ബ്രെക്സിറ്റിന് ശേഷം യുകെയില് സ്ഥിരതാമസമാക്കിയ 3.7 ദശലക്ഷം യൂറോപ്യന് യൂണിയന് പൗരന്മാര്ക്ക് ബ്രിട്ടീഷ് പൗരത്വം നല്കുമെന്ന ലേബര് പാര്ട്ടി നേതാവ് കീര് സ്റ്റാര്മറുടെ നിലപാട് ബ്രക്സിറ്റ് അനുകൂലികളും എതിരാളികളും തമ്മില് വീണ്ടും ഒരു തുറന്ന പോരാട്ടത്തിന് വഴിവച്ചു. ലേബര് പാര്ട്ടിയുമായി അടുത്ത ബന്ധം പുലര്ത്തുന്ന ഒരു ഇടതുപക്ഷ ചിന്തകനാണ് കീര് സ്റ്റാര്മറോട് ഇക്കാര്യം ആവശ്യപ്പെട്ടിരിക്കുന്നത്. ബ്രക്സിറ്റിന് ശേഷം യുകെയില് സ്ഥിരതാമസത്തിനുള്ള അനുമതി ലഭിച്ച 37 ലക്ഷത്തോളം യൂറോപ്യന് പൗരന്മാര്ക്ക് ബ്രിട്ടീഷ് പൗരത്വം നല്കണം എന്നതാണ് ആവശ്യം. അതേസമയം, കുടിയേറ്റക്കാരെക്കുറിച്ചുള്ള ബ്രിട്ടീഷുകാര്ക്കിടയില് ഭയം ഇല്ലാതാക്കാന് നയം സഹായിക്കുമെന്ന് വാദമുണ്ട്.
യൂറോപ്യന് യൂണിയന് പൗരന്മാര് ബ്രിട്ടീഷ് പൗരന്മാരായി മാറിയാല് വോട്ടര്മാര് ഉയര്ന്ന തോതിലുള്ള കുടിയേറ്റം സ്വീകരിക്കാന് കൂടുതല് സാധ്യതയുണ്ടെന്നാണ് ലേബര് ടുഗതര് അവകാശപ്പെടുന്നത്. കുടിയേറ്റക്കാര്ക്ക് ഒരു നിശ്ചിത സമയം ഇവിടെ താമസിച്ചാല് ബ്രിട്ടീഷ് പൗരന്മാരാകാന് അമേരിക്കന് മാതൃകയിലുള്ള ഒരു വഴിയാണ് തിങ്ക് ടാങ്ക് ശുപാര്ശ ചെയ്യുന്നത്. എന്നാല് ബ്രെക്സിറ്റിനുശേഷം ബ്രിട്ടനില് താമസിക്കുന്ന ഏകദേശം നാല്പത് ലക്ഷം യൂറോപ്യന് യൂണിയന് പൗരന്മാര്ക്ക് കാര്ട്ടെ ബ്ലാഞ്ച് പൗരത്വ അവകാശങ്ങളും അവര് ആഗ്രഹിക്കുന്നു. അനിശ്ചിത കാലത്തേയ്ക്ക് ഇവിടെ താമസിക്കാനും ജോലി ചെയ്യാനും പഠിക്കാനും ഇത് അവരെ അനുവദിക്കും.
യൂറോപ്യന് യൂണിയന് പൗരന്മാര്ക്ക് ബ്രിട്ടീഷ് തെരഞ്ഞെടുപ്പുകളില് സമ്പൂര്ണ്ണ വോട്ടിംഗ് അവകാശം നല്കണമെന്ന് കീര് സ്റ്റാര്മര് നേരത്തേ ആവശ്യപ്പെട്ടിരുന്നു. അതിനു പുറമെയാണ് ഇപ്പോള് അവര്ക്ക് പൗരത്വം നല്കണമെന്ന് ആവശ്യപ്പെട്ട് ലേബര് പാര്ട്ടിയുമായി അടുപ്പമുള്ള വ്യക്തി രംഗത്തെത്തുന്നത്. അതോടെ, കണ്സര്വേറ്റീവ് അംഗങ്ങള് ഈ നിര്ദ്ദേശങ്ങള്ക്ക് എതിരെ രംഗത്തെത്തിക്കഴിഞ്ഞു. ഈ നയം നടപ്പിലാക്കിയാല് അത് ബ്രക്സിറ്റിന്റെ പേരില് നടത്തുന്ന ഒരു വഞ്ചനയായിരിക്കും എന്നായിരുന്നു കണ്സര്വേറ്റീവ് പാര്ട്ടി ഡെപ്യുട്ടി ചെയര്മാന് ജോനാഥന് ഗള്ളിസ് പ്രതികരിച്ചത്. ഇതിനോടകം തന്നെ ഇയു പൗരന്മാര്ക്ക് സമ്പൂര്ണ്ണ വോട്ടവകാശം നല്കണമെന്ന് സ്റ്റാര്മര് ആവശ്യപ്പെട്ടത് അറിയാമെന്നു പറഞ്ഞ ഗള്ളിസ്, ഇപ്പോള് ലേബര് പാര്ട്ടിയുമായി അടുത്ത വൃത്തങ്ങളാണ് അവര്ക്ക് സ്വമേധയാ പൗരത്വം നല്കണമെന്ന് ആവശ്യപ്പെടുന്നതെന്നും പറഞ്ഞു.
കീര് സ്റ്റാര്മറും, യൂറോപ്യന് യൂണിയനും തമ്മിലുള്ള ഒരു ഇടപാടാണ് ഇതെന്ന് ജനങ്ങള് ആശങ്കപ്പെടുന്നു എന്ന് പറഞ്ഞ ഗള്ളിസ്, ഇത് നടപ്പാക്കുന്നത് ബ്രിട്ടന്റെ അതിര്ത്തികള് ബ്രസ്സല്സില് പണയം വയ്ക്കുന്നതിന് തുല്യമാണെന്നും പറഞ്ഞു. ബ്രിട്ടീഷ് അതിര്ത്തികള് സംരക്ഷിക്കുന്ന കാര്യത്തില് സ്റ്റാര്മറിനെ വിശ്വസിക്കാന് പറ്റില്ലെന്നും എന്നും അദ്ദേഹം പറഞ്ഞു.
നിലവില് വിദേശികള്ക്ക്, ബ്രിട്ടീഷ് പൗരന്മാരാകുന്നതിനുള്ള നിയമങ്ങള്ക്ക് എന്ത് പോരായ്മയാണ് ഉള്ളതെന്ന് വ്യക്തമാക്കണം എന്നാവശ്യവുമായി കണ്സര്വേറ്റീവ് പാര്ട്ടി ബ്രെന്ഡാന് ക്ലാര്ക്ക് സ്മിത്തും രംഗത്തെത്തിയിട്ടുണ്ട്. കുടിയേറ്റക്കാര്ക്ക് സമ്പൂര്ണ്ണ വോട്ടവകാശം യൂറോപ്യന് യൂണിയനും നല്കുന്നില്ല എന്നും അദ്ദേഹം ചൂണ്ടിക്കാണിച്ചു. പാര്ട്ടി അനുയായിയുടെ പ്രസ്താവനയെ സ്റ്റാര്മര് തള്ളണമെന്നും അദ്ദേഹം ആവശ്യപ്പെട്ടു.