ബ്രിട്ടനിലെ പത്തില്‍ ഏഴ് കാര്‍ മോഷണങ്ങളിലും പോലീസ് തിരിഞ്ഞുനോക്കുന്നില്ലെന്ന റിപ്പോര്‍ട്ട് കഴിഞ്ഞ ദിവസമാണ് ബ്രിട്ടീഷ് പ്ത്രം പുറത്തു വിട്ടത്. കഴിഞ്ഞ വര്‍ഷം പത്തില്‍ ഏഴ് കാര്‍ മോഷണങ്ങളിലും പോലീസ് നേരിട്ട് വന്ന് അന്വേഷണം പോലും നടത്തിയില്ലെന്നായിരുന്നു വിവരാവകാശ രേഖകള്‍ പ്രകാരം പുറത്തുവന്ന കണക്കുകള്‍ കാണിക്കുന്നത്. അതുകൊണ്ടുതന്നെ സ്വന്തം കാര്‍ മോഷണം പോകാതെ നോക്കുക എന്ന വലിയ ഉത്തരവാദിത്തം ആണ് കാര്‍ ഉടമകള്‍ക്കുള്ളത്. എന്നാല്‍ കാര്‍ മോഷണം തടയുക എന്നത് നിലവിലെ സാഹചര്യത്തില്‍ അതീവ ദുഷ്‌കരമായിരിക്കുന്നു എന്നതാണ് യാഥാര്‍ഥ്യം.
യുകെയില്‍ ഓരോ 240 സെക്കന്‍ഡിലും ഒരു കാര്‍ വീതം മോഷ്ടിക്കപ്പെടുന്നു എന്നാണ് കണക്കുകള്‍. ഇവയില്‍ പലതിും കമ്പ്യൂട്ടര്‍ ഹാക്കിംഗ് ഉപകരണങ്ങള്‍, ജിപിഎസ് ജാമറുകള്‍, ഡ്രോണുകള്‍ എന്നിവയുള്‍പ്പെടെയുള്ള ഹൈടെക് റോബറി കിറ്റുകള്‍ ഉപയോഗിച്ച് നടത്തുന്ന മോഷണങ്ങളാണ് എന്നതാണ് ഞെട്ടിപ്പിക്കുന്ന സത്യം. ഇന്‍ഷുറന്‍സ് പ്രീമിയങ്ങള്‍ കുതിച്ചുയരുന്നതിനാല്‍, എല്ലാ ഡ്രൈവര്‍മാരെയും പോക്കറ്റിടിക്കുന്ന ഒരു പകര്‍ച്ചവ്യാധിയുടെ പിടിയിലാണ് രാജ്യത്തെ കാര്‍ ഉടമകളെന്ന് വിദഗ്ധര്‍ മുന്നറിയിപ്പ് നല്‍കുന്നു.
കാര്‍ മോഷണങ്ങളുടെ വര്‍ദ്ധനവ് കാര്‍ ഇന്‍ഷുറന്‍സിന്റെ നിരക്കുകള്‍ കുതിച്ചുയരുകയാണ്. കഴിഞ്ഞ വര്‍ഷത്തെ 58 ശതമാനം വര്‍ദ്ധനയെത്തുടര്‍ന്ന് ശരാശരി ക്വോട്ട് ഇപ്പോള്‍ 995 പൗണ്ട് ആയി ഉയര്‍ന്നതായി വില താരതമ്യം സൈറ്റ് കണ്‍ഫ്യൂസ്ഡ്.കോമിന്റെ കണക്കുകള്‍ വ്യക്തമാക്കുന്നു.
ഡ്രൈവേഴ്സ് ഇന്‍സ്ട്രക്ടേഴ്സ് അസോസിയേഷന്‍ പറയുന്നതനുസരിച്ച്, കഴിഞ്ഞ വര്‍ഷം 130,000-ലധികം കാറുകള്‍ മോഷ്ടിക്കപ്പെട്ടതായി റിപ്പോര്‍ട്ടുണ്ട്, അതായത് മണിക്കൂറില്‍ 15 എന്ന നിരക്കില്‍! 2022-ല്‍ മോഷ്ടിക്കപ്പെട്ട 72,000 ന്റെ ഇരട്ടിയാണിത്.
