എയര് ഇന്ത്യ വിമാനത്തില് സഹയാത്രികയ്ക്കു മേലെ മൂത്രമൊഴിച്ച സംഭവത്തില് പ്രതി ശങ്കര് മിശ്രയ്ക്കെതിരെ സഹയാത്രികന്റെ മൊഴി. ശങ്കര് മിശ്ര മദ്യലഹരിയിലായിരുന്നു എന്നാണ് ഒപ്പം യാത്ര ചെയ്ത ഡോക്ടര് മൊഴി നല്കിയത്. സഹയാത്രികയ്ക്കു മേലെ മൂത്രമൊഴിച്ചതിനു പിന്നാലെ സ്വബോധം വീണ്ടെടുത്ത ശങ്കര് മിശ്ര ബ്രോ ഞാന് പ്രശ്നത്തിലാണെന്ന് തോന്നുന്നു എന്നു പറഞ്ഞതായും നാല് ഗ്ലാസ് മദ്യം മിശ്ര കഴിച്ചെന്നും ഡോക്ടര് പറയുന്നു.
അതേസമയം, എയര് ഇന്ത്യയിലെ എട്ട് ജീവനക്കാരുടെ മൊഴി ഇന്നെടുക്കും. വിമാനക്കമ്പനി അതിക്രമത്തിന്റെ വിവരങ്ങള് ഡിജിസിഎക്ക് കൈമാറിയിരുന്നില്ലെന്നും റിപ്പോര്ട്ടില് പറയുന്നു.വിമാനത്തില് വച്ച് മുതിര്ന്ന പൗരയോട് മോശമായി പെരുമാറിയ കേസില് ശങ്കര് മിശ്രയെ കമ്പനി പുറത്താക്കി. യുഎസ് ആസ്ഥാനമായി പ്രവര്ത്തിക്കുന്ന കമ്പനിയുടെ ഇന്ത്യയിലെ വൈസ് പ്രസിഡന്റാണ് ശങ്കര് മിശ്ര. എയര് ഇന്ത്യ വിമാനത്തിലെ സംഭവം വ്യോമയാന മേഖലക്ക് തന്നെ അപമാനമായെന്ന് ചൂണ്ടിക്കാട്ടിയാണ് കര്ശന നപടികള്ക്ക് മന്ത്രാലയം നിര്ദ്ദേശം നല്കിയത്.
അതേസമംയം, വിമാനത്തിനുള്ളില് യാത്രക്കാര് മോശമായി പെരുമാറി പ്രശ്നമുണ്ടാക്കിയാല് സാഹചര്യം നിയന്ത്രിക്കുന്നതിനു വിമാനക്കമ്പനികള്ക്ക് മാര്ഗനിര്ദേശം നല്കി ഡയറക്ടറേറ്റ് ജനറല് ഓഫ് സിവില് ഏവിയേഷന്.
മോശമായി പെരുമാറുന്നവര്ക്കെതിരെ കര്ശന നടപടിയെടുക്കണമെന്ന് വ്യോമയാന മന്ത്രാലയം നിര്ദ്ദേശിച്ചു. വിമാനം ലാന്ഡ് ചെയ്യുന്ന ഉടന് കേസെടുക്കാനുള്ള നടപടികള് സ്വീകരിക്കണം. സംഭവങ്ങള് കൃത്യമായി റിപ്പോര്ട്ട് ചെയ്ത് നടപടിയുണ്ടായില്ലെങ്കില് പൈലറ്റ് ഇന് കമാന്ഡ് അടക്കമുള്ളവര്ക്കെതിരെ കര്ശന നടപടി വേണമെന്നും വ്യോമയാനമന്ത്രാലയം നിര്ദ്ദേശിച്ചു. വിമാനക്കമ്പനികള് നിര്ദേശങ്ങള് കൃത്യമായി പാലിച്ചില്ലെങ്കില് കര്ശന നടപടിയുണ്ടാകുമെന്നും ഡിജിസിഎ മുന്നറിയിപ്പ് നല്കി.