ചെന്നൈ വിമാനത്താവളത്തില് കസ്റ്റംസിന്റെ വിചിത്ര വേട്ട. വിമാനത്താവളത്തിലെത്തിയ പാഴ്സല് ബാഗ് പരിശോധിച്ച കസ്റ്റംസ് ഉദ്യോഗസ്ഥര് ഞെട്ടിപ്പോയി. കുരങ്ങ് മുതല് രാജവെമ്പാല വരെയായിരുന്നു ബാഗില് ഉണ്ടായിരുന്നത്. ചെന്നൈ രാജ്യാന്തര വിമാനത്താവളത്തിലാണ് സംഭവം. ബാങ്കോക്കില് നിന്നെത്തിയ തായ് എയര്വേയ്സ് വിമാനത്തിലുണ്ടായിരുന്ന പാഴ്സല് ബാഗിലാണ് നിരവധി ജീവികളെ കണ്ടെത്തിയത്.
പാഴ്സല് അനങ്ങുന്നത് കണ്ടപ്പോഴായിരുന്നു പരിശോധന. ആദ്യത്തെ പാക്കേജില്നിന്ന് പുറത്തുചാടിയത് ആഫ്രിക്കയില് മാത്രം കാണുന്ന ഡി ബ്രാസ കുരങ്ങ്. ചോക്ലേറ്റുകള് നിറച്ച പെട്ടിയിലാണ് കുരങ്ങിനെ അടച്ചിരുന്നത്.
അടുത്ത പെട്ടി തുറന്നപ്പോള് കണ്ടത് ചില്ലറക്കാരെയല്ല. 15 രാജവെമ്പാലകള്! മറ്റൊരു പെട്ടിയില് അഞ്ച് പെരുമ്പാമ്പുകള്. അവസാനത്തെ ബാഗില് അധികം വലുപ്പമില്ലാത്ത രണ്ട് അള്ഡാബ്ര ആമകള്. ജീവനുള്ള മൃഗങ്ങളെ ഇറക്കുമതി ചെയ്യുന്നത് ഇന്ത്യയില് നിയമവിരുദ്ധമായതിനാല് ഇവയെ ബാങ്കോക്കിലേക്ക് തിരിച്ചയച്ചു. ചെന്നൈയില് പാഴ്സല് സ്വീകരിക്കേണ്ടിയിരുന്ന ആളെക്കുറിച്ച് കസ്റ്റംസ് അന്വേഷണം തുടങ്ങി.