കിഴക്കന്‍ യൂറോപ്പ് ആസ്ഥാനമാക്കി പ്രവര്‍ത്തിക്കുന്ന ക്രൈം ഗ്രൂപ്പുകള്‍ക്ക്, വിന്‍ഡോ തകര്‍ക്കുക, തീ കത്തിക്കുക തുടങ്ങിയ പരമ്പരാഗത മോഷണ തന്ത്രങ്ങള്‍ ഒന്നും പയറ്റാതെ തന്നെ നിമിഷങ്ങള്‍ക്കുള്ളില്‍ ഒരു കാര്‍ തട്ടിയെടുക്കാന്‍ കഴിയും. അവരുടെ രീതികള്‍ വളരെ സങ്കീര്‍ണ്ണമായിരിക്കുന്നതിനാല്‍ തന്നെ പോലീസിന് പലപ്പോഴും ഫോറന്‍സിക് തെളിവുകളും ലഭിക്കില്ല.
ക്രിമിനലുകള്‍ ഉപയോഗിക്കുന്ന ഏറ്റവും പുതിയ സാങ്കേതികവിദ്യ എന്നത് മോഷ്ടിച്ച വാഹനം എവിടേക്കാണ് കൊണ്ടുപോകുന്നതെന്ന് ഉടമകളെയും സുരക്ഷാ സ്ഥാപനങ്ങളെയും അറിയിക്കാനുള്ള ജിപിഎസ് സംവിധാനം ഡിസേബിള്‍ ചെയ്യുക എന്നതാണ്. കീ കോഡ്-ഗ്രാബിംഗ് കിറ്റുകള്‍ വഴി വിദൂരമായി ഇലക്ട്രോണിക് കീ ഫോബുകള്‍ ഹാക്ക് ചെയ്യാന്‍ മോഷണ സംഘങ്ങള്‍ക്ക് സാധിക്കും. നിരവധി ആഡംബര കാറുകളില്‍ ഉപയോഗിക്കുന്ന സ്മാര്‍ട്ട് കീ സിസ്റ്റങ്ങള്‍ ഹാക്ക് ചെയ്യാന്‍ റിലേ ആക്രമണ ഡിവൈസുകള്‍ അവരെ സഹായിക്കുന്നു. അതുവഴി അവര്‍ക്ക് വാഹനമോടിക്കുന്നതിന് മുമ്പ് ഡോറുകള്‍ അണ്‍ലോക്ക് ചെയ്യാനും എഞ്ചിന്‍ ഓണാക്കാനും കഴിയും.
കൂടാതെ 'CAN ഇഞ്ചക്ഷനുകള്‍ എന്നറിയപ്പെടുന്ന ഡാര്‍ക്ക് വെബില്‍ വാങ്ങാന്‍ കഴിയുന്ന ഏറ്റവും പുതിയ ഗാഡ്ജെറ്റ് വഴി, കീ ആവശ്യമില്ലാതെ തന്നെ ഒരു കാറിന്റെ സെന്‍ട്രല്‍ കണ്‍ട്രോള്‍ നെറ്റ്വര്‍ക്കിലേക്ക് ഹാക്ക് ചെയ്യാനുള്ള അവസരം കള്ളന്മാര്‍ക്ക് നല്‍കുന്നു.
മോഷ്ടിക്കാന്‍ ചുമതലപ്പെടുത്തിയിരിക്കുന്ന നിര്‍ദ്ദിഷ്ട കാര്‍ മോഡലുകള്‍ക്കായി തിരയാന്‍ സംഘങ്ങള്‍ ഡ്രോണുകള്‍ പോലും ഉപയോഗിക്കുന്നു എന്ന വിവരം ഞെട്ടിപ്പിക്കുന്നതാണ്. മോഷണങ്ങള്‍ നടത്തുമ്പോള്‍ കാണുന്നവരെ കബളിപ്പിക്കാന്‍ കുറ്റവാളികള്‍ ഹൈ-വിസ് ജാക്കറ്റുകള്‍ ധരിക്കുന്നതും പതിവാണ്.
കുറ്റവാളികള്‍ക്ക് ഇത് വളരെ ലാഭകരമായ ഒരു പണിയാണെന്ന് സുരക്ഷാ സ്ഥാപനമായ ട്രാക്കറിന്റെ പോലീസ് ലെയ്സന്‍ തലവനായ റിട്ടയേര്‍ഡ് ഡിറ്റക്റ്റീവ് ചീഫ് സൂപ്രണ്ട് ക്ലൈവ് വെയ്ന്‍ പറഞ്ഞു. ''കിഴക്കന്‍ യൂറോപ്പില്‍ ഞങ്ങള്‍ക്ക് ഇപ്പോള്‍ ഒരു പ്രത്യേക പ്രശ്നമുണ്ട്, കാരണം യൂറോപ്പിലും പ്രത്യേകിച്ച് യുകെയിലും മോഷണങ്ങള്‍ സംഘടിപ്പിക്കുന്ന ധാരാളം ക്രിമിനല്‍ സംഘങ്ങള്‍ അവിടെയുണ്ട്. അവര്‍ ക്ൃത്യത്തിനായി പ്രാദേശിക കുറ്റവാളികളെ ഉപയോഗിക്കും, അവര്‍ക്ക് പുറത്ത് പോകാനും ഒരു വാഹനം മോഷ്ടിക്കാനും താരതമ്യേന ചെറിയ തുക നല്‍കും. മോഷ്ടിച്ച വാഹനം ഒരു തുറമുഖത്തേക്ക് പോകും, തുടര്‍ന്ന് ഒരു ഷിപ്പിംഗ് കണ്ടെയ്നറില്‍ വിദേശത്തേക്ക് കയറ്റി അയയ്ക്കും.
അല്ലെങ്കില്‍ ഭാഗങ്ങളായി പൊട്ടിച്ച് ഇവിടെയോ വിദേശത്തോ വില്‍ക്കും. കഴിഞ്ഞ വര്‍ഷം, ഞങ്ങള്‍ കണ്ടെടുത്ത വാഹനങ്ങളില്‍ 93 ശതമാനവും താക്കോല്‍ ഇല്ലാതെ മോഷ്ടിക്കപ്പെട്ടവയാണ്. മാര്‍ച്ചില്‍, ഞങ്ങള്‍ കണ്ടെടുത്ത എല്ലാ വാഹനങ്ങളുടെയും 100 ശതമാനവും താക്കോല്‍ ഇല്ലാതെയാണ് എടുത്തത്.''അദ്ദേഹം പറഞ്ഞു.
50,000 പൗണ്ടിനും 120,000 പൗണ്ടിനും ഇടയില്‍ വിലമതിക്കുന്ന കാറുകളാണ് അല്‍ബേനിയന്‍ സംഘങ്ങള്‍ ലക്ഷ്യമിടുന്നതെന്ന് സറേയിലെ പോലീസും ക്രൈം കമ്മീഷണറുമായ ലിസ ടൗണ്‍സെന്‍ഡ് പറയുന്നു. ''കീലെസ് കാര്‍ മോഷണത്തില്‍ വന്‍ വര്‍ധനവ് ഞങ്ങള്‍ കണ്ടു. നിരവധി മോഷ്ടാക്കളെ അറസ്റ്റ് ചെയ്ത് ജയിലിലേക്ക് അയക്കുന്നതില്‍ ഞങ്ങള്‍ വളരെ വിജയിച്ചു. എന്നാല്‍ ഇത് ഒരു വെല്ലുവിളിയാണ്, ഇന്‍ഷുറന്‍സ് കമ്പനികള്‍ അവരുടെ നഷ്ടം നികത്താന്‍ ശ്രമിക്കുമ്പോള്‍ പ്രീമിയങ്ങള്‍ വര്‍ദ്ധിക്കുന്നതിലും ഇത് സ്വാധീനം ചെലുത്തുന്നു''. അവര്‍ പറഞ്ഞു.
ഗില്‍ഡ്ഫോര്‍ഡ് ക്രൗണ്‍ കോര്‍ട്ടില്‍ കഴിഞ്ഞ മാസം, 53 കാര്‍ മോഷണ കേസുകളിലായി പെറി ലവ്ജോയ്, 29, ലൂക്ക് ജാക്സണ്‍, 28, ബില്ലി ഹാരിസണ്‍, 30, ഹാരി സെയില്‍സ്, 28 എന്നീ പ്രതികളെ മൂന്നര വര്‍ഷം വീതമാണ് കോടതി ജയിലിലടച്ചത്.
ഉടമയുടെ വീടിനുള്ളില്‍ നിന്ന് ഒരു പ്രധാന സിഗ്‌നല്‍ ഹൈജാക്ക് ചെയ്ത ശേഷം ബാലക്ലാവ ധരിച്ച സംഘം ബെന്റ്‌ലിയുമായി ഒളിച്ചോടുന്നതിന്റെ ഞെട്ടിക്കുന്ന ദൃശ്യങ്ങളാണ് ഒരു കേസുമായി ബന്ധപ്പെട്ട് പോലീസ് പുറത്തുവിട്ടത്. രണ്ട് ഉപകരണങ്ങളാണ് സംഘം ഇതിനായി ഉപയോഗിച്ചത്. ഒന്ന് കാറിനടുത്തും മറ്റൊന്ന് വീടിനടുത്തും. ഇത് ഉപയോഗിച്ച് സിഗ്‌നല്‍ കണ്ടെത്തുകയും അത് പകര്‍ത്തുകയും കീ ഫോബിനും കാറിന്റെ ആന്തരിക കമ്പ്യൂട്ടറിനുമിടയില്‍ റിലേ ചെയ്യുകയും ചെയ്യുന്നു, ഇതിലൂടെ മോഷ്ടാക്കള്‍ക്ക് കാര്‍ അണ്‍ലോക്ക് ചെയ്യാനും ഓടിക്കാനും സാധിക്കും. എന്തായായും പുറത്തു വരുന്ന റിപ്പോര്‍ട്ടുകല്‍ സൂചിപ്പിക്കുന്നത് യുകെയിലെ കാര്‍ ഉടമകള്‍ക്ക് വരും നാളുകള്‍ ഉറക്കമില്ലാത്തത് ആയിരിക്കും എന്നു തന്നെയാണ്.
More Latest News
പീറ്റര്‍ബോറോ പള്ളിയില്‍ മോര്‍ ഗീവറുഗീസ് സഹദായുടെ ഓര്‍മ്മപ്പെരുന്നാള്‍ മെയ് 5 ഞായറാഴ്ച നടക്കും, ഫാ. രാജു ചെറുവിള്ളില്‍ കാര്‍മ്മികനാകും
സേവനം യുകെയുടെ ബര്‍മിങ്ങ്ഹാം യൂണിറ്റിന്റെ നേതൃത്വത്തില്‍ നടക്കുന്ന രണ്ടാമത് കുടുംബ സംഗമം, നാളെ യുകെയിലെ ശിവഗിരി ആശ്രമത്തില്‍ വെച്ച് നടക്കും
ഡീഗോ മറഡോണയുടെ മൃതദേഹം സ്വകാര്യ സെമിത്തേരിയില്‍ നിന്നു ശവക്കല്ലറയിലേക്ക് മാറ്റണം, ആവശ്യവുമായി മക്കള്‍ അര്‍ജന്റീന കോടതിയില്‍
'ആ വാക്ക് അങ്ങനെയല്ല പറയേണ്ടത്, ലാലേട്ടന്‍ പറയുന്നതിലും തെറ്റുണ്ട്, അങ്ങനെ ഒരു വാക്ക് ഡിക്ഷ്ണറിയില്‍ ഇല്ല' ആ വാക്കിനെ തിരുത്തി പറഞ്ഞ് രഞ്ജിനി ഹരിദാസ്
വാട്‌സ്ആപ്പിലൂടെ ആ പഴയ കള്ളകള്ളികള്‍ നടക്കില്ല, 'അക്കൗണ്ട് റിസ്ട്രിക്ഷന്‍' എന്ന ഫീച്ചറിലൂടെ ഉപയോക്താക്കള്‍ക്ക് തട്ടിപ്പ് അക്കൗണ്ടുകള്‍ റിപ്പോര്‍ട്ട് ചെയ്യാന്‍ സാധിക്കും
Most Read
British Pathram Recommends
