ഷങ്ങളായി വര്ദ്ധിച്ചിരുന്നു. മാര്ച്ചില് ബിബിസി വിശകലനം ചെയ്ത കണക്കുകളില് 400 ഓളം ഹോട്ടലുകള് ഇത്തരത്തില് ഉപയോഗിക്കുന്നുണ്ടെന്ന് വ്യക്തമായിരുന്നു. ഇതിനായി ഒരു ദിവസം ഏകദേശം 7 മില്യണ് പൗണ്ടാണ് ചിലവ് കണക്കാക്കിയിരുന്നത്.
ചൊവ്വാഴ്ച പ്രസിദ്ധീകരിച്ച ഹോം ഓഫീസിന്റെ വാര്ഷിക വിശകലനത്തില്, 'നികുതിദായകന് പ്രതിദിനം 8 മില്യണ് പൗണ്ട് ചിലവാകുന്ന ഹോട്ടലുകളിലെ കുടിയേറ്റക്കാരുടെ അസ്വീകാര്യമായ ചെലവ് പരിഹരിക്കാന് നടപടിയെടുക്കുമെന്ന്' വാഗ്ദാനം ചെയ്തു. എന്തുകൊണ്ടാണ് തങ്ങള് കുടിയേറ്റക്കാരെ ഹോട്ടലുകളില് നിന്ന് പുറത്താക്കുകയും അനധികൃത കുടിയേറ്റ ബോട്ടുകള് നിര്ത്തുകയും ചെയ്തത്' എന്ന് പുതിയ കണക്കുകള് കാണിക്കുന്നുവെന്ന് കണക്കുകള് പുറത്തു വിട്ടുകൊണ്ട് സര്ക്കാര് വൃത്തങ്ങള് പറഞ്ഞു.
അതിനിടെ, കണ്സര്വേറ്റീവുകള് ഹോം ഓഫീസ് ബജറ്റുകളും അഭയ സമ്പ്രദായവും തകര്ത്തെന്നും ബ്രിട്ടീഷ് ജനത അതിന്റെ വില കൊടുത്തുകൊണ്ടിരിക്കുകയാണെന്നും ലേബറിന്റെ ഷാഡോ ഹോം സെക്രട്ടറി യെവെറ്റ് കൂപ്പര് ആരോപിച്ചു. ''ഞെട്ടിപ്പിക്കുന്ന കാര്യം, ഋഷി സുനക് ഹോട്ടല് ഉപയോഗം അവസാനിപ്പിക്കുമെന്ന് വാഗ്ദാനം ചെയ്തതിന് ശേഷം ഹോട്ടല് താമസത്തിന്റെ വില മൂന്നിലൊന്നായി വര്ദ്ധിച്ചു,'' അവര് കൂട്ടിച്ചേര്ത്തു.