ഖത്തര് ലോകകപ്പില് നെതര്ലന്ഡ്സ് കോച്ച് ലൂയി വാന് ഗാലിനോടുള്ള പെരുമാറ്റത്തില് ഖേദം പ്രകടിപ്പിച്ച് അര്ജന്റീന സൂപ്പര് താരം ലയണല് മെസി. ഡച്ച് ടീമിന്റെ കോച്ച് ലൂയി വാന് ഗാലിനെ നോക്കി ഇരു ചെവികളിലും കൈകള് വെച്ച് കാര്ട്ടൂണ് കഥാപാത്രമായ ടോപ്പോ ജിജിയോയെ അനുകരിച്ച് മെസി നടത്തിയ ഗോളാഘോഷം എല്ലാവരെയും ഞെട്ടിച്ചിരുന്നു.
ഇത് കണ്ട് നെതര്ലന്ഡ്സ് ടീം മാത്രമല്ല, ഫുട്ബോള് ലോകം ഒന്നാകെ അമ്പരന്നു. മത്സരത്തിന് മുന്പ് അര്ജന്റീന ടീമിനെതിരെ വാന് ഗാല് നടത്തിയ പ്രകോപനപരമായ പ്രസ്താവനകളാണ് പൊതുവെ ശാന്ത ശീലനായ മെസിയെ ഇങ്ങനെ പെരുമാറാന് പ്രേരിപ്പിച്ചത്. ഈ പെരുമാറ്റത്തിനാണ് മെസിയിപ്പോള് ഖേദം പ്രകടിപ്പിച്ചത്.
ലയണല് മെസിയുടെ വാക്കുകള് ഇങ്ങനെയായിരുന്നു. ''വാന് ഗാലിന് എതിരായ പെരുമാറ്റം അപ്പോഴത്തെ ആവേശത്തില് പെട്ടന്ന് സംഭവിച്ചതായിരുന്നു. വിഡ്ഢിത്തരമാണ് ചെയ്തതെന്ന് അപ്പോള് തന്നെ മനസിലായി. അതിലിപ്പോള് ഞാന് ഖേദിക്കുന്നു.'' ഇഎസ്പിഎന്നിന് നല്കിയ അഭിമുഖത്തില് മെസി പറഞ്ഞു.