നിരോധിക്കപ്പെട്ട ഇസ്ലാമിക ഭീകര സംഘടന പോപ്പുലര് ഫ്രണ്ടിന് രഹസ്യ വിഭാഗമെന്ന് ദേശീയ അന്വേഷണ ഏജന്സി. കൊച്ചി എന്ഐഎ കോടതിയിലാണ് ഇത് സംബന്ധിച്ച റിപ്പോര്ട്ട് നല്കിയത്. ഇതര സമുദായത്തില് പെട്ടവരുടെ ഹിറ്റ്ലിസ്റ്റ് ഒരുക്കാനാണ് രഹസ്യവിഭാഗം പ്രവര്ത്തിച്ചതെന്നും പിഎഫ്ഐ ഓഫീസ് കേന്ദ്രീകരിച്ചായിരുന്നു ഇവരുടെ പ്രവര്ത്തനമെന്നും എന്ഐഎ കോടതിയെ അറിയിച്ചു.
റെയ്ഡില് പിടിച്ചെടുത്ത ഡിജിറ്റല് രേഖകളുടെ പരിശോധനയില് പിഎഫ്ഐ നേതാക്കളുടെ ഐഎസ് ബന്ധത്തിന് തെളിവുണ്ടെന്നും എന്ഐഎ അറിയിച്ചു. രാജ്യവ്യാപകമായി എന്. ഐ. എ നടത്തിയ റെയ്ഡില് കേരളത്തില് അറസ്റ്റിലായ കരമന അഷറഫ് മൗലവിയടക്കമുള്ള 14 പ്രതികളുടെ റിമാന്ഡ് നീട്ടണമെന്ന് കാട്ടിയുള്ള എന്ഐഎയുടെ ഹരജി ഇന്ന് കോടതി പരിഗണിച്ചിരുന്നു. ഈ അവസരത്തിലാണ് എന്ഐഎ വാദം ആവര്ത്തിച്ചത്. റിമാന്ഡ് 180 ദിവസത്തേക്ക് നീട്ടണമെന്ന ആവശ്യം കോടതി അംഗീകരിച്ചു.
ഒറ്റ ഫോണ് കോളില് സമുദായത്തെ നിയന്ത്രിക്കാന് കഴിവുള്ളവരാണ് പ്രതികള്. ഈ സ്വാധീനത്തില് പ്രതികള് ഈ വിഭാഗത്തെ സര്ക്കാരിന്റെ നയങ്ങളെയും നിയമപരമായ പ്രവര്ത്തനങ്ങളെയും പ്രതിരോധിക്കാന് രംഗത്തിറക്കിയിരുന്നു. സെപ്തംബര് 23ലെ ഹര്ത്താലില് സംസ്ഥാനവ്യാപകമായി അക്രമങ്ങള് അരങ്ങേറിയത് ഇതിന്റെ തെളിവാണെന്നും റിപ്പോര്ട്ടിലുണ്ട്. വിവരശേഖരണം നടത്തുന്നതും അത് നേതാക്കള്ക്ക് നല്കുന്നതും രഹസ്യ വിഭാഗത്തിലുള്ളവരാണെന്നാണ് എന്ഐഎ കോടതിയെ അറിയിച്ചിരിക്കുന്നത്